“Nenge! M Ngu Geman Akaa Cii Hingir A He”

NENGE ior mba lun saan saan mba ve lu sha igbende i antakerada ne. Ú soo u lun môm ken ave kpa? ‘Een, ga kanyi,’ kape ú kaa la. Gadia ngun ne ka bem man ijoughave i i sar uumace sha won jimin cii je ne. Hanma kweior cii—ior il, ior i pupuu, ior nyian—mba nungwan hingir tsombor môm. Ka kwagh u iemberegh tsô! Ka mzough u dedoo tsô! Akperan nga ga ior mban mba a ishimanyian sha kwagh u ityav mbi bughur shin mciem ma va tagher a ifer i sha igyosugh la ga. Agirgi a uitya vihi bem u a lu sha abeen a doonashe a hen sule ne ga. Ushoja mba ga, uindyer gbuuka kpa ga, shin ugbuuka mbagenev kpaa mba je ga. Ankon u dasenda tsô kpaa kwagh gba sha mi heen sha ci u nan mluvough ga. Ityav man ifer mba ga jimin cii. M-ban u uya ngu ga, sha ci u hanmaor nan ngu a ya u nana yila er ka u nan yô.

² Kenger mbayev mbara yôô! Inumbe ve la ka kwagh u iemberegh u nengen. Nenge imba ishôso i ve lu numben a mi la! Kwagh gba sha igyar i yôô hen sule ne ga, sha ci u ishôso cii ngi ken bem a uumace man hen ayolave. Begha vea iyôngo je kpaa ve hingir ijende. Nenge ase inyon i i lu a uimondon mba engem mban er ve lu purugh heen man heela la. Shi ungwa er amo ave la a nungwa sha ahán a mbayev man a iv sha ahumbe yô. Ukeji mba gaa? Ei, sha ci u hanma kwagh ka mlu u ken uikangen ga man iember i lun a myange shio hen ijiir ne. Yô ungwa ase ihuma i uimondon mbara yôô, ungwa er mngerem ma lu kuan shin kungwa yô, kav ase mtsee u iyange wese̱ wese̱ la. Aye, ma u shi bende ma ityamegh ki ki lu shin ikyese la tsô he, gadia  ka atam a hemban cii je la, di er hanma kwagh u i lu u a nenge a min shi a fa mdoom nagh hen sule u engem ne kpaa á lu nahan.

³ ‘Kpa tile yôô,’ orgen kaa nahan, ‘ior mba been ayol mbara mba hana? Ve kpaa, doo u vea lu a kwar ken msaanyol u ijiir ne gaa?’ Sha mimi yô, ior mba been ayol mba her je, kpa mba hiden hingir yev her. Hen sule ne yô or môm nan kpen sha ci u iyolbeen ga. Hegen yô mbayev ka ve vese ve via or tsô man ve kera bee iyol ga. Shin vea lu anyom 20 shin a̱ lu anyom 200 je kpaa, hanmô ve ken ior umiliôn mba ve lu ken sule ne cii mba ember sha mdoo u lun yev yev, a mnyoon shio la. Umiliônô, kape ú kaa laa? Een, umiliôn, sha ci u mba samber aa sule ne ken hanma tar. Ua ngee a uma, bem, man mdoom ken hanma kighir i tar, hii hen Fuji zan zan za a̱r sha iwo i Andes, tôô ken Hong Kong di yem za a̱r ken Mediterenia. Sha ci u tar cii mba geman ú ua hingir sule u paradiso. Á lu mhidi u a hide a Paradiso sha tar cii la.

⁴ ‘M lumun a mi ga,’ kape ú kaa laa? Hiihii yô, time sha akav a a tese mimi u kwagh ne la. We man ya wou cii ne fatyô u waren mkar u tar u ngun a mbamzeiyol mba ú ne cii man ne nyôr ken Paradiso u i tese sha igbende yase ne. *

Takerada u ú Pase Kwagh u Paradiso La

⁵ Akaa a lun a iengem ne cii, kua mimi u á kpaa, i pase ken takerada,  takerada u i nger man ú lu ú hembancii yô. Mba yer ú er Bibilo. Ka takerada u ú tse tsung je yô, avegher a ú a genegh yange i nger á kuma er anyom 3,500 nahan ken ijime. Nahan cii kpaa, shi ka takerada u u hembe cii sha u tesen kwaghwan u tsevaa, u a lu a iwasen sha mlu u sha ayange a ainge ne yô. Akaaôron a i̱ a profeti la a na ishimaverenkeghen i ken hemen i i wanger yô. Ka takerada u i hembe yamen ú sha tar cii ken atô u ityakerada i hemban la, sha ci u i samber a Bibilo jimin shin avegher a vesen a i̱ kuma er iyenge 2,000,000,000 nahan ken ijô hemba 2,000.

⁶ Takerada u genegh môm tsô kpaa i samber a ú sha tar wuee nahan ga, man í genegh kpishi í tsa zulum ikua a i̱ cuku tsô kpaa ga. Koran u Islam la ngu a̱ tsa i kuma anyom 1,400 ga. Buddha kua Confucius yange ve lu sha won er anyom 2,500 a a kar ken ijime la nahan, man ngeren vev kpaa ka shighe u ve hii je la. Uicighanruamabera mba Shinto mbara yange i nger ve er ve lu hegen nahan la hemba anyom 1,200 ken jime ga. Takerada u Mormon ngu di anyom 160 tseegh tsô. Môm ken ityakerada i tseghan ne tsô kpaa ia fatyô u ôron akaa a uumace a sha ayange a mbayiase a tôôn shighe ken jime je er anyom 6,000, er Bibilo i̱ ôr nahan la ga. U zuan a mkav sha kwagh u kwaghaôndo u mimi yô, ka keng a gba u se nenge ken Bibilo. Ka i̱ tseegh i̱ lu aa loho sha ci u uumace sha tar cii ye.

⁷ Mfe man mdoom ma loho u Bibilo la mba kaven kwagh sha tar cii lumun a mi. Ikpuror u timen sha akaa man u yange va a tindi u tahav mbu udugh akaa hiden a min shin inya la Sir Isaac Newton, kaa wener: “Ma gbenda u timen sha akaa môm kpaa hemba ngun mimi a Bibilo ga.” Patrick Henry, orhemen u mba nôngon sha u van a mgem u hemen ken America u i fe un sha mkaanem nam ma “Nam ipaan, ga yô nam ku” la kpaa, yôô wener: “Bibilo i̱ hemba hanma  ityakerada i genegh i i gber la cii.” Or u hemban mfe u Mbahindu Mohandas K. Gandhi je kpaa yange kaa a gomna u tar u Britain u lu ken India la er: “Shighe u tar wou man u wam ua va ijiir i môm sha u eren sha atesen a Kristu na ken Ityesen i sha Uwo la yô, hen shighe la se bee a mbamzeiyol, á kera lu mba ityar yase tseegh ga kpa á lu mba tar cii.” Gandhi lu ôron kwagh ne sha mkaanem ma ken Mateu ityouv 5 zan zan 7 ken Bibilo. Ôr ityouv mbin iyol you man nenge aluer iloho i ker i vesen la ia kpiligh we iyol ga yô.

Bibilo—Takerada u sha Ityoughkitaregh

⁸ Kposo a kwagh u ior kpishi ve fe la yô, Bibilo ka kwagh u á dugh ken mfe u ken Tar Buter ga, man shi i̱ tese icivir sha mfe la kpaa ga. Shi kpeghee tsô Bibilo jimin cii yange ma i nger i ken ityar i sha Ityoughkitaregh. Ior mba yange ve nger i̱ cii yange ve lu mba sha Ityoughkitaregh. Ken inyom i 1513 B.C.E. la, anyom dubu môm cii man i mar Buddha la, Mose, u yange lu hen Atô u Imbusutariyan la, zua a mpase u sha mnenge hen Aôndo u ngeren takerada u hiihii u ken Bibilo, u i yer er Genese la. Ken mhii ne je, Bibilo i̱ dondo itinekwagh môm zan zan va a̱r ken takerada u masetyô u Mpase la. Yange i nger Bibilo i bee ken inyom i 98 C.E. la, man anyom kar 600 cii ve i mase maren Buddha ye. Ú vande fan wer Bibilo ngi a ityakerada ker kposo kposo 66 kpa? Een, Bibilo iyol i i̱ ka iyou i koson ityakerada ker jim je!

⁹ Nahan yô, ken atô u anyom 1,600 hii sha shighe u Mose la zan zan, iorov 40 wa uwegh ken mnger u mkaanem ma kpiaan ma ken Bibilo mara. Ve kpaa ve kaa er yange lu tahav mbu mbu hembe mbu or yô mbu na ve mnenge ye. Apostoli u Kristu Paulu nger er: “Gadia icighanruamabera cii ka Aôndo A ne i nger ye. Ngu a inja sha ityesen man sha mkôôm man sha  myange man sha myese u ken perapera kpaa.” * (2 Timoteu 3:16) Man shi apostoli Peteru yange pase er: “Ma kwaghôron u profeti u ken icighanruamabera ka kwagh u or nana gba pasen iyol i nan tsô ga. Gadia mayange ma kwaghôron u profeti due sha awashima u or ga, kpa Icighan Jijingi mgbegha ior man ve ôr kwagh u Aôndo ye.”—2 Peteru 1:20, 21; 2 Samuel 23:2; Luka 1:70.

¹⁰ Shi, kwagh ugenegh u á kpilighyol yô, ka sha er Bibilo i̱ va ar sha ayange a ase ne la. Ken anyom udubu udubu, zan zan va a̱r ken anyom 500 a karen shighe u i e̱r akeke a gberen ityakerada la, yange i ngeren akagh a Bibilo sha ave. Ma takerada môm u i nger sha ayange a mbayiase la u yange gba u a nger kwa kimbir kimbir nahan ngu ga. Yange gba u a nger i̱ kwa kimbir kimbir, kpa lu sha iko i wan tsung. Mba kimbir ngeren mbara yange lu akaa kpeghee tseegh ve nger za kpe ye, man mkar u i kar akaa ne yô a tese er i lu Aôndo na i nger mba hiihii mbara yô. Orvesen u timen sha agbenger a uruamabera mba Bibilo, Sir Frederic Kenyon, kaa er: “Kwagh u i mase karen a mi kera yô ka akperan a kaan er Ruamabera nyôr hen a vese vough er yange i nger un nahan ga la.” Nyian, akagh a Bibilo a yange i nger sha ave yô nga her kuma er 16,000 nahan shin avegher a i̱, man mbagenev je yô tsa sha won kuma je er derianyom u sha uhar cii man mmar u Kristu la nahan. Ka heela tseegh ga, i gema Bibilo mba ken ijô Heberu, Shiria, man Grika i yange i nger i̱ ker sha hiihii la ken ijô kpishi kpishi sha tar wuee.

¹¹ Mbagenev nôngo er vea va a ilyahan sha Bibilo sha u kaan er ngi vough ga. Nahan cii kpaa, ken anyom kpeghee a a sember karen ne mba timen sha akaa a tse a shin inya ve time hen ajiir a tse a genegh a yange ior tema twev a i nger ken Bibilo la man ve zua a ngeren kua akav a genegh kpaa a tesen a akperan shio er ajiir man ior mba i er kwagh ve ken Bibilo mba ve  hembe tsan la je kpaa mimi je yange ve lu. Ve dugh akaa shin inya a a tese er mimi je yange mngerem ma deemee va, kwagh shon u Bibilo i̱ kaa er yange er ken anyom 4,000 a karen ken ijime, sha ayange a Noa la. Sha kwagh ne yô, Wantor Mikasa, ortimen sha akaa a shin inya u a ze iti tsung la, kaa er: “Yange Mngerem ma Deemee ma va miminii? . . . I zua a kwagh u tesen er mimi je yange mngerem ma deemee va la a akperan shio.” *

Aôndo u Bibilo La

¹² Di vough er ior mbagenev ve lam sha Bibilo daeng nahan, kape mbagenev ve lam daeng sha kwagh u mlu u Aôndo Uhembanagee ngu la. (2 Peteru 3:3-7) Ka ve kaa er, ‘A er nan ve me na jighjigh hen Aôndo, er i lu u me fatyô u nengen a na ga laa? Ikav ngi i tesen er Orgban u i nengen a na ga, u a hembe oruma yô, nan ngu mimi je kpa? Aôndo ngu ken hanma kwagh gaa?’ Mbagenev ka ve kaa er, ‘Aôndo shin Buddha ngu ga.’ Nahan cii kpaa, Bibilo i tese er di vough er hanma wase yange nan zua a uma sha ikev i ter u shin tar nahan, kape mbamaren asev mba hiihii mbara kpaa yange ve zua a uma hen Ter u sha, shin Orgban je la, iti na jim er Yehova.—Pasalmi 83:18; 100:3; Yesaia 12:2; 26:4.

¹³ Yehova pase iyol na hen uumace sha igbenda i tseer tseer ihar. Gbenda u vesen yô ka ken Bibilo, i̱ i pase mimi na man mbaawashima nav mba gbem sha won la. (Yohane 17:17; 1 Peteru 1:24, 25) Gbenda ugen yô ka ken ityom na i igbetar la. Sha u nengen akaa a kpilighyol a a kase ve la yô, ior kpishi mase kaven er ka keng Aôndo u Gbanakaa ngu u a tese mlu na u kpilighyol ken ityom na yô.—Mpase 15:3, 4.

¹⁴ Yehova Aôndo ka un á lu Orngeren u Bibilo ye. Ka un á lu Jijingi Uhemban, u a lu gbem sha won ye. (Yohane 4:24; Pasalmi 90:1, 2) Iti na i “Yehova” la i pase awashima na sha ci u ior nav mba a gbe ve la. Ka awashima na u una tsegha zege iti la sha u timin mbaaferev man shi yiman  mba ve lu a dooshima hen a na la sha er vea lu shin tar u paradiso yô. (Ekesodu 6:2-8; Yesaia 35:1, 2) Er á lu Aôndo Uhembanagee cii yô, ngu aa tahav mbu eren kwagh ne. Er á lu Orgban u tar cii yô, á hemba hanma aôndo u akuraior kua ieev cii.—Yesaia 42:5, 8; Pasalmi 115:1, 4-8.

¹⁵ Ken uderimbaanyomov mba ve sember karen ne, ior mba tôvonkwaghfan tôô shighe kpishi sha u henen kwagh sha ityom i igbetar. Ve kule er nyi? Môm ken mbahemen ken gbaatom u henen kwagh u usu u latriki, or u henen sha akaa a igbetar u ken Britain u a ze iti yum la Lord Kelvin, yange kaa er: “M na jighjigh mer er se za hemen u tôvon kwaghfan sha gbashima tsung la kape kwagh la una na se hemba gban ca a m-ban u jighjigh u nan hen aôndo je la.” Ortôvonkwaghfan u i mar un ken Europa la Albert Einstein, shin er yange i fa er ka or u nyiman mgbe u akaa nahan kpaa, yange na mpase wener: “Kumam sha u . . . henen sha mlu u kpilighyol u tar, u í lu u se fatyô u kaven kpeghee tseegh ne, man u nôngon sha u kaven a iyol i hiden a mi jime anvegher kpeghee u mfe u i tese ken igbetar la.” Ortôvonkwaghfan u ken America u yange zua a iwua i Nobel la Arthur Holly Compton kaa er: “Mlu-vough u tar la a tese mimi u kwaghôron u a hembe lun a icivir sha won cii la—‘Sha hiihii Aôndo.’ ” Yange lu kimbir mkaanem ma hiihii ma ken Bibilo la.

¹⁶ Alaghga mbahemenev mba ken akuraior a lun aa tahav vea ta ave vanger sha ci u mfe ve man akaaeren a ve a sha kwaghfan u sha uee u ken iamegh la. Kpa akaa ave a purugh sha ahumbe la ka di anivur kwagh tsô aluer í kar á sha uwer u ka u ningir tar, man akum a ka a ningir iyange la yô! Akaaeren a uumace angan ndahar tsô aluer i kar á sha akum a Yehova a gbe sha a nan iwanger á a lu a akpaasan ubiliôn kpishi la, e̱r hanma á lu a uiyange ker ubiliôn er i̱ yase ne nahan la, man e̱r á kohol á shi á ver á  ken iamegh sha u ve̱ lu gbem sha won yô! (Pasalmi 19:1, 2; Yobu 26:7, 14) Kape i lu ve ior ve lu sha ishigh ki Yehova er ka mbaahungwa nahan, man akuraior a lun aa tahav kpaa “er ka ma kwagh ga” la.—Yesaia 40:13-18, 22.

¹⁷ Ú tse ken iyou kpa? Alaghga yange ú maa iyou la iyolyou ga, shin ú fa or u yange nan maa i̱ kpaa ga. Nahan cii kpaa, er ú fe or u yange nan maa i̱ ga la ngula una yange ú u lumun wer mimi je ma or u lun a mfe yange nan maa i̱ ga. U henen er iyou la yange i̱ maa iyol i i̱ la á lu ibume mhen kpishi! Er zege tar ne, man hanmakwagh u á lu kimi cii, yange tôô mfe u hemban la sha u maan u yô, ka a inja u lumun er ka keng ma Orgban u lun a Mfe nan ngu ga he? Mimi je, ka di ibumeor tseegh nana kaa ken ishima i nan er, “Yehova ngu ga” ye.—Pasalmi 14:1, NW; Mbaheberu 3:4.

¹⁸ Akaa a engem a kpilighyol a a kase se ne—uimondon, inyon, ishôso, igbetar i i yer er or la, akaa a kpilighyol sha kwagh u uma man mar la—akaa ne cii pase er Mfe u Vesen u i nengen a mi ga la ka un yange er á ye. (Mbaromanu 1:20) Hen ape mfe á lu yô, mhen kpaa ngu. Hen ape mhen á lu yô, or ngu. Mfe u hembancii la ka u Or Uhembancii, Orgban u akaauma cii, Imbor i uma jim la. (Pasalmi 36:9) Mimi je Orgban ne kuma u ngohol hanma iwuese man icivir kpaa.—Pasalmi 104:24; Mpase 4:11.

¹⁹ Mbagenev mba mba jighjigh ve u nan hen Aôndo yange tenger sha ci u akaa a ican a yange er ken Ityav Mbi Tar Cii mbi sha II la yô. Hen shighe la hanma tar cii yange u yila “Aôndo” u ú, shin a̱ lu Mbakatoliko shin kwaghaôndo u Mbaprotestanti shin ukwaghaôndo mba sha Ityoughkitaregh kpaa. A fatyô u kaan er  “Aôndo” yange na akuraior agenegh mhembe kpa gema na ian er i̱ hemba a geneghee? Bibilo i̱ tese er môm ken akuraior ne tsô kpaa yange lu yilan sha iti i Aôndo u mimi la ga. Yehova Aôndo, Orgban u sha man tar la, ngu uwegh ken anzughul kua ityav mbi akuraior a lu nôngon la ga. (1 Mbakorinte 14:33) Mbamhen nav ve tav hemba mba mbapativ man mbauityaav mba tar u ngun ne. (Yesaia 55:8, 9) Sha gbenda shon môm, kwaghaôndo u mimi man mcivir u Yehova ngu uwegh ken ityav mbi akuraior la ga. Yehova tav hemba mbaaôndo mba akuraior cii. Ngu kposo sha er á lu Aôndo u ior man kasev mba soon bem ken akuraior a sha won cii yô. Er Bibilo i̱ kaa nahan: “Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan.” (Aerenakaa 10:34, 35) Ior ken akuraior cii mba perapera á doo ve ishima yô mba henen Bibilo hegen man shi mba ngohol mcivir u “Aôndo u bem” u mimi, Orgban u uumace cii la.—Mbaromanu 16:20; Aerenakaa 17:24-27.

²⁰ Ior mbagenev ka ve hôn ave sha mbampav man imanger i ken ukwaghaôndo mba Mbakristu mbaaiev, mba ve kaan er ve mba dondon Bibilo la. Shi ka ve kaa er, ‘A er nan ve me na jighjigh ken Aôndo u Bibilo, er akuraior a a lu a Bibilo la a lu ken atô u mba ve lu tan ikyav mbi utyaav mbi bughur yemen ca la atihi atihi sha gbashima laa?’ Mimi u á lu ken kwagh ne yô, shin er hanma shighe cii Bibilo ka i̱ lu a mimi nahan kpaa, Mbakristu mbaaiev mba ken akuraior ne ve pav a mcivir u Kristu u ken Bibilo la gba ca vough er Ikighir i Imbusutariyan i pav i gbe ca a Ikighir i Ityôtar nahan. Ka sha iyolmanger tseegh ve kaan er ve mba Mbakristu ye. Mba a Bibilo, kpa mba dondon atesen a i̱ ga. Presiden u America u yange na zwa er i̱ ta bom u atôm sha gar u Hiroshima sha kwa u hiihii la yange kaa er: “Kpe ahii, sarem e̱r ma̱ Yesaia shin St. Paulu ma a lu heen!”—sha u kôôm ior ken mzeiyol u taregh ne yô. Aluer yange una lumun a Yesaia u  ken Bibilo la yô, yange ma ta bom u atôm la mayange ga, sha ci u Yesaia wa kwagh er i̱ ‘gema usanker i var indyuhar a mi, man awange kpaa a hingir ahô a sôron ikon a mi.’ Ka heela tseegh ga, yange lu Paulu u ken Bibilo la kaa nahan ye er: “Se mba nenge ityav sha inja i iyolough ga. Gadia ikyav mbi utyav yasev ka mbi iyolough ga.” (Yesaia 2:4; 2 Mbakorinte 10:3, 4) Nahan cii kpaa, a u ve dondon kwaghwan u injaa u Bibilo la yô, mba ken akuraior a Mbakristu mbaaiev ne nyôr iyol ken gesa u varen ikyav mbi utyaav mbi van a mtim. Nyityô kwagh i ve kaa er ve mba Mbakristu mba dondon Bibilo cii ka mbaaie. Vea tagher ishigh a ijirôron i Aôndo kpee sha ci u ve venda u eren ishima na.—Mateu 7:18-23; Sefania 1:17, 18.

Akaa a Yehova a Gbe la man Uivande

²¹ Yehova gbe akaa, shi eren uivande kpaa. Ú vande henen sha kwagh u geman mngerem hingir awambe, paven Zegemnger u Nyian, mmar u iniunkwase mar Yesu la, kua uivande mbagenev mba i nger ken Bibilo la kpa? Er tahav mbu mhen u or mbu yen yô, alaghga nana kav e̱r yange i hii ve uivande mbagenev mban ve e̱r ga, di vough er nana fatyô u kaven ivande i iyange ka i due shi i mire hanma iyange la ga nahan. Mgbe u or la yange lu ivande. Or u ainge yange nan nenge a ivande la vough ga, kpa nan fa er yange kwagh er nahan, sha ci u nan ngu uma nyian u tesen er ka mimi. Mimi je, uma man tar sha won cii ka zege ivande i kpilighyol. Nahan ka u se nyiman zum u Mkaanem ma Aôndo, Bibilo, ma kaa er yange e̱r uivande sha ashighe a genegh, shin e̱r ityôkyaa i kera lu í una er uivande mba shonov nyian ga nahan yôô?

²² Akaa a Yehova a gbe cii ka ivande man ka i̱ kpilighyol kpaa! Nahan cii kpaa, kwagh u yange hii gban la yange hemba lun u kpilighyol cii. Lu mgbe u Wan na u ken jijingi la, “waniunda” na la. (Mbakolose 1:15) Wan na u sha ne yange i yila un er “Imo.” Anyom nga karen udubu kpishi ken hemen er i gba un kera yô, á va shin tar ne maa i yila un er “or, ka Kristu Yesu” je la. (1 Timoteu 2:5) Tsô i ôr sha kwagh na er: “Man Imo la hingir  or je, va tema her a vese, se kenger icivir Na, icivir la lu er ka i Wan u môm môm u Ter nahan, mgbough a mrumun u sha mhôôn man mimi kpaa.”—Yohane 1:14.

²³ Mlu u Yehova vea Wan na la á fatyô u karen sha orvesen u lun a ateiwa kua wan na, hen ape wan la ka nan wasen sha u eren akaa a ter na a ndera la. Sha ikyev i Wan na u hiihii man orwasen un tom kpaa la, Yehova gba ujijingi mbagenev kpishi mba ve lu ônov mba Aôndo yô. Ken hemen yô, mban cii ve ember e̱r ve nenge Wan u Yehova, Orfan Tom na la, lu eren usha kua tar u se lu shimi ne nahan. Ú ngu a akperan ken ishima wer yange i gba a gba akaa ne gaa? Yange anyom nga karen ken hemen udubu udubu yô, Yehova pine orjighjigh ugen er: “Shighe u M tim imagh ki taregh la, u lu hana? Kaa ase, aluer wea lu a mkav sha mi yô. Zum u asan a sha use lu wan icam, man ônov mba Aôndo cii ger amo sha iember laa?”—Yobu 38:4, 7; Yohane 1:3.

²⁴ Shighe ze deghôô yô, Yehova gba akaauma, a iyolough shin tar ne, imendenev, ikon, uimondon, ishu, inyon, man ishôso. (Genese 1:11-13, 20-25) Tsô Aôndo kaa a Orfan Tom na er: “Sé er or sha inja i mlu Wase, sha ibeen Yase . . . Nahan Aôndo gba or sha inja i mlu Na, lu sha inja i mlu u Aôndo je A gba nan ye; lu nomsoor man kwase A gba ve ye.” (Genese 1:26, 27) Er yange i gba nan sha ibeen man mlu u Aôndo, a mbamlu mba Aôndo mba dooshima, kwaghfan, perapera, man agee yô, or u hiihii la hemba ishôso ca je. Or ngu kposo a ishôso sha ci u ka nan er  mhen, nana fatyô u wan ago iyol sha kwagh u ken hemen, shi nan ngu aa isharen i civir Aôndo kpaa. Ishôso ngi a mfe u henen kwagh a mi ga, kpa ngi uma sha aeren a i a gbaaôndo la di tsô. A lu m-ban u kwaghfan tsô u kaan er Orgban ngu ga kpa geman kaan er orumace u nan lu a mfe tsung, nan fe kwagh tsula ne nan gba duen abu tsô ken ishôso!—Pasalmi 92:6, 7; 139:14.

²⁵ Aôndo yange ver or ken “sule ken Eden vegher u sha ityoughkitaregh” la. Yange lu sule u kundunyol, vough er sule u ú lu sha igbende i takerada wase ne nahan, shin er hen shighe la yange lu uumace uhar tseegh, Adam man kwase na nahan kpaa. Paradiso shon jim yô kera ngu ga, sha e̱r yange i tim un kera ken Mngerem ma deemee ma sha ayange a Noa la yô. Kpa i fa ijiir i yange lu hen Atô u Ityoughkitaregh la, sha ci u uifi mbagenev mba i yer ati a ve ken Bibilo er yange ve lu kuan karen ken atô na la mba her zan zan nyian. (Genese 2:7-14) Or yange nan lu a zege ian u yaren tom a sule ne sha u u̱ hingir ijiir i hen atô i á samber shi á sôr tar cii, á gema ú ua hingir paradiso yô.—Yesaia 45:12, 18.

²⁶ Er Aôndo kua Wan na cii ve lu mbatomov nahan, kape Aôndo yange na or tom u nana er shin tar heen kpaa vough je la. (Yohane 5:17) Hen Adam man Ifa, or man kwase u hiihii la yô, yange kaa er: “Mar nen kpishi, seer nen ngeen, iv nen tar, gema nen u, u̱ lu sha ikev yen; ishu i shin zegemnger man inyon i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen.” (Genese 1:28) Ngun ka u kaan er yange lu u or nana seer ngeen, nana tser tar, shi nana za hemen u seer ngeen zan zan tar u̱ iv poo u̱ haa inya shinii? Ei. Or ka nana kaa a we er u̱ iv tii shin iyongo yô, ka ú za hemen u haan zan zan tii la i̱ iv iyongo la i̱ haa sha tebul cii ga. Ka ú iv di iyongo la tsô maa ú de u haan je. Sha gbenda shon môm, tindi u Yehova hen or er, “Iv nen tar” la, yange tese awashima na u nengen er or iv tar sha mlu u ken mkpeyol, nahan man uumace vea mem u maren. Kwagh ne una va a mzeiyol hen mtem u ior  mba ve lu vough la ga. Ka ken tar u nyian u uumace ve lu vough ga ne tseegh mngee u ior á ve a mzeiyol ye.

Akaa a Bo—Er Nan Aôndo Á Ne á Iana?

²⁷ Aluer awashima u Aôndo ka u una maa tar u paradiso yô, er nan ve nyian tar u iv a ifer, ican i yan, man ijungwen yumu? Aluer Aôndo ka Uhembanagee yô, er nan a de er mbamlu mban ve̱ lu gbem yum nahana? Ishimaverenkeghen ngi sha mkur u mbamzeiyol asev cii je kpa? Bibilo i̱ kaa er nyi?

²⁸ Bibilo i̱ tese er mbamzeiyol mba uumace yange ve hii shighe u môm ken ônov mba Aôndo mba ken jijingi yange hemba ato sha u hendan aa hemen u Yehova, shin mtemtor na yô. (Mbaromanu 1:20; Pasalmi 103:22, NW Ref. Bi., ngeren u shin kpe) Akperan nga ga ortyom ne yange lu môm ken mba ve ember shighe u ve nenge er i gba or la yô. Kpa hua kua imanger ve wa amise ken ishima na, man shi á lu a isharen i Adam man Ifa ma ve civir un ma i kera lu Orgban ve, Yehova ga yô. A lam sha ikyev i iyô, di vough er or u fan anumbe ka nan lam sha ikyev i eev nahan, ortyom ne mee Ifa sha u a̱ hemba Aôndo Uhembanagee ato yô. Nahan nom na Adam kpaa dondo un ken ihyembeato la.—Genese 2:15-17; 3:1-6; Yakobu 1:14, 15.

²⁹ I va hingir u yilan ortyom u hembanato la er “ka tseyô.” (Mpase 12:9; 2 Mbakorinte 11:3) Shi i na un iti er Satan, inja na yô ka “Orhendankwagh,” man Diabolo, inja na yô “Or-msende.” Yange va a anyiman sha kwagh u mkom man perapera u mtemtor u Yehova sha tar la, shi a kaa Aôndo imbwase er hegen un, Satan, una fatyô u geman uumace cii kera vea gbihi mcivir u mimi la. Aôndo na Satan shighe kuma je er anyom 6,000 nahan sha u a̱ tese mimi u imbwase na la yô, sha er akperan sha kwagh u ian i hemen u Yehova la a bee shighe môm vindi vindi gbem sha won yô. Hemen u or a Aôndo shio la ú gba kera je gande. Kpa ior kua kasev mba  jighjigh, ken atô ve yô Yesu ka ikav i hemban cii, ve tile sha mimi hen Aôndo sha ashighe a ican a hemban cii je kpaa, ve kende a Yehova sha nahan ve tese er Diabolo ka oraie. (Luka 4:1-13; Yobu 1:7-12; 2:1-6; 27:5) We kpaa, ú fatyô u tilen sha mimi. (Anzaakaa 27:11) Kpa ka Satan tseegh á lu orihom u a ze se iyol ga. Ka hanma orihom ugen kpa á lu?

Orihom La—Ku

³⁰ Aôndo yange ver injar i ihyembeato—ku. Er lu ôron kwase u hiihii la ijir yô, Yehova kaa er: “Me seer we ican tsung sha iyav mbu wan ou, ú maren sha ican je; isharen you ia lu sha nomou, ú lu sha ikev na.” Hen or shon la Adam a kaa er: “Ka sha iusa i sha ishigh you man ú ya kwaghyan ye, zan zan ú hide hen inya, gadia u ngu vuulevu, nahan ú shi ú hide ú hingir vuulevu.” (Genese 3:16-19) Yange í zenda nom man kwase mba hembanato mbara ken Paradiso u saanyol la kera i haa ve ken tar u i sôr ú ga la. Shighe karen yô maa ve kpe.—Genese 5:5.

³¹ Ka er yange Adam man Ifa ve gba ve hingir mba yinan nahan cii ve ve hii u maren ônov ye. Ior cii nyian ve due ken tsombor ve ken mlu u vough ga la, ka nahan ior cii ve lu kpen ye. Orngeren Bibilo ugen pase kwagh ne ken mkaanem man er: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.” “Isholibo” ne jim yô kanyi? Ka myina u yinan sha mlu u vough shin mkom u vough la. Yehova Aôndo lumun shin den er kwagh u á yen la a̱ lu uma her ga. Er ior cii ve ngohol isholibo man myina hen or u hiihii Adam yô, ku “tema tor” sha a ve. (Mbaromanu 5:12, 14) Or u gban ne ka nan kpe, di vough er ishôso kpaa ka i kpe nahan.—Orpasenkwagh 3:19-21.

³² “Ku” ne di yô kanyi? Ku ka mkposo u uma. Aôndo yange ver ian i lun uma sha tar a ikighir shio hen or aluer yange nana ongo un yô. Nahan cii kpaa, nan hembaato, man injar yô lu ku, u kera fan kwagh ga, kera lun  ga. Aôndo yange ôr kwagh u karen a uma u or yemen a mi ken ma mlu u ken jijingi shin ken ma “hell” u yeghen usu aluer nan hembaato man nan kpe yô ga. Yange ta or icin er: “Ú kpe je.” Lu orwuanor Diabolo yange er aie sha u kaan er: “Ne kpe je ga” ye. (Genese 2:17; 3:4; Yohane 8:44) Kwagh u ior cii ve zough a mi hen Adam yô ka ku u hingir vuulevu la.—Orpasenkwagh 9:5, 10; Pasalmi 115:17; 146:4.

³³ Nahan yô, ma mlu u ken hemen ngu sha ci u or u nan kpe la gaa? Mlu ngu u kpilighyol je! Bibilo i̱ tese er awashima u Aôndo u van a tar u paradiso sha ci u uumace cica cii la, kua sha ci u mba ve kpe hegen kpaa la, ka u una bunde mayange ga. Yehova kaa er: “Sha ka ikônough Yagh ki torough je, man tar ka ijiir Yam i pendan angahar sha mi.” “Me gema ijiir Yam i veren angahar ia lu i icivirigh.” (Yesaia 66:1; 60:13) Ken mngee u dooshima na la, Yehova tindi Wan na, Imo la, shin tar ne, sha er tar u uumace cii ma u zough a uma ken a na yô. (Yohane 3:16; 1 Yohane 4:9) Akaa nga atar a vesen a se nenge shami hegen man a Yehova a er sha ikyev i Wan na yô, ka, (1) u nan msagh sha ikev i tahav mbu ku; (2) u nderen mbakpenev shin ku kpôô kpôô; man (3) u van a gomoti u vough sha uumace cii.

 Msagh Ken Ku Kera

³⁴ Hii sha ayange a tsuaa la je, uprofeti mba Aôndo tese jighjigh u nan ve, kpa lu sha kwagh u mtsôr u or ga, lu sha ishimaverenkeghen i Aôndo una “paa ve” ken ku la. (Hosea 13:14) Kpa á er nan ve á paa or sha ikyangenev mbi ku kera? Ieren i sha perapera u vough u Yehova la yange gba u á lu ‘uma sha uma, ishe sha ishe, inyigh sha inyi.’ (Duteronomi 19:21) Sha nahan yô, er Adam yange va a dyako i ku hen uumace cii sha u hemban Aôndo ato sha apera man hingir u ior vea yina sha mlu u uma u vough la yô, gba u saa or-uma ugen u vough nana tile sha ityough ki Adam sha u kimbin sha uma u nan u vough la, sha u hiden yamen kwagh u Adam yange ta kera la.

³⁵ Tindi u kimbin ‘kwagh sha kwagh’ la i lumun a mi wuee hii sha igbetar je. Ishember kwaghôron i ka i ôr ashighe kpishi yô er “u nan ipaan.” Ipaan kanyi? Ka “injar i ka i kimbi sha u paan or shin kwagh hen u nan ker or shin kwagh ken uikyangen la. Sha nahan yô mba ken gaadi shin ikpan i uitya mbara ka i kaa er i paa ve shighe u ka a̱ pase ve sha u nan ma kwagh u taver ishe yô. . . . Nyityo kwagh i i ne i til sha ityough ki nan shin i ne sha ci u i̱ lu iwom sha ci u nan yô ka ipaan.” * Hii sha shighe u isholibo i Adam la je, uumace cii hingir er ka mbakwarev shin ikpan i uitya nahan, ken ikyangenev mbi lun ken myina man ku. U paan ve yô, yange gba u saa a na ipaan. Sha u yangen anyiman hegen shin ken hemen sha kwagh u perapera u injar i ipaan la yô, á gba keng u nan uma u or u vough, inja na yô, u á lu vough er Adam yange lu nahan la.

 ³⁶ Nahan cii kpaa, ka hana a zua a imba uma u or u vough laa? Ior cii, er ve lu tsombor u or u yinan Adam yô, i mar ve ken myen. “Or u nan fetyô u paan anngô u nan, nan ngu je ga, shin u nan Aôndo kwagh u á paa nan a mi kpaa ga.” (Pasalmi 49:7) Sha u sôron kwagh ne yô, Yehova, er dooshima na hen uumace mgbegha un yô, á na “waniunda” u lu Wan na u doon un ishima la sha u a̱ hingir nagh ku i gbe u á na keng la. A musan a uma u vough u Wan u ken jijingi shon, Imo la, a va a mi ken iyav mbu iniunkwase i ken Yuda, Maria. Gumkwase la wa iyav man ken hemen yô á mar wannomso, i ii un iti er “Yesu.” (Mateu 1:18-25) Orgban u uma una fatyô u eren imba ivande i kpilighyol la.

³⁷ Yesu yange vese via or, na iyolna hen Yehova, maa i er un batisema. Tsô Aôndo maa wa un tom er a̱ er ishima Na. (Mateu 3:13, 16, 17) Er uma u Yesu u shin tar ne yange va sha man lu or u vough kpaa yô, á fatyô u nan nagh sha uma u vough la, nahan a paa uumace ken ku kera. (Mbaromanu 6:23; 5:18, 19) Er yange kaa nahan: “M va sha u ve̱ zua a uma, ve̱ zua a mi wuee je.” “Or ngu a dooshima u a hembe ngun ga, je u or nana gbihi uma u nan sha ci u akar a nan.” (Yohane 10:10; 15:13) Shighe u Satan na i wua Yesu sha kon la, Yesu yange na iyolna sha u kpen ku u sha ican ne, fa dedoo je er ior mba ve ne jighjigh yô vea zua a uma ken mne u ipaan la.—Mateu 20:28; 1 Timoteu 2:5, 6.

U Hiden Lun Uma

³⁸ Shin er mbaihomov nav yange ve wua un nahan kpaa, ian i Wan u Aôndo i lun a uma u vough la saa ga, sha ci u yange kura jighjigh na u nan hen Aôndo. Kpa, er yange kpe lu shin uwar nahan, Yesu una er nan ve una yar tom a kwagh u injaa ne, ian i lun a uma u or ne, sha ci u uumace? Ka heen Yehova shi e̱r ivande i genegh ye, lu hiin u imba shon je la. Sha iyange i sha utar i Yesu lu shin uwar la, Yehova nder un shin ku a hingir or u ken jijingi, u lun a mtsôr. (Mbaromanu 6:9; 1 Peteru 3:18)  Sha u maan jighjigh u nan ken mnder u shin ku yô, Yesu ande hen mbahenen nav sha ashighe kposo kposo aa iyol i or, hen shighe ugen la ve kuma iyenge 500 kua mba hemban nahan je kpaa. Mô ken mban ne, shin apostoli Paulu u yange m-ande u Yesu ken iengem pir un ashe la kpaa, lu a ityôkyaa i hunan ivande na i mnder u shin ku la ga.—1 Mbakorinte 15:3-8; Aerenakaa 9:1-9.

³⁹ Ayange nga karen 40 yô Yesu u i nder un shin ku la kôndo yem shaala sha ishigh ki Aôndo, sha u una za na injar i vough i̱ nagh nagh ku sha iyol la sha ci u mpaa u uumace yô. “Un yô, A va na nagh môm tseegh sha ci u asorabo, maa A za tema sha uwegh ku yanegh ku Aôndo gbem. Ngu masen keghen zan zan á va gema mbaihomov nav vea hingir Un kwagh u pendan angahar a Na sha mi.” (Mbaheberu 10:12, 13) Mba hiihii mba á paa ve sha ipaan ne yô ka “anikumuile u kpeghee” u Mbakristu mba nan jighjigh “mba ve lu ior i Kristu” la. (Luka 12:32; 1 Mbakorinte 15:22, 23) Mban “ka mba i paa ve ken ior” yô, man sha nahan yô ken mnder u shin ku la ve hingir mba ken jijingi mba lun vea Kristu imôngo shaala. (Mpase 14:1-5) Nahan cii kpaa, zege ikpelaior i i yav i lu shin iwar ve hegen kpenegh la di ye? Shighe u yange lu shin tar ne la, Yesu yange kaa er Ter na na un tahav mbu ôron ijir man mbu nan uma kpaa. A seer er: “Kwagh ne a̱ de kpiligh ne iyol ga, gadia shighe ngu van u mba ve lu shin iwar [i m-umbur, NW ] cii vea ungwa imo Na, vea due kpaa; . . . ken mnder.” (Yohane 5:26-29) Una hide a mban uma ken tar u Paradiso la.

 ⁴⁰ Ver ase ikav sha mkaanem ma Yesu mara, “Kwagh ne a̱ de kpiligh ne iyol ga.” Nahan je kpaa, a er nan ve or u nan kpe ica i gbe yum la á fatyô u saghen nan ken ku shi hiden a nan uma? Iyol i nan hingir vuulevu gaa? Avur a genegh a yange lu iyol i nan la alaghga a sough á nyôr ken akaauma a genegh, anza er imendenev man ishôso nahan. Nahan cii kpaa, mnder u shin ku yô ka u hiden a mbamlu mba iyolough mbara heregh kpôô kpôô ga. Inja na yô Aôndo una hide una gba or shon la, a mlu u nan la her vough. Una er iyol i he sha akaa a shin inya la, man ken iyol la una ver mbamlu mba nan her vough, mbamlu mba nan mba yange i fa nan a mi la kpaa vough, m-umbur kpaa her vough, ieren i uma i or la yange nan lu a mi cii man shighe u ku u nan la.

⁴¹ Alaghga kwagh vande eren we nahan er iyou you i yange i doou ishima kpishi yô i̱ hia i̱ haa inya. Nahan cii kpaa, ú fatyô u hiden maan iyou shon her vough, sha ci u mlu u i̱ u doon we ishima la cii ngu ken ityough you heregh waeng. Nahan, mimi je, Aôndo u á lu Orhiin kwagh u m-umbur ne una fatyô u hiden eren ior mba ve lu ken m-umbur na yô sha ci u ve doo un ishima. (Yesaia 64:8) Ka nahan ve Bibilo i̱ yer ishemberkwagh er “iwar [i m-umbur, NW ]” ye. A va kuman shighe u Aôndo á ver er una hide a mbakpenev uma yô, una er ivande la, di vough er yange er ivande sha u gban or u hiihii la nahan, kpa kwa ne yô una er i̱ kwa kimbir kimbir.—Genese 2:7; Aerenakaa 24:15.

⁴² Aôndo una hide uumace a uma, a ian i kera kpen karen sha tar kera mayange ga. Kpa á fatyô u van a uma u tsôron shin tar nena? Á fatyô sha ci u ka ishima i Aôndo kua awashima na kpaa. (Yohane 6:37-40; Mateu 6:10) Ityôkyaa i or ka nan kpe shin tar nyian yô ka sha ci u yange nan ngohol dyako u ku hen Adam. Nahan cii kpaa, aluer se nenge akaa a kpilighyol kposo kposo a shin tar a yange i wa ishima er or nana ember la  yô, anshighe u lun uma u yinan anyom deri la a ndahar je gande ikyaa inya! Er lu nan tar ne hen ônov mba iorov yô, Aôndo yange wa ishima er or nana za hemen u lun uma sha er nana ember ken mdoom ma akaa a Á gbe la, sha anyom deri tseegh tsô ga, shin anyom dubu tseegh tsô kpaa ga, kpa i lu gbem sha won!—Pasalmi 115:16; 133:3.

Gomoti u Vough u Bem

⁴³ Sha ci u mbamaren asev mba hiihii mbara yange ve venda tindi u Aôndo yô, gomoti u ior hingir sha ikyev i Satan. Sha nahan yô Bibilo i̱ yila Satan er “aôndo u tar u ainge ne.” (2 Mbakorinte 4:4) Ityav, afer, anzaabo, man anzughul a ugomoti mba iorov la tese je er ngu. Mzough u Ityar Sha won cii man Mzough u Akuraior la ve kanshio u van a bem ken atô u anzughul ne. Uumace mba vaan sha u ma ve zough a gomoti u bem yô. Ka a inja u henen er, Orgban, u a we ishima u hiden a Paradiso shin tar ne la, una kanshio u van a gomoti u vough sha ci u Paradiso shonoo? Ka kwagh u Yehova á we ishima u eren vough je la. Tor u una hemen sha ci Na ken gomoti la ka “Wantor u Bem,” Kristu Yesu, man “mseer u tarkuran kua bem vea lu a ikighir je ga.”—Yesaia 9:6, 7.

⁴⁴ Bibilo i̱ tese er gomoti u vough la una lu sha. Hen ijiir i lun tseer tseer ne, Tor Yesu Kristu una hemen tar cii ken perapera. U seer yô, una lu a mba wasen un hemen ken gomoti u a fatyô u nengen a mi ga, u a lu sha la. Mban i tsua ve ken atô u uumace mba nan jighjigh, mbadondon mba Yesu mba yange ve lu a na ken hanma ameen cii mba a kaa a ve nahan la er: “M ver ne tartor er Terem kpa A verem nahan.” (Luka 22:28, 29) Ka ior kpeghee ken atô u uumace i tsough ve sha u ve̱ za hemen vea Kristu Yesu ye. Ka kwagh môm hen akuraior nyian, e̱r ka i lu iorov kpeghee tseegh ka i tsua sha u ve̱ lu mba wan atindi shin mba hemen shin tine la nahan. Bibilo i̱ tese er Yesu Kristu una lu a mba hemen vea na iorov 144,000 tseegh. Nahan Tartor u Aôndo, shin gomoti u sha la, ka Kristu Yesu kua  iorov 144,000 mba a tôô ve shin tar a yem a ve sha yô. (Mpase 14:1-4; 5:9, 10) Man tar di ye? Pasalmi 45:16 ôr kwagh kaa er Tor la una ver “mbatarev sha won cii.” Ior mba vea lu “mbatarev,” shin mbatomov mba gomoti la, á lu sha á tsua ve ye sha ci u ishimaveren ve i taveraa sha atindi a perapera la.—Kar Yesaia 32:1.

⁴⁵ Ka hanma shighe man ka inja nena a ver gomoti u vough ne? Shighe u Yesu yange lu shin tar la Tartor ne lu itinekwagh i hemban cii i kwaghpasen na. (Mateu 4:17; Luka 8:1) Nahan cii kpaa, yange ver Tartor shon hen shighe la ga, shin sha shighe u mnder na shin mbakpenev la kpaa ga. (Aerenakaa 1:6-8) Shighe u yange hide kôndo yem sha la je kpaa, yange gba u una kegh shighe u Yehova a ver la. (Pasalmi 110:1, 2; Mbaheberu 1:13) Kwaghôron u profeti ken Bibilo tese er shighe u i ver la yange va ken inyom i 1914 C.E. Nahan cii kpaa, alaghga orgen nana pine er, ‘A u ma lu gomoti u vough yô, inyom i 1914 la yange i lu mhii u mseer u atsan shin tar ga he?’ Ka kwagh u a lu vough je la! Mve u Tartor u Aôndo la ngu a mzough ikua ikua a akaa a kpilighyol a ken anyom a a sember karen ne, er se nenge hegen nahan.

⁴⁶ Ken anyom 35 a yange kar cii man 1914 la, The Watchtower (hegen ka magazin u kwaghaôndo u i hembe samber a mi sha tar cii yô) lu vanden tesen uwegh sha 1914 er ka inyom i i tsegh i̱ ken akaaôron a Bibilo a  profeti yô. Akaaôron a profeti ne yange hii u ivin sha gbenda u vesen ken 1914. Môm ken ve yô lu kwaghôron u profeti u Yesu, u yange ôr ken anyom 1,900 a karen, sha kwagh u “ikav” i ia va ken mkur u tar u ainge ne man ia tese er mimi je un tema tor sha utaha hen ape a fatyô u nengen a na ga la. Er lu nan mbahenen nav ikar sha mpin u ve pine un sha kwagh u “ikav” la yô, a kaa er: “Ikurior igen ia mough ityav a ikurior igen; tartor ugen kpaa ua mough ityav a tartor ugen; ijen ia gba man ityartenger ia lu sha ajiir kposo kposo. Kpa akaa ne cii yô, ka a ka mhii u ican tsô.” (Mateu 24:3, 7, 8) Sha u ivin kwagh ne vough yô, ityav mbi tar cii mbi sha hiihii la yange mbi hii ken 1914, mbi va a mtim u hemba u ken ityav 900 mbi i vande nôngon ken atô u anyom 2,500 a karen la jimin cii yô! Atsan za hemen hii shighe la zan zan je. We ú nenge a mtim u ityav mbi ve a mi, m-ban u kwaghyan, shin môm ken uzege mba ityartenger i i tser tar hii ken 1914 la kpa? Aluer wea nenge a mi yô, we kpaa ú nenge a “ikav” i “shighe u mkur” u tar u ainge ne.—Daniel 12:4.

 ⁴⁷ “Ican” la i seer hen shighe u Ityav mbi Tar Cii mbi sha II, mbi yange mbi va a mtim hemba Ityav mbi Tar Cii mbi sha I la kwa nyiin, man i̱ za hemen zan zan va ar hen ayange a ikyav mbi uityaav mbi bughur yemen ca la, sha u seer ivin kwaghôron u profeti u Yesu la er: “Akaa a cieryol man uivande mba vesen kpaa vea due sha aôndo.” (Luka 21:11) Mseer u ipila man ifer, mvende u vendan atindi man ihyembeato i mbayev la, kua mseer u m-ban u mciviraôndo man ijimba la—akaa a cieryol ne cii yange i tsengaôron er aa lu ikav i “ayange a masetyô” a tar u bo ne.—2 Timoteu 3:1-5; Mateu 24:12.

⁴⁸ Nahan cii kpaa, aluer yange i ver gomoti u sha la ken 1914 yô, er nan ve ican i lu shin tar imba ne yum nahana? Ka Satan Diabolo a lu van a i̱ ye. Yange Kristu ngohol tahav mbu Tartor yô, kwagh u á hii eren yô lu u nôngon ityav a Satan shaala hen ape se fatyô u nengen a min ga la. Kwagh u yange due ker yô, Satan, “u a lu tsughun tar cii la,” i gbihi un shin tar a mbatyomov nav cii a na imôngo. Er á fe er mtim na mgbôghom yô, ka a va a mbamzeiyol mba vesen shin tar. Hegen yô “kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô.”—Mpase 12:7-9, 12.

⁴⁹ Akaatseren ne aa lu a mkur je kpa? Een!—shighe u gomoti u sha, Tartor u Aôndo Uhembanagee, ua yar tom yô “u á tim mba ve lu vihin tar la kpaa.” (Mpase 11:18; Daniel 2:44) Mayange Aôndo una kera na ma tahav mbu pati, Mbakristu mbaaiev, shin nyityo or ugen er nana vihi tomavee na, tar ne, sha ikyav vev mbi uityaav mbi bughur yemen ca la ga. Kpa, a gema a kaa er: “Awashima Wam yô, ka u kohol akuraior, sha u Me kohol ityartor ijiir i môm, sha u Me haa iyugh Yam sha a ve, ka ishimavihin Yam cii je la.” (Sefania 3:8) Yehova, sha ikyev i Kristu na, una  yar tom aa zege utaha na u a kôron tar a mi la sha u timin mba ve dondon Satan sha tar la cii vindi vindi. Kwagh ne una lu sha tar cica cii, una tser tar vough er Mngerem ma deemee ma sha ayange a Noa la nahan.—Yeremia 25:31-34; 2 Peteru 3:5-7, 10.

⁵⁰ Ken Bibilo yô mtim u ityar i aferegh ne mba yer er ityav mbi Aôndo mbi Armagedon. (Mpase 16:14-16) Ka ior mba asemaleghlegh tseegh, mba ve lu keren Yehova man perapera kpaa la, vea war Armagedon vea nyôr ken tar u bem u Aôndo la ye. (Sefania 2:3; Yesaia 26:20, 21) Hen mban yô Bibilo i̱ kaa er: “Kpa mbaasemaleghlegh yô, vea ya dyako u tar, á saan ve iyol sha mngee u bem.” (Pasalmi 37:11) Tsô zege tom u hiden a Paradiso shin tar la una hii!

Ityesen i Nyôron ken Paradiso

⁵¹ We ú soo u lun ken Paradiso kpa? Aluer ú na ikyar wer ‘Een’ yô, á saan we iyol u fan wer zum u Yesu ôr kwagh u mbamzeiyol mba tar u nyian kua kwagh u “ikav” i mgbôghom u mtim u ú la, shi yange seer wener, “Kov ne ua lu a kar kera ga saa akaa ne cii aa er ve.” (Mateu 24:34) Nahan cii kpaa, ka kwagh u kôron kunya kpishi sha u fan er ior kpishi nyian mba sha gbenda u gbanger u u yem ken mtim la. (Mateu 7:13, 14) Shighe kera shi her vese u vea gema asema ga. Ú fatyô u lun a ishughun sha er Yehova á ne icin-tan sha shighe vough yô! Er Yehova á  soo er u̱ zua a uma yô, una waseu sha er ú er akaa a a lu vough yô.—2 Peteru 3:9; Esekiel 18:23.

⁵² Kwagh u a hembe lun hange hange sha ci wou hegen yô ka u we zuan a mfe u vough la. (1 Timoteu 2:4; Yohane 17:3) Ka han ú zua a mini? Ka u a fatyô u gban zuan a mi ken hanma kwaghaôndo tsô shinii? Ior mbagenev ka ve kaa er hanma kwaghaôndo cii ka ijiir i môm una za kule ye, di vough er hanma hwange sha uwo u yem sha ityough nagh nahan. Mba ken mtsum tsô! Sha u zuan a hwange u u lu shami la yô, mba unden iwo ka ve lu a takerada u tesen mkôngom la, shi ka ve lu a mba tesen ve gbenda kpaa. Sha gbenda shon môm, kwaghaôndo u mimi ngu di môm tsô u una fatyô u yemen a or ken uma u tsôron yô, man gba u a ngohol mkôôm sha er a zua a mi yô.—Aerenakaa 8:26-31.

⁵³ Mbashiada mba Yehova nger antakerada ne sha u a̱ waseu yô. A vande wasen we u fan mimi u akaa a kiriki agen a ken Bibilo, shin a waseu ga? Akperan nga ga we kpa u lumun iyolyou wer hanma kwagh u a ôr cii yô ka ken Mkaanem ma Aôndo a ne i nger yô. Hegen ne, sha u ú vese ú a̱r sha isharen you yô, saa ú za hemen u henen kwagh. Di vough er i lu keng u zuan a mfe u takerada u a kom sha u or nana zua a ijiir i injaa ken tom u eren hen atô u ior hanma iyange nahan, kape mfe u vough u Bibilo kpaa a lu keng sha u una na or nana kuma vough sha u nyôron ken nongoior u ua war ua lu ken tar u Paradiso je la. (2 Timoteu 3:16, 17) Alaghga Satan una nôngo u danen we sha u nan sha er mba ve lu azende a ou a̱ hendan a we shin sha u meen we nyôron a mi ken isharen i uyôughyôugh mbaakaav shin akaa a jimbagh. De ne Satan ian ga. Myom wou man mlu wou u ken hemen kua u tsombor wou cii har sha u we henen Bibilo zan a za hemen la.—Mateu 10:36; 1 Yohane 2:15-17.

 ⁵⁴ Dugh u we zan hemen a Bibilo you i henen la kera yô, gbenda ugenegh kpaa ngu u henen kwagh. Ior mba hen ningir wou mba ityesen i ken Bibilo la i sar ve yô mba ze mbamkombo hen Iyou i Tartor i i lu her la hanma shighe. Mba ve ze her cii ka ve za sha u vea za ngohol kwaghwan u ken Bibilo yô man mba nôngon tsung sha u hingir ior mba dedoo. Ka ve ngohol mba van hegh mbara fese je, ve kaa a ve er, “Va sé kôndo nen sha uwo u TER [ijiir i civir un] . . . A̱ tese se igbenda Na, se kpaa sé zende sha igbenda Na.” (Yesaia 2:3) Atôakaa a dedoo a zan mbamkombo mba Bibilo la i pase á ken Mbaheberu 10:24, 25, hen ape i kaa nahan la er: “Sé wa nen ayol a ase iko, sé taver nen ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i̱ seer eren nahan er ne nenge iyange la i lu mgbôghom yô.”

⁵⁵ Er ú lu kohol imôngo a nongoior u Yehova yô, ú kav wer mlu ve la ngu kposo a u ken utempel kua mbaadua la. Mba nyohon zwa sha u zamber inyaregh ga, u kaan a ior shin zwa zôhôn kpaa ga, shi mpav sha ci u tsombor u or nan dugh ker shin mlu u inyar u nan kpaa ngu je ga. Kwagh u a hembe lun tseer tseer ken Mbashiada mba Yehova cii yô ka dooshima. Hiihii yô, Yehova doo ve ishima, man u sha uhar yô, ior mbagenev kpaa doo ve ishima. Ka akav a Mbakristu mba mimi je ne. (Mateu 22:37-39; Yohane 13:35) Doo u ú za mbamkombo vev sha er ú nenge kwagh ne iyolyou yô. Akperan nga ga mzough u ve lu a mi la una doou. Mbashiada hemba umiliôn unyiin hegen sha tar cii ken ityar hemba 200. Nahan kpaa, Mbashiada sha tar cii mba dondon kwagh henen inja i môm ken mbamkombo vev cii. Man er i gberen ityakerada ken ijô kpishi sha shighe môm yô, ken mbamkombo vev mba ken hanma sati la Mbashiada mba Yehova kpishi sha tar cii ka ve hen atôakaa inja i môm  ken Icighanruamabera i nôngo u lun sha shighe môm a mkposo u mbaahwa kpeghee hen atô ve. Mzough u nongoior u Yehova la ka ivande sha ayange a nyian ken tar u u pav ker yum ne.

⁵⁶ Er ú za hemen u kohol imôngo a ior mba Yehova yô, a gba u ú haa “orhe iyol” shi ú ume ityamegh ki jijingi u Aôndo—“dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.” (Mbakolose 3:10, 12-14; Mbagalatia 5:22, 23) Kwagh ne una vaú a mkom kpishi. Alaghga mbamzeiyol vea lu mba ú nôngo a mi sha ashighe ashighe sha er ú lu ken tar u u vihi tsung ne yô man sha ci u mbamyina ou kpaa. Kpa Yehova una wase u. Mkaanem nav ma na ishima taver hen mba ve lu nôngon sha mimi u vea er ishima na yô er: “Ishima i de nyian ne sha ma kwagh ga, kpa akaa a a gbe ne la, Aôndo A̱ fa a ken hanma kwagh cii sha msen man sha mzamber a ishughun, man bem u Aôndo u a gande hanma mfe wase cii una kura asema a en man mbamhen enev ken Kristu Yesu ye.” (Mbafilipi 4:6, 7) Dooshima u Yehova una udugh we, nahan we kpaa ú soo u eren ishima na. Á saan Mbashiada mba Yehova iyol u tesen we er ú er ve ú na uma wou hen Aôndo u dooshima ne man ú hingir u zuan a ian i civirigh i lun môm ken mbashiada nav yô. (Pasalmi 104:33; Luka 9:23) Een, ka ian i civirigh je. Hen ase yôô! Er ú lu or u civir Yehova yô, ú fatyô u nyôron sha ian i zuan a uma u tsôron ken tar u paradiso shin tar heen.—Sefania 2:3; Yesaia 25:6, 8.

⁵⁷ Yô, za ase hemen, u henen man u vesen ken dooshima man iwuese you hen Yehova Aôndo, Wan na, man gomoti u sha u perapera la. Er lu pasen kwagh u gomoti u Aôndo man averen a una haa sha uumace yô, kwaghôron u profeti u ken Bibilo kaa er: “Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve.”  “Aôndo iyol Na,” u á tav á hembe hemen u or u vihin, wan kangegh yum nyian ne, una lu ikua ikua sha inja i Ter u lun a mhôônom ma zungwen hen mba ve lu a dooshima her a na man ve civir un cii ken msertar u he la. Sha mimi yô, kwaghaôndo una lu môm tseegh, á lu mcivir u mimi u Yehova Aôndo, man mba civir un vea lu ishima i môm kangenaan er mbayev ka ve lu a mi hen Ter ve nahan. Una tese iyolna er un lu Ter u dooshima yô! “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.

⁵⁸ Kape zege ivande i van aa tar u paradiso sha ikyev i gomoti u sha u vough la ia iv ne. Ka kwagh u una iv keng yô vough er i lu keng u kper iyange ia due shi ia mire nahan. Sha ci u hanma shighe cii uityendezwa mba Yehova Aôndo, Orgban u sha man tar la, ka akaa a “jighjigh man ka a mimi kpaa.” Ka un a yee sha ikônough ki torough nagh shaala ye er: “Nenge! M ngu geman akaa cii hingir a he.”—Mpase 21:5, NW.

Sha u kimbirhenen antakerada ne asav asav yô, ú na ikyar sha mbampin mban nena?

Ka sha igbenda i nyi Bibilo i̱ lu kposo?

Kanyi ú hen sha kwagh u Aôndo?

Ka an nan lu Kristu Yesu?

Ka an nan lu Satan Diabolo?

Ka sha ci u nyi Aôndo á ne aferakaa iana?

Er nan or ka nan kpe?

Mlu u mbakpenev ngu nena?

Kanyi i lu ipaan-a?

Ka hana man ka inja nena mnder u shin mbakpenev la una va?

Tartor la kanyi, man ua er nyi?

Kanyi i lu “ikav” i “mkurtara”?

Ú wa ago iyol sha ci u uma u tsôron ken Paradiso nena?

[Footnotes]

[Study Questions]

1-4. (a) Ka anzaakaa a nyi ken foto u á lu sha igbende i antakerada wase ne á doou u nyôron iyol kimini? (b) Kanyi ian i iengemegh i lu sha ci wou heene? (c) Ka avur a ken Bibilo a hana á ne ishuen sha imba ishimaverenkeghen laa?

5. (a) Ka hanma takerada ú pase akaa nee? (b) Ka sha igbenda i nyi takerada ne ú hembe?

6. Kanyi i ne Bibilo i̱ hembe ityakerada i i kaan er ka í tseghan laa?

7. Kanyi mbakavenkwagh ve ôr sha Bibilo?

8, 9. (a) Ka sha ci u nyi i lu shami ga u yilan Bibilo er ka takerada u ken Tar Butere? (b) Yange í nger Bibilo nena, man yange tôô shighe nena? (c) Ka sha nyi a fatyô u yilan Bibilo er ka ijiir i koson ityakerada? (d) Ka iorov ume yange i yar tom á ve sha u ngeren Bibilo? (e) Kanyi shiada u ken igbar yange mbagenev ken ior mban ve na sha kwagh u hen Ijiir i Bibilo i̱ dugh laa?

10. (a) Bibilo i̱ va zan zan i̱ va a̱r hen ayange a ase nena? (b) Ka sha ci u nyi se fatyô u nan jighjigh ser se mba a ngeren u Bibilo u yange i nger sha hiihii laa?

11. Ka mbamkav mba ainge mba nyi ve lumun a kwagh u Bibilo i̱ nger laa?

12. (a) Mba lamen daeng mbagenev ka ve kaa er nyi sha kwagh u Aôndo? (b) Er nan Bibilo i̱ yer Aôndo er Tere? (c) Bibilo i̱ tese er iti i Aôndo ka ana?

13. Ka sha igbenda ihar i nyi Yehova a pase iyolna hen uumacee?

14. Kanyi Bibilo i ôr se sha kwagh u Yehova?

15. Akaahenen sha kwagh u igbetar a mbakavenkwagh la á va a mbamkur mba nyi?

16. Tar cii u pase kwaghfan u Aôndo sha mgbe u akaa man agee na nena?

17. Er nan í lu aa inja u nan jighjigh ken Orgbana?

18. Kanyi i̱ tese er Aôndo ka or, man á kuma iwuese?

19. (a) Ka sha ci u nyi ma tar môm tsô kpaa ua fatyô u kaan er ka Aôndo á ne ú mhembe ken uitya nyian ga? (b) Er nan ve Aôndo á lu aa uwegh ken ityav mbi akuraior ga?

20. Kanyi i̱ tese er Mbakristu mbaaiev ka mbakristu ga man shi mba vende Aôndo?

21. Er nan i lu a inja u hunan uivande mba Aôndo ga?

22. Pase kwagh u Aôndo gba hiihii la.

23. (a) Á fatyô u pasen mlu u Aôndo vea Wan na nena? (b) Yehova yange gba nyi sha ikyev i Wan naa?

24. (a) Kanyi kwagh Yehova á gbe shin tar i̱ hembe ciili, man ka sha nyi igbenda? (b) Er nan i lu mhen u sha mlan u kaan er or gbaduen tsô ken ishôso?

25, 26. (a) Ka ian i vesen i nyi yange i ver sha ci u oro? (b) Er nan mngee u ior shin tar una va lu kwagh u zan iyol ga?

27. Ka mbampin mba nyi i gbe u a na ikyar shami hegene?

28. Yange ihyembeato i̱ nyôr ken sule u Paradiso la nena?

29. (a) Ka atôakaa a nyi yange due sha u a nenge sha mini? (b) Aôndo tagher ishigh a imbwase la nena? (c) We ú wa uwegh sha u nan ikyar sha ilyahan i Satan nena?

30. Icighanruamabera i̱ kaa er nyi sha kwagh u injar i i ve sha or sha ci u ihyembeato laa?

31. Isholibo kanyi, man i̱ va a nyi hen uumace?

32. Bibilo i̱ pase er yange se ngohol dyako u ku nena?

33. (a) Kanyi iengem i lu ken hemen sha ci u uumace man tar nee? (b) Ka akaa atar a nyi Yehova a er sha ikyev i Wan naa?

34, 35. (a) Ka sha nena tseegh a fatyô u paan or ken ku? (b) Ipaan kanyi?

36. Yehova yange na uma u or u vough sha u a̱ lu ipaan nena?

37. Yesu yange tese dooshima na hen uumace mba uma a sar ve mbara cii nena?

38. Yange i hide Wan u Aôndo a uma heregh nena, man kanyi i tese kwagh nee?

39. (a) Yesu yar tom a injar i nagh nagh nena, man hiihii yô lu sha ci u unô? (b) Ka ivande igen i nyi yange Yesu ôr kwagh shamini?

40, 41. (a) Pase inja i kwagh u “mnder” la. (b) Ka sha ci u nyi se fatyô u nan jighjigh ken ityendezwa i Aôndo sha kwagh u mnder laa?

42. Er nan uma u tsôron shin tar a lu kwagh u una fatyô u eren keng a u bunden shio?

43. (a) Kanyi kwagh á gbe sha gomoti u vough laa? (b) Awashima u Yehova sha kwagh ne kanyi?

44. (a) Gomoti ne una lu hana? (b) Mlu na una lu nena?

45, 46. (a) Kanyi yange i lu itinekwagh i hemban cii i kwaghpasen u Yesu shin tar nee? (b) Er nan yange i ver gomoti u vough la fese je ga? (c) Ka sha nena 1914 C.E. yange lu inyom i tseer tseer sha kwagh u profeti man ken akaa a taregh-a?

47. Ken anyom a a sember karen ne akaa a ivin “ikav” la seer a seer nena?

48. Ka an nan ve a akaa a tseren ior shin tara, man er nan ve á seer hii ken 1914 la je?

49. (a) Kanyi ia e̱r mba ve lu “vihin tar la”? (b) Yehova una kule “awashima” na u ijirôron sha akuraior nena?

50. (a) Kanyi i lu “Armagedon”? (b) Ka unô tseegh vea war Armagedon shono?

51. Er nan i lu hange hange u ú yar tom sha kwagh ne hegen je?

52. Kanyi i gbe i ú zua a mi sha u ú tsua kwaghaôndo sha mfe?

53. (a) Sha u zuan a uma u tsôron yô, kanyi i gbe u ú za hemen u erene? (b) Ka ameen a Satan a nyi alaghga á gba u ú hemba á?

54. Ka iwasen igenegh i zuan a mfe i nyi Yehova a ver hen ningir wouwe?

55. (a) Ka sha igbenda i nyi nongoior u Yehova ú lu kposo a igeneghe? (b) Mzough u Mbashiada mba Yehova ngu kposo a u ior mbagenev nena?

56. (a) Ka iwasen i nyi ú zua a mi sha u nyôron nongo a nongoior u Yehova? (b) Shighe u mbamzeiyol ve ve yô, doo u ú er nena? (c) Er nan i lu a inja u tseghan uma wou sha ci u Yehova?

57. (a) Ken msertar u he la, kanyi mlu u biishii una lu hen atô u Aôndo man uumace? (b) Ka averen a nyi nahan ú fatyô u va ember hen shighe laa?

58. Er nan ú fatyô u nan jighjigh wer Yehova una ‘gema akaa cii a hingir a he’?

 [Pictures on page 2]

 

UNITED STATES

AUSTRALIA

BRITAIN

GERMANY

BRAZIL

JAPAN

ITALY

CANADA

[Ufoto u sha peeji 13 la]

Sha mlu u igbetar yô, or hemba ishôso ca je

[Ufoto u sha peeji 18 la]

Yesu yange lu kwagh môm a Adam or u vough la