Apostoli Paulu ôr kwagh u mzeyol u anmgbianev mba ken Kristu yilan ajir ayol a ve ken mbaatejir la ken 1 Mbakorinte 6:1-8. Vihi un kpishi er Mbakristu mbagenev ken Korinte lu ‘za yilan ajir hen mbaaferev’ nahan. (Ivur 1) Paulu na atôakyaa a vesen a i gbe u Mbakristu vea za yila ayol a ve ijir ken mbaatejir ga, kpa vea sôron mbamzeyol vev ken tiônnongo yô. Se time nen sha atôakyaa agen a jijingi u Aôndo yange mgbegha Paulu nger mkaanem man yô, se been yô se nenge sha mbamzeyol mbagenev kpuaa mba kwaghwan na ne a bende sha mi keng ga yô.

Aluer anzughul due ken kpenga u se lu eren vea ma anmgbian wase u ken Kristu yô, kwagh u hiihii u se er yô ka u nôngon ser se sôr mzeyol shon sha gbenda u Yehova a soo la, a lu u wase ga. (Anzaakaa 14:12) Yesu yange pase wener, hemba doon u se hime iyongo fese cii man ia hingir kwagh u vesen ye. (Mateu 5:23-26) Kwagh er vihi yô, Mbakristu mbagenev ka ve ker ishô sha ikyaa i í lu inya la zan zan je ve hingir u za yilan ijir ken atejir. Paulu kaa ér: “Kwagh hemba ne a hemba je er ne lu a ajir ayol a en yô.” Sha ci u nyi? Ityôkyaa i vesen yô, alaghga ijir i ma anmgbian nan za yer la ia vihi iti i dedoo i tiônnongo kua Aôndo u se civir la kpaa. Nahan yô, se hen nen sha mpin u Paulu a pin heen ne: “Guda u ne gba ngohol ibo sha apera tsô gaa?”—Ivur 7.

Paulu shi ôr ér Aôndo tese tiônnongo gbenda u dedoo u sôron ayôôso. Mbatamen mba ior mba fan kwagh mba ken Kristu sha ci u mfe u ve fe akaa a mimi a ken Ruamabera la, nahan Paulu ôr ér vea “fatyô u ôron ikyaa i hen anmgbianev” sha “akaa a shin tar ne.” (Ivur 3-5) Yesu pase ér shighe u anmgbian nan er ugen kwaghbo, er angereke shin anyighe nahan yô, ve sôr mzeyol la sha u dondon igbenda itiar i í lu heen ne: hiihii yô, ve nôngo u himen iyongo la ve uhar tseegh; sha uhar yô, aluer ve nôngo kpa gba sha mi ga yô, ve yila or môm shin iorov uhar ve wase ve  u sôron mzeyol shon, man sha utar yô, aluer nahan kpa gba sha mi ga yô, i za a ikyaa shon hen tiônnongo u i lu mbatamen ve hemen la.—Mateu 18:15-17.

Nahan kpa, mbatamen mba ken Kristu ka mbafanatindi shin mbakpengav keng ga, shi ka tom ve la ga. Mba veren atindi a anmgbianev mba ayôôso a kpenga a gbe hen atô ve la vea dondo sha u himen iyongo ve la ga. Kpa ka ve wase anmgbianev mban u dondon kwaghwan u ken Ruamabera, nahan sôron mzeyol la ken bem. Zum u i lu mzeyol u taver tsung yô, mbatamen vea fatyô u zan idyu a ortamen u sôron atôônanongo shin ôron afishi a branci a Mbashiada mba Yehova kwagh sha mi. Nahan kpa, akaa agen nga a kwaghwan u Paulu ne a bende sha mi keng ga yô. Akaa shon yô kanyi?

Ashighe agen yô, ka a za a ijir hen atejir kpa i lu kwagh keng ga shin i lu di u eren kwagh u tindi a tese sha u kuren ikyaa ken bem tsô. U tesen ikyav yô, sha ajiir agen yô, alaghga ka atejir tseegh or nana fatyô u paven ivaa ker shin ngohol wan u nan ye. Shi ka atejir una fatyô u wan inyaregh ki nom nana na kwase u nan shighe u ve pav ivaa la ye, shin ngohol inyaregh hen kômpeni u ishiôlansi nan or ye. Shi aluer kômpeni gba yô, ka atejir ngu a tese mba ve kom u a kimbi ve inyaregh ye; shi ka atejir ngu a nenge sha takerada u karen dyako sha u pasen ér ka u mimi shin ka u mimi ga ye. Ashighe agen yô, a hingir hange hange u anmgbian nana za yila or u nan yer nan ijir la ijir sha er nana war iyol i nan yô. *

Aluer akaa angan nahan a za a mi hen atejir sha inja i kperan a kperan kwagh ga yô, alaghga mba ve ze a mi la mba vendan kwaghwan u Paulu ne keng ga. * Nahan cii kpa, i hemba gban Orkristu ishima u tseghan iti i Yehova shi van a bem man mzough ken tiônnongo kpaa. Ka dooshima a lu kwagh u vesen u i fe mbadondon Kristu a mi ye, man “dooshima . . . keren kwagh na iyol na tsô ga.”—1 Mbakorinte 13:4, 5; Yohane 13:34, 35.