1-4. (a) Yesu yange tese kwase Samaria tsembelee nena, man lu nyi i due kere? (b) Mbaapostoli nav er nena?

YESU vea mbaapostoli nav yange ve zende shighe gôgônan. Ve mough ken Yudia ve lu zenden angahar yemen vegher u ken imbusutarimese la, ve ver ishigh u zan Galilia. Ve yem sha gbenda u u hemba lun kôvora yô, ve kar ken Samaria, lu zende u kuman er ayange atar nahan. Ka kom er iyange sha tembe nahan yô, ve za nyôr hen angar ugen, i yilan un ér Shikar, ve mem her ér vea ya kwagh.

² Mbaapostoli nav mba yemen u za yamen kwaghyan yô, Yesu tema hen kpejôr, ken won u gar la. Tsô kwase ugen va her u va kesen mngerem. Yesu yange ma de kwase la ér a yem kwagh na. Gadia “iyol kpe Yesu a zende.” (Yohane 4:6) Yange una lam a kwase Samaria la ga, zan zan kwase la una kar yemen kwagh na kpa or ma nan na un ibo ga. Er se vande henen ken ityough ki sha 4 ki takerada ne nahan, a̱ shi nan kpa kwase la yange fa ér kwagh a fatyô u gban Oryuda môm a na ga. Nahan kpa, Yesu hii iliam a na.

³ Yesu hii u lamen a kwase la sha injakwagh, i i zua sha kwagh u uma u kwase la u ayange ayange yô, man lu kwagh u kwase la lu eren ave ave la je. Yange va u va kesen mngerem; nahan Yesu ôr kwagh u mngerem ma umam, ma ma a bee un imura i ken jijingi yô. Kwase la pine mbampin imôngo mba vea ngôôr van a anyiman ga yô. * Yesu er kwagh sha kwaghfan,  sha ci u a palegh anyimanakaa, a gema a za hemen u lamen a kwase la sha kwagh u vande wan ishima u lamen a na sha mi la. Yange lam sha akaa a ken jijingi tseegh, ôr kwagh u mcivir u wang man Yehova Aôndo. Mkaanem nam bende a kwase la kpishi, sha ci u yange za ôr ior mba ken gar kwagh sha mi, nahan ve kpa ve va ér vea va ungwa kwaghôron u Yesu.—Yohane 4:3-42.

⁴ Shighe u mbaapostoli za hide la, ve nenge kwaghpasen u Yesu lu pasen kpoghuloo la nena? Ikyav tese ér maa ve iyol a kwagh u Yesu lu eren la ga. Kpiligh ve iyol er Yesu lu lamen a kwase la yô, man a̱ shi nan kpa ve bugh zwa a kwase la ga. Kwase la yemen cii yô, ve gba zamber a Yesu ér a ya kwaghyan u ve va a mi la. Nahan kpa, Yesu kaa a ve ér: “M ngu a kwaghyan u ne fe un ga yô.” Sha hiihii la, ve hen ér Yesu lu a kwaghyan kpôô kpôô, nahan taver ve. Tsô a pase ve ér: “Kwaghyan Wam yô, ka u Me er ishima i u A tindim la, Me kure tom Na vough kpaa.” (Yohane 4:32, 34) Nahan Yesu tese ér tom u un lu eren la hemba lun un a inja a kwaghyan. Yange soo ér ve kpa ve nenge tom shon nahan. Lu nyi tomo?

5. Lu tom u nyi Yesu er a uma na, man kanyi se lu timen sha mi ken ityough kini?

⁵ Sha shighe ugen la Yesu kaa ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.” (Luka 4:43) Yange i tindi Yesu ér a va ôr ior loho u dedoo u Tartor shi a tese ve kpaa. * Mbadondon Yesu nyian kpa mba a tom u eren vough er u Yesu er la nahan. Sha nahan yô, doo u se time sha ityôkyaa i i na ve Yesu pasen kwagh la, man kwagh u pasen la, kua gbenda u nengen tom shon la kpaa.

6, 7. Yesu yange soo ér “hanma ortesen” nana nenge kwagh u pasen mbagenev loho u dedoo la nena? Tese ikyav.

⁶ De se time se fa mnenge u Yesu sha kwagh u tesen la, se been yô, se time se fa er yange nengen ior mba tesen va la yô. Yesu yange ôr injakwagh igen sha u pasen mnenge u lu a mi sha kwagh u pasen mbagenev akaa a mimi a Yehova tese un la. A kaa ér: “Hanma orngeren [shin “hanma ortesen,” NW] u nan hingir orhenen ken tartor u Sha yô, nan ngu er orya nahan u ka nan dughun akaa a he man a tse ken iyou i nan i koson akaa a injaa la.” (Mateu 13:52) Er nan ve orya u ken injakwagh ne a dughun akaa ken iyou na i koson akaa a injaa?

⁷ Orya la ngu tan a ta ihyagh sha akaa a a lu a mi, er Tor Hesekia u ngise la er kwagen ve, kwagh tser un la nahan ga. (2 Utor 20:13-20) Kanyi i lu awashima u orya laa? Nenge ase ikyav ne: U za tica wou ugen u ú ne un icivir kpishi yô inya. Nahan a bugh drowa, a dugh uwashika shimi uhar, u môm la tsa je gema kala, ugen la di hemba ngun hegh. Ka uwashika mba ter na nger un yô, yange nger u môm shighe u tica la lu wanye la je, ugen la di ter na sember ngeren tindin un a mi. Saan un iyol kpishi u ôron we er uwashika mbara ve lu un a inja kpishi, man er kwaghwan u a lu ker la a gem uma na shi una fatyô u wasen we yô. Uwashika mbara gba tica la kwagh je ka ashe tugh ga, ve doo un ishima kpishi. (Luka 6:45) Ngu tesen we uwashika mban sha u kaan ihyagh shin sha u zuan a mtsera sha ma gbenda ugen ga, kpa ka u wasen we shi pasen we er ve lu a inja yô.

8. Se mba a ityôkyaa i dedoo i nengen akaa a mimi a se hen ken Mkaanem ma Aôndo la ser ka akaa injaa sha ci u nyi?

⁸ Lu awashima u Yesu, Ortesen u Hemban la kpa lu a mi ve pasen mbagenev akaa a mimi a Aôndo tese un la je la. Akaa shon lu un a inja hemba hanma kwagh ugen cii. Mfe ne yange doo un ishima kpishi, nahan maa un iyol u wasen mbagenev ér ve kpa ve zua a mi. Yange soo ér mbadondon un cii, “hanma ortesen” yô nana lu a imba mnenge la. Se mba a imba mnenge la kpa? Se mba a ityôkyaa i dedoo i soon hanma kwagh u mimi  u se hen ken Mkaanem ma Aôndo cii. Mkaanem ma mimi ma injaa mara doo se kpishi, ma a lu akaa a injaa a se ne jighjigh a mi ica i gbe, shin a i sember kengese kpaa. Aluer se mba ôron ior akaa a Yehova a tese la sha gbashima shi se za hemen u tesen ser akaa shon doo se ishima yô, se wase mbagenev kpa vea hii u soon akaa a injaa ne, vough er Yesu kpa er nahan.

9. (a) Yesu yange nengen ior mba tesen ve la nena? (b) Se dondo ieren i Yesu a ior la nena?

⁹ Ior mba Yesu tesen ve la kpa yange ve doo un ishima, er se va hen ken Vegher u sha 3 u takerada ne nahan. Kwaghôron u profeti tsengaôron ér: “mhôônom maa kôr [Mesiya] a mbaatsanev man mbaibanave.” (Pasalmi 72:13) Sha kpôô yô, kwagh u ior yange gba Yesu ishima. Yange kwagh gba un sha mbamhen mba iorov man mbamnenge vev mba yange ve mgbeghan ve u eren kwagh la kpaa; ikyav mbi yuhwan mbi ve tôô kpishi la kpa lu kwagh u zan Yesu iyol, kua akaa a a lu yangen ve u kaven mimi la kpaa. (Mateu 11:28; 16:13; 23:13, 15) Ikyav i tesen yô, umbur kwagh u kwase u ken Samaria la. Yange doo un kpishi er kwagh na gba Yesu ishima la je ka u henen a hen ga. Er Yesu fa mlu u kwase la tsembelee yô, ishima mgbegha kwase la u lumun ér Yesu ka profeti shi za ôr mbagenev kwagh na kpaa. (Yohane 4:16-19, 39) Sha mimi yô, mbadondon Yesu nyian vea fatyô u fan kwagh u a lu ken asema a ior mba ve pasen ve kwagh la ga. Nahan kpa, kwagh u ior una fatyô u gban se ishima, er Yesu nahan; shi se fatyô u tesen ve ser kwagh ve gba se ishima, shi lamen a ve sha akaa a a hembe doon ve la man sha mbamzeyol vev kua mbamgbe vev kpaa.

10, 11. (a) Lu nyi Yesu pasene? (b) Er nan ve yange kwagh gba sha Tartor u Aôndoo?

¹⁰ Lu nyi Yesu pasene? Aluer u ker u zuan a mlumun u sha mpin ne sha u timen sha atesen a ucôôci kpishi mba ve senge ér mba Mbakristu la yô, alaghga u kure ikyaa wer Yesu yange pasen kwagh u tarsôron ken ivangeli na. Gayô alaghga u nenge wer yange pasen kwagh u mgem u mbapatii vea va a mi la shin  hemban ôron ér myom u hanma or hemba akaa agen cii. Nahan kpa, er se vande nengen nahan, Yesu yange pase wang ér: “Ka u Me ôr Loho u Dedoo u tartor u Aôndo ken agar agen kpaa keng.” U pasen loho u dedoo u Tartor la yange wa nyi man nyi kere?

¹¹ Umbur wer, shighe u Satan hii gban ahon sha ian i Yehova a lu a mi i hemen la, Yesu lu sha vea Ter na. Nenge er yange ishima ia vihi Yesu ker kpishi er Satan sende Ter na u perapera la ityough shi wa un aie iyol ér ngu Orhemen u mimi ga, u a nyum akaa a á gbe a la kwagh u dedoo la sha wono! Shi nenge er yange ishima ia vihi Wan u Aôndo ker shighe u Adam man Ifa, mba lu u vea va hingir mbamaren mba tsombor u uumace cii la lumun a sendetyo u Satan la sha wono! Wan u Aôndo yange nenge er isholibo man ku va sha tsombor u uumace sha ci u ihyembeato la yô. (Mbaromanu 5:12) Nahan kpa, yange a gema a doo un tsung u fan er yange sev a hungwa a av ve Ter na una kure hanma kwagh cii vough sha ikyev i Tartor na la yô!

12, 13. Ka aferakaa a nyi Tartor u Aôndo ua va kar a mi kera, man Tartor la lu itinekwagh i Yesu pasen ior loho sha mi nena?

¹² Lu ikyaa i hemban cii i nyi yange gba u a sôrô? Yange gba u a tsegha icighanti u Yehova, a kar a hanma ilyahan i Satan kua mba ve te ikyaa a na ve ve a mi sha iti shon la cii kera. Shi gba u a paa hemen u Yehova u perapera la iyol, ka gbenda u Yehova a hemen la je la. Yesu yange hemba fan akaa a vesen ne a hanma or cii. Ken msen u Yesu tese mbadondon un la, a kaa a ve ér ve hii sônon ér i tsegha iti i Ter na, u dondon yô, ve sôn ér Tartor u Ter na u va, maa ve sôn ér i er ishima i Ter na shin tar. (Mateu 6:9, 10) Ica a kera gba ga tsô, Tartor u Aôndo u Yesu a lu Tor u ú la ua kar a hemen u bo u Satan ne kera, nahan hemen u Yehova u perapera la ua lu gbem sha won.—Daniel 2:44.

¹³ Tartor la lu itinekwagh i Yesu pasen ior loho sha mi yô. Mkaanem nam man aeren a na cii wase u tan iwanger sha kwagh u Tartor la u lu man gbenda u Tartor shon ua kure awashima u Yehova la kpaa. Yesu yange de ér kwagh môm a yange un u eren tom u pasen loho u dedoo u Tartor u Aôndo  la ga. Sha ayange a na la, ior lu ken mbamzeyol mba vesen kpishi, aferakaa kpa de ishar. Nahan kpa, Yesu hemba veren ishima sha loho na man tom na. Kwagh u Yesu er ne tese ér yange nômbon ikyôr sha mbamhen nav shi waan ior ikyo ga, zeren kimbir gbenda u yange pasen ior kwagh la shinii? Mayange ga!

14, 15. (a) Yesu yange tese ér un ngu or “u A hembe Solomon” yô nena? (b) Se dondo ikyav i Yesu sha loho u se pasen la nena?

¹⁴ Er vegher u sha uhar u takerada ne una tese se nahan, Yesu yange pasen kwagh sha gbenda u a doo ior yô, shi pasen kwagh gbenda môm tseegh ga. Yange a pase kwagh i kôr ior ken ishima. Alaghga se umbur kwagh u Solomon, Tor u fan kwagh, u yange a ker akaaôron a dedoo man a mimi, a una nger mbamhen mba Yehova mgbegha un u ngeren shin takerada la. (Orpasenkwagh 12:10) Yehova yange ‘bugh’ or u lu vough ga la ‘ishima,’ nahan wase un u lamen sha akaa kpishi, hii sha inyon zan zan due sha ishu man ikyon kua uzendenya kpaa. Ior yange ve mough sha ajiir a icaa ve va sha u va ungwan kwaghfan u Solomon. (1 Utor 4:29-34) Nahan kpa, Yesu lu or “u A hembe Solomon” yô. (Mateu 12:42) Kwaghfan na hemba u Solomon yem zende zende, shi “ishima i bughun” na kpa hemba i Solomon la. Yesu yange una tesen ior yô, a er tom a mfe u fa Mkaanem ma Aôndo hemba hanma or cii la, kua mfe u lu a mi sha kwagh u inyon man inyam man ishu man tom sule man mlu u ahumbe man akaa a a lu eren ave ave man kwagh u mbayiase kua mbamlu mba sha tar la cii. Nahan cii kpa, mayange Yesu ta ihyagh sha kwaghfan na sha u i doo mbagenev ga. Loho na yange u taver ga shi u wanger kpaa. Ka nahan ve yange i doo ior u keghen ato a na yum ye!—Marku 12:37; Luka 19:48.

¹⁵ Nyian ne, Mbakristu ka ve nôngo ér vea dondo ikyav i Yesu. Se mba a kwaghfan kpishi er un nahan ga, kpa se cii se pande se mba a mfe, shi se nenge a akaa ken uma wase a se fatyô u pasen ior akaa a mimi a ken Mkaanem ma Aôndo a mi yô. Ikyav i tesen yô, alaghga mbamaren vea tôô kwagh u ve nenge a mi ken myese u ve yesen ônov vev la vea tese ikyav i dooshima u  Yehova a lu a mi sha ônov Nav la. Mbagenev vea fatyô u tesen ikyav sha kwagh u tom u uke shin makeranta gayô mfe u ve zough a mi sha u eren kwagh vea ior kua mfe u ve lu a mi sha akaa a a lu zan hemen la. Nahan kpa, gba u se ver ishima sha er se yem u ôron akaa agen se undu loho wase ga yô, ka loho u dedoo u Tartor u Aôndo je la.—1 Timoteu 4:16.

16, 17. (a) Yesu yange nengen tom na u pasen kwagh la nena? (b) Yesu yange tese ér un hemba veren ishima sha tom na u pasen kwagh la nena?

¹⁶ Yesu yange nenge tom na u pasen kwagh la ér ka kwagh u injaa tsung. Yange i doo un u wasen ior sha u ve nengen Ter na u sha la er a lu jim jim la, nahan a yer kwagh u Ter na sha u tesen atesen a ior shin aeren a uter a tsumen a tsume a ior la ga. Yange i doo Yesu u wasen ior sha u ve ya ikyar a Yehova kangenaa shi ve zua a ishimaverenkeghen i uma u tsôron la. Shi i doo un u surun ior ishima shi nan ve msaanyol sha loho u dedoo. Yesu yange tese ér doo un u eren ambaakaa ne nena? Nenge ase sha igbenda i itiar ne.

¹⁷ Hiihii yô, tom u pasen kwagh la lu kwagh u hiihii ken uma u Yesu. U pasen ior kwagh u Tartor la lu tom u Yesu tsua u eren a uma na jimin cii yô. Lu ityôkyaa i i na ve Yesu er kwagh sha kwaghfan, sha u eren akaa ken uma na akuma akuma je la, er se vande henen ken ityough ki sha 5 la nahan. Yesu yange ver ishe na jighilii sha u eren kwagh u hemba lun a inja la, di er waan mbagenev kwagh ér ve er nahan. Yesu yange wa akaa ave kpishi, a yange gba u una kimbi inyaregh sha mi shin una ver ishima sha mi shin una sôr shin shighe a karen yô a gba u una yam a he ga, nahan kwagh lu u danen un ga. Yange eren akaa akuma akuma sha er ma kwagh a yange un u eren tom na u pasen kwagh la ga yô.—Mateu 6:22; 8:20.

18. Ka igbenda i nyi nahan Yesu yange er tom u pasen kwagh la sha agee a na ciilii?

¹⁸ Kwagh u sha uhar yô, Yesu yange er tom na u pasen kwagh  la sha agee a na cii. Yange er tom ne sha agee a na cii, a zende angahar ukilomita uderi uderi tser tar u Iserael la sha u keren ior mba una pase ve loho u dedoo yô. Lu lamen a ve sha uya vev man sha ityembegar man sha ityembekasua kua sha ajiir a ken igbar cii. Yange a̱ gba u una mem shin una ya kwagh shin una ma mngerem shin a gba u una mem kpuaa vea azende a na a sôngo sôngo la je kpa, a lam a ior. Shighe u Yesu lu kpen la je kpa, yange za hemen u pasen mbagenev loho u dedoo u Tartor u Aôndo!—Luka 23:39-43.

19, 20. Yesu yange tese ikyav ér gba u a er tom u pasen kwagh torough torough nena?

¹⁹ Kwagh u sha utar yô, Yesu yange er tom u pasen kwagh la torough torough. Umbur iliam i Yesu lam a kwase u ken Samaria hen kpejôr ken wongar u Shikar la. Ikyav tese ér mbaapostoli mba Yesu yange ve nenge ér gba u a pase mbagenev loho u dedoo torough torough hen shighe la ga. Yesu kaa a ve ér: “Ne yô, ne mba kaan ner: Shi iwer inyiin man sunda ua kuma ye gaa? Nenge, M kaan ne ne, kende nen ashe sha, nenge nen, iyiav mbi ken ishule, mbi via kuma u sundan ve.”—Yohane 4:35.

²⁰ Yesu ôr injakwagh ne sha ci u shighe u sunda kuma. Ikyav tese ér yange lu ken uwer u Chislev (uwer u Novemba pelegh Disemba). Lu u iwer inyiin ia kar cii ve shighe a kuma u sundan shair, sha shighe u iniongo i Paseka, sha iyange i Nisan 14 la ye. Nahan mbasulev nenge ér sunda ngu a kuma u vea er kwagh torough torough hen shighe la ga. Gadia shighe lu her kpishi. Kpa sha kwagh u sunda u sha injakwagh la di ye? Ior kpishi soo u ungwan loho u dedoo shi ve soo u henen kwagh shi hingir mbahenen mba Kristu shi zuan a ishimaverenkeghen i dedoo i Yehova ver sha ci ve la. Lu inja er Yesu kenger ken ishule i sha injakwagh la yô, a nenge iyiav via kungu mtom, ahumbe lu masen tenger a mi, sha u tesen je ér mbi kuma u sundan nahan. * Shighe ne lu shighe u sunda, man lu u a er tom  la torough torough kpaa! Sha nahan yô, zum u ior mba ken gar ugen nôngo ér Yesu a lu vea ve gbem yô, a kaa a ve ér: “Ka u Me ôr Loho u Dedoo u tartor u Aôndo ken agar agen kpaa keng, gadia ka sha ci u nahan je i tindim ye.”—Luka 4:43.

21. Se dondo ikyav i Yesu la nena?

²¹ Se fatyô u dondon Yesu sha igbenda i itiar i se tim sha mi ne cii. Se fatyô u geman tom u pasen kwagh u Mbakristu la ua lu kwagh u hiihii ken uma wase. Sea lu a tsombor kua ityom i uke i eren ave kpishi je kpa, se fatyô u tesen ser tom wase u pasen kwagh la ngu se kwagh u hiihii sha u eren u sha gbashima shi eren u hanma shighe cii, er Yesu eren nahan. (Mateu 6:33; 1 Timoteu 5:8) Se fatyô u eren tom u pasen kwagh la a agee a ase cii shi eren u hanma shighe shi suen u sha akaa a ase mgbeghaa. (Luka 13:24) Shi gba u se umbur hanma shighe cii ser tom wase ka tom u torough torough. (2 Timoteu 4:2) Nahan gba u se pasen kwagh hanma shighe u ian i dugh cii!

22. Kanyi se time sha mi ken ityough ki ki dondo nee?

²² Shi Yesu tese ér tom u pasen kwagh la ngu hange hange, nahan a er kwagh u ua za hemen shighe u una kpe kera yô. Yange wa mbadondon un tom u pasen kwagh shi tesen ior la sha ikyev. Se time sha tom u Yesu wa mbadondon un la ken ityough ki ki dondo ne.