TSOMBOR ka mzough u or-uma u hemban tsan cii u̱ í fe sha tar yô, kpa nyian yô ngú ken mzeiyol. Msamber u m̱-me u agumaior a me icimbiv sha tindi ga la kua dang u eren, kwaghtseren u ainge u ivaapaven man ipila i hen tsombor, mseer u iyenge i icombor í lun a ormaren môm i gbe vesen iúú la, kua mbamzeiyol mbavesen mbagenev na yô ka lanen mbagenev ishima ér uma u hen tsombor una war je o.

Tsombor shi ua kôr cio u lun ikyasen i̱ lun dông, nán ityesen hen mba ve lú ken ú kpa? Een, aluer mba hen tsombor ve fa kwaghmyer u msaanyol hen tsombor jim yô. Kwaghmyer ne ngu myer ga. Í vande yaren tom a mi shi í kàr un kwa imôngo imôngo, ken atô u uderimbaanyomov mbà ve kar la. Kanyi jimi? Takerada ne, Kwaghmyer u Msaanyol hen Tsombor, na ­ikyar. Shi ú na akav á tesen sha er “kwaghmyer” ne una wase u sôrón akaa a taver tsung a hen tsombor yô. Mà or ngu nyian u̱ kwagh a gbe nan sha imba kwaghwan ne ga yôô?