Uma Wou Ver Ishigh Han Jimi?

• Ior kpishi tume ityough nôngon a uhambe hambe mba uma mba sha ayange ayange ne, je yô mba fe gbidyen kwar henen vegher u uma ve a ver ishigh jim la ga.

• Bibilo pase se ér akaa a kpilighyol nga van ken hemen. Shi i ta se icin kpaa ér mbamgem mba vesen vea va ken mbamzough mba uumace ve ver la tar sha won cii. Aluer ka u se zua a mtsera ken kwagh u i er ne, shi se palegh kwaghtseren kpaa yô, saa se er kwagh sha kwagh ne fese, se kera timbir a timbir ga.

• Ior mbagenev fa kwagh u Bibilo i er la, shi ka ve nôngo je ér vea dondo kwagh shon u i er la, kpa akaa a nyian ishima a uma ne a dan ve, nahan ve kera fatyô u veren ishima eren kwagh u ve we ishima ér vea er la ga.

• Ape uma wou a ver ishigh yemen la doo ú kpa? Ka wea wa ago wer ú er ma kwagh nahan, ú shi gbidi kwar ú nengen er kwagh la una bende a akaa a ú we ishima wer ken hemen ú va er ken uma wou la kpa?

[Ngeren u kiriki/​Foto u sha peeji 9 la]

Kanyi I̱ Hembe Gban We Kwaghaa?

Kanyi kwagh heen ú hen wer i hemba gban kwagh ciilii? Nger á cii sha adondo adondo.

Akaa ne kpishi nga a inja ken uma u or, kpa, aluer í kaa a kaa ér u̱ tsua yô, kanyi ú vande tsuan hiihii? Kanyi ia dondo, shi kanyi igen ia cir sha mi, zan zan á lu nyi ia za masee?

․․․ Gurgur u eren man iemberyolough i keren

․․․ Tom wam u sha tôndo la

․․․ Gbong gbong u iyolough wam

․․․ Msaanyol wam

․․․ Or u ḿ vese la

․․․ Mbamaren av

․․․ Ônov av

․․․ Ya u injaa man akondo a injaa

․․․ U duen ityough sha nyityô kwagh i ḿ lu eren cii

․․․ U civir Aôndo

 [Ngeren u kiriki u a lu sha peeji 10, 11 la]

Sha Mimi yô Akaa A Ú We Ave Ú Lu Eren la Nga Zan a We Ape I Sar Ú u Zan la Kpa?

TIME ASE SHA MBAMPIN MBAN

GURGUR MAN IEMBERYOLOUGH: Iemberyolough i ḿ eren la ngi ne ka samben mo a sambe iyol kpa? Ngi ságher mo iyol sha gbenda u ua nam a na angev shin ua sombon jim je kpaa shinii? Ka ma “msaanyol” u una na a sagher mo iyol anshighe kpuaa kpa una gema a nam ityough ki nanden gbem shinii? Aluer gurgur u ḿ lu eren la ka u vough je kpa, ḿ ngu shin her gbem je, gema ngu yangen mo u eren akaa agen a á hembe lun a inja yôô?

TOM WAM U SHA TÔNDO LA: Ngú suen mo a sue shin ú gemam m hingir a hingir kpan u ú asee? Ka i gba u me shile tom wam je a tumem iyol, je yô hingir u alaghga me va zua a zua a angev je kpaa shinii? Me hemba soon u shin sha tom karen shighe u kurun la inya shinii, a hemba saren mo u lun vea or u m vese la shin mbayev ava? Aluer orvesen wam sha tom kaa ér m̱ er kwagh u a ze imoshima yam iyol shin m̱ er kwagh u ka a zer yangen mo u eren akaa a ken jijingi nahan, me za hemen me er imba tom la her sha u i de deen mo tom ga shinii?

GBONG GBONG U IYOLOUGH WAM: Kwagh gbem sha iyol yam ga kuaa shinii, shin ḿ we ikyo sha er me vihi iyol ga asee? Kwaghôron wam cii hembe haren sha mkpeyol wamaa? Ḿ eren a iyol yam sha gbenda u tesen ér kwagh u tsombor wam gbam ishima kpa?

MSAANYOL WAM: Ka kwagh u a hembe gbam mo ishima laa? Ḿ vanden veren kwagh ne ken hemen, kpa msaanyol u or u m vese la shin u tsombor wam yô, ḿ gem ḿ pahar ḿ gbihin ken ijime shinii? Gbenda u m keren msaanyol wam la ngu tesen ér m ngu or u civir Aôndo u a lu u mimi la kpa?

OR U Ḿ VESE LA: Ka shighe u ishima i doom ker la tseegh m tee or u m vese la mer ka ikyarem yee? Ḿ we or u m vese la ikyo sha inja i a kuma icivir kpa? Ḿ eren kwagh a or u m vese la sha gbenda u tesen ér m na Aôndo jighjigh kpa?

MBAMAREN AV: Aluer m ngu a̱ hia m wa ikyondo ga yô, ḿ ongo mbamaren av kpa—ḿ er kwagh a ve sha icivir kpa, shi ḿ eren ityom i ve nem ér m̱ er la kpa, ḿ ze mape ḿ hidi shighe u ve kaa ér m̱ hide kpee la kpa, shi ḿ palegh ujende mba ve tem icin ér m̱ palegh la, kua akaa a ve kaa ér m̱ palegh la kpa? Aluer m wa ikyondo kera cii yô, ḿ keghen ato a mbamaren av sha icivir, shi ḿ ne ve iwasen shighe u i gbe u me wase ve la kpa? Ḿ eren kwagh a ve mer gbam doo yum, shin ḿ dondon kwagh u Mkaanem ma Aôndo ma kaa laa?

ÔNOV AV: Ḿ tôô mer ka mo me tese ônov av aeren a dedoo shinii, ḿ ver ishima mer i tese ve akaa ne ken makeranta? Ḿ tem imôngo vea mbayev av kpa, shin ḿ hembe undun ve a mbaanar mba numben a mi kua televishen, shin ḿ gbihin ve mer ve̱ gbaa numben a akaa sha kômputa tsô? Ḿ tsahan mbayev av hanma shighe u ve kera dondo atindi a Aôndo ga kpa, shin saa shighe u ve er kwagh u vihin mo tseeghle?

YA U INJAA MAN AKONDO A INJAA: Kanyi i ne ve m woho iyol er m woho la shi m ombon akaa a m lu a mi laa—ka sha u me nôngo mba wan ndor a mo ve̱ nenge er ḿ gbe kpam shinii? shin ḿ eren nahan sha u me wa tsombor wam ikyo? shin ḿ eren kwagh ier i me tese mer ḿ ngu civir Aôndo?

U DUEN ITYOUGH SHA NYITYÔ KWAGH I M LU EREN CII: Ḿ nengen mer ka a inja u me eren hanma kwagh cii sha inja kpa? Ḿ keren mer saa me hemba keng shinii? Orgen ka nana̱ er kwagh a̱ hemba doon a mo nahan, ishima ka i vihim ker shinii?

U CIVIR AÔNDO: Hemba gban mo ishima u Aôndo a̱ lumun a mo shin ka u or u m vese la nana̱ lumun a mo í hembe hangen mo, shin ka u mbayev av ve lumun a mo laa, shin mbamaren ava, shin ka or u nan teem tom la ḿ hembe keren mlumun u nana? Me pahar mciviraôndo wam me gbihi ken ijime sha u seer keren mkunduyoloo?

 GBIDYE KWAR SHA KWAGHWAN U BIBILO I̱ WE NE DOO DOO

Mciviraôndo ngu ú a inja nan je?

Orpasenkwagh 12:13: “Cia Aôndo, waan atindi Na iko; gadia ngun ka kwagh u ior cii ma ve er je ne.”

PINE IYOL YOU WER: Uma wam tese ér m ngu dondon kwagh u ivur ne i er ne kpa? Ḿ eren ityom hen ya shin sha ijiir tom shin sha makeranta sha er me nôngo me dondo kwagh u tindi u Aôndo a kaa la, me kar kpe ga kpa? Shin ka ḿ de mer saa me kure akaa agenegh a á gbem ishima kua ukpete kpete mbagenev mba m tagher a mi cii ian a due ve, me civir Aôndo?

Mlu wou vea Aôndo ngu nena?

Anzaakaa 3:5, 6: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.”

Mateu 4:10: “Civir Ter, Aôndo wou, ka Un tseegh er Un tom ye.”

PINE IYOL YOU WER: Kape mo kpa kwagh u Aôndo a lum ken ishima laa? Akaa a m eren ayange ayange la, kua gbenda u anzughul ka aa va ve m sôr la tese ér m ngu suur sha Aôndo shi civir un kpa?

Bibilo i ôron shi henen gba ú kwagh nan je?

Yohane 17:3: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”

PINE IYOL YOU WER: Shighe u ḿ tem ḿ er Mkaanem ma Aôndo shi m timen sha ma zulee la tese ér mimi je m na mkaanem ma ken ivur ne jighjigh kpa?

Mbamkombo mba zan ken tiônnongo u Kristu gba ú kwagh nan je?

Mbaheberu 10:24, 25: “Sé wa nen ayol a ase iko, sé taver nen ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav [ga], . . . seer eren nahan er ne nenge iyange la i lu mgbôghom yô.”

Pasalmi 122:1: “M ember zum u i kaa a mo er: Sé za nen hen iyou i TER yô.”

PINE IYOL YOU WER: Uma wam tese ér m ngu a iwuese sha gbenda u Aôndo a tesen se ken Mkaanem nam ne kpa? Mase zan yange m de mer ma kwagh gen a̱ kar a̱ yam shighe, tsô m bunde ma mkombo u Mbakristu ken uwer ú ú kar la shinii?

Ú er mbagenev kwagh u Aôndo man awashima na sha gbashima kpa?

Mateu 24:14: “Loho u Dedoo u tartor ne yô, á ôr u á tser tar, sha u u̱ lu mpase . . . ; ka zum la man mkur una kuma ye.”

Mateu 28:19, 20: “Nahan yô, za nen, za gema nen akuraior cii a̱ hingir mbahenen, . . . tesen nen ve u kuran akaa a M we ne kwagh sha mi cii.”

Pasalmi 96:2: “Wa TER icam, wuese iti Na, pase kwagh u myom Na ayange ayange.”

PINE IYOL YOU WER: Sha mimi yô m kôr tom ne ave ahar er i gbe u ma m ker ú la kpa? Ci u m lu a mi ken tom shon ne tese gbar gbar ér m fa mer shighe u se lu ker ne ka shighe u numben ga kpa?