“Ve Fa Ga”

ALUER kwa ne kwa ne ka a̱ ta icin je, ú hure kera wer ka ma kwagh ga yô, yange sev a av aahe una tser ú.

Ken inyom i 1974 la, ior mba ken gar u Darwin, ken tar u Australia ve lu kohol iyol i ember memyol zan a mi ave, maa i gba yôôn angwe gbungur gbungur, tan icin ér zege ijeverahumbe u bo ngu van. Cii man shighe ne yô, ijeverahumbe lu a̱ kera ta sha gar u Darwin a vihi un ga je war kuman er anyom 30 nahan. Tsô kwa ne di yô a lu nena o? Ior mba ken gar la kpishi tôô ér kwagh u bo una er kpee ga, zan zan ahumbe va, gba bughun haav sha ayou kera, yôhôr ayou a ior ta ijuku lu ker la. Kper nan sev mbu aven yô, gar la cii vihi vindi vindi, hingir ice.

Ken uwer u Novemba ken inyom i 1985 la, uwo ugen bughur ken tar u Kolombia. Senou man ako a mnger sough, nungwa sha amgbiôr sen va cir ior mba ken gar u Armero u lu ikyua la, ii ior shin inya je hemba iorov 20,000. Yange í ta icin faa ga shinii? Uwo la vande hiin u tenger kuma iwer imôngo. Kpa, er ior mba ken gar u Armero vande lun hen ijiir i uwo usan haan amgbiôr sha tar hoghor ve yô, ve wa ikyo ga. I vande ôron mbatomov mba gomoti tsuaa ér aahe sôôn van, kpa ve er ma kwagh môm u tan ior icin ga. Í de í yôô akaa sha redio sha u pasen ior ér ishima i de ze ve iyol ga. Í shi í yôô sha kwagh u samber a mkaanem ken côôci la kpaa, í taver ior asema ér ishima i de te ve kwe ga, kwagh á er ga. Iyange been yô, uwo la bughur taver taver kuma kwa har nahan. Yange wea lu her nahan, yange ma ú undu akaa ou ma ú yevese kpa? Lu ior kpuaa tseegh ve nôngo ér vea yevese ye, mbagenev kpishi de zan zan tso kuwa kar ihongo.

Ashighe kpishi mba ve keren u fan tsegh ku mbayiase sha u timen fan kwagh u á lu ken awen la, ka ve fatyô u tsengan pasen ijiir í tar ua tenger jighilii yô. Kpa u tsengan pasen shighe jighilii u tar ua tenger yô, ka i taver ve. Ken inyom i 1999 la, tar tenger wua ior tar sha won cii kuma iorov 20,000. Ken atô u ior mba yange ve kpe mbara, kpishi yange ve hen ér mayange imba kwagh la ia er ve ga.

Ka A̱ Lu Aôndo Iyol Na Je Una Ta Icin Nahan, Ka Ú Er Nena?

Tsuaa je Bibilo vande pasen akaa a aa er tseer tseer sha u tesen ér ayange angan ka a masejime la vighe vighe. i pase kwagh u ayange shon i kaa ér se̱ gbidye kwar se̱ nenge kwagh u yange er sha “ayange a Noa” la. “Sha ayange a mngerem ma  deemee lu a va ga la,” ior tume ityough eren akaa a ve vanden eren kera keke var ve la, nahan kpa ishima yô i nyian ve sha ipila i i dumbur sha shighe ve yum la je. Kpa gema hide sha icintan i Aôndo lu tan sha ikyev i wanakiriki na Noa la yô, “ve fa ga zan zan mngerem ma deemee va, va kuwa a ve cii.” (Mateu 24:37-39) Luun er yange wea lu her nahan, ma ú ungwa icintan la kpa? Hegen yô ú ngu ungwan í kpa?

Yange wea lu ken gar u Sodom sha ayange a Loti, wan u anngô u Aberaham la di ye? Sodom lu ikyua a Zegemnger u Kuugh. Utsa mba ve kase gar la ve wa atô cii ve doo kpishi, lu er ka paradiso nahan. Shi inyaregh kpa ngee ken gar la. Kwagh je kpa za ior mba ken gar la iyol ga, ve lu kwagh ve kera beelee je. Sha ayange a Loti la yô, “ve lu yan akaa, man akaa, yamen ukasua, lôôn akaa, maan uya.” Dang ngee hen ijiir í ve lu la je kar ihongo. Yange wea lu hen ijiir la nahan, ma ú ungwa icintan i Loti, er a lu yôôn ikyenge ikyenge ér aeren ve la ka a bo nahan kpa? Yange una kaa ú ér Aôndo wa ishima u timin gar u Sodom la nahan, ma ú shi ungwa kpa? Shin we kpa yange ma ú tôô wer ngu eren a er asenge, di er ônov nav mba kemev kpa ve hen la nahana? Mase zan yange ma ú kôr gbenda yevese, kpa ma ú za tile ma ú gema ashe ijime, er kwase u Loti er nahan asee? Er icintan la gba mbagenev kwagh ga nahan kpa, sha iyange i Loti due ken Sodom la yô, “usu man sulfur due sha, haa shin inya, i tim ve cii.”—Luka 17:28, 29.

Kape ior kpishi sha shighe wase ne kpa ve fe ga je la. Kpa í nger akav ne nga ken Mkaanem ma Aôndo sha u tan se icin, shi taver se ishima kpaa ér se̱ lu tsevaa, se̱ KURAN!

[Ngeren u kiriki/​Foto u sha peeji 22]

Mimi Je Yange Mngerem ma Deemee Va Tser Tar Ciilii?

Mbanyimanakaa kpishi tuna ér Ei, kwagh lu nahan ga. Kpa Bibilo gema lumun ér Een, kape yange kwagh lu je la.

Yesu Kristu iyol na kpa ôr kwagh ter ma, shi un lu uma nenge shighe u ma va la sha ashe na, gadia lu shaala lu nengen.

[Ngeren u kiriki/​Foto u sha peeji 23]

Yange Í Tìm Gar u Sodom man Gomora Mimii?

Mbadughun akaa shin inya er shiada ér kwagh yange lu nahan.

Mbatimen sha akaa a mbayiase kpa ôr kwagh ter mtim u agar la.

Yesu Kristu kpa shi taver mimi u kwagh la, shi í nger kwagh shon u yange er la ken ityakerada i Bibilo igen 14.