Mhii Ve u Sha Shighe Wase Ne man Mzehemen Ve

KWAGH u Mbashiada mba Yehova u sha shighe wase ne hii hemba hegen anyom deri. Ken mhii u kwavanyom u 1870 la, i hii annongo u henen Bibilo ugen u fan kpa i fa un ga yô ken gar u Allegheny, Pennsylvania, U.S.A., ape hegen i hingir vegher u gar u Pittsburgh la. Lu Charles Taze Russell je hemba lun ityough sha annongo ne ye. Ken uwer u Julai 1879 la, mgber u hiihii u magazin u i yilan ér Zion’s Watch Tower and Herald of Christ’s Presence [Iyoukura i Shion man Myer u Yôôn M-ande u Kristu] la maa due. Ka va kom ken inyom i 1880 la yô, annongo u cuku u henen Bibilo u yange i hii la vese hingir atôônanongo imôngo, samber ar ken ikpentar igen i i lu ikyua la. Ka va aren ken inyom i 1881 yô, maa i ver Zion’s Watch Tower Tract Society, shi ken inyom i 1884 la i nger mzough la, Russell lu pesiden u mzough shon. Ken masejime yô i va gema iti i Society hingir Watch Tower Bible and Tract Society. Ior kpishi lu eren shiada sha uya-uya, nan ior ityakerada i haren sha Bibilo kpaa. Iorov 50 lu eren kwagh ne nduuruu ken inyom i 1888 la—hegen ingyegh ki mba ve eren tom ne nduuruu tar sha won cii yô kuma er iorov 700,000 nahan.

Ka va nyer ken inyom i 1909 yô, tom ne maa hingir u tseren tar cii, shi ka hen shighe la kpa i mough a ijiir i shin tine i Society la i yem a í hen ape í lu hegen ken Brooklyn, New York la ye. Yange i gber mkaanem i kar pipa mba tôôn abaver imôngo, man ka va nyer ken inyom i 1913 yô, i gema eren kwagh ne ken ijô inyiin shi samber a mi sha upipambaabaver udubu imôngo ken tar u United States man Canada man Yuropa kpaa. Hen shighe ne nahan i kar ior ityakerada man antyakerada mba kiriki man ikyatakerada i kuman umiliôn uderi imôngo.

Ka nyer ken inyom i 1912 yô, i hii tom sha inumbe i nengen a nenge i i yilan ér “Photo-Drama of Creation” [Inumbe i Tesen Foto u Kwagh u Igbetar] la. Yange ufoto mba senema mba lun a iliam ker mbara hii sha kwagh u shighe u igbetar je zan zan za ar sha shighe u Hemen u Kristu u Anyom Dubu la. Yange i hii u tesen ior ufoto mban ken inyom i 1914 la, man hanma sev yô ior ve kumba u nengen i kuma iorov 35,000. Lu hiin i kwagh u foto u senema u kuan iliam sha mi je la.

INYOM I 1914 LA

Iyange ikyaa lu mgbôghom. Ken inyom i 1876 la, or u henen Bibilo Charles Taze Russell due a kwaghngeren ken pipa i i yilan ér Bible Examiner, i yange i gber ken gar u Brooklyn ken New York la ér,  “Gentile Times: When Do They End?” (Shighe u Atôatyev La: Una Kure Hanma Shighe?) Yange nger sha peeji u sha 27 ken mgber u Oktoba la nahan ér, “ashighe a ataankarahar la aa kure ken inyom i 1914 A.D. la.” Shighe u Atôatyev la ka iaven i í yer ken mgem u Bibilo ugen ér “shighe u i ver sha ci u akuraior” je la. (Luka 21:24, New World Translation) Ka hanma kwagh u yange i hen ér una er ken inyom i 1914 la cii yange er ga, kpa inyom shon yô, yange i lu mkur u Shighe u Atôatyev la di nahan vough, shi i lu inyom i sha kwarkyaa kpaa. Mbatimen sha tsegh ku mbayiase man mbangeren akaa kpishi lumun ér inyom i 1914 la yange i gema mlu u orumace. Mkaanem ma iorov ma i nger ma dondo shiin ne ma tese ikyav i kwagh ne:

“Inyom i masetyô i yange i lu i ‘vough’ ken mlu u akaa yô, lu inyom i 1913, i yange i kar cii ve Ityav mbi Tar Cii Mbi sha I mbira hii la.”—Ngeren u Duen a Mhen u ken Times-Herald, Washington, D.C., Maaci 13, 1949.

“Mbatimen sha tsegh ku mbayiase mbá hemban nengen ér shighe u anyom a 75, u yange hii ken inyom i 1914 zan zan va ar ken inyom i 1989 á yange yisa ityav mbi tar cii mbi ihiar man ityav mbi sha kume tan la cii, jimin ka shighe môm, u a lu shighe u kahan kposo yô, man ken atô u shighe shon cii yange tar ua nôngon ityav ga yô, ú sember memen ityav mbi nôngon, shin ú waan ago iyol a nôngon ityav.”—The New York Times, Mei 7, 1995.

“Tar cii yange ú bughur sha shighe u Ityav mbi Tar Cii Mbi sha I la, man zan zan hegen se mba a̱ fa ityôkyaa i yange i na kwagh la ga. Er shighe la lu a̱ va ga la, ior lu henen ér iengem-tar i yange mnyam cier ior a mi la zulum. Yange bem lu kua mzehemen kpaa. Maa hanma kwagh cii gba bughur kwa môm je kpuu. Hii shighe la je se mba humee er ikpam ta sha a vese nahan. . . . I hemba wuan ior ken derianyom ne a ior mba i woo ve hii sha igbetar cii.”— Ikpurorfantakerada Walker Percy, American Medical News, Novemba 21, 1977.

Yange inyom i 1914 la i kar ka tse ka hembe er anyom 50 nahan yô, orvesen u ken tar u Jamani Konrad Adenauer nger kwagh kaa wener: “Hii ken inyom i 1914 la je, mkpeyol man mlu u ving la bee ken uuma mba iorov kera.”—The West Parker, Cleveland, Ohio, Janawari 20, 1966.

Pesiden u hiihii u Society u i yilan ér C. T. Russell la yange kpe ken inyom i 1916 la, nahan inyom igen i ker yô, Joseph F. Rutherford kar tema sha ityough nagh. Nahan akaa gema kpishi. I due a magazin u Iyoukura la á ikyar, i yilan ikyar na la ér Golden Age. (Mba yer un hegen ér Awake!, msamber na hemba ingyegh 20,000,000 ken ijô i hemban 80.) I hemba kumen acin sha kwagh u eren shiada sha ihinda-ihinda hen shighe la. Ken inyom i 1931 la, Mbakristu mban ngohol iti i Mbashiada mba Yehova la sha u paven ayol a ve veren kposo a ukwaghaôndo mba Mbakristu Mbaaiev mbara. Iti ne har sha Yesaia 43:10 -12.

 Yange i yar tom a redio kpesee ken kwavanyom u 1920 man u 1930 la. Shighe u i va nyôr ken inyom i 1933 la nahan, Society lu yaren tom a mtôm ma redio 403 sha u samber a akaaôron a ken Bibilo. Shighe ze deghôô yô, i gba den kwagh u redio la tegh tegh, Mbashiada lu hemban seer a seer mze u zan sha uya-uya a mkaanem ma Bibilo ma i kura ken icer i ungwan a ungwa la. I gba hiin Bibilo i henen hen ya a hanma or u nana̱ tese ér mimi u Bibilo gba nan ishima cii.

U HEMBAN AJIR

Ken kwavanyom u 1930 man u 1940 la, i kôr Mbashiada kpishi sha ci u m-er u ve lu eren tom ve shon ne la, nahan i ôr ajir ken mbaatejir sha u kuran ian i hanma or nan lu a mi u ôron kwagh shi nan abaver shi kumban imôngo shi civir kpaa la. Ken tar u United States yô, apii mba yange i er sha mbaatejir mba kiriki i tôô i yem sha mba vesen la na Mbashiada hemba ajir 43 ken Atejir u Tamen u ken United States la. Kape ajir a i ôr ken mbaatejir mbatamen ken ityar igen kpa i na ve ishô je la. Ortumbunmfetakerada C. S. Braden yange ôr kwagh u ajir shon a yange Mbashiada hemba ne ken takerada na u i yer ér These Also Believe (Mban Kpa Na Jighjigh) la nahan ér: “Ve er gomoti u mbakpishiv la tom sha iniôngon i ve nôngo sha u kuran ian i ior ve lu a mi u eren kwagh la, sha ci u ve nôngo kpishi ve kura ian la sha ci u hanma annongo u kiriki u ken Amerika cii.”

 IGBENDA I LUN KPOSO I NAN ITYESEN

J. F. Rutherford yange kpe ken inyom i 1942 la, nahan N. H. Knorr maa kar tema sha ikyônough ki pesiden la. Tsô maa i hii aaven a kohol nan ityesen kyamaa. Ken inyom i 1943 la, i ver makeranta u vesen sha ci u tesen mbamishen, i yilan ú ér Makeranta u Bibilo u Watchtower ken Gileadi. Hii hen shighe la yem hemen je tsô, i zer tindin mba been makeranta ne sha avegher a taregh a sha tar cii. I tím atôônanongo ken ityar i yange mô kpa vande lun ga yô,  shi i ver ubranci sha tar cii hemba 100 hegen. Mba ser aan sha ashighe ashighe mba veren sha u tesen mbatamen mba ken tiônnongo man mba ve ne ayol a ve sha u eren tom sha ubranci la, kua mbagenev mba ve eren tomshiren keke la kpaa (ka upania je la). Shi i bugh imakeranta igen i tesen mbatomov ken ijiir i henen makeranta i í lu ken gar u Patterson, ken New York la.

N. H. Knorr yange kpe ken inyom i 1977 la. Môm ken mbamgem mba ken nongo ne mba yange lu a ci ker cii mase kpen yô, lu msamber u samber a Mbahemenev mba Shin Tine, mba ve lu ken gartamen u sha tar cii u á lu ken Brooklyn la. Ken inyom i 1976 la, i pav ityom i sha kwagh u hemenegh i kar ukômatii mba ior mba ken Mbahemenev mba Shin Tine, mba ve cii ve er tom anyom a barem la.

 I GBANGER A IKYÁV MBI GBEREN ITYAKERADA

Tsegh ku mbayiase ku Mbashiada mba Yehova mba ainge ne iv a akaa a kpilighyol kpishi. Hii sha Bibilo i henen i kpuaa i yange i hii ken gar u Pennsylvania ken inyom i 1870 la je, Mbashiada za hemen u vesen zan zan ken inyom i 2000 la yô, ve kuma atôônanongo 90,000 sha tar jimin cii. Sha hiihii la yô, hanma takerada cii lu ikyômpeni i eren kpenga u gberen ityakerada yange i gberen í ye; nahan kpa, ken inyom i 1920 la, Mbashiada gber ityakerada igen ken ayou a gberen ityakerada ker a yange i kôr a kôr haya yô. Kpa hii ken inyom i 1927 la je tsô, i lu seer a seer gberen ityakerada ken gôgôyou u lun a ukpo anigheni u̱ lu ken Brooklyn, New York, i i lu i Watchtower Bible and Tract Society of New York, Inc. la. Iyou ne gbanger hegen seer, wa ayou a gberen ityakerada agen ker man afishi kpaa. Ayou agen nga her ikyua ken gar u Brooklyn, hen ape mbatomov mba ve ne ayol ave sha u eren tom a ikyáv mbi gberen ityakerada la ve tse yô. U seer sha akaa ne yô, iyaagh ki genegh ki ikyua a gar u Wallkill ken gar u New York, ape sule ú lu shi ityakerada kpa i gberen her yô. Mba gberen Iyoukura man Awake! hen ijiir la, shi ka her i kahan iyiagh ki ki ne mba ve eren tom sha ajiir wue wue la kwaghyan kpaa ye. Hanma or u nan ne iyol i nan sha u eren tom yô, mba ne nan anivur inyar kpuaa sha uwer sha ci u zendesha u nan.

MBAMKOHOL MBA ITYAR ITYAR

Ken inyom i 1893 la, i hii zuan mkohol u vesen ken gar u Chicago, Illinois, U.S.A. Yange ior za mkohol la kuma iorov 360, shi i er iorov 70 batisema kpaa. Zege mkohol u ityar ityar u i mase zuan yô, lu ken New York City ken inyom i 1958 la. Yange i yar tom a Ikpur i Yankee man Mbaagirigi mba Polo mba yange ve lu hen shighe shon la kpaa. Iyenge ior i hemban cii ken mba yange ve za yô, lu iorov 253,922; mbahev mba yange i er ve batisema di gema lu iorov 7,136. Hii shighe la je, mba kombo mbamkohol mba ityar ityar cirigh cirigh ken ityar imôngo. Kohol cii yô, imba mbamkohol mba gban cirigh cirigh la kwa gen ka ve kuma udubu imôngo ken ityar wue wue sha tar cii.

[Mkaanem ma sha peeji 8 la]

Iniôngon i kuran ian i ior ve lu a mi la

[Foto u sha peeji 6 la]

“Iyoukura,” mough hen ingyegh ki 6,000 ken zwa môm yem hemba ingyegh 22,000,000 ken ijô hemba 132

[Foto u sha peeji 7 la]

Mlu u orumace kôr gema