Yehova soo ér mba ve vese ayol a ve la ve de vihin iceghzwa ve i ivesegh la ga. Shighe u Yehova zua nomsoor man kwase u hiihii la, a kaa ér: “Or . . . nan var ken kwase u nan, ve hingir iyôgh i môm.” Yesu kpa va ôr mkaanem man shi seer magenem kpa sha mi, wener: “Kwagh u Aôndo je zua yô, or a̱ de kera paven un ga.” (Genese 2:24; Mateu 19: 3-6) Nahan yô, Yehova man Yesu nenge ivaa ér ka kwagh u gbekeke u a kuren sha shighe u kwase shin nom nan sar ku tseegh yô. (1 Mbakorinte 7:39) Er ivaa i lu icighankwagh yô, ivaa paven ka beerkwagh ga. Jighilii yô, hanma ivaa paven i í lu sha gbenda u Ruamabera a tese ér i̱ paven ga cii yô Yehova soo ga.—Malaki 2:15, 16.

Ruamabera tese ér i̱ paven ivaa nena? Yehova kôr idya man ijimba i eren ihyom. (Genese 39:9; 2 Samuel 11:26, 27; Pasalmi 51:4) Idya vihi un ishima kpishi je, nahan á na ian ér ka idya tseegh i lu ityôkyaa i a fatyô u paven ivaa ye. (Wea soo u fan kwagh u a lu idya jighilii yô, nenge Ityough 9; ikyumhiange i sha 7 la pase kwagh u a lu idya yô.) Yehova na nom u kwase u nan shin kwase u nom u nan nan er idya la ian i lun vea nan her shin paven ivaa a nan. (Mateu 19:9) Nahan yô, aluer kwase shin nom u ishôôgh la pav ivaa la yô, nan er kwagh u vihin Yehova ishima ga. Nahan cii kpa, nongo u Kristu ngu taver or ishima ér nana za pav ivaa ga. Ashighe agen je yô, kwase shin nom u ishôôgh la ka nan nenge ér hemba doon u nana pav ivaa la ga, hemban cii je yô aluer ikyar u nan la gema ishima sha mimi yô. Kohol cii yô, nom shin kwase u nan lu a ian i paven ivaa sha gbenda u Ruamabera a tese la nana tsua kwagh u nana er la iyol i nan, shi nana lumun nyityôkwagh i ia due ken kwagh u nan tsough u eren la cii.—Mbagalatia 6:5.

Mbakristu mbagenev tagher a mbamzeyol mba vihin tsung ken ivaa ve, nahan ve undu noov vev shin kasev vev. Mbagenev pav ivaa ve, shin er or u ve vese la nan er idya ga nahan kpaa. Aluer kwase undu nom u nan shin nom kera ngu vea kwase u nan ga yô, Bibilo pase ér “nana̱ lu kwav, gayô nana̱ hime” a nan. (1 Mbakorinte 7:11) Orkristu u nan undu ikyar u nan la nan ngu a ian i hiden vôson orgen ga. (Mateu 5:32) De se nenge ase nen mbamzeyol mba vihin tsung mba mbagenev ve nenge ér ka atôakaa a aa na nom man kwase vea kera lu imôngo ga yô.

Aluer or venda u nengen sha tsombor u nan sha apera yô. Ashighe agen yô tsombor ka u kungu ican kpishi, u lu a kwagh u kuren mbamgbe mba hange hange ga, sha ci u nom venda u nengen sha kwase u nan man ônov mba nan yum, shin er nan lu a gbong gbong iyol nahan kpaa. “Aluer or nana kera nenge sha . . . mba ken ya u nan [ga yô], nan nyiman jighjigh u nan ve, nan hemba gban kera a or u nan ne jighjigh ga yô.” (1 Timoteu 5:8) Aluer imbaor la venda u geman inja i nan yô, kwase u nan la nana fatyô u undun nan  shin ngohol takerada u undun ivaa sha tindi la aluer nan soo yô, sha er nana kura iyol i nan shi nana nenge sha ônov mba nan kpaa yô. * Nahan kpa, shighe u i gbe ijir ér or ngu nengen sha tsombor u nan ga yô, doo u mbatamen mba ken Kristu vea tôv sha ikyaa shon vighe vighe sha er vea fa mimi u kwagh shon yô. Or u nan vende u nengen sha tsombor u nan cii yô a fatyô u dughun nan ken tiônnongo u Kristu kera.

Aluer nom nan ngu gbidyen kwase u nan coholoo shin aluer ka kwase nan lu eren nahan kpaa. Mbagenev ka ve gbidye kasev vev kpishi je ve vihi ve iyol shin i mase shin a shi u vea wua ve. Aluer imbaor la nan ngu Orkristu yô, mbatamen mba ken tiônnongo ve tôv sha kwagh ne. A fatyô u dughun or ken tiônnongo kera, sha ci u ishima i nyoon man ipila i eren hanma shighe la.—Mbagalatia 5:19-21.

Aluer nom ngu yangen kwase na shin kwase ngu yangen nom na u civir Aôndo yô. Ashighe agen yô, nom shin kwase ka nan zer eren akaa a yangen ikyar u nan u civir Aôndo sha mimi shin nan kighir nan sha apera ér nana per atindi a Aôndo. Zum u kwagh a lu nahan yô, alaghga nom shin kwase u i lu yangen nan u civir Aôndo la nana nenge ér doo u nana undu ikyar u nan shin nana ngohol takerada u undun ivaa sha tindi la, sha er nana “hemba ungwan imo i Aôndo . . . a imo i ior” yô.—Aerenakaa 5:29.

Shighe u mbamzeyol mba se er kwagh sha mi ne ve lu inya yô, or nana de kighir nom shin kwase u ishôôgh la ér nana undu ikyar u nan la shin nana lu vea nan her ga. Alaghga Mbakristu mba ve taver ken mcivir u Aôndo kua mbatamen vea wase amba ne shi vea wa ve kwagh ken Bibilo kpaa, nahan cii kpa or môm tsô nana fatyô u fan mzeyol u nom man kwase vindi viindi ga. Ka Yehova tseegh a fe hanma kwagh vindi vindi ye. Kpa, aluer kwase shin nom u ken Kristu nan kehe a mbamzeyol mba nan lu a mi ken ivese i nan la sha er nana zua a ityôkyaa i undun ikyar u nan yô, ieren i nan la ia va a icivir hen Aôndo shin sha ivaa i nan la ga. Or nana er ayom sha er nana undu ikyar u nan yô, Yehova fa hanma kwagh cii; nana̱ yer kwagh u nan er la kpile kpile kpa Yehova fa. Jighilii yô, “akaa cii nga gbar gbar, i tar a tar a kpaa sha ashe a Wen u kwagh a zough se a Na la.” (Mbaheberu 4:13) Kpa aluer mzeyol u vihin tsung la za hemen yô, or môm nana de puun Orkristu shin kwase Kristu u nan undu  ivaa i nan sha ci u nan kera fa kwagh u nana er ga la ga. Kohol cii yô, “se cii sé va tile sha ikyônough ki ijirigh ki Aôndo.”—Mbaromanu 14:10-12.