Hen Or u Soon Yehova:

Yesu yange kaa ér: “Né fa mimi, mimi kpaa una pase ne una tuhwa.” (Yohane 8:32) Mkaanem man ka ma taver se ishima kpen kpen! Sha kpôô yô, ken “ayange a masejime” a ican, a mbaaie ve ngee yum ne je kpa, mimi una hemba se u fan ga. (2 Timoteu 3:1) U umbur shighe u yange u hii fan mimi u i pase ken Mkaanem ma Aôndo la kpa? Yange saan we iyol je gande!

Kpa, er i lu hange hange u se lu a mfe u mimi shi se pasen ior mimi ne hanma shighe nahan, kape shi i lu hange hange u aeren a ase kpa aa zua sha mimi ne vough je la. Saa se za hemen u lun ken dooshima u Aôndo la ve se kôr cio u eren akaa a a zough sha mimi la ye. Se lu ken dooshima u Aôndo nena? Kwagh u Yesu yange ôr hen tugh mbu kpernan i wua un la na mlumun sha mpin ne. Yange kaa a mbaapostoli nav mba jighjigh mbara ér: “Aluer ne wa atindi Am ikyo yô, né lu ken dooshima Wam; er Mo kpaa M we atindi a Terem ikyo, man M luun ken dooshima Na nahan.”—Yohane 15:10.

Fa wer, Yesu lu ken dooshima u Aôndo sha ci u lu wan atindi a Ter na ikyo. Se kpa ka kwagh u i gbe u se eren nyian je ne. Aluer ka u se za hemen u lun ken dooshima u Aôndo yô, gba u hanma iyange yô se eren akaa a a zough sha mimi u se fe la. Hen tugh mbu shon la je Yesu shi kaa ér: “Aluer nea fa akaa ne, man nea eren sha mi yô, á saan ne iyol.”—Yohane 13:17.

Se mba eren msen ser, takerada ne u wase u za hemen u eren akaa a a zough sha mimi yô, nahan ‘lu ken dooshima u Aôndo a ishima i veren keghen uma u tsôron la.’—Yuda 21.