Iwasen i Injaa i Loho u Dedoo Ú Lu a Mi hen Ityô Yô

ASHIGHE kpishi ka se ungwa ior ve ôr kwagh ken tar u ainge ne ve kaa nahan ér: “Akaawan a Kwagh u Kristu nga a inja ga. Aa fatyô u wasen ken tar u ainge ú ú lu kperegh kperegh ne ga.” Nahan cii kpa, kwagh u i kaa ér orhemen u Mbahindu Mohandas K. Gandhi yange ôr vea Lord Inwin, or u ngise lu Gomna u lu ashe a tar u Britain ken India la yô, gema tese kwagh ugen kposo. Í kaa ér Lord Irwin yange pine Gandhi kwagh ér kanyi kwagh ngula a hen ér ia sôr mbamzeyol mba yange ve lu hen atô u tar u Zege Britain man India la. Gandhi maa tôô Bibilo, bugh hen ityough ki sha utaan ki Mateu la, maa kaa ér: “Shighe u tar wou man u̱ wam ua zua ijiir i môm sha u dondon ityesen i yange Kristu na ken Ityesen i sha Uwo la yô, hen shighe la se bee a mbamzeyol mba ityar yase tseegh ga, kpa á lu mba sha tar cii.”

Ityesen la ôr kwagh u keren mlu u ken jijingi man u lun ishima legh legh man u lun bem bem, kua u zungwen mhôônom shi soon perapera kpaa. Í venda iwoo-or tseegh ga, kpa kua u vihin ishima a mbagenev kpaa, shi í venda idya tseegh ga, kpa kua u henen akaa a jimbagh ken ishima kpaa. Í venda ivese i gban paven tsô, í í sarem icombor shi í ne mbayev ican i yan la kpaa. Ityesen shon kaa se ér: ‘Doo a mba ve ker ú ihyom mbara je kpaa, na mbaibanave mbara kwagh, de gbe nan or ibo gagh a mhôônom ma zungwen shio ga, er kwagh a mbagenev vough er i sar ú ka we kpa ma i er a we nahan.’ Akaawan ne cii aluer i dondo á yô, aa va a mbamtsera kpishi. Ior vea nguren seer a seer dondon á hen haregh wou yô, kape haregh shon una lu hemban doon a doo je la!

Mlu u Mbashiada mba Yehova mba benden a ior sha gbenda ne. Bibilo tese ve ér ve̱ wa ivese ikyo. Mba tesen ônov vev u dondo igbenda i vough. Mba er kwagh u mluainja u tsombor zever zever. Icombor i lun ken mzough kangenaa la ka kwagh u injaa hen ityô you man hen tar wou jimin cii je kpaa. Tsegh ku mbayiase iv a akav a tesen myôhôr u yange ityahav mbigenev mbi hembancii yôhôr zum u mbamlu mba hen tsombor mba kangenaa mbara oghom shi idya i eren seer a seer yô. Mbashiada mba Yehova ka vea seer wasen ior asange asange kua icombor sha u ve̱ dondon atesen a Mbakristu yô, dang u eren man ijimba i eren man ifer kpaa i panden a pande hen haregh wou.

Kwagh u á lu zan hemen sha ajiir kpishi kua ken ityar kpishi  yô, ka ihyom i kôron mbavanava la. Kpa apostoli Peteru gema kaa kposo nahan ér: “M kav, Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan.” Shi Paulu kpa yange nger wener: “Or u Yuda kua or u Grika kera ngu ga, kpan kua wan kpaa kera mba ga, nomsoor kua kwase kpaa kera mba ga, gadia ne cii ne mba môm ken Kristu.” (Aerenakaa 10:34, 35; Mbagalatia 3:28) Mbashiada mba Yehova lumun a kwaghôron ne. Ior mba ken hanma tar cii kua mba kwaviyolough ve ú lu kposo kpaa mba tse ijiir i môm shi mba eren tom imôngo shin ijiir ve i shin tine la man sha ubranci vev, kua ken atôônanongo ve kpaa cii.

Ikweior igen ken kpentar u Afrika ia fatyô u nungwan imôngo a ayôôso shio ga. Nahan cii kpa, ken mbamkohol mba Mbashiada mba Yehova ve zough sha ajiir shon la yô, ikweior kposo kposo ka i yaan kwaghyan ijiir i môm shi i tsaan ijiir i môm shi i civir Aôndo ijiir i môm ken mzough kangenaa man ken mlu u kundu kundu kpaa. Mbatomov mba gomoti ka vea nenge kwagh ne yô, i kpiligh ve iyol. A fatyô u nengen ikyav i mtsera u á lu ken mzough u Kwagh  u Kristu u mimi a ve a mi la ken kwagh u yange pipaabaver i ken gar u New York i í yer ér Amsterdam News, u Agusutu 2, 1958 la yange i nger la. Yange kwaghôron ne due zum u i nenge kwagh u yange za hemen hen mkohol u ityar ityar u í vande ôron kwagh teren, u yange Mbashiada za udubu imôngo ken gar u New York City la.

“Yange Ior-il man ior nyian man ior mba sha Ityoughkitaregh mba eren ityom atô kposo kposo lu, mba ve dugh ken hanma vegher sha tar cii yô, ve zua imôngo ve lu ember, mô ve lu kusususu ga. . . . Mbashiada mba civir Aôndo mba ve dugh ken ityar 120 mbara kohol ijiir i môm ken bem, nahan ve tese ior i Amerika e̱r i taver u eren kwagh ne ga yô. . . . Mkohol la ka ikyav i tseer tseer i tesen e̱r ior vea fatyô u eren tom imôngo shi lun imôngo hen ijiir i môm yô.”

Alaghga ior kpishi vea kaa ér akaawan a Kwagh u Kristu la nga a inja ken tar u ainge ne ga. Nahan kpa, kanyi igen i lu i wasene, shin ia va wasa? Akaawan a Kristu aa fatyô u lun a inja kpishi aluer i dondo á hen haregh wou hegen yô, shi ka á aa lu imaagh ki a zua hanma “ikurior man hanma nongo man hanma nongoior” tar sha won cii sha ikyev i Tartor u Aôndo ú ua hemen orumace la ye.—Mpase 7:9, 10.

[Mkaanem ma sha peeji 23 la]

Ikweior man ior mba kwaviyolough ve ú lu kposo cii mba eren tom imôngo

[Mkaanem ma sha peeji 24 la]

Kwagh u Kristu ngu a iwasen. Kanyi igen i wasa?