Hen sha kwagh ne: Karen za pati ngu a shi her i kuma miniti pue ga je tsô a ungwa ikyenge i or u a fe nan yô, ken ijime na.

Karen gem yô, a nenge ijende na Jesika kôr akpe ahar a i sember bughun yô. Kenger yô, ka msôrom. Jesika kôr ikpe igen za Karen a mi sha zwa, maa kaa a na ér, “Uwe, u ngu wanyee, anzar u cuku kpa u bende ga ka nyi?”

Karen soo u vendan, kpa ngu nengen ér Jesika ka ijende na. Man Karen gema soo ér kwagh na a due ijende na ishima ga. Bee kera yô, a nenge ér Jesika ngu môm ken mbayevkasev mba un fe ve a inja i dedoo yô. Nahan aluer ngu man msôrom yô, tese ér msôrom ka kwaghbo joo ga. A kaa ken ishima na ér, ‘Ka di kwaghman tsô, ka mcimbim ma bom ga.’

A lu we nahan, u er nena hen shighe la?

Kwagh u una wase u u eren kwagh u vough hen shighe la nahan yô, saa u fa injaor i u lu la. Inja na yô, saa u umbur akaa a u ne jighjigh a mi shi u nenge wer nga u a inja la. Ka wea fa kwagh ne nahan yô, u kera lumun wer mbagenev ve ôr u ma kwagh u u er a uma wou ga.—1 Mbakorinte 9:26, 27.

Ka nyi ia wase u u eren kwagh ne? Hii sha u nan mlumun sha mbampin mba ve dondo ne.

Aluer u kav akaa a u fe u eren tsembelee la kua anza a ou a dedoo yô, u seer lun a vangertiôr.

IKYAV I KEN BIBILO: Apostoli Paulu yange nger ér: “Aluer mea lu or u fan kwaghôron ga kpaa, sha kwaghfan yô, m yina ga.” (2 Mbakorinte 11:6) Er Paulu fa Ruamabera tsema tsema yô, yange a hendan a na kpa a tile her dông, a tenger ga. Yange de ér alam a dang a na un iyolkpen ga.—2 Mbakorinte 10:10; 11:5.

HEN SHA UMA WOU: Nger ma kwagh u u fe u eren la heen.

Pase ma ieren i dedoo i u lu a mi yô. (U tesen ikyav yô, u we kwagh ikyoo? U ne or kwagha? U ngu a mimi iyolo? U ze hen kwagh sha shighee?)

Er ka wea tam ishange ahi i hôôn ve i vihi agen a u lu vanden tamen la cii nahan, kape aluer u de mbamshi ou ya tor ken a we ve, vea vihi aeren ou a dedoo cii je la.

IKYAV I KEN BIBILO: Paulu yange fa mbamshi nav. A nger ér: “Or u ken a mo u ker atô la ngu lumun atindi a Aôndo saan saan je. Kpa m ngu nengen a tindi ugen ken alegh a am kpaa, ngu nôngon num a tindi u ken mhen wam, ngu kôron mo yemen a mo uikyangen sha ikyev i tindi u isholibo u a lu ken alegh a am la.”—Mbaromanu 7:22, 23.

HEN SHA UMA WOU. Nger mbamshi ou mba i gbe u u hen u kôron iyol tsaha sha mi yô.

Ú cata mato, maa u kaa a deraba wer a gbaa nahan we ningir ya wou gbem tsô mkurem ma kar beenee? Ngura nahan ka ibumegh kua inyaregh ki vihin dang gaa?

Ka nyi se hene? Ka wea tsua akaa a injaa a u soo u eren yô, u fa kwagh u u lu sha mi yô, nahan u kera vihi agee a ou sha abumeakaa ga. Ka u lu a kwagh u u we ishima u eren yô, shi u keren gbenda u kuren awashima shon.

IKYAV I KEN BIBILO: Paulu yange nger ér: “M ngu yevese bema be bema ga, m ngu tan azu er or u tan ahumbe dang nahan ga.” (1 Mbakorinte 9:26) Paulu yange wa akaa ave kumba kumba ken uma na ga, kpa lu a akaa a yange wa ishima u eren jim jim yô, shi ver ishima er a.—Mbafilipi 3:12-14.

HEN SHA UMA WOU.Nger akaa atar a u we ishima u eren ken atô u inyom i i ve ne yô.

Aluer u ngu a vangertiôr sha ma kwagh ga yô, u lu ta ta ta. Nahan, er hum ka a gema iyol sha u una zua vea kala u a nenge a mi nahan, kape we kpa u gema eren akaa a u nenge mbakwav wou ve eren je la. Man kwagh ne una lu tesen ér u fa injaor i u lu jim ga.

Gema di aluer akaa a u eren la zua sha kwagh u u ne jighjigh a mi la yô, tese ér mbagenev vea er nan nan kpa we yô, u gema ga, u lu or u u lu la her.

IKYAV I KEN BIBILO: A̱ shi nan kpa lu shighe u Daniel lu wanye la je “vande wan ken ishima” ér una kura atindi a Aôndo ye, shin er yange i pav un a tsombor na nahan je kpaa. (Daniel 1:8) Sha nahan yô, Daniel dondon mbamhen mba iorov ga. Kpa eren akaa a yange na jighjigh a mi yô.

HEN SHA UMA WOU: Ka nyi akaa u ne jighjigh a mini? Ikyav i tesen yô, u na Aôndo jighjighi? Wea na un jighjigh yô, ka sha ci u nyi? Man ka nyi nahan i tese u ér mimi je Aôndo nguu?

U na jighjigh wer atindi a Aôndo a we la ka sha ci u iwasen you wee? Wea na jighjigh nahan yô, ka sha ci u nyi?

Ken masejime yô, u va lu nyi? U lu er kwa u ahumbe a teghelee kpa ka a purugh a u la shinii, u lu er kon u ahumbeaura a taver ka aa ta sha u je kpa u gba ga laa? Kange ishima u eren akaa a u ne jighjigh a mi shi u nenge wer nga u a inja la, nahan u lu er imba kon la nahan. Kwagh ne una wase u u fa injaor i u lu jim yô.