Igbenda I Ve Yaren Tom a Mi u Karen Loho u Dedoo Ne a Ior Yô

I WA Mbakristu kwagh ér ve̱ ‘gema akuraior cii a̱ hingir mbahenen,’ kpa ú ngu wer ka u ve̱ kighir a kighir ior shin ve̱ geman ve sha igyosough ga. Yesu yange na zwa ér i “yôô Loho u Dedoo hen mbaatsanev” shi i “sur mba asema a vihi ve la asema,” shi ‘mba ve zungu cii, i sur ve asema.’ (Mateu 28:19; Yesaia 61:1, 2; Luka 4:18, 19) Mbashiada mba Yehova ka ve nôngo u eren kwagh ne sha u yôôn loho u dedoo ú ú lu ken Bibilo la. Di vough er ngise profeti Esekiel er nahan, nyian kpa Mbashiada mba Yehova ka ve keren mba “ve lu a asema a shirin man ve vaa sha ci u akaa a ndôhôrshima a i eren” la.—Esekiel 9:4.

Gbenda u i fe ú hembe doon cii u ve yaren tom a mi u keren mba ve shirin asema sha ci u akaa a a lu zan hemen hegen ne yô, ka u zan sha uya-uya. Sha nahan yô ka ve nôngo kwagh tsung u aren a ior, di vough er Yesu kpa yange er zum u “A gba zenden nyôron ken agar a tamen man angarev mba kiriki, lu ôron kwaghaôndo, pasen Loho u Dedoo u tartor u Aôndo” la nahan. Mbahenen nav mba tsuaa mbara kpa yange ve er nahan. (Luka 8:1; 9:1-6; 10:1-9) Nyian kpa, hen ape i gbe i doo yô, Mbashiada mba Yehova ka ve nôngo u zan hen hanma ya kwa imôngo ken inyom, ve keren u ma ve lam a orya la ma i kom uminiti kpuaa sha ma itinekwagh i kwagh a gbe ior sha mi hen ijiir la shin sha tar cii yô. Alaghga a due a ivur ruamabera i môm shin avur ahar á á time sha mi yô, nahan aluer orya la tese gbashima yô, alaghga Orshiada la nana sôr ian nana ver sha u shi hiden va zan hemen a kwaghôron la shighe u i hembe lun sha inja yô. Mba ne ior Bibilo man ityakerada i pasen Bibilo kpaa, shi aluer orya la ka nana lumun yô, i hii u henen Bibilo a nan hen ya gbilin. Mba eren tom u injaa u henen Bibilo a ior kua icombor acin umiliôn imôngo ne hanma shighe sha tar cii.

Gbenda ugen u i pasen mbagenev “Loho u Dedoo u tartor ne” yô, ka sha mbamkombo mba i zough ken Ayou a Tartor sha ajiir wue wue la. Mbashiada mba zough mbamkombo ker sha hanma sati. Môm ken mbamkombo mban ka i lu kwaghôron u ken igbar u ka i na sha itinekwagh i kwagh a gbe ior sha mi hen shighe la la, a̱ been yô maa i gba sha u yaren tom a kwagh u i nger ken magazin u i yer ér Iyoukura la sha u henen ma itinekwagh i ken Bibilo shin ma kwaghôron u profeti. Mkombo ugen yô ka makeranta ú tesen Mbashiada u hingir mba hemban fan u yôôn loho u dedoo  tsema tsema la, a̱ been yô, vegher ugen u a har sha u timen sha tom u eren shiada hen haregh u ve lu her la maa a dondo. Shi, Mbashiada ka ve kumba ken uya mbaiorov kwa môm ken sati sha atihi a cuku cuku sha u henen Bibilo.

Hanma or cii nana fatyô u zan mbamkombo mban. Mba sen iyua mayange ga. Amba a mkombo la nga a inja hen ior cii. Bibilo kaa ér: “Doo u sé nenge gbenda u se hemba taver ayol a ase asema u lun a dooshima man aeren a dedoo yô, ka u se bunden mbamkohol asev mba aduaav er mbagenev ve eren nahan la ga, kpa guda yô sé taver nen asema ayol a ase, man se seer eren nahan er ne nenge Iyange la i lu mgbôghom yô.” Ka hange hange u henen kwagh ken iuv shi timen sha kwagh kpaa, kpa u kumban imôngo a mbagenev la ne ka sagher or iyol: “Iyôgh ka ki tsaase iyôgh, kape or kpaa ka nan tsaase orgen la.”—Mbaheberu 10:24, 25; Anzaakaa 27:17, The New English Bible.

Shi Mbashiada ka ve yar tom a aan a injaa a á dugh la sha u lamen a ior sha kwagh u loho u dedoo zum u ka vea zenden vea zuan vea ior mbagenev shighe u ve eren akaa ve a sha ayange ayange la yô. Alaghga á lu mkaanem ma or nan lam a or u nan we ndor a nan kpuaa la, shin ma nan lam a or u nan lu zan zende a nan imôngo shin mato shin shín girgi i purugh la, ga yô á fatyô u lun iliam i nan lam a ijende i nan shin anter u nan naleghaa, shin iliam i nan lam a or u eren tom a nan imôngo sha shighe u i ne ahumbe la. Shiada i Yesu yange er zum u a lu shin tar la yange hemba lun imba ne—lu zum u a lu zenden hen kpe zegemnger shin zum u a tema hen kpe uwoogh shin zum u a lu yan kwaghyan hen ya u or, shin zum u a za iniongo i ivesegh shin a lu yemen zende shin Zegemnger u Galilia shín tso u kôron ishu la. Yange tesen ken ushinagoge man ken tempel u ken Yerusalem la kpaa. Hanma ijiir i yange una lu cii yô, a ker aan a lamen a ior sha kwagh u Tartor u Aôndo. Mbashiada mba Yehova mba nôngon ér vea dondo akishiangahar na sha gbenda ne kpaa.—1 Peteru 2:21.

 U PASEN KWAGH SHA IKYAV I TESEN

Igbenda i í pasen we loho u dedoo ne cii ia fatyô u lun we a inja ga, aluer or u nan lu ôron we ú la nan ngu eren sha atesen la ga yô. U ôron kwagh kpa geman eren ugen kposo la ka imanger, man imanger i í eren ken kwaghaôndo la i na ior umiliôn imôngo gema ijime a Bibilo. A kpen nan Bibilo ibo gbilin gbilin tsô. Mbafarishi man mbangeren yange ve lu a Ruamabera u ken zwa Heberu la, kpa Yesu na ve ibo ér mba mbaimangerev. Yange ôr kwagh u m-er u ve ôron Tindi u Mose la, maa á seer ôron a mbahenen nav nahan ér: “Akaa a ve kaan ne cii, er nen a, waan nen a iko kpaa, kpa de eren nen er ve eren nahan la ga; gadia ka ve kaa a kaa kwagh, kpa ve eren sha mi ga.” (Mateu 23:3) U Orkristu lun ikyav i tesen i ieren i vough la hembe kuman a u pasen kwagh ahwa imôngo la. Yange i pase kasev Mbakristu mba noov vev ve lu mbananjighjigh ga mbara kwagh ne nahan, ér: “Á urugh ve sha mlu u kasev vev la, á kera lu sha kwaghôron kpee ga, er ve nengen mlu wen u wang u cian Aôndo la yô.”—1 Peteru 3:1, 2.

Sha nahan yô, Mbashiada mba Yehova ka ve nôngo sha u vea pase mbagenev loho u dedoo sha imba gbenda ne kpaa: sha u lun ikyav i tesen i dedoo sha aeren a Orkristu á ve eren hen mbagenev la. Ka ve nôngo u ‘eren mbagenev akaa a i sar ve ka mbagenev kpa ma ve eren ve la.’ (Mateu 7:12) Ka ve nôngo u eren nahan a ior cii, ka lu di hen atô u mba ve lu Mbashiada a ve imôngo la tseegh, shin azende a ve shin mba ve we ndor a ve mbara, shin anterev vev tseegh tsô ga. Kpa er ve kpa ve yen yô, ka ashighe cii ve ker cio u eren nahan vie vie ga. Kpa sar ishima ve u eren akaa a dedoo hen ior cii, ka sha u ôron ve loho u dedoo u Tartor la tseegh ga, kpa ka sha u wasen ve sha igbenda igen kpaa hen shighe u ve fetyô cii.—Yakobu 2:14-17.

[Foto u sha peeji 19 la]

Hawaii

[Foto u sha peeji 19 la]

Venezuela

[Foto u sha peeji 19 la]

Yugoslavia

[Ufoto mba sha peeji 20 la]

Ayou a Tartor a i ndera sha inja la, ka ajiir a i timen ken Bibilo her yô

[Ufoto mba sha peeji 21 la]

Ken uma u Mbashiada u hen tsombor man zum u ve zough ishigh a ior mbagenev kpaa, ka ve nôngo u eren sha akaa a ve ne á jighjigh la a ishima i môm