1. Ka sha ci u nyi u nengen sha ya a fatyô u lun kwagh u taver nyiana?

“MLUASHE u tar ne ngu karen kera.” (1 Mbakorinte 7:31) Mkaanem mara yange i nger ken anyom 1,900 a karen la, man ma due mimi nyian tsô! Akaa nga geman, hemban je yô sha uma u hen tsombor. Kwagh u yange i nenge er ka ieren i igbetar shin ka ieren i ityô ken anyom 40 shin 50 a karen la ashighe kpishi mba vende nyian. Sha ci u kwagh ne yô, u nengen sha tsombor sha gbenda u vough la ka a va a mbamtaver mba vesen. Nahan kpa, aluer i dondo kwaghwan u ken Icighanruamabera yô, ú fatyô u hemban mbamtaver mbara.

2. Ka mbamlu mba inyar mba nyi ka ve va a mtaver ken tsomboro?

² Nyian ior kpishi ka kera kom ve a uma u heghema, u hen tsombor la ga. Er tar u kpenga u lu varen akaa seer a seer shi u lu yaren tom a kwaghfan ve u yôôn angwe u kpenga la sha u meen ior yô, uter man ungô umiliôn ka ve shi sha ityom mbaahwa kpishi sha u vea fatyô u yamen akaa ne yô. Umiliôn mbagen kpishi ka ve tagher ishigh a iniôngon i ma ve pende kwaghyan sha tebul la. Ka i gba u vea vihi shighe sha tom a hemba er ngise ve eren la ica je, alaghga yô ve eren ityom ihiar je kpaa, sha u vea kure mbamgbe mba ve lu hange hange la tseegh tsô. Nahan kpa mbagen di yô a saan ve iyol u ma ve zough aa tom u eren yô, sha ci u m-ban u tom ka  mzeiyol u a samber wuee yô. Een, uma fe lun heghema her tsombor u ainge ne ga, kpa atindi a Bibilo aa fatyô u wasen icombor u nôngon a atsan tsung.

3. Ka kwaghwan u nyi apostoli Paulu yange pase, man ka nena u yaren tom a mi una wase or u nengen sha tsombor dedolo?

³ Apostoli Paulu yange zua a mbamzeiyol sha kwagh u inyar. Sha u nôngon a ve yô, yange zua a ityesen i dedoo, i a pase ken washika na u a nger hen huror na Timoteu la. Paulu nger er: “Se nyôr ken tar ne a ma kwagh môm ga, u duen yemen a kwagh kpaa se fatyô ga. Kpa aluer sea lu a kwaghyan man akondo yô, i̱ kuma se.” (1 Timoteu 6:7, 8) Ka mimi, mgbe u tsombor hemba di kwaghyan man akondo tseegh la. Shi gba u ua lu a ijiir i lun her kpaa. Gba u mbayev vea zua a kwaghhenen. Shi gba u a kimbin injar i iyouci kua inyaregh sha akaa agenegh kpaa. Nahan cii kpaa, kwaghwan u ken mkaanem ma Paulu la ngu vough. Aluer u zuan a akaa a kuren mbamgbe la kuma se man se undu asaren kera yô, uma una hemba lun se zange.

4, 5. Ka nena kwar u gbidyen ken ishima man ago a wan sha ci u ken hemen vea wase ken mser u ya?

⁴ Kwaghwan ugen u una wase ngu ken injakwagh i Yesu igen. Yange kaa er: “Ka anti ken a ven a lu nan ka maan gôgôyou u taven sha, nana kera tema nana vande ôron inyaregh ki maan a mi la ga, sha u nana fa shin nan ngu a kwagh u nana kure i a min kpaou?” (Luka 14:28) Heen ne Yesu ngu ôron kwagh u kwar u gbidyen ken ishima, ago a wan sha ci u ken hemen. Se vande nengen ken ityough ki ken ijime la er kwagh ne ka a wase zum u agumaior ka a lu a awashima u eren ivese yô. Man shi ka vea er ivese kera kpaa, shi ka a wase sha u nengen sha ya. Kwar gbidyen sha imba gbenda ne kua inyaregh ki koson, ago a wan iyol ken hemen sha er a vihi inyaregh ki ki lu la sha gbenda u kwaghfan yô. Sha u eren nahan la tsombor ua fatyô u panden inya regh vev ki vihin, vea veren inyaregh ki vea vihin sha akaa a hange hange sha hanma sev shin hanma sati yô, man vea kera er a hemba kwagh u ve lu a mi ave la ga.

⁵ Ken ityar igen yô, imba inyaregh ki koson nahan la alaghga a gba u a hendan a isharen i gban anzô a a kimbi zege liba shami sha u a yam akaa a mayange a lu hange hange ga yô. Ken igen di yô, alaghga a gba u a kôr iyol tsaha sha er a yar tom a kati u yamen akaa a mi la. (Anzaakaa 22:7) Alaghga shi a gba u a kôr iyol tsaha sha kwagh u gban yamen tsô er i nenge a mi la—u gban yamen kwagh kpoo tsô a u timen sha mbamgbe shin kwagh u una due ker kpaa ga la. U seer yô, inyaregh ki koson nahan la kia na a due ken igbar je er u vihin inyaregh sha ifer sha u haan do, ityu i man, kua msôrom ma man kpoghuloo la ma vihin mlu u inyar u tsombor, shi ieren la ngi kposo a atindi a Bibilo kpaa.—Anzaakaa 23:20, 21, 29-35; Mbaromanu 6:19; Mbaefese 5:3-5.

6. Ka mimi mba nyi ken Icighanruamabera ka ve wase mba i gbe u vea lu ken ibanave laa?

⁶ Nahan kpa, mba i hembe ve ve lu ken ibanave la di ye? Kwagh môm u a lu yô, ishima a fatyô u surun ve u fan er mzeiyol u a tser tar ne una za hemen anshighe kpeghee tsô. Ken tar u he u u lu van iuu la, Yehova una kar a ibanave man akaabo agen aa ve uumace a iyugh la cii kera. (Pasalmi 72:1, 12-16) Hegen yô, Mbakristu mba mimi, shin aluer mba ken ibanave tsung je kpaa, ishima yen ve elegh elegh ga, sha ci u mba a jighjigh u nan ken ityendezwa i Yehova la er: “Mayange Me undu u ga, Me kende u kpaa ga.” Sha nahan yô, or u nan jighjigh nana fatyô u ôron a vangertiôr er: “[Yehova] ka Orwasen mo, me kera cia ga.” (Mbaheberu 13:5, 6) Ken ayange a taver ne, Yehova suen mba civir un sha igbenda kpishi zum u ka vea dondo atindi a na shi vea ver Tartor na hiihii ken uma ve yô. (Mateu 6:33) Ikpela  ken ave vea fatyô u pasen, vea ôr, ken mkaanem ma apostoli Paulu er: “Hanma gbenda cii man ken hanma kwagh cii kpaa, i nyôr a mo ker, m fa ci ca cii, u yan kwagh kuman mo man shi u lun ijen kpaa, u ngeen a kwagh wuee man shi u banen a kwagh kpaa. M ngu a agee a eren akaa cii je ken Un u A taver mo ne.”—Mbafilipi 4:12, 13.

7. Ka mkaanem ma Yesu ma nyi, aluer i yar tom a ma yô, maa wase u nengen sha ya dedolo?

⁷ Ikua a mkur u tom na shin tar la, Yesu kaa er: “Or u nan we ndor a we yô, nana̱ doo u ishima er we iyol you  nahan.” (Mateu 22:39) U yaren tom a kwaghwan ne ken tsombor ka a wase tsung sha mnenge u nengen sha ya. Kera je kpa, ka unô ve lu mba wan ndor a vese mba ve hembe lun ikua, ve hembe doon se ishima aluer ka mba ve lu tsombor môm a vese la ga yô—noov man kasev, mbamaren man ônovo? Ka nena mba ken tsombor vea tese dooshima hen ayolave?

8. Ka nena a fatyô u tesen dooshima ken tsomboro?

⁸ Gbenda môm yô ka u hanma or hen tsombor nana̱ er tom u u lu sha ci u nan hen ya la. Nahan, gba u a tese ônov u sôron akaa veren vough zum u ve yar tom a mi ve bee kera yô, shin akaa ne a̱ lu akondo shin mbaanar mba numben a mi kpaa. Alaghga a tôô shighe kua iniôngon sha u sôron gambe hanma pepe, kpa ka zege iwasen sha mser u ya. Ka mimi, a fatyô u yangen ankaam ma côugh côugh, ma ka i tsenda wuee anshighe kpeghee la ga, kpa ve cii vea fatyô u veren ya tsembelee, shi vea kilen ikyav zum u a̱ bee kwaghyan kpaa. Hwev, ishoon i iyolough, man jijingi u gban lun zunguluu, hiden jime la una fatyô u tsaren hanma or. (Anzaakaa 26:14-16) Sha gbenda ugen yô, jijingi u sar sar, u soon u eren kwagh la ka a kpe tsombor iyol. “Ka or u nan ne kwagh sar sar la je nan doo Aôndo ishima ye.”—2 Mbakorinte 9:7.

9, 10. (a) Ka ikyav mbi nyi ashighe kpishi ka mbi lu sha kwase ya, man ka nena a fatyô u heghem mbi? (b) Ka mnenge u vough sha tom u hen ya u nyi i kaa er ma i nenge shami?

⁹ Iko i wan man dooshima una wase u yangen kwagh u a lu mzeiyol u vesen hen uya mbagenev la. Sha igbetar yô ka ungô ve ser ya jim ye. Ka ve nenge sha mbayev, ve sôr ya, ve kire akôndo her ya, shi ve yam akaa ve er kwaghyan. Ken ityar igen yô, kasev ka ve er tom ken atev, ve tee akaa ken kasua, shin ve va a inyaregh her ya sha igbenda igenegh. Ken ajiir a ngise kwagh lu nahan ga je kpaa, mgbe na yô kasev umiliôn imôngo ker ityom ken won u ya. Kwase ya man ngô u nan eren tom ken  avegher kposo kposo ne nan kuma iwuese. Vough er kwagh u “kwase u injaa” u i ôr ken Bibilo la nahan, ayange a nan iv aa tom u eren. “Ye kwaghyan u oruhwe ga.” (Anzaakaa 31:10, 27) Nahan kpa, ngun ka u kaan er ka kwase tseegh nana er tom hen ya ga. Zum u nom man kwase ve er tom ken won u ya iyange jimin yô, doo u kwase nana er tom u hen ya cii nan tswen kpa nom kua mbagenev hen tsombor yô vea lu mememne? Mimi je dooga. (Kar 2 Mbakorinte 8:13, 14.) Nahan, u tesen ikyav yô, aluer ngô nan ngu yôron iwer yô, a doo nan kpishi aluer mbagenev hen tsombor ve wa uwegh sha u sôron tebul, ve za yam akaa ken kasua, shin ve sôr akaa agenegh hen ya yô. Een, hanma or nana fatyô u lun a uwegh ken tom u eren.—Kar Mbagalatia 6:2.

¹⁰ Mbagenev vea kaa er: “Hen ijiir i m lu la ka tom u nomsoor u eren ambaakaa la ga.” Alaghga a lu mimi nahan, kpa a doo u shi sôron timen sha kwagh ne gaa? Zum u Yehova Aôndo hii veren tsombor la, yange wa tindi er ma tom u lu sha ci u kasev tseegh ga. Kwa ugen, zum u mbatyomov mbavesen mba hen Yehova va orjighjigh Aberaham inya yô, un iyolna yange nyôr iyol ken iwer yôron man mne u nan mbavannya mbara kwaghyan. (Genese 18:1-8) Bibilo wa kwagh er: “Noov kpaa, kasev vev ve̱ doo ve ishima keng er ayol a ve nahan la.” (Mbaefese 5:28) Aluer, ken mkur u sev, nom vôr man soo u memen yô, ka u a hen er kwase kpaa ka nan nahan, alaghga je yô nan hemba vôron ga he? (1 Peteru 3:7) Tsô, a lu vough shi a lu ieren i sha dooshima u nom nana wase hen ya gaa?—Mbafilipi 2:3, 4.

11. Ka sha nyi gbenda Yesu yange ver ikyav i dedoo sha ci u hanmaor hen ya?

¹¹ Yesu ka ikyav i hemban cii i or u yange nan er sha ishima i Aôndo shi nan va a msaanyol hen ahur a nan yô. Shin er yange er kwase ga nahan kpaa, Yesu ngu ikyav i dedoo hen noov, kua kasev man ônov kpaa. Un  iyolna yange kaa er: ‘Wan u or kpaa va, ka sha u i̱ er Un tom ga, kpa sha u Un Una er mbagenev tom,’ inja na yô, una er tom sha ci u mbagenev. (Mateu 20:28) A kpe icombor i hanma ve nan lu a imba ieren la iyol tsô!

12. Kanyi Yehova a soo er mba civir un ma ve ere?

¹² Tindi u Bibilo ugen u una wase ken mser u ya yô a zua a mi ken 2 Mbakorinte 7:1. Hen ijiir la i ôr er: “Se wanger nen ayol a ase sha hanma kwagh u hôngorough u ken iyol kua ken jijingi cii.” Mba ve ongo icighan mkaanem man yô Yehova ngohol ve, un u a soo “mcieaôndo u wang u a lu a acôghor iyol” shio la. (Yakobu 1:27) Man ya ve ka a zua a mbamtsera mba ka ve va la.

13. Er nan mlu u waeng a lu kpee ken mnenge u sha ya?

¹³ Ikyav i tesen yô, Bibilo taver se asema er iyange ngi van i angev mbu a kera lu ga man or kpaa nana kera gba angev ga yô. Hen shighe la, “ma or u nan tem ker kpaa nana kera kaa er: Kwagh nyoon mo, ga.” (Yesaia  33:24; Mpase 21:4, 5) Nahan cii kpaa, cii man shighe la a̱ va yô, gba u hanma tsombor ua nôngo aa angev ashighe ashighe. Paulu man Timoteu je kpaa yange ve gba angev. (Mbagalatia 4:13; 1 Timoteu 5:23) Nahan kpaa, mba fan kwagh u tweregh kaa er angev kpishi a fatyô u yangen. Icombor i lun a mkav ka i yange iangev mbigenev aluer ve palegh hôngor u sha iyol man u ken jijingi yô. De se nenge er a er kwagh ne yô.—Kar Anzaakaa 22:3.

14. Ka sha nyi gbenda mlu u waeng sha aeren una kura tsombor sha uange?

¹⁴ Mlu waeng u ken jijingi la kua mlu waeng u sha ieren kpaa. Er i fe gbar gbar nahan, Bibilo kende a aeren a vough sha man i̱ venda nyityô ieren i myav u nomsoor a kwase ken won u ivese cii. “Mbadyarev . . . shin mbavihin ivaa sha idya shin nomso mba ve yaven a ayol a ve . . . kpaa, vea ya dyako u tartor u Aôndo je ga.” (1 Mbakorinte 6:9, 10) U dondon aeren ne vough la ka kwagh u hange hange hen Mbakristu mba ve lu ken tar u vihin tsung u ainge ne. U eren nahan la doo Aôndo shi ka a wase u kuran tsombor sha iangev mbi tsaren sha mnyande anza er AIDS, bor, akaci, man anyigôr u i yer er chlamydia la.—Anzaakaa 7:10-23.

15. Tese ikyav i hôngor u sha iyol u ua fatyô u van aa angev mbu ma i fetyô u yangen yô.

¹⁵ ‘U wanger iyol sha hanma kwagh u hôngorough ken iyol’ la ka a wase u kuran tsombor sha iangev mbigenev kpaa. Iangev kpishi mbi ve sha m-ban u mwanger u iyolough. Ikyav i vesen yô ka ityu i man. Ityu i man i hôngor huhu, akondo, man ahumbe kpaa tseegh ga, kpa ka i̱ na ior angev jim kpaa. Ior umiliôn kpishi ka ve kpe hanma inyom sha ci u ve ma taav. Hen ase shami yôô; hanma inyom yô, ior umiliôn imôngo ma ve gbaan angev shi ma ve kpeen kpoo ga aluer vea palegh ‘hôngor u iyolough’ yô!

16, 17. (a) Kanyi tindi u Yehova yange na Mbaiserael yange wase u kuran ve sha iangev mbigeneve? (b) Ka nena a yar tom a kwaghwan u ken Duteronomi 23:12, 13 la ken uya ciili?

 ¹⁶ Shi nenge ikyav i genegh. Anyom a karen er 3,500 nahan ken ijime la, Aôndo na nongo u Iserael Tindi na sha u sôron mcivir ve shi, u seer yô, uma ve u ayange ayange kpaa. Tindi la yange kura nongo la sha angev sha u wan atindi sha kwagh u mkpeyol. Môm ken atindi la lu u i wa sha mhaa u akôngo a or kera, u i kaa er i ii shin inya ica a afo sha er mba ve lu ker la aa hôngor ve ga yô. (Duteronomi 23:12, 13) Tindi u ngise la nyian kpaa ka kwaghwan u dedoo man u vough. Nyian je kpaa ior ka ve gba angev man ve kpe sha ci u ve dondo tindi la ga. *

 ¹⁷ U eren sha kwaghwan u a lu ken tindi u i wa Mbaiserael la yô, kwa u ôôn iyol u tsombor man ihungwa akôngo ve—shin a̱ lu ken atô shin ken won kpaa—i̱ ver ve tsembelee shi i̱ sue icigh kpaa. Aluer i ver ijiir i ihungwa akôngo la tsembelee shi i cir í kpaa ga yô, iji ia kohol shami man ia samber aa acôghor la ken avegher a ya agenegh—man kua sha kwaghyan u se lu yan la kpaa! U seer yô, mbayev kua mbaganden ve̱ ôô ave zum u ve ze hen ijiir ne ve hidi yô. Aluer ve er nahan ga yô, vea hide a acôghol sha kwavyolough ve. Sha kwaghôron u ortwer u ken France yô, ave a ôôn ka “kwagh u hemban cii u yangen angev mbu shin uya, ken iôôn, shin sha kwavyolough cii.”

18, 19. Ka mbamhen mba nyi i ne sha u sôron ya veren waeng shin hen haregh u ibanave i lu je kpaa?

¹⁸ Ka mimi, mlu u waeng ka kwagh u ican hen haregh u ibanave i̱ lu yô. Orgen u hoghor hen imba ajiir la yô pase er: “Ajiir a iceenyolough i tsung i lu la tom u kiren akaa ka u hemba taver cii. Ahumbe a ihundu ka a cir hanma iuv ken iyou cii a ihundu i nyian. . . . Mngee u iyengeior ior ken agar a tamen, kua ken agar a kiriki agen kpaa la, kpa ka a va a iangev. Ahungwa akôngo a lun ivegher, ihôghonouv atihi atihi a ka i kura kera ga la, ahungwa a lun tsembelee ga a ior ve ze ker kpishi la, ihyev i tôôn iangev, ivokpekpe, man iji hingir akaa a i nengen a mi use use yô.”

¹⁹ U lun waeng ken mbamlu mban nahan ka kwagh u taver. Nahan kpa, injar i i lu ken mnenge shon la i̱ kehe. Icahur man mngerem kua antom u eren seer kpeghee la hemba taver ishe ga a icigh man inyaregh ki kimbin sha iyouci. Aluer ú ngu hen imba ikyasen la yô, nôngo sha er ú fetyô cii, ver iyou you man ya wou waeng man ve̱ de lu a akôngo a zendenya kpaa ga. Aluer gbenda u zan hen ya wou la ka u lu a  amgbiôr fam yô, ú fatyô u haan awen a hemben shin agboghol shami sha u yangen amgbiôr a nyôron ken iyou kpa? Aluer i wa akôv shin abakpa yô, a fatyô u tsuan ve cii man u nan we ve la nana nyôr ken iyou kpa? Shi, gba kpee u ú ver mngerem ou hen ape kwagh a hôngor a ma ga yô. I ker ahaba er abunde kera kera kpa iku i umiliôn uhar ken inyom ka i va sha ci u iangev mbi i zou a mi shin mngerem ma lun waeng ga shin m-ban u mlu u tsembelee la.

20. Aluer gba u iyou ia lu waeng yô, ka an nana wa uwegh ken tom shon kpeele?

²⁰ Ya u lun waeng la har sha hanma or—ngô, ter, ônov, man mbavannya. Ngô ugen u lun a ônov anigheni ken Kenya kaa er: “Ve cii ve hen u eren kwagh u i gbe u vea er la.” Ya u lun waeng, lun tsembelee la ka a tese mlu u dedoo u tsombor cii. Injakwagh i ken zwa Spanish kaa er: “Ibanave i ve aa hôngor ga.” Aluer or nan tse ken zege ya u i maa i yisa, shin hen kpoiyou, shin anyou u akuma akuma, shin ken mcimbi je kpaa, mlu u waeng ka gbenda u zuan a tsombor u ken mkpeyol.

21. U zuan sha Anzaakaa 31:28 yô, kanyi ia wase u van a msaanyol hen ya?

²¹ Zum u u lu ôron kwagh u kwase u injaa yô, takerada u Anzaakaa kaa er: “Ônov mba nan ve mough, ve wuese nan ve ver nan doo doo, nom u nan kpaa, wuese nan.” (Anzaakaa 31:28) Ka hanma shighe ú mase wuese or u hen tsombor wouwe? Jim yô, se mba er ikon i inyom i ka i mondo zum u i zough a mtsee man avure nahan. Ken vegher wase yô, sar se u ma i wuese se sha mimi yô. Ka i lu a iwasen u kwase nana̱ fa er nom u nan wuese tom u nan eren taveraa man iko i wan i nan i sha dooshima la shi nan fa er or la nenge nan daeng ga.  (Anzaakaa 15:23; 25:11) Shi ka i kundu iyol tsô zum u kwase ka nana wuese nom u nan sha tom u nan er ken won man ken atôya la. Ônov kpaa ka ve lu yar yar zum u mbamaren vev ka vea wuese ve sha iniôngon ve hen ya, ken makeranta, shin ken tiônnongo u Kristu yô. Man iwuese i kpeghee la ka i za ca tsô! Ka i kimbi nyi sha u kaan er: “M suugh” we? Côhiin tsô, nahan kpa kwagh u ka a va ker sha msaanyol u hen tsombor la ngu a lu mgbeghaa tsô.

22. Kanyi i lu kpee sha u a “taver” ya, man a zua a kwagh ne nena?

²² Sha atôakaa kpishi, u nengen sha ya ka kwagh u kiriki ga. Nahan kpa, a fatyô u eren dedoo. Injakwagh i ken Bibilo kaa er: “Ka sha kwaghfan i maa ya ye, shi ka sha mkav kpaa i taver un ye.” (Anzaakaa 24:3) A fatyô u zuan a kwaghfan man mkav aluer mba hen tsombor cii ve hen ishima i Aôndo man ve yar tom a mi ken uma ve yô. Mimi je tsombor u lun a msaanyol la ka kwagh u a nôngo shami yô!