Ka hanma shighe nahan i doo u kasev mba ken Kristu vea kange ityough zum u ve lu civir Aôndo, man ka sha ci u nyi? De se time sha kwagh u icighan jijingi yange na apostoli Paulu nger sha ikyaa ne la. A tese kwagh u una wase se se tsua kwagh u , u una na Aôndo icivir yô. (1 Mbakorinte 11:3-16) Paulu tese akaa atar a i gbe u se time sha mi yô: (1) ityom i kwase nana eren ve nana kange ityough yô, (2) Ajiir a nana lu ve a gba u nana kange ityough yô, man (3)mbaawashima mba nan sha u dondon kwaghwan ne.

Ityom. Paulu ter ityom ihiar: msen man u ôron kwaghôron u profeti. (Ivur 4, 5) Msen ka iliam i lamen a Yehova sha icivir. Nyian ne, u ôron kwaghôron u profeti la a fatyô u lun hanma tom u Orkristu nan er u tesen ior Bibilo cii. Nahan Paulu ngu kaan ér hanma shighe u kwase nan lu eren msen shin nan lu tesen ior mimi u ken Bibilo yô, nana kange ityough shinii? Ei. Ka ijiir i i gbe u nana er msen shin nana tese or la ia tese aluer ka u nana kange ityough shin nana kange ga ye.

 Ajiir. Mkaanem ma Paulu man tese ajiir ahar a i gbe u nana er kwagh ne yô, ka hen tsombor man ken tiônnongo. A kaa ér: “Ityough ki kwase yô, gema ka nom . . . Hanma kwase u nana eren msen shin nana ôron kwaghôron u profeti man nan cir kwagh sha ityou ga yô, nan ngu heen ityough ki nan je.” (Ivur 3, 5) Hen tsombor yô, ka nom Yehova a ver ér nana lu ityough ki kwase ye. Aluer nan kar nan za er ityom i Yehova a ne nom u nan la, kpa nan gema nan er kwagh u tesen ér nan kav hemen u nom u nan ga yô, nan hee nom u nan. U tesen ikyav yô, aluer gba kpee u nana hen Bibilo a or hen ijiir i nom u nan a lu yô, doo u nana tese icivir sha hemen u nom u nan sha u kangen ityough. Aluer nom u nan la er batisema shin nan ngu a er ga je kpa, gba u nana kange ityough, sha ci u ka nom u nan a lu ityough ki tsombor ye. * Shi zum u nan lu henen Bibilo a or hen ijiir i wan u nan u nomso u nan er batisema nan lu her kpa nana kange ityough, sha ci u wan u nan la ngu ityough hen tsombor yum ga, kpa ka sha ci u tahav mbu i ne nomso mba ve er batisema ken nongo u Kristu la.

Paulu ôr kwagh u tiônnongo ér: “Aluer ma or wa anyiman yum yô, se yô, se mba a imbaieren la nahan ga, shin iniongo i Kristu i Aôndo kpaa ga.” (Ivur 16) Ka nomso mbaiorov mba ve er batisema i tsough ve ér ve lu ityough ken tiônnongo ye. (1 Timoteu 2:11-14; Mbaheberu 13:17) Ka nomso tseegh i ne ve mbatamen man udiakon shi i ne ve tom u nengen sha ikyumile i Aôndo ye. (Aerenakaa 20:28) Nahan kpa ashighe agen, alaghga a gba u kwase Kristu nana er tom u i lu nomso mba eren batisema mba ve kom la tseegh ve eren yô. U tesen ikyav yô, alaghga a gba u nana hemen mkombo u duen kwaghpasen zum u nomsoor u eren batisema u nan kom nan lu ga yô. Shin nana hen Bibilo a or hen ijiir i nomsoor u nan er batisema nan lu yô, kpa ka zum u nan vande kaan a or la ér nana hen kwagh a nan tseegh. Er akaa ne a gbe a zough vea nongo u Kristu yô, gba u kwase nana kange ityough sha u tesen ér nan kav er nan lu eren tom u i gbe u nomsoor nana er yô.

Nahan kpa, avegher a mcivir agen nga a i gbe u kwase nana kange ityough keng keng ga yô. U tesen ikyav yô, saa nana  kange ityough zum u nan lu nan mlumun ken mbamkombo mba Mbakristu shin shighe u nan dugh kwaghpasen vea nom u nan shin ma anmgbian u nomso u nan er batisema ga; shi zum u nan lu henen Bibilo a ônov mba nan mba ve lu a er batisema ga shin nan lu eren msen vea ve kpa saa nana kange ityough ga. Nahan kpa, alaghga mbampin vea due sha kwagh ne, man aluer anmgbian u kwase nan fa kwagh u nana er jighilii ga yô, nana̱ seer timen sha mi ken ityakerada yase. * Aluer nan time sha mi kpa wanger nan ga, man imoshima i nan kaa a nan ér nana kange ityough yô, kwaghbo ngu sha mi ga.

Mbaawashima. Ivur i sha 10 la tese atôakyaa ahar a aa na ve kwase u ken Kristu nana soo u kangen ityough yô, ér: “Kwase nana̱ lu a ikyav i utaha sha ityou kpee sha ci u mbatyomov mba Shaav.” Hiihii yô, ver ishima sha ishember i “ikyav i utaha” la. U kangen ityough la ka gbenda u kwase tesen ér nan kav tahav mbu Yehova a ne anmgbianev mba nomso mba ken tiônnongo mba ve er batisema la. Aluer nan er nahan yô, nan tese ér Yehova Aôndo doo nan ishima shi nan dondon atindi a na sha mimi kpaa. Ityôkyaa i sha uhar la ngi ken ishember i i kaa ér “sha ci u mbatyomov” la. Kwase ka nana kange ityough yô, kwagh la a bende a ior mba ageegh mba ken jijingi mban nena?

Sar mbatyomov mba shaav tsung u nengen ér i dondo hemen u Aôndo a ver ken nongo u Yehova jimin cii, sha man shin tar la. Shi ikyav i uumace mba ve yen mban ve ver i dondon kwaghwan ne la i wasen ve kpaa. Gadia gba u ve kpa vea wa ayol a ve sha ikyev i Yehova; kwagh ne lu ikyaren i mbatyomov kpishi yange ve gba sha ayange a tsuaa la yô. (Yuda 6) Alaghga mbatyomov vea nenge a kwase Kristu u nan hembe lun a mfe a nomsoor u ken tiônnongo u nan er batisema yô; nahan kpa nan wa iyol i nan sha ikyev i  hemen u nomsoor shon. Ashighe agen je yô, kwase la ka nan lu môm ken mba i shigh ve mkurem mba vea za tema tor vea Kristu la. Ken hemen yô, imba kwase la nana za lu sha ian i i hembe i mbatyomov ve lu sha mi la kpaa yô; nana za hemen vea Kristu sha. Ka ikyav i dedoo hen mbatyomov mba ve lu kenger ve la kpen kpen! Sha kpôô yô, anmgbianev mba kasev cica cii mba a ian i tesen iyol i hiden a mi ijime sha ashe a mbatyomov mba jighjigh umiliôn imôngo mba ve lu kenger ve la sha ieren ve i wan ayol a ve sha ikyev i mba ve lu ityough sha a ve la!