Hen Ape á Gema sha u Zuan a Ákár La
Hen Ape á Gema sha u Zuan a Ákár La
“Ityesen i ican i tsôron la kàhà kposo á u nan dooshima u Aôndo a tese sha u gbanakaa la jighjigh. . . . U nan mtsaha u tsahan uma gbem sha won jighjigh sha ci u lanegh ku sha anyom kpuaa tseegh, a u nan uma shon ian i kôôm ieren na shio la kpaa, ka u eren kwagh kahan kposo a mhen u injaa.”—NIKHILANANDA, ORHINDU U TÔVON KWAGHFAN.
1, 2. Er jighjigh u nan sha kwagh u tar ú Àlúgbem a lú kposo kposo yum yô, ka mbampin mba nyi ve dúghu?
TAVER ior kpishi nyian u lumun ityesen i ican i tsôron la, vough e̱r Orhindu u tôvon kwaghfan Nikhilananda kpaa yange taver un nahan. Shi kape mbagenev kpaa i taver ve u kaven ambaakaa e̱r u aren sha Nirvana kua u hingir môm vea Tao je la.
2 Nahan kpa, ukwaghaôndo mba sha Ityoughkitaregh kua mba shin Ityôtar due a jighjigh u nan kperegh kperegh sha kwagh u tar ú Àlúgbem, sha ci u jighjigh u nan u ve lú a mi ér uma kpen ga la. A fatyô u fan mimi sha kwagh u ka a er se zum u se kpe la kpa? Mimi je uma kpen gaa? Ka han se gema sha u zuan a ákára?
Kwaghfan u Sángén Yeke man Kwaghfan u Taregh
3. Kwaghfan u sángén yeke shin igbenda i gban mker i kwaghfan la na ákár sha mbampin mba ve lu sha kwagh u uma shin ku la kpa?
3 Kwaghfan u sángén yeke shin gbenda u gban mker u kwaghfan shon la ngu a ákár sha mbampin mba ve dugh sha kwagh u tar ú Àlúgbem laa? Sha ci u akaa agenegh a á sember eren ior ve zulum aa ku shin akaa agenegh a á vande eren amba e̱r ‘or due undu iféségh ki iyolough’ la nahan ná yô, mbatimen sha akaa mbagenev nôngo u wan zwa sha kwagh u uma u shin ku la. E̱r orivangeli u Mbakatoliko Hans Küng lu̱ saven ôron ishèngè i mbagen ka ve senge la ken kwaghôron na sha itinekwagh i “Ku Ka Ian i Nyôron ken Iwangeree?” la yô, á kùrè wener: “Akav a pasen angan nahan tèsè ma kwagh sha mlu u uma shin ku ga: akav ne tèsè kwagh u ka a mase eren ken atô u miniti utaan mba masetyô cii man ku la tseegh, tèsè ma kwagh u uma u gbem sha won shin ku ga.” Á seer wener: “Kwagh u uma u shin ku la ka kwagh u vesen hen or u nan lú uma la. Gba u á na ikyar shami man ka keng u á kér ikyar ne pe genegh aluer ka u mbatweregh vea kan shio u nan i yô.”
4. Kwaghfan u taregh una fatyô u tan iwanger sha igbenda wue wue i uma u ken hemen u ukwaghaôndo kpishi ve dugh a mi la kpa?
4 Kwaghfan u taregh di ye? Una fatyô u wasen se u zuan a ákár sha mbamhen mbà ukwaghaôndo ve dúgh a mi kposo kposo sha kwagh u uma u ken hemen la kpa? Mker u kérén kwaghfan u taregh la kua “tom u kèrén àhábà kpaa ker,” kape orfankwagh u sha derianyom u sha 20 u ken tar u Britain Bertrand Russell a kaa la. Sha kwaghôron u The World Book Encyclopedia yô, kwaghfan u taregh ka “inja mker—gbenda u timen sha kwagh, páásé kwagh, nán mpase sha kwagh, shi kèrén àhábà kpaa.” Sha kwagh u tar ú Àlúgbem yô, mbaàhábà mba kwaghfan u taregh mbá wue wue. Mbagenev yila mtsôr ér ka kpen-sàrèn di tsô, kpa mbagenev di yô yila ér ka dyako u sha marami u hanma or-uma cii.
Imbor i Vesen i Zuan a Ákár
5. Ka takerada u hana ú hembe tsan ciili?
5 Nahan cii kpa, takerada ngú u ú lú a ákár a mimi sha mbampin mba vesen mba ve lú sha kwagh u uma man ku yô. Ka takerada u ú hembe tsan cii yô, i nger avegher a ú agenegh tsa hegen kuma anyom 3,500. Yange i nger vegher u hiihii u takerada ne uderimbaanyomov kàr kpuaa cii i mase ngeren atsam a hiihii a ruamabera u Hindu, á i yer ér Veda la ye, shi kuma anyom dubu cii Buddha kua Mahāvīra man Confucius, ve mase lun sha tar kpaa ye. Yange i nger takerada ne i bee ken inyom i 98 S.A., hemba anyom 500 cii Muhamadu hii tímin imaagh ki Islam ye. Imbor shon i vesen i i lú a kwaghfan u hemban ne ka Bibilo. *
6. Ka sha ci u nyi se fatyô u veren ishima ser Bibilo i páse se kwagh u á lu uma yôô?
6 Bibilo ngi a kwagh u mbayiase u tsuaa tsuaa u a hembe lun vough a nyityo takerada u ú lu sha tar cii yô. Kwagh u mbayiase u i nger ken Bibilo la yem ken jime zan zan za ar sha mhii u tsombor u or-umace la shi i pase e̱r yange er ve se va lu sha tar heen kpaa. i yem a vese ken jime zan zan za ar sha shighe u i lu̱ a̱ gba or-umace ga la je kpaa. Mimi je imba takerada la ia na se mkav sha er yange i er or shi kwagh u uma á lu la kpaa.
7, 8. Ka sha ci u nyi se fatyô u geman hen Bibilo fan ser ngi a ákár a mimi sha kwagh u ka a er zum u se kpe laa?
7 Heela tseegh ga, Bibilo ka takerada ú i nger akaaôron a profeti á a iv vough yô. U tesen ikyav yô, yange i tsenga pasen mdúgh man mgbé u ityartor i Mbamedia man Mbapershia kua tartor u Grika la kpaa vindi vindi. Mkaanem man yange má iv shami vough je yô mbànyimanakaa mbagenev nôngo ér vea tese ér akaa shon yange vande eren karen cii ve i nger á ye, kpa ve kan shio. (Daniel 8:1-7, 20-22) Akaaôron a profeti agenegh nga ivin vough vough sha shighe wase ne kpaa. *—Mateu, ityough 24; Marku, ityough 13; Luka, ityough 21; 2 Timoteu 3:1-5, 13.
8 Ma or-umace ngu u naná tsenga pasen akaa a ken hemen vough nahan ga, aluer nan ngu a mfe nan nan je kpaa. Ka Orgban tar u á hembe agee cii shi a hembe kwaghfan kpaa cii la tseegh una fatyô ye. (2 Timoteu 3:16, 17; 2 Peteru 1:20, 21) Mimi je Bibilo ka takerada u ú dugh hen Aôndo yô. Sha mimi yô, imba takerada la ia fatyô u nan se ákár a aa kuma se sha kwagh u ka a er se zum u se kpe yô. De se hii nengen kwagh u i er sha kwagh u uma yô.
[Ngeren mba shin kpe]
^ Ikyum. 5 Nenge antakerada u i yer ér A Book for All People ú Watchtower Bible and Tract Society of New York, Inc., a nger la.
^ Ikyum. 7 Nenge takerada u i yer ér The Bible—God’s Word or Man’s?, ú Watchtower Bible and Tract Society of New York, Inc., a nger la.
[Mbampin Mba Ngeren u Henen]
[Foto u sha peeji 18 la]
Takerada ú u hembe tsan cii la
[Foto u sha peeji 18 la]
Takerada ú u ne ákár a mimi a kuman vough yô
