Hen sha kwagh ne: Sha iyange i Tomatar aikighe, Jeff er ityom i hen ya been yô, a due gbilin. Nahan a soo u memen! Maa a bugh Televishen, a hide a yav shin ikyônough ki a hemban teman shimi la.

Baba na maa va tile sha hunda, a vihi ishigh sha.

Wea lu Jeff nahan, ma u er nan ve teru ma a vihi ishima a we ga?

Ka wea lamen a ormaren wou yô, i lu inja er u ngu nahan mato nahan. Ka a za yisa gbenda kpa u hide u tôô gbenda ugen.

 Ikyav I Tesen:

Gumkwase ugen mba yer iti na ér Leah, a kaa ér: “Ka i lum pe lamen a baba wam ga cii. Ashighe agen ka m lamen a na doo doo, maa a va kende a kaa ér, ‘Aa, yam anyi, u ngu ôron zan kwagh a moo?’”

LEAH UNA FATYÔ U EREN KWAGH MÔM KEN AKAA A ATAR NE.

1. Una lam a baba na sha ishimavihin.

   Leah una kaa a baba na ér, “Ka nyi di nee? U hen wer ka asengee? Shi kegh atô yôô!”

2. Una kera bugh zwa a baba na ga.

   Leah una kera ker gbenda u ôron baba na kwagh u a ze un iyol la ga.

3. Una ker ian i i hembe doon u una ôr baba na zayol na shon yô.

   Leah una de shighe a karen yô, una za lam vea baba na, shin una nger un washika una pase un kwagh u a ze un iyol la ker.

Ken akaa a atar ne, ka nyi we u kaa a Leah wer a ere?

HEN SHA KWAGH NE: Baba u Leah ngu henen sha akaa kpishi ken ishima, nahan ishima ia vihi Leah kpa una fa ga. Sha nahan yô, aluer Leah er kwagh u sha 1 la, lam a baba na sha ishimavihin kpa orti una fa ityôkyaa ga. Ieren ne ia wase baba u Leah u hemban keghen ato a na ga, shi ia tese icivir kpaa ga(Mbaefese 6:2)

Kwagh u sha 2 la hemba ngun ican ga cii, kpa gema ka kwagh u a hembe doon u eren la ga. Sha ci u nyi? Sha ci u Leah una fatyô u sôron zayol na la ga, saa una pase baba na, shi saa baba na una fa zayol u a lu ker la ve una wase un ye. Aluer a bugh zwa ga yô, zayol na una lu un her, shi baba na kpa una fa kwagh u a ze un iyol ga.

Nahan kpa, Leah tsua u eren kwagh u sha 3 la, a de ér zende na u kighir hen ape i za yisa gbenda la ga. A ker gbenda u ôron baba na zayol shon kwagen. Man aluer Leah tsua u ngeren baba na washika pasen un zayol shon tseegh kpa, ishima ia pever un.

Aluer a nger washika la yô, kwagh la shi una wase un u pasen baba na kwagh u a soo u ôron un la jighilii. Baba na una za ôron washika la yô, una mase kaven kwagh u Leah yange soo u ôron un la, nahan una hemba kaven kwagh u a ze Leah iyol la tsembelee. Sha nahan yô, kwagh u sha 3 ne una wase Leah man baba na cii. Nahan Leah una lam a lam vea baba na shin una nger un a nger washika kpa, a dondo kwaghwan u Bibilo u a kaa ér, “keren nen kwagh u nan bem” la.—Mbaromanu 14:19.

Shi ka nyi igen kpa Leah una fatyô u erene?

Hen, wea zua a kwagh ugen u Leah una er ve a wase un yô, nger hen ian i i tese shin heen ne. Maa pase er ieren shon ia za a na yô.

Umbur wer ashighe kpishi ka wea ôr kwagh a mbamaren ou yô, ve kav kwagh shon kposo.

IKYAV I TESEN:

Mbamaren ou pine u er i hii ve u lu yuen yô. Maa u kaa a ve wer, “Kam ape lamen hegen ga.”

Kpa mbamaren ou nenge ér, inja na yô u ngu kaan wer: “Kwagh wen wanger mo ga, me ôr ne zayol wam ga. Guda me ôr azende a am.”

Shi tôô wer u tagher a zayol u vesen, nahan mbamaren ou kaa ér vea wase u. Kpa u kaa a ve wer: “Ei, ka kwagh ga. Mo tseegh kpa me nenge sha mi.”

• Alaghga mbamaren ou vea hen ér, inja na yô u ngu kaan wer:

• Kwagh u u ôr a ve ve a hemba doon yô, alaghga a lu: