Ityough 18

I Lu Ishimaveren You u Eren Aôndo Tom Gbem sha Won

1, 2. Kanyi i gbe u a zua a mi dugh u zuan a mfe u Aôndo la sha yô?

TÔÔ wer ú tile sha hunda u iyou i lun a akaa a injaa kpishi i i sende yô. De se kaa ser or u nan lu a tahav nan nau makuli u sha iyou la man nan kaa er u̱ tôô akaa a injaa la a̱ lu a ou. Makuli la una lugh a iwasen ga saa ú yar tom a mi. Sha gbenda shon môm, saa ú yar tom a mfe man una lugh a iwasen ye.

² Jim je yô ka mimi nahan sha mfe u Aôndo la. Mimi je, mfe u vough u Yehova Aôndo man Yesu Kristu la una va a uma u tsôron. (Yohane 17:3) Nahan kpaa, ishimaveren la a fatyô u ivin i sha u zuan a mfe la tseegh tsô ga. Vough er ú yar tom a makuli u injaa nahan, gba u ú yar tom a mfe u Aôndo ken uma wou. Yesu yange kaa er ka mba eren ishima i Aôndo la vea “nyôr sha tartor” ye. Ambaaior la a lu a ian i eren Aôndo tom gbem sha won!—Mateu 7:21; 1 Yohane 2:17.

3. Kanyi i lu ishima i Aôndo sha ci wase?

³ Ú henen ú faan kwagh u a lu ishima i Aôndo kera yô, ka keng u ú er sha shami. Ú hen wer ishima i Aôndo sha ci wou yô kanyi? A fatyô u saven a sav ken mkaanem man vough er: Kav Yesu. Peteru u Hiihii 2:21 ôr se er: “Ka sha kwagh ne je i yer ne ye, gadia Kristu kpaa ya ican sha ci wen, A ver ne ikav je sha u né dondo Un ijime yô.” Nahan,  eren ishima i Aôndo yô, gba u ú dondo ikyav i Yesu la zulee je. Kape ú yar tom a mfe u Aôndo je la.

ER YESU YANGE YAR TOM A MFE U AÔNDO LA

4. Er nan Yesu a fe kwagh u Yehova yumu, man a yar tom a mfe na la nena?

⁴ Yesu Kristu ngu a mfe u Aôndo hemba er mbagenev ve lu a mi la. Yange lu vea Yehova Aôndo sha shi er tom vea na anyom udubu udubu cii mase van shin tar ye. (Mbakolose 1:15, 16) Man kanyi Yesu yange er a imba mfe la ciilii? Yange kuma un sha u lun di a mi tsô ga. Yesu yange lu uma sha atindi a mfe la. Ka sha ci u nahan ve yange lu a mhôônom ma zungwen tsung, lu a ishima i wan, man dooshima ken aeren a na a uumace mbagenev ye. Sha nahan la Yesu yange lu kaven Ter na u sha man lu eren sha mfe u a lu a mi sha igbenda i Yehova man mlu na la vough.—Yohane 8:23, 28, 29, 38; 1 Yohane 4:8.

5. Er nan yange i er Yesu batisema, man yange er sha inja i batisema na nena?

⁵ Mfe u Yesu lu a mi la na un u eren kwagh u vesen. A mough ken Galilia a va hen Ifi u Yordan, hen ape Yohane er un batisema la. (Mateu 3:13-15) Batisema u i er Yesu la tese ikyav i nyi? Er lu Oryuda yô, i mar un ken nongo u u vande tseghan iyol hen Aôndo yô. Sha nahan yô, i vande tseghan Yesu zum u i mar un la je. (Ekesodu 19:5, 6) Sha u zan er i er un batisema la, yange lu nan iyol na hen Yehova sha u una er ishima i Aôndo hen shighe la. (Mbaheberu 10:5, 7) Man Yesu er sha inja i batisema na la. Yange nôngo tsung sha u eren Yehova tom, lu samber a mfe u Aôndo hen ior sha hanma ian cii. Yesu yange zua a iember sha u eren ishima i Aôndo la, je yô a kaa er ka er kwaghyan nahan her a na.—Yohane 4:34.

6. Ka sha nyi gbenda Yesu yange nyiman iyolna?

⁶ Yesu yange fa dedoo er u eren ishima i Yehova la a lu kwagh u taver ishe—a gba u una na uma na je kpaa. Nahan cii kpaa, Yesu nyiman iyolna, ver mbamgbe nav ve lu  kwagh u ken ijime. U eren ishima i Aôndo lu kwagh u hiihii hanma shighe cii. Hen ian ne yô, ka nena se fatyô u dondon ikyav i Yesu i vough ne?

AAVEN A YEMEN KEN UMA U TSÔRON

7. Kanyi akaa i lu u or nana er keng ve nana kuma u a er nan batisema?

⁷ Kposo a Yesu yô, se yina nahan se fatyô u aren sha iaven i batisema zum u se vande tôôn aaver angahar a vesen la tseegh. Kwagh ne ka a hii sha u se zuan a mfe u Yehova Aôndo man Yesu Kristu ken ishima yase yô. U eren kwagh ne ka a na se lu a jighjigh u nan man dooshima u vesen hen Aôndo. (Mateu 22:37-40; Mbaromanu 10:17; Mbaheberu 11:6) U eren sha atindi a Aôndo, kua akaawan, man mbamkôôm nav la gba u una na se u geman asema, tesen ijungwen a mcieaôndo sha asorabo a ase a karen la. Kwagh ne ka a va a mgem, inja na yô, ka u geman ijime den nyityô ieren i yange se eren zum u se lu a̱ zua a mfe u Aôndo ga la cii. (Aerenakaa 3:19) Sha gbaaôndo yô, aluer se mba eren ma isholibo igen her ken myer a u ma se lu eren perapera yô, se mba a̱ gema se na ijime ga, shin se tsugh Aôndo kpaa ga. Yehova fe hanma imanger cii.—Luka 12:2, 3.

8. Kanyi kwagh i gbe u ú er aluer ú ngu a isharen i nyôron iyol ken tom u pasen kwagh u Tartor yôô?

⁸ Hegen u ú lu ngohol mfe u Aôndo ne yô, doo u ú time sha akaa a ken jijingi sha er a bende a we la ga he? Alaghga ka girim we iyol u ma ú ôr anmgbianev ou, ahuraior a ou, man mbagenev kpaa kwagh u ú lu henen la. Jim je yô, alaghga ú ngu vanden eren kwagh ne, vough er Yesu yange kar loho u dedoo la a mbagenev sha hanma ian nahan. (Luka 10:38, 39; Yohane 4:6-15) Hegen alaghga ú soo u eren hemban nahan. A saan mbatamen mba ken Kristu iyol u lamen a we sha u vea fa shin wea kuma shi a̱ lu pe ú fatyô u eren tom u pasen kwagh u Tartor a Mbashiada mba Yehova imôngo yô. Aluer ú kuma yô, mbatamen vea sôr ian sha u ú due kwaghpasen vea Orshiada yô. Mbahenen mba  Yesu yange ve dondon akaawan na sha u vea er tom la sha gbenda u vough yô. (Marku 6:7, 30; Luka 10:1) We kpaa ú zua a mtsera ken imba iwasen la er ú nyôr ken msamber u samber a loho u Tartor la sha uya uya man sha igbenda igenegh kpaa yô.—Aerenakaa 20:20, 21.

9. Or ka nan tsegha iyol i nan hen Aôndo nena, man iyoltseghan ka i bende a uma u or nena?

⁹ U pasen loho u dedoo hen hanma anzaaior cii ken ningir u tiônnongo la ka gbenda u keren mba ve lu a isharen i eren perapera yô shi ka môm ken ityom i dedoo i tesen er ú ngu a jighjigh u nan je la. (Aerenakaa 10:34, 35; Yakobu 2:17, 18, 26) U zan mbamkombo mba Mbakristu hanma shighe shi eren tom u injaa ken kwaghpasen la kpaa ka igbenda i tesen er ú zungwe shi ú gema ijime man hegen yô ú soo u eren kwagh sha mne u mfe u Aôndo yô. Kanyi igen shi i dondo? Ka u nan iyol you hen Yehova Aôndo. Ngun ne inja na yô ken msen u sha gbashima, ú ôr Aôndo wer ú ngu nan uma wou hen a na a mkighir shio man shi ka sha ishima you i môm sha u ú er ishima na yô. Kape ú na iyol you hen Yehova man ú ngohol ikyav mbi Yesu Kristu je la.—Mateu 11:29, 30.

BATISEMA—INJA NA HEN AWE

10. Er nan i gbe u ú er batisema zum u ú tsegh iyol you hen Yehova la?

¹⁰ Sha kwaghôron u Yesu yô, mba vea hingir mbahenen nav la cii saa a er ve batisema. (Mateu 28:19, 20) Er nan kwagh ne a lu keng zum u ú ne iyol you hen Aôndo kera yôô? Er ú ne iyol you hen Yehova yô, a fa je er un doo ú ishima. Kpa ka keng ú soo u eren kwagh ken hemen u una na mbagenev kpaa vea fa dooshima wou hen Aôndo yô. Ka shami, batisema ka a nau ian i pasen mne wou hen Yehova Aôndo la ken igbar.—Mbaromanu 10:9, 10.

11. Inja i batisema yô er nyi?

¹¹ Batisema ngu a inja vese. Er i mir ú, shin “i ii ú,” shin atô mnger la, ka inja er ú kpe sha uma wou u tse la nahan. Shighe u ú dugh shin mnger kera yô, ka inja er ú ngu duen  nyôron ken uma u he, u i lu ishima i Aôndo i hemen un i kera lu i you ga yô. Ka mimi, ngura ka u kaan er we ú kera er isholibo ga ze, sha ci u se cii se yina nahan ka se er isholibo hanma sev. Nahan cii kpaa, er ú ne iyol you, i er ú batisema ú hingir ortom u Yehova yô, ú nyôr ken icighan mlu vea na. Sha ci u mgem ishima wou man mne u ú ne iyol you sha u i er ú batisema la yô, Yehova ver ishima u una de u a asorabo a ou sha tahav mbu nagh ku ipaan ku Yesu la. Nahan batisema ka a va a imoishima i dedoo hen Aôndo.—1 Peteru 3:21.

12. Kanyi i lu inja i eren batisema (a) “ken iti i Ter”? (b) ‘ken iti i Wan’? (c) ‘ken iti i icighan jijingi’?

¹² Yesu yange kaa a mbadondon nav er ve̱ eren mbahenen mbahev batisema “ken iti i Ter man Wan man Icighan Jijingi.” (Mateu 28:19) Yange Yesu ver ishima er nyi? Batisema “ken iti i Ter” la tese ikyav er or u i lu eren nan batisema la nan lumun Yehova Aôndo a ishima i môm er ka Orgban man shi ka un a lu Uhembancii sha tar ye. (Pasalmi 36:9; 83:18; Orpasenkwagh 12:1) U eren batisema ‘ken iti i Wan’ la inja na yô er or la nan fa Yesu Kristu—man jim yô nagh Nagh ku ipaan la—er ka cii gbenda u myom u Aôndo a ver je la. (Aerenakaa 4:12) Batisema ‘ken iti i icighan jijingi’ la tese er u i lu u a er nan batisema la nan fa icighan jijingi u Yehova, shin tahav mbu tomov, er ka ikyagh ki tomov ki Aôndo a eren tom a mi sha u ivin mbaawashima Nav man shi a ne tahav hen mbatomov Nav sha u ve̱ er ishima Na i perapera imôngo a nongo Na u jijingi a lu hemen ú la.—Genese 1:2; Pasalmi 104:30; Yohane 14:26; 2 Peteru 1:21.

Ú WA IYOL SHA CI U BATISEMA VEE?

13, 14. Er nan i lu u se lu a mciem iyol sha u tsuan er se er Yehova Aôndo tom ga?

¹³ Er batisema a lu a inja kpishi man shi a lu kwagh u hange hange ken uma u or nahan, ka kwagh u we ú cia yôô? Mayange ga! Er u geman ishima wer ú er batisema la i lu  kwagh u a tôô heghema ga nahan kpaa, ahon a gban nga ga ka kwagh u hemban cii u or nana er sha won je ne.

¹⁴ Batisema ka a tese ken igbar er we u tsua wer ú er Yehova Aôndo tom. Hen ase sha ior mba ú fe mbara. Sha gbenda môm shin ugen, hanmô ken ave nan ngu eren ma orvesen tom ga he? Mbagen ka ve lu kpan u inyar. (Mateu 6:24) Mbagenev di yô ka ve zenda mzehemen shin ve er iyol ve tom sha u tôôn m-iv u asaren a ve la hingir kwagh u hiihii ken uma ve. Shi mbagenev di ka ve er mbaaôndo mbaaie tom. Kpa we ú tsua wer ú civir Aôndo u mimi, Yehova. Orgen môm tese imba erdoo, mhôônom ma zungwen, man dooshima ne ga. Aôndo ka a na uumace icivir sha u nan ve tom u tesen ve gbenda u myom. Ka a na mbatomov nav injar i uma u tsôron. Mimi je, u dondon ikyav i Yesu man nan uma wou hen Yehova la ka kwagh u ú cia ga. Jim yô, ka cii kwagh u a lu sha ishima i Aôndo shi a lu sha kwaghfan vough kpaa je la.—1 Utor 18:21.

15. Ka mbaagbe mba nyi ve hembe lun mba yangen batisema u erene?

¹⁵ Nahan kpaa, batisema ka kwagh u a er sha mkighir ga. Ka kwagh wou vea Yehova ne uhar tseegh. (Mbagalatia 6:4) Er ú lu vesen ken jijingi la, alaghga u lu henen ken ishima wer: “Ka nyi je i yange u eren mo batisema?” (Aerenakaa 8:35, 36) Alaghga ú pine iyol you wer, ‘Ahendan a hen tsombor nga yangen mo shinii? M ngu iyol ken ma kwagh u Icighanruamabera i vende shin ieren i isholibo her shinii? Alaghga m ngu cian mer me kera gba kwagh hen ityô yam ga shinii?’ Angan ka atôakaa a ú time shami je ne, kpa kar á dedoo.

16. Ka nena ú zua a mtsera sha u eren Yehova tomo?

¹⁶ Ka ieren i sha kwaghfan ga u henen sha akaa a aa saa ú la tseegh a u timen sha mbamtsera mba ve lu ken u eren Yehova tom la shio. Ikyav i tesen yô, nenge ase sha kwagh u mhendan u hen tsombor la. Yesu yange er ityendezwa er aluer anngôôv mba mbahenen nav ta ve kera sha ci u dondon un je kpaa, vea zua a tsombor u ken jijingi u vesen  hemban nahan. (Marku 10:29, 30) Mba ve kpaa ve lu mba nanjighjigh ne vea tese ú dooshima u anmgbianev, vea waseu u wan ishima sha tôvaican, shi vea sue ú sha u yemen sha gbenda u uma la. (1 Peteru 5:9) Hemban je yô mbatamen mba ken tiônnongo vea waseu u kôron mbamzeiyol man akaa a genegh kpaa doo doo. (Yakobu 5:14-16) Sha kwagh u tar kera soon we ga la yô, alaghga a doo u ú pine iyol you wer, ‘Kanyi je ia hemba u zuan a mlumun u Orgban tar, u nan un iember sha uma u m tsough nee?’—Anzaakaa 27:11.

U EREN SHA MLU U IYOLTSEGHAN MAN BATISEMA WOU LA

17. Er nan i doo u ú nenge batisema wer ka mhii tseegh kpa gema ka mkur ga?

¹⁷ Ka hange hange u umbur wer batisema ka mkur u ivesen you i ken jijingi ga. Gema ka mhii u tom u eren hen Aôndo gbem sha won u ortom u tseghan man shi u hingir môm ken Mbashiada mba Yehova. Shin er batisema a lu hange hange tsung nahan kpaa, ka ibumun er or nan zua a myom ga. Yesu yange kaa er: ‘Hanma or u i er nan batisema yô a yima nan’ ga. Kpa, yange gema kaa er: “Or u nana taver ishima zan zan mkur yô, ka nan á yima nan ye.” (Mateu 24:13) Sha ci u nahan yô, ka kpee u ú vande keren Tartor u Aôndo hiihii sha u veren ú u lu kwagh u hemban cii ken uma wou.—Mateu 6:25-34.

18. Batisema una karen kera yô, kanyi akaa i doo u haren ishima shami?

¹⁸ Sha u taver ishima ken tom wou hen Yehova yô, doo u lun a asaren a ken jijingi sha ci wou. Môm ken asaren la yô ka u seer mfe wou u Aôndo sha u henen Mkaanem nam iyol you sha hanma shighe cii. Wa ago iyol u ôron Bibilo hanma sev. (Pasalmi 1:1, 2) Zaan mbamkombo mba Mbakristu hanma shighe, sha ci u ior mba ú kohol a ve la vea wase u nan we agee a ken jijingi. Ken vegher wou yô, er nan ú we ken ishima wer ú ôron kwagh ken mbamkombo man sha nahan yô ú lu wuese Yehova shi ú lu keren sha u  maan mbagenev kpaa ga? (Mbaromanu 1:11, 12) Ishimaveren igen yô alaghga a lu u sôron mbamsen ou.—Luka 11:2-4.

19. Kanyi aeren icighan jijingi una waseu u lun a mi?

¹⁹ Aluer ka u ú er uma wou sha inja i batisema wou yô, gba u ú waan iko sha kwagh u ú lu eren la hanma shighe cii, ú na icighan jijingi u Aôndo ian wer a̱ ume ken a we aeren anza er dooshima, msaanyol, bem, ishima i wan, sar sar, mlu u dedoo, jighjigh, ishima i legh legh, man u kôron iyol tsaha nahan. (Mbagalatia 5:22, 23; 2 Peteru 3:11) Umbur wer, Yehova ne icighan jijingi na hen mba ve sen un man shi ve eren ishima na ve lu mbatomov nav mba perapera yô. (Luka 11:13; Aerenakaa 5:32) Nahan sôn Aôndo a̱ nau jijingi na shi pine un sha u a̱ nau iwasen i eren akaa a a lu sha ishima na yô. Aeren la aa hemba duen ken igbar ken iliam you man ieren you sha er ú lu ngohol mkôôm u jijingi u Aôndo la. Ka mimi, hanmaor ken tiônnongo u Mbakristu nan ngu nôngon sha u nana lu a “orhe” la shi nana hingir er Kristu yô. (Mbakolose 3:9-14) Hanmô wase nan tagher ishigh sha kwagh ne inja kposo sha ci u se mba ken mzehemen u ken jijingi aaven kposo kposo. Er ú yen yô, saa ú nôngo taveraa sha u ú lu a mlu u Kristu la. Kpa ishima i de yinan we sha kwagh ne ga, sha ci u ú fatyô sha iwasen i Aôndo.

20. Ka sha nyi igbenda ú fatyô u kaven Yesu ken tom laa?

²⁰ Môm ken akaa a ú har ishima shami yô i lu u kaven Yesu ken tom na u eren a iember la. (Mbaheberu 12:1-3) Yange tom la doo un ishima. Nahan yô, aluer ú ngu a ian i nyôron ken tom u pasen kwagh u Tartor la yô, nôngo i de lu di kwagh u gban eren tsô ga. Nôngo zua a mkom ken u tesen mbagenev kwagh u Tartor u Aôndo er Yesu kpaa yange zua a mi nahan. Yar tom a akaawan a tiônnongo ka a na sha u wasen we ken ityesen you la. Man lu a ishimaveren wer Yehova una fatyô u nan we agee a zan hemen ken tom wou.—1 Mbakorinte 9:19-23.

21. (a) Ka nena se fe ser Yehova nenge mba nan jighjigh mba ve er batisema la er ka mbainjaava? (b) Kanyi i tese er batisema ka kwagh u hange hange ken mwar wase u ijirôron i mtim i Aôndo sha botar nee?

 ²¹ Or u nan tsegh iyol i nan, nan er batisema man nan lu nôngon sha jighjigh u nan er nana dondo Yesu yô ka icighan or hen Aôndo. Yehova karen asema a uumace ubiliôn kpishi mbara cii nahan a fa er ambaaior la a ban kpishi yô. Ka a tôô ve er mba akaa a taver ishe, “akaainjaa.” (Hagai 2:7) Akaaôron a profeti a ken Bibilo tese er Aôndo tôô ambaaior la er ka mba i ver ve ikyav sha u vea war ijirôron i mtim i shighe kpeghee ia va sha tar u bo ne yô. (Esekiel 9:1-6; Malaki 3:16, 18) We ú ngu ken “mba i ver ve sha u ve̱ zua a uma u tsôron” la kpa? (Aerenakaa 13:48) Ka isharen you tsung wer i vereu ikyav er ú ngu eren Aôndo tom kpa? Iyoltseghan man batisema mba ken ikyav la, man mba hange hange sha u zuan a mwar.

22. Kanyi kwagh “zegeikpelaior” la ia fatyô u veren ishima keghene?

²² Er Mngerem ma deemee ma sha tar cii mara ma karen kera yô, Noa a tsombor na ve due ken tso la ve nyôr ken tar u i kile u lu waeng yô. Sha gbenda shon môm nyian, “zegeikpelaior” i i yar tom a mfe u Aôndo ken uuma vev man ve zough a mlumun u Yehova yô mba a ishimaveren i waren mkur u botar ne man ember uma gbem sha won sha tar u a kile la. (Mpase 7:9, 14) Uma la una lu nena?

KAR MFE WOU

Ka nena Yehova a soo er u̱ yar tom a mfe u ú fe un laa?

Ka akaa a eren a nyi a yem a za ar ken batisema u erene?

Er nan batisema á lu mkur ga kpa a gem a lu mhii?

Ka nena se er sha inja i iyoltseghan man batisema wase?

[Mbampin Mba Ngeren u Henen]

[Foto u sha peeji 172 la]

Ú na iyol you hen Aôndo ken msen kpa?

[Foto u sha peeji 174 la]

Ka nyi je i yange ú u eren batisema?