Ishimaveren i Tseer Tseer!
Ishimaveren i Tseer Tseer!
“Anti or u nan lu uma man nan nem jighjigh yô, nana kpe mayange ga.”—YOHANE 11:26.
1. A va nder mbakpenev umiliôn imôngo vea nyôr ken nyi imba ikyasene?
ZUM ú a va nder ior umiliôn imôngo shin ku yô, a hide a ve shin tar u lun ivegher gbilin ga. (Aerenakaa 24:15) Vea nder a nyôr ken ikyasen i doonashe shi vea nenge á vande sôron ajiir ve a tsan kpaa doo doo, a vande koron akondo ve a zeren á ver a ver, kua kwaghyan kpaa mgbeghaa. Ka unô vea wa ago ne ciili? Wanger, á gba u ior vea vande lun shin tar u he la cii mnder u shin ku u shin tar la una hii ye. Kpa á lu̱ unô?
2-4. Kanyi ishimaveren i vesen i lu ken hemen sha ci u mba ve lu ken “ayange a masejime” nee?
2 M-iv u kwaghôron u profeti ken Bibilo tèsè ér se mba ken “ayange a masejime” a tar ne. * (2 Timoteu 3:1) Shi ca ga tsô, Yehova Aôndo una wa uwegh sha akaa a or-umace una kar á aferakaa shin tar kera vindi vindi. (Pasalmi 37:10, 11; Anzaakaa 2:21, 22) Hen shighe la, kanyi ia e̱r mba ve lú eren Aôndo tom sha mimi laa?
3 Yehova una tim mbaperapera a mbaaferev imôngo ga. (Pasalmi 145:20) Mayange ngu a̱ vande eren imba kwagh la ga, shi una e̱r nahan zum u una lu̱ karen a hanma kwagh u bo sha tar kera la kpaa ga. (Kar sha Genese 18:22, 23, 26.) Jim je yô, takerada u masetyô u Bibilo kaa ér “zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa,” ve due ken “zegecan la” kera. (Mpase 7:9-14) Een, zegeikpelaior ia wár zegecan u tar u ifer ne ua tim ker la, man vea nyôr ken tar u he u Aôndo. Kimi yô, uumace mba ungwan tindi vea zua a mtsera u vesen ken msagh u Aôndo una va sagh uumace ken isholibo man ku una tuhwa la. (Mpase 22:1, 2) Sha nahan yô, mayange “zegeikpelaior” la ia kera nenge aa ku ga. Ngun ka zege ishimaveren tsô!
4 Se fatyô u haren ishima sha imba ishimaverenkeghen i kpilighyol ne kpa? Keng je! Yesu Kristu iyol na yange tèsè ér shighe ngu van u ior vea lu uma gbem a u kpen mayange ga yô. Cii man á nder huror na Lasaru shin ku yô, Yesu kaa a Marta ér: “Anti or u nan lu uma man nan nem jighjigh yô, nana kpe mayange ga.”—Yohane 11:26.
We Kpa Ú Fatyô u Lun Uma Gbem sha Won
5, 6. Aluer ú soo u lun uma gbem sha won ken Paradiso shin tar yô, kanyi i gbe u ú ere?
5 Ú soo u lun uma gbem sha won ken Paradiso shin tar kpa? Sar ou u shi nengen a mba doon we ishima mbara kpa? Yô saa ú zua a mfe u vough u Aôndo la kua mbaawashima nav. Yesu yange ôr ken msen na hen Aôndo, ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”—Yohane 17:3.
6 Ishima i Aôndo yô ka “u ior cii ve̱ war ve̱ ar sha mfe u fan mimi la.” (1 Timoteu 2:3, 4) Ka hegen je í lú shighe u ú hen sha e̱r we kpaa ú fatyô u lun uma gbem sha won ken Paradiso shin tar, imôngo a mbagenev umiliôn kpishi mba ve lu vanden eren ishima i Aôndo la ye. Á saan Mbashiada mba Yehova iyol u̱ wasen we u seer henen kwagh u Aôndo man akaa a á soo la. E̱r nan ú ze hen ave ken Iyou i Tartor i i lú ikua a we la shin ú nger hen adereshi u a hembe lun ikua a we sha peeji u a dondo heen ne ga?
[Ngeren mba shin kpe]
^ Ikyum. 2 Nenge Mfe u Una Va a Uma u Tsôron La, peeji 98-107, ka Watchtower Bible and Tract Society of New York, Inc., a nger ye.
[Mbampin Mba Ngeren u Henen]
[Foto u sha peeji 31 la]
Á gba u “zegeikpelaior” vea bende aa ku mayange ga
