Hen Or u Ôron:

“Va dondo sha a Mo.” (Marku 10:21) Er Yesu Kristu ôr mkaanem man a orgen nahan kpa, jighilii yô ngu lôhôn se cii ér se dondo sha a na. U ngu vengese myer na ne kpa? Aluer u vengese yô, kwagh ne una wase u kpen kpen. Sha ci u nyi?

Yehova yange tindi Wan na u môm môm la shin tar ér a va na uma na sha u paan se. (Yohane 3:16) Dugh ku u Wan na yange va kpe sha ci wase la kera yô, shi a tese se er se eren akaa ken uma wase yô. Ken hanma kwagh u yange er yô, a tile sha mimi, nahan a na saan Ter na iyol. Yesu shi tese se gbenda u se eren kwagh er Ter na nahan yô. Se fatyô u nengen a igbenda i Ter man akaa a a lu sha ishima i Ter la cica cii ken mkaanem man aeren a Wan na la.​—Yohane 14:⁠9.

Bibilo kaa ér, Yesu ngu “ikyav” hen a vese, “sha u [se] dondo Un ijime yô.” (1 Peteru 2:21) Aluer se soo u kporom ikyua a Yehova, shi se soo ser uma wase a lu se a inja hegen shi se za hemen u lun sha gbenda u zan ken uma u tsôron la yô, gba u se dondo Yesu ijime keng keng.

Saa se fa kwagh u uma u Yesu shin tar ne vighe vighe ve se fatyô u hiin zende ne ye. Nahan yô, gba u se time vighe vighe se fa kwagh u Yesu, u i pase ken Bibilo la. Aluer se mba gbidyen kwar sha akaa a Yesu ôron shi eren la, shi se mba henen sha igbenda i se fatyô u kaven un sha mkaan man sha aeren a ase yô, kwagh ne una wase se se hemba fan er se dondo sha a na cii.

Takerada ne u̱ wase u, Yesu man Yehova ve seer doon we ishima. Shi dooshima la a̱ mgbegha u, dondo Yesu ijime lianaa sha er u na a saan Yehova iyol hegen zan zan gbem sha won yô.