Ú Fatyô u Zuan a Msaanyol ken Hemen!
Ityough 1
Ú Fatyô u Zuan a Msaanyol ken Hemen!
1, 2. Kanyi Orgban wou a soo sha ci wouwe?
MKUVE hen or u doon we ishima. Ahan a dedoo zum u ú lu yan kwagh u dedoo vea ahuraior a ou la. Msaanyol u kenger mbayev ou er ve lu numben eren yaa yaa la. Ashighe er angan nahan ka ashighe a msaanyol ken uma. Nahan cii kpaa, hen ior kpishi, ka i lu inja er uma ngu van a mzeiyol ugen tsô shi ugen nahan. Aluer ka nahan hen awe yô, wa ishima.
2 Ka awashima u Aôndo er we u̱ ember msaanyol gbem sha won ken mbamlu mba hemban cii hen ajiir a iengem. Ngun ne ka mnyamciem tsô ga, sha ci u Aôndo nau makuli u zuan a msaanyol u ken hemen la. Makuli la ka mfe.
3. Ka hanma mfe a lu makuli u zuan a msaanyolo, man er nan se fatyô u nan jighjigh ser Aôndo una na mfe laa?
3 Se mba ôron ka kwagh u icighan mfe u a hembe kwaghfan u oruma ca je yô. Ka “mfe u fan Aôndo” jim. (Anzaakaa 2:5) Ken anyom a karen ikua er 2,000 la, orngeren Bibilo kaa er: “Hanma ya yô, or maa un a maa, kpa u A maa akaa cii yô, ka Aôndo.” (Mbaheberu 3:4) Hen ase imba mfe i Orgban u akaa cii ne una lu a mi yô! Bibilo i kaa er Aôndo ôron iyenge kua ati a asan a sha cii. Ka kwagh u kpilighyol tsô, sha ci u asan nga ubiliôn uderi uderi ken tar wase ne, man mba timen sha akaa a sha kwavaôndo kaa er ityar igen ngi kuma ubiliôn deri! (Pasalmi 147:4) Shi Aôndo fa hanmakwagh wase, nahan ka an ugen nana na ikar i hemban doon sha mbampin mbavesen sha kwagh u uma?—Mateu 10:30.
4. Er nan ve se ver ishima ser Aôndo una na akaawan a tesen se, man ka takerada u nyi u iv ishimaveren laa?
4 Kenger ken ishima iorov uhar mba nôngon sha u vea sôr umato vev. Sha lanshima, môm ken ave haa ikav mbi tomov nav inya. Ugen la kundu ishima zulee tsô a sôr mzeiyol la, a wa makuli a bugh, man a se teghelee er injin la a bugh a lu eren tom vough yô. A taver we u tsuan ken atô u mbauhar mbara u yange nan lu a antakerada u pasen kwagh u sha ikev i orvaren mato la ga. Ka vough u henen er Aôndo una na akaawan a aa tese se gbenda ken uma ga he? Er alaghga ú vande fan nahan, Bibilo i kaa er ka i i lu a akaawan ne ye—takerada u kwaghwan man ityesen i hen Orgban wase, u i er sha u nan mfe u Aôndo la.—2 Timoteu 3:16.
5. Mfe u Bibilo i lu a mi la ngu a iwasen nena?
5 Aluer kwaghôron u Bibilo ne ka mimi yô, hen ase imba mfe u kpilighyol u takerada la ua lu a mi yô! Ken Anzaakaa 2:1-5 (NW ), i taver se ishima er se̱ ker kwaghfan, se time un er ka akaa a injaa a i yer nahan—ka a i yer shin inya i mhen u or la ga, kpa ka ken Mkaanem ma Aôndo. Aluer se ker heela yô, se “zua a mfe u fan Aôndo.” Er Aôndo a kav mbamyina man mbamgbe asev yô, ka a na se kwaghwan u una wase se u lun bem, ken msaanyol ken uuma asev yô. (Pasalmi 103:14; Yesaia 48:17) U seer yô, mfe u Aôndo na se loho u dedoo u saanyol.
UMA U TSÔRON!
6. Kanyi ishimataver Yesu Kristu yange na sha kwagh u mfe u Aôndo?
6 Or u i fe un gbaa gbaa ken akaa a mbayiase la Yesu Kristu yange pase vegher u mfe u Aôndo u ngun ne wanger wanger. Yange kaa er: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3, ka se se nger i yier ye.) Hen ase yôô—mfe u una va a uma u tsôron yô!
7. Kanyi ikyav i lu i tesen er Aôndo yange wa ishima er se̱ kpe ga?
7 De gbe hulen uma u tsôron kera fese wer ka di mnyamciem tsô ga. Kpa, gema nenge sha gbenda u i er iyol i or la. I er í vough sha u i kav mnyohom, i ungwa, i ungwa ihumakwagh, i nenge, shi i kav sha u benden a kwagh kpaa. Akaa ngee sha tar a ka a doo se yô—kwaghyan u nyohon, imoinyon i doon ungwan, uimondon mba humandoon, ajiir a doon nengen, azende a nan msaanyol! Man mhirinim asev ma kpilighyol mara ma hemba kômputa u a hembe cii la, sha ci u ka ma wase se u zuan a iember i akaa la cii. Ú hen wer Orgban wase soo er se̱ kpe se̱ undu akaa ne ciilii? A hemba lun mhen u sha kwaghfan u kaan er a soo er se̱ lu uma ken msaanyol man se̱ ember uma gbem sha won gaa? Ka shami, ka kwagh u mfe u Aôndo una vau a mi je la.
UMA KEN PARADISO
8. Bibilo i kaa er nyi sha kwagh u mlu u uumace u ken hemene?
8 Kwagh u Bibilo i ôr sha mlu u tar ken hemen man u uumace cii a fatyô u kohol ken ishember kwaghôron môm er—Paradiso! Yesu Kristu yange ôr kwagh shami shighe u a kaa a or u lu kpen la er: “Ú lu a Mo imôngo ken Paradiso.” (Luka 23:43) Mter u yange i ôr kwagh i ter Paradiso la ka keng yange una umbur or la ken ishima mlu u ken msaanyol u mbamaren asev mbahiihii la, Adam man Ifa. Zum u Aôndo gba ve la, ve lu vough man shi ve lu ken sule u Orgban vande nderan shi lôôn kpaa la. Yange i yila u vough nahan er sule u Eden, man iti la tese mkpeyol.
9. Yange lu nena u lun ken Paradiso u hiihii laa?
9 Sule la yange u doo tsô! Yange u lu paradiso jim je. Ken ikon i engem i i lu ker yô lu igen i umen atam a nyohon. Er Adam man Ifa ve lu ningir ker nengen u, man mngerem ma u ma nyohon mara, man shi kohol atam a ikon i u la nahan, yange ve lu a ma ityôkyaa i lun a ishimanyian shin mciem kpaa ga. Ishôso je kpaa yange lu kwagh u ia anger ve ga, sha ci u Aôndo ver or man kwase na la er ve̱ nengen sha ave sha dooshima. U seer yô, ior mba hiihii mbara ve lu gbong gbong ken iyol. Er yange ve za hemen u ungwan imo i Aôndo di tsô yô, mtsôr, man msaanyol lu sha ci ve ken hemen. Yange i na ve tom u van ve a mkom u ve̱ waan iko sha Paradiso ve u kpilighyol la. U seer yô, Aôndo na Adam man Ifa tahav er ve̱ ‘iv tar, ve gema u, u̱ lu sha ikev ve.’ Ve kua ônov vev lu u vea gbanger a akur a Paradiso zan zan tar cii ua hingir ijiir i iengem man i mkpeyol kpaa.—Genese 1:28.
10. Zum u Yesu yange ôr kwagh u Paradiso la, kanyi yange wa ken ishima?
10 Nahan cii kpaa, shighe u Yesu yange ôr kwagh ter Paradiso la, lu kaan a or u lu kpen la er a̱ hen kwagh utse utse la ga. Ei, Yesu yange lu ôron kwagh u ken hemen! Yange fa je er tar wase cii ua hingir paradiso. Nahan Aôndo una iv awashima na u hiihii sha ci u uumace man tar wase la. (Yesaia 55:10, 11) Een, a hide a Paradiso! Man una lu nena? De Mkaanem ma Aôndo, Icighan Bibilo, i na ikar.
UMA KEN PARADISO U A HIDE A MI LA
11. Ken Paradiso u a hide a mi la, kanyi ia er angev, iyolbeen, man ku?
11 Angev, iyolbeen, man ku vea kera lu ga. “Tsô á bugh mbaapirashe ashe, man á bugh mbakondonato ato. Tsô orkeer nana gba tsuwen er ashim nahan, man nombor u orkondoniker kpaa ua wa icam.” (Yesaia 35:5, 6) “Aôndo iyol Na Una lu a [uumace]. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.
12. Er nan ve se fatyô u nan jighjigh ser ifer, ipila, man ieren i bo cii vea kera lu ken Paradiso u ken hemen la ga?
12 Ifer, ipila, man ieren i bo cii vea kera lu ga gbem sha won. “Á va tim aferaior kera . . . Shi côhin tsô iferor á kera lu ga . . . Nana lu ga. Kpa mbaasemaleghlegh yô, vea ya dyako u tar.” (Pasalmi 37:9-11) “Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera.”—Anzaakaa 2:22.
13. Aôndo una va a bem nena?
13 Bem una tema tor sha tar cii. “A [Aôndo] er ityav mbi bee zan zan ar hen ikighir i tar je, A sombo ada, A kever iwange.” (Pasalmi 46:9) “i kpe orperapera iyol, man bem a̱ ngee zan zan uwer ua kera lu ga.”—Pasalmi 72:7.
14, 15. Bibilo i kaa er nyi sha kwagh u uya, tom, man kwaghyan ken Paradiso u a hide a mi laa?
14 Uya vea lu a mkpeyol man tom kpaa ua lu a mkom. “Vea maa uya man vea tema keregh . . . Mayange vea maa ya, orgen á kar á tema ker ga, vea lôô, man orgen á kar á ya, ga; gadia er ayange a ikon a lu nahan kape ayange a ior Av kpaa aa lu la; uicuwan Av kpaa vea ya tom u ave ve zan zan je. Vea kera er tom gbilin ga, vea kera mar ônov sha ci u ve̱ tim kera kpaa ga.”—Yesaia 65:21-23.
15 Kwaghyan u nan mkpeyol una dumbur. “Iyiav mbi ngee shin tar sha ityouv mbi iwoov je kpaa, asagher a mbi a̱ hingir war war.” (Pasalmi 72:16) “Inya mende iyiav dedoo; Aôndo, Aôndo wase, Una ver se doo doo.”—Pasalmi 67:6.
16. Er nan ve uma ken Paradiso una lu a msaanyolo?
16 Uma u tsôron sha tar u paradiso a lu kwagh u saaniyol. “Mbaperapera vea ya dyako u tar, vea lu ken u gbem.” (Pasalmi 37:29) “Taaikôngo man ikpoghonya vea lu sar sar, deserti una ember, una mondo er ishohough nahan.”—Yesaia 35:1.
MFE MAN MLU WOU U KEN HEMEN
17. (a) Kanyi i doo u ú er aluer uma ken Paradiso la sar u yôô? (b) Er nan ve se fe ser Aôndo una va a mbamgem mba vesen sha tara?
17 Aluer uma ken Paradiso sar ú yô, de deen wer ma kwagh a yange ú u zuan a mfe u Aôndo ga. Uumace doo un ishima man una va a mbamgem mba i doo u vea lu la sha er a gema tar ua hingir paradiso yô. Kera je kpa, aluer wea lu aa tahav mbu been a ican i yan man mban u perapera mba ve ngee sha tar yum ne yô, ma ú er ga he? Se ver ishima ser Aôndo una er a yina nahanaa? Jim yô, Bibilo i ôr kwagh wanger wanger u shighe u Aôndo una kar a hemen u akperan a iv ker ne kera man una ver hemen u vough, u perapera yô. (Daniel 2:44) Kpa Bibilo i er kwagh hemba u ôron se akaa ne tseegh tsô la. i tese se er se fatyô u waren nyôron ken tar uhe u Aôndo a tende zwa la yô.—2 Peteru 3:13; 1 Yohane 2:17.
18. Kanyi mfe u Aôndo una er ken awe hegen je?
18 Mfe u Aôndo shi una fatyô u eren akaa kpishi sha ci wou hegen je kpaa. Mbampin mba uma mba ve hembe zan shimi shi ve hembe zan iyol kpaa Bibilo i na akar shami. U ngohol ityesen i i la una waseu u yan ikar a Aôndo. Ngun ka ian i kpilighyolo! Man ngun una na ú zua a bem u i lu Aôndo tseegh una fatyô u nan la. (Mbaromanu 15:13, 33) Er ú hii u ngohol mfe u hange hange ne, ú ngu eren kwagh u a hembe man u una hemba wasen we ken uma wou cii yô. Mayange ú vaa afanyô wer ú zua a mfe u Aôndo u una va a uma u tsôron la ga.
19. Ka nyi mpin se nenge shami ken ityough ki ki dondo laa?
19 Se vande ôron kwagh u Bibilo er ka takerada u u lu a mfe u Aôndo yô. Nahan kpa, er nan ve se fe ser ka takerada u u lu a kwaghfan u oruma ga, kpa ka kwagh u hemban nahan ca je? Se nenge sha mpin ne ken ityough ki ki dondo ne.
KAR MFE WOU
Er nan ve mfe u Aôndo una fatyô u van we a msaanyol u tsôronô?
Uma una lu nena ken tar u Paradiso u u lu van laa?
Er nan ú zua a mtsera sha u ngohol mfe u Aôndo hegene?
[Mbampin Mba Ngeren u Henen]
