MPIN U SHA 6
Ka Nyi Me Er Ve Mbakwav Wam Vea Fatyô u Kighir Mo Ga?
A LU WE NAHAN U ER NENA?
Hen sha kwagh ne: Brian nenge mbayev mba ken makeranta na uhar mba van ape a lu yô, maa ishima hii u zan un iyol. Ken kasua la tseegh ve mee un kwa har ér a ma taav. Lu kwa ve u sha utar je ne.
Wannomso u hiihii la kende pine un ér:
“Shi u ngu we tswene? De m na u boki.”
A yila ishember i “boki” la je a kam un ishe, maa a za uwegh ken ikpa a dugh kwagh ngu nan Brian.
Brian nenge wan la a shigali ken uwe. Maa ishima hemba zan un iyol cii.
Brian kaa a na ér: “Ei he. M vande kaan a we je mer me . . . ”
Wannomso u sha uhar la maa nyôr un sha zwa, ér: “De cie ga!”
Brian cia ashe ga kaa a ve ér, “M cie kwagh ga.”
Wannomso u sha uhar la penda Brian uwegh sha kwende, gema kaa a na tegheelee ér, “Orne gba ngohol tsô.”
Wannomso u hiihii la ngu zan a shigali la una wa Brian sha zwa, ngu ôron kwagh a na ivarvase kaan ér: “Se ôr or ga. Orgen môm nana fa kwagh sha mi ga.”
A lu we nahan, u er nena?
HIDE HEN A ISHIMA!
Azende a Brian ne hen sha kwagh u ve lu eren la je he? Ka ve ayol a ve ve tsough u eren nahan yee? Ka ve keng ga. Jighilii yô, ve de ior mbagenev vihi ve. Sha ci u ve soo ér vea eren kwagh sha ishima i mbagenev, nahan ve de ér ior ve kaan ve kwagh u vea er yô.
Aluer u tagher a imba kwagh la nahan, u er kwagh u mbakwav wou vea kanshio u kighir we la kpa?
-
WA IYOL KEGH A KEGH
Bibilo kaa ér: “Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.”—Anzaakaa 22:3.
Ashighe kpishi u fatyô u nengen a zayol ken ica je. U tesen ikyav yô, alaghga u nenge a agumaior agen a a ze makeranta vea we yô, nga man taav yemen we sha hemen. Aluer u fa wer u za kohol ve vea na u zayol yô, u fa kwagh u u er ve u palegh zayol shon yô.
-
HEN KWAGH U U ER YÔ
Bibilo kaa ér: ‘Lu a imo i wang ken ishima.’—1 Peteru 3:16.
Pine iyol you wer, ‘Aluer m ngu eren kwagh u m nenge mer ior kpishi mba eren la yô, a va lum nena ken hemene?’ Ka mimi, alaghga hen shighe la u soo wer mbakwav wou ve de puun we ga. Kpa ken hemen a va lu u nena? U soo wer u er kwagh u doon mbayev mba ken makeranta wou, u gema u vihi aeren a ou a dedoo laa?—Ekesodu 23:2.
-
TSUA KWAGH U U ER YÔ
Bibilo kaa ér: “Orfankwagh ka nan cian ifer.”—Anzaakaa 14:16.
A gba u hanma wase nana tsua kwagh u nan soo u eren a uma u nan la, man kwagh u a dugh ker la cii una zaan a nan ityô. Bibilo ôr se kwagh u ior mba yange ve tsua u eren kwagh u dedoo yô, er Yosev, Yobu, man Yesu nahan. Shi i pase se kwagh u ior mba yange ve tsua u eren akaa sha inja ga la kpaa, er Kain, Isou, man Yuda nahan. We ka nyi u soo u erene?
Bibilo kaa ér: “Dondo sha kwagh u mimi.” (Pasalmi 37:3) Aluer u vande henen sha zayol u ieren you i a va u a mi la, shi u kange ishima u eren kwagh u vough yô, a kera lu u ican u ôron kwagh u u lu sha mi jighilii la ga, shi u zua a iveren kpaa.
De we ikyo ga, ityôkyaa ngi i u ôr kwagh a mbakwav wou kpishi ga. Aluer u kaa a ve wer EI tseegh kpa a kuma. Gayô venda a ve wang tile her, kaa wer:
-
“Mo de wem nen ker ga!”
-
“M eren kwagh la ga!”
-
“Ngyewe, me er kwagh la ga, ne je kpa ne fa!”
Kwagh u vesen u u er yô, venda a ve her wang. U er nahan yô, mbakwav wou mbara vea kar sha ving je a kpiligh we iyol!
KWAGH U U ER SHIGHE U I LU NAHAN WE TAR YÔ
Aluer mbakwav wou mba nahan we tar nahan u er nena? Aluer ve kaa a we ér: “Ka nyi jimi, er nan u eren er u ngu an-or u cian kwagh nahana” di ye? Fa wer ka kwagh u agumaior kpishi a ôron sha u nahan mbakwav ve tar je ne. Nahan u er nena? Akaa nga ahar a u fatyô u eren yô.
-
U fatyô u lumun tarnahan ve la. (Alaghga u kaa wer, “Een ka mimi, cier mo iyol!” Maa pasen ve ityôkyaa tiônôô.)
-
U fatyô u ôron kwagh u vea hide a hen a ishima yô. Pase ve ityôkyaa i i ne ve u vende la, maa ôr kwagh u una na vea hide a hen sha ieren ve la yô. (Alaghga u kaa wer, “M hen mer ne nahan ne bugh ashe gande u man taav!”)
Aluer mbakwav wou mbara de u nahan we tar ga yô, kar sha ving! Umbur wer aluer u ngu her yô, vea lu hemban nahan we tar cii. Kpa aluer u kar her sha yô, u tese wer u soo u lun er ve nahan ga.
Jighilii yô, hanma ijiir i u lu cii, ka keng u tagher a mbakwav wou mba vea ker gbenda u kighir we yô. Kpa u fatyô u pasen ve kwagh u u soo u eren man kwagh u u lu sha mi la tilen her. Ken masejime yô, a lu we u tsua kwagh u u soo la ye!—Yosua 24:15.