Ka Unô Ioro?

SAR Mbashiada mba Yehova ka mà ú fe ve doo doo. Alaghga ve wa ndor a we shin ú eren tom ijiir i môm a ve, ga yô ú zough a ve zum u ka wea eren ityom i sha use use la yô. Alaghga ú vande nengen a ve sha godobi, ve lu nan mba karen gbenda magazin vev mbara. Shin alaghga ú tôndo aniliam a ve kpuaa hen hunda wou.

Sha jighilii yô, kwagh wou gba Mbashiada mba Yehova ishima kua mkpeyol wou kpaa. Ve soo ér ma ve ye ijende a we shi ma ve seer ôron we kwagh ve ayol a ve man kwagh u jighjigh u nan ve man nongo ve, kua er ve nengen ior kua tar ú se cii se lu shin ú ne. Ve nger antakerada ne sha ci wou sha u vea iv awashima ne yô.

Mbashiada mba Yehova mba di er ior mbagenev kpa ve lu nahan sha igbenda kpishi. Mba a mbamzeyol mba ior mbagenev kpa ve lun a mi la—mbamzeyol mba inyaregh man mba iyolough kua mba ken ishima kpaa. Ashighe agen ka ve tsume, sha ci u mba vough ga, shi mba ne ve ma icighan mkaan ga, shi ú ngu wer mba gbe ga ze. Kpa ka ve nôngo ve hen kwagh sha akaa a á vande eren ve la, shi ve hen Bibilo tsusee sha er vea kôôm ayol a ve er i gbe u vea kôôm la yô. Ve tsegha ayol a ve sha ci u Aôndo sha u eren ishima na, nahan ka ve nôngo tsung sha er vea er sha iyoltseghan ve ne yô. Sha ityom i ve eren cii, ka ve ker ér Mkaanem ma Aôndo ma̱ hemen ve kua icighan jijingi na kpaa.

Kwagh u a lu u vesen hen a ve yô, ka u jighjigh u nan ve a̱ har sha Bibilo, i de lu sha mbaahaba mba keren mba orumace shin sha atindi a kwaghaôndo ga. Ka i lu ve ken ishima vough er yange lu Paulu ken ishima ve nger kwagh u i na un ér a̱ nger la nahan, ér: “Aôndo A̱ lu u mimi shin er ior cii ve lu mbaaiev nahan kpaa.” (Mbaromanu 3:4, Icighan Bibilo *) Hide sha kwagh u atesen a i tese ér ka mimi u ken Bibilo la yô, Mbashiada lumun a kwagh u ior mba ken Berea yange ve er zum u ve ungwa kwaghpasen u apostoli Paulu la tsung je. I kaa ér: “Ve rumun kwaghôron la sha gbashima shi  ve lu timen ken icighanruamabera ayange ayange sha u vea nenge shin akaa la aa lu nahan yô.” (Aerenakaa 17:11) Mbashiada mba Yehova na jighjigh ér i karen atesen a kwaghaôndo cii sha imba ikyaren i karen sha Icighanruamabera ne, aluer ka ve ayol a ve ve tese ityesen la, shin a̱ lu orgenegh kposo kpaa. Mba lôhôn we—shi taver we ishima kpaa—ér u̱ er kwagh ne sha mtim u ú lu timen sha akaa a ve imôngo la.

A fatyô u nengen ken kwagh ne maa fan je ér Mbashiada mba Yehova na Bibilo jighjigh ér ka Mkaanem ma Aôndo. Ve nenge ityakerada i i lu ker 66 la ér ka Aôndo a ne i nger í ye, shi akaa a mbayiase a á lu ker la kpaa nga vough. Kwagh u i hembe yilan ér Ikuryan I He la ve mba gem mba yer ér Ruamabera u Mbakristu u ken zwa Grika, shi mba yer Ikuryan I Tse ér Ruamabera u ken zwa Heberu. Mba haren sha Ruamabera mba uhar mban cii, u ken zwa Grika la man u ken zwa Heberu la, shi ve lumun a kwagh u i nger ker la ér ka akaa a kpôô kpôô, saa di zum u kwagh u i lu ôron zan a mi a ve shin kwagh u yange lu zan hemen hen iaven shon la una tese wang ér ka injakwagh shin ka kwaghôron u tesen ikyav tseegh. Ve kav ér akaaôron a profeti a i nger ken Bibilo kpishi vande ivin kera, agen nga ivin a iv zan a mi a ve, shi agen di yô mba keghen a kegh m-iv u á.

ITI VE

Mbashiada mba Yehova? Een, kape ve yer ayol a ve je la. Iti la ka í pasen a pase mlu u kwagh, í tese ér ve mba eren Yehova shiada, shi mba eren shiada sha mlu na u sha inja i Aôndo la, man mbaawashima nav kpaa. “Aôndo” man “Ter” man “Orgbanakaa” cii—ka a ka atiatom tsô, man a fatyô u yilan ior kposo kposo sha á kpaa—di vough er “Pesiden” man “Tor” man “Torutya” kpa i lu atiatom nahan. Kpa iti i “Yehova” la yô ka iti jim jim, man ka í Aôndo u hembanagee u a lu Orgban sha man tar cii la. I tese kwagh ne ken Pasalmi 83:18, sha mgem u Bibilo i í yer ér King James la yô, i kaa ér: “Sha er ior ve̱ fa er we, u i lu we tswen i yer iti you ér YEHOVA la, ú lu uhembansha sha tar cii yô.”

Iti i Yehova (shin Yawe, sha myer u Jerusalem Bible u mba Roman Katoliko la, man mbafantakerada mbagenev ve yer la) i due ken Ruamabera u hiihii u ken zwa Heberu la war kuman kwa 7,000. Ken Bibilo mbagenev kpishi mba ngeren í nahan ga, kpa i gema i nger “Aôndo” shin “Ter” sha ityough ki í. Nahan kpa, ken Bibilo mban je kpaa, taver u fan ajiir a yange i nger iti i Yehova la ken ngeren u hiihii u ken zwa Heberu la ga, sha ci u asemberatii a i gem i nger sha ityough ki í sha ajiir shon la i nger á sha asangaabaacaa a vesen shin sha asangaabaacaa a hemban ndahar, er i nger heen nahan: AÔNDO, TER. Ken mbamgem mba ainge kpishi i nger iti i Yehova la shin í Yawe la. Sha nahan yô, i  nger ken mgem u i yer ér New World Translation la ken Yesaia 42:8 nahan ér, “Ka mo Yehova. Ka iti yam je la.”

Ngeren u ken Ruamabera u Mbashiada mba Yehova ve civ ker ve, ve ii iti ve la ngu ken ityough ki sha 43 ki takerada u Yesaia la. I tôô tar cii hen ijiir la inja er ka kwagh u a lu zan hemen ken atejir nahan: I lôhô mbaaôndo mba akuraior ér ve̱ va a mbashiada vev ve̱ va pase mimi u ishenge i ve senge ér ve mba a aeren a perapera la, ga yô, ve̱ ungwa mbashiada mba ve lu ken vegher u Yehova la nahan ve̱ lumun a mimi. Yehova kaa a ior nav her nahan ér: “Ka ne ne lu mbashiada av ye, kape Yehova a kaa ne, wanakiriki wam u m tsough, sha er ne̱ fam, ne̱ nam jighjigh, ne̱ kav er m lu un kpaa yô: aôndo ugen vande lun a mo ga, ken ijime yam kpaa una lu ga. Ka mo m lu Yehova ye; á lu mo ga yô, ma oryiman ugen ngu ga.”—Yesaia 43:10, 11, American Standard Version.

Yehova Aôndo yange lu a mbashiada shin tar ken atô u udubumbaanyomov mba ve kar cii man i mase maren Yesu la. Mba ngeren ati a ior mbajighjigh mbara mbagenev ken Mbaheberu ityough 11 mba been yô, Mbaheberu 12:1 maa kaa ér: “Nahan yô, se kpaa er ikpela i mbashiada i vesen ve kase se yô, sé shir nen hanma ikav kua isholibo i ka i tseren se abur abur la, sé gba nen ayem sha ishima i taver tsung sha gesa u ayemegh u i ver se sha ishi la.” Yesu yange kaa sha ishigh ki Pontiu Pilatu nahan ér: “Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye.” I yila un ér “Orshiada u jighjigh man u mimi.” (Yohane 18:37; Mpase 3:14) Yesu yange kaa a mbahenen nav ér: “Né va ngohol agee shighe u Icighan Jijingi Una va sha a ven yô, man né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.”—Aerenakaa 1:8.

Sha nahan yô, iorov mba kuman ingyegh er 6,000,000 nahan mba ve lu pasen loho u dedoo u Tartor u Yehova u sha ikyev i Kristu Yesu ken ityar i hemban 230 ne, ve nenge ér ka kwagh u vough u̱ yilan ayol a ve nahan ér Mbashiada mba Yehova.

[Ngeren u shin kpe]

[Mkaanem ma sha peeji 4 la]

Ve tsegha ayol a ve sha ci u Aôndo sha u eren ishima na

[Mkaanem ma sha peeji 4 la]

Ve na jighjigh ér Bibilo ka Mkaanem ma Aôndo

[Mkaanem ma sha peeji 5 la]

Mzough u iti la i zua sha kwagh u ken atejir yô

[Mkaanem ma sha peeji 5 la]

Mbashiada kuma ingyegh er 6,000,000 nahan ken ityar i hemban 230

[Foto u sha peeji 3 la]

Kwagh wou gba ve ishima

[Foto u sha peeji 4 la]

Iti i Aôndo jim ken zwa Heberu u tsuaa la