Er Nan Ka Se Kpe?
Er Nan Ka Se Kpe?
“Sha ityov mbi agunguv cii huan kwéng hegen, sha ityov mbi ikyonov cii ú úngwà ma iôôn je ga; ínyon ngi mnya sha ikyon: kegh; ica a gba ga tsô we kpa ú mem vough e̱r mban nahan.”—JOHANN WOLFGANG VON GOETHE, ORJAMAN U NGEREN ATSAM.
1, 2. (a) Yange i gba uumace a isharen i nyi? (b) Kanyi imba uma uumace mba hiihii mbara yange ve embere?
AÔNDO yange gba uumace a isharen i lun uma gbem sha won. Mimi je, Bibilo kaa ér a wa “isharen i mtsôr ken asema ve.” (Orpasenkwagh 3:11, Beck) Kpa Aôndo e̱r kwagh hemba u nan di a na uumace isharen i lun uma gbem tsô la. Yange na ve ian i lun uma gbem sha won kpaa.
2 Yange í gbà mbamaren asev mba hiihii, Adam man Ifa, ve lu̱ vough, ve lu̱ a acôghol sha iyol ga, shin ken ishima kpaa ga. (Duteronomi 32:4) Gbidye ase kwar yôô—ma iyol hían taveraa shin mnyoon lu̱ ga, mciem shin ishimanyian kpaa je ga! U seer yô, Aôndo ver ve ken iyaagh ki paradiso u doonashe. Aôndo yange wa ishima ér or-umace a̱ lu gbem sha won shi ken hemen yô tar cii u̱ iv aa ônov nav mba lun vough kpaa. (Genese 1:31; 2:15) Tsô, er nan ve ka se kpe?
Ihembeato Va aa Ku
3. Uma u tsôron sha ci u Adam man Ifa la yange hàr sha nyi?
3 Aôndo yange wa Adam tindi kaa ér: “Hanma kon u ken sule ne, gbaa yan u tsô, kpa kon u mfe u fan kwagh u dedoo man kwagh u bo la, de ye u ga, gadia iyange i ú ya u la, ú kpe je.” (Genese 2:16, 17) Nahan uma u tsôron sha ci u Adam man Ifa lu̱ a icúr; yange hàr sha mwe ve u wan kwaghôron u Aôndo ikyo la.
4. Zum u Adam man Ifa yange ve e̱r isholibo la, er nan ve ian i lun uma gbem sha won ken Paradiso la yange i kàr ve?
4 Nahan cii kpa, kwagh u vihin u yange er yô, Adam man Ifa yange ve venda tindi u Aôndo la. (Genese 3:1-6) Sha ieren ve la yô, ve hingir mbaasorabo, gadia “isholibo ka atindi a vendan.” (1 Yohane 3:4) Sha ityôkyaa ne yô, Adam man Ifa kera lu̱ a ishimaveren i zuan a uma u tsôron ga. Sha ci u nyi? Sha ci u “injar i isholibo i kimbin yô, ka ku.” (Mbaromanu 6:23) Ka nahan ve, zum u Aôndo lu̱ ôron Adam man Ifa ijir yô, á kaa nahan ye ér: “U ngu vuulevu, nahan ú shi ú hide ú hingir vuulevu.” Nahan maa i zenda mbamaren asev mba hiihii mbara ken ya ve u Paradiso la kera. Sha iyange i Adam man Ifa e̱r isholibo la je, ve hii u yemen shin ku tegh tegh.—Genese 3:19, 23, 24.
“Ku Va sha Ior Cii”
5. Ku yange u sàmbèr sha uumace cica cii inja nena?
5 Hen shighe ne isholibo ya tor ken iyol i Adam man Ifa. Sha nahan yô, ve kan shio u maren ônov mba vough, di vough e̱r kwagh u tan akam a mi u á lu vough ga una fatyô u tan ikyamegh ki vough ga nahan. (Yobu 14:4) Mimi je, hanma or u i mar yô ka nan tese ikyav ér mbamaren asev mba hiihii mbara yange ve ta mkpeyol man uma u tsôron ve kua u̱ ônov vev cii kera. Paulu apostoli u Kristu yange nger wener: “Er isholibo nyôr shin tar sha or môm, man ku gema va sha ci u isholibo yô, nahan ku va sha ior cii sha ci u ve cii ve er isholibo yô.”—Mbaromanu 5:12; kar sha Pasalmi 51:5.
6. Er nan ve ka se kpe?
6 Nyian mbatôvon kwaghfan fatyô u fan ityôkyaa i i ne ve uumace ka ve beeiyol shi ve kpe la ga. Nahan cii kpa Bibilo yô i pàsè ér ka se kpe sha ci u i mar se ken isholibo, se ya dyako ne hen mbamaren asev mba hiihii mbara. Kpa kanyi ka i er se zum u se kpe kera laa?
[Mbampin Mba Ngeren u Henen]
