Mbampin mba Ior Mba Lun a Gbashima Ve Zeren Pinen La

Aluer Aôndo ka dooshima yô, er nan á ne iferkwagh iana?

AÔNDO na iferkwagh ian, man ior umiliôn imôngo sha tar tsua u eren ifer sha asema a ve. U tesen ikyav yô, ka ve lôhô ityav, ve ta mbayev mba kiriki ubom, ve caver aa tar shi ve na ijen i gba kpaa. Ior umiliôn kpishi ka ve ma taav gbem ve gba angev mbu kyansa i sha huhu, shin ve er idya ve za tôô angev mbu sha yavaor, shin ve ma msôrom i za ngee je ve hingir u zuan a angev mbu sha mtema, kua ambaakaa la nahan. Ambaaior la soo ér iferkwagh i bee mimi mimi ga. Ve soo di tsô er i kar a mbamtsaha mba ka a̱ er ambaakaa la ve i zua a mi la kera tseegh. Ka vea sundan kwagh u ve lee yô, ve gba vaan kaan ér, “Er nan i lu mo keng-e?” Shi ka ve na Aôndo ibo, di er Anzaakaa 19:3 a kaa nahan, ér: “Ibumegh ki orough ka ki vihi uma u nan, tsô ishima i nan i gema i hingir iyongo a TER.” (The New English Bible) Shi aluer Aôndo una yange ve u eren ifer yô, vea vaa iyol ér i tagher ve kwagh!

Ityôkyaa i vesen i Yehova a ne iferkwagh ian yô ka u nán mlumun sha imbwase i Satan la. Satan Diabolo yange kaa ér Aôndo una fatyô u veren ior sha tar mba vea lu mimi sha ishigh Nagh zum u i kar ve la ga. (Yobu 1:6-12; 2:1-10) Yehova de Satan ér a̱ lu uma her sha er una zua a ian i tesen mimi u imbwase na la yô. (Ekesodu 9:16) Satan ngu zan hemen u van a atsan hegen, sha u ior ve̱ gema ijime a Aôndo sha mnenge u a nôngon ér una tese mimi u imbwase na la. (Mpase 12:12) Nahan kpa, Yobu yange kôr mimi na her gbang. Yesu kpa er sha zwa la. Mbakristu mba mimi kpa mba eren nahan hegen.—Yobu 27:5; 31:6; Mateu 4:1-11; 1 Peteru 1:6, 7.

Kam pe nán paradiso u shin tar u̱ ior vea lu ker gbem sha won la jighjigh, kpa kwagh ne doo gande u lun mimi ga zee?

Bibilo kaa nahan ga. Kwagh ne ngu inja er a doo gande u lun mimi nahan kpa ka sha er orumace nan fe kwaghbo uderimbaanyomov ve ngee yum yô. Yehova yange gba tar kaa a orumace ér nana̱ iv ú a nomso man kasev mba perapera mba vea wa ikyo sha imendenev man zendenya u sha ú shi nana kura mdoom ma ú, nana vihi a vihi ú ga yô. (Nenge sha peeji 12 man 17 la.) U ma i lu Paradiso shon u i tende zwa la ma á doo ma i gande u lun mimi yô, gema ka mlu u hegen u van a mzungu ne a vihi i gande u una za hemen ye. Paradiso una kar a tile sha ityough ki mlu ne.

 Me er nan ve me na ior mba ka ve ôr kwagh sha Bibilo geseghee ve kaa ér ka kwaghhir shi i̱ lumun a kwaghfan u sangen yeke ga la mlumunu?

U nan uityendezwa mban jighjigh la ka ibumegh ki kwagh ga. “Jighjigh u nan ka sha m-ongo.” Se nguren henen Mkaanem ma Aôndo yô, kwaghfan u ma la una due ken igbar nahan jighjigh u nan maa una gba vesen.—Mbaromanu 10:17; Mbaheberu 11:1.

Akaa a i tim i dugh shin inya sha ajiir a i nger kwagh u á ken Bibilo la tese ér tsegh ku mbayiase ku Bibilo i er kwagh i ter la kpishi ka mimi. Kwaghfan u sangen yeke u mimi zua sha kwagh u a lu ken Bibilo la. Akaa a mimi a i nger a dondo heen ne yange vande lun ken Bibilo ica i gba cii ve mbafantakerada mase va anden sha á ye, ka: ukpo mba yange tar kar sha mi sha alô sha alô ken mhii u ú la, ugen yô ér tar ngu gbilititi, shi ú hambe sha ma kwagh ken iamegh ga, shi inyon ngi moughon twev ngi yemen ajiir agen.—Genese ityough 1; Yesaia 40:22; Yobu 26:7; Yeremia 8:7.

Akaaôron a profeti a a iv la tese ér i nger Bibilo sha icighan mne. Daniel yange tsengapasen m-mough man mgbe u ityahav mbi hemen tar cii, man shighe u Mesiya una va shi a wua un la kpaa. (Daniel ityouv 2, 8; 9:24-27) Nyian kpa akaaôron a profeti agen nga ivin her, nga tesen ér angan ka “ayange a masejime” je ne. (2 Timoteu 3:1-5; Mateu, ityough 24) Imba utaha i tsengan fan kwagh u ken hemen la ngi sha ikyev i orumace ga. (Yesaia 41:23) U seer zuan a mkav yô, nenge ken takerada u i yer ér The Bible—God’s Word or Man’s? la kua u i yer ér Is There a Creator Who Cares About You? la kpaa. Í cii ka Watchtower Bible and Tract Society a nger ye.

Me er nan ve me fa u nan mbamlumun sha mbampin mba ken Bibilo?

Saa ú hen Bibilo shi ú gbidye kwar sha kwagh u ú hen la, shi ú sôn Aôndo wer a̱ na ú jijingi na sha er una hemen we yô. (Anzaakaa 15:28; Luka 11:9-13) Bibilo kaa ér: “Aluer kwaghfan una yina mô wen yô, nana̱ sôn Aôndo u ka A na ior cii wuee, A kera kôhôn ashe ga la, tsô á na nan di je.” (Yakobu 1:5) Shi ityakerada igenegh i wasen Bibilo i henen kpa ngi í í doo u ú time ken í yô. Kera cii yô, ka i gba u mbagenev vea na iwasen, di er Filibu yange hen kwagh a Oretiopia la nahan. (Aerenakaa 8:26-35) Mbashiada mba Yehova mba henen Bibilo gbilin a ior mba i gbe ve ishima la ken uyaav vev. Gba pinen ve vangertiôr je, we kpa ve̱ va hen kwagh a we.

Er nan ve ior kpishi ve hendan a Mbashiada mba Yehova shi ve kaan ér m̱ de henen kwagh a ve ga?

Yange i hendan a kwaghpasen u Yesu la, nahan a kaa ér kape a hendan a mbadondon un kpaa je la. Zum u ityesen i Yesu doo mbagenev ishima yô, mbakwaghaôndo mbaahendanev gba kaan ér: “Ne kpaa i tsume a venee? Mô u ken mbavesen shin u ken Mbafarishi kpaa nan na Un jighjigh shinii?” (Yohane 7:46-48; 15:20) Ior kpishi mba ve we ú kwagh ér u̱ de henen  kwagh a Mbashiada ga la ve fa kuma ve ga, ga yô ve kôr ve ihyom. Hen kwagh a Mbashiada nahan nenge iyol you aluer mkav u ú kav Bibilo la una seer shin una seer ga yô.—Mateu 7:17-20.

Er nan ve Mbashiada ve ze hen ior mba ve lu a ukwaghaôndo veve?

Mba dondon ikyav i tesen i Yesu sha kwagh u ve eren la. Yange za hen Mbayuda. Mbayuda lu a kwaghaôndo ve, kpa kwaghaôndo la yange kaha undu Mkaanem ma Aôndo sha igbenda kpishi. (Mateu 15:1-9) Akuraior ci ca cii nga a ukwaghaôndo vev, a̱ lu mba ve yer ayol a ve ér Mbakristu la, shin mba ve kaan ér ve mba Mbakristu ga la kpaa. Ka hange hange u ior vea lu a jighjigh u nan u a zough sha Mkaanem ma Aôndo yô, nahan iniôngon i Mbashiada ve nôngon ér vea wase ve u eren kwagh ne ne, ka u tesen dooshima u orwanndor a or je la.

Mbashiada na jighjigh ér ka kwaghaôndo ve tseegh á lu u shami yee?

Ka a inja u hanma or u nan lu a gbashima sha kwaghôndo u nan cii yô nana hen ér ka u nan la a lu u shami ye. Aluer ka nahan ga yô, hii nan ve nan lu kere? I wa Mbakristu kwagh ér: “Karen nen akaa cii, kôr nen u dedoo la gban je.” (1 Mbatesalonika 5:21) Doo u or nana kar nana fa dedoo shin akaa a nan ne á jighjigh la Ruamabera kpa una̱ lumun a á yô, gadia jighjigh u nan u mimi yô ngu môm tseegh. Mbaefese 4:5 lumun a kwagh ne, a kaa ér: “Ter ngu môm, jighjigh u nan kpaa ngu môm, batisema kpaa môm.” Yesu yange lumun a mnenge u ainge u i we kwagh ikyo ga, i kaan ér igbenda ngi kpishi, ukwaghaôndo kpa mba kpishi, kpa ve cii mba zan a vese ken myom la ga. Kpa, yange gema kaa ér: “Hunda hoghor, gbenda kpaa imbishi u u ze sha uma la, mbazuan a mi mba kpeghee tsô.” Mbashiada mba Yehova na jighjigh ér ve zua a gbenda shon. Í lu nahan ga yô ma ve ker kwaghaôndo ugen.—Mateu 7:14.

Ve na jighjigh ér ka ve tseegh vea war yee?

Ei. Ior umiliôn imôngo mbà yange ve tsa sha won ken uderimbaanyomov mba ve kar la zan zan ve kar kpen, kpa ve lu Mbashiada mba Yehova ga la, a hide a ve ken mnder u shin mbakpenev la nahan vea hide a lu a ian i lun uma. Ior kpishi mba ve lu uma hegen ne kpa alaghga vea va tsua u tilen ken vegher u mimi man perapera cii man “zegecan” la una mase van ye, nahan vea zua a myom. Bee heela kera yô, Yesu yange kaa ér se̱ de er orgen ijir ga. Se mba nengen sha mluashe u ken won la tseegh; kpa Aôndo yô nengen ken ishima je. Nengen kwagh vough shi er ijir sha mhôôn kpaa. A wa tom u ôron ijir la sha ikyev i Yesu, ka sha ikyev yase ga.—Mateu 7:1-5; 24:21; 25:31.

 Ka inyaregh nan i gbe u mba ve ze mbamkombo mba Mbashiada mba Yehova mbara vea naana?

Sha kwagh u uiyua mba eren sha inyar la yô, apostoli Paulu yange kaa ér: “Hanma or nana̱ na er nan we ken ishima i nan la nahan, i de lu zunguluu ga, i de lu sha apera kpaa ga, gadia ka or u nan ne kwagh sar sar la je nan doo Aôndo ishima ye.” (2 Mbakorinte 9:7) Ken Ayou a Tartor man ajiir a mkohol a Mbashiada mba Yehova cii, mba zenden mba ngohol iyua mayange ga. I ver mbaakwati sha ajiir sha er hanma or u nan soo u eren iyua cii a taver nan u eren i ga yô. Ma orgen fe kwagh u mbagenev ve ne ga, shi mbagenev vea naan kwagh ga cii cii kpa or fe ga. Mbagenev mba ne ka hembe mbagenev; shi alaghga mbagenev di yô vea fatyô u nan kwagh ga jimin cii. Yesu yange tese mnenge u vough zum u a ôr kwagh a ter akwati u eren iyua u ken tempel ken Yerusalem, man mba ve lu eren iyua la. A tese ér: Ka mker u or nan kôr cio u nan kwagh la, kua jijingi u soon u nan la kwagh a gbe sha mi ye, ka iyenge inyar i or nan ne la ga.—Luka 21:1-4.

Aluer ḿ hingir Orshiada u Yehova yô, a ver ishima ér mo kpa m̱ pasen kwagh er ve pasen nahanaa?

Mfe u va lun ken Paradiso u i tende zwa u van a mi shin tar sha ikyev i Tartor u Kristu la ka una ivin or ken ishima yô, nan soo u karen un a mbagenev. We kpa ú er nahan. Ka loho u dedoo je!—Aerenakaa 5:41, 42.

U eren kwagh ne ka gbenda u vesen u tesen wer ú ngu orhenen u Yesu Kristu je la. I yila Yesu ken Bibilo ér “Orshiada u jighjigh man u mimi.” Shighe u yange lu shin tar la, lu pasen kwagh kaan ér: “Tartor u Sha mgbôghom ve.” (Mpase 3:14; Mateu 4:17; 10:7) Ken masejime yô, Yesu wa mbadondon un kwagh kaa a ve ér: “Nahan yô, za nen, za gema nen akuraior cii a̱ hingir mbahenen, . . . tesen nen ve.” Shi a tsengapasen ér cii man mkur a̱ va yô, “Loho u Dedoo u tartor ne . . . á ôr u á tser tar, sha u u̱ lu mpase hen akuraior cii.”—Mateu 24:14; 28:19, 20.

Igbenda ngi kpishi í yôôn loho u dedoo ne. Ashighe kpishi u̱ lamen vea azende kua mba se fe ve la ka a bugh gbenda u yôôn ú. Mbagenev ka ve yôô ú sha u ngeren ior uwashika shin sha u yilan ior sha telefon. Mbagenev ka ve tindi mba ve fe ve la a ityakerada í ve nenge ér ia doo ior mba shon u ôron yô. Er i sar Mbashiada u ma ve undu or môm tsô kpa ken inya ga yô, ka ve za a loho ne sha ihinda ihinda.

I nger mlehe u kundu kundu ne ken Bibilo, ér: “Jijingi man kwasehe mba kaan er: Va! Or u nan lu ungwan kpaa nana̱ kaa er: Va! Or u imura i ker nan yô, nana̱ va. Or u i sar nan kpaa, nana̱ va, nana̱ va ngohol mngerem ma umam gbilin.” (Mpase 22:17) Ka u ior a kar a ishima ve vea ôr mbagenev kwagh u tar u Paradiso man averen a ú, a lu m-iv u ishima ve i iv a isharen  i karen loho u dedoo ne a mbagenev la ia mgbegha ve u eren kwagh ne ye.

Se na jighjigh ser ú ngu a mbampin mbagenev mba pinen sha kwagh u Mbashiada mba Yehova man akaa a ve ne jighjigh a min la kpaa. Alaghga akaa agenegh ka a gban akperan shami. A doo se u nan mbamlumun sha mbampin ou mbara. Ian yina se ken antakerada ne, nahan se mba lôhôn we ser u̱ pine Mbashiada mba ve lu hen ijiir you la. Ú fatyô u eren kwagh ne ken mbamkombo mba ve nyer ken Iyou i Tartor la, shin shighe u ve ze ú inya hen ya wou yô. Ga yô ú fatyô u tindin a mbampin ou hen Watch Tower, yaren tom a adereshi u a hembe lun sha inja hen mba i nger ve dondo heen ne.