Kwagh Gba sha Mimi u sha Kwagh u Uma La
Kwagh Gba sha Mimi u sha Kwagh u Uma La
“Né fa mimi, mimi kpaa una pase ne una tuhwa.”—YOHANE 8:32.
1. Ka sha ityôkyaa i nyi i lú hange hange u se time sha jighjigh u nan wase sha kwagh u uma man ku?
ASHIGHE kpishi jighjigh u nan u or nan lú a mi sha kwagh u kuu man kwagh u tar ú Àlúgbem la ka a due ken ityesen i kwaghaôndo u nan kua aeren a ityô i nan. E̱r sé vande nengen nahan, jighjigh u nan ne hii sha ityesen i i kaa ér uma ka a mase za zuan a awashima na zum u i hide i mar or kwa kimbir kimbir la zan zan a̱r sha ityesen i lun uma shighe môm tseegh u hanma or nana fa mkur u nan la. Sha nahan yô, alaghga orgen naná lu a ishimaveren i masen za zuan a mhembe u mimi la, orgen di ishimaveren i nan á lu u aren sha Nirvana, kpa orgen di yô á lu u zuan a injar i sha. Nahan yô, kanyi jim i lu mimi? E̱r jighjigh u nan wase ka a hemen mbamhen asev, man aeren ase, kua kwagh u se tsough u eren la kpaa yô, doo u kwagh á gba se u kérén zuan a ikyar sha mpin ne gaa?
2, 3. (a) Ka sha ityôkyaa i nyi se fatyô u haren ishima sha kwagh u Bibilo i ôr sha kwagh u uma laa? (b) Er í nger ken Bibilo nahan, kanyi i lu mimi sha kwagh u uma?
2 Bibilo, takerada u ú hembe tsan sha won cii la, ú tôv sha akaa a mbayiase a or-uma hii sha mgbe u í gba uma u or sha hiihii la je. Ityesen i i ngí a kwaghfan u taregh kimi shin aeren a tyôô a ior kpaa ga. Bibilo pàsè mimi sha kwagh u uma wang je, ér: Uma wou ka we, mbakpenev za mbá mape ga cii, shi mba ve lu ken m-umbur u Aôndo la a va nder ve shin ku sha shighe u Aôndo á ver la. U fan kwagh ne una lu a inja hen a we nena?
3 “Né fa mimi, mimi kpaa una pase ne una tuhwa,” kape Yesu Kristu ôr a mbadondon nav la. (Yohane 8:32) Een, mimi sàghén mba ve lu ken uikyangen la kera toho. Kpa mimi sha kwagh u uma la una sagh se ikyangenev mbi nyi?
U Saghen Ikyangenev mbi Mciem man Mzungu
4, 5. (a) Mimi sha kwagh u uma ne kar a nyi mcie kera? (b) Ishimaverenkeghen i mnder u shin ku yange i taver wanyekwase u lu̱ uange tsung la nena?
4 The World Book Encyclopedia kaa ér: “Ior kpishi mba cie ku shi ka ve nôngo ér vea hen kwagh sha ú tsô kpaa ga.” Ortimen sha akaa a mbayiase ugen kaa ér: “Ishemberti i ‘ku’ la jim kpaa i nôngo u hingir iti-kwagh i mba shin Ityôtar vea ôr kwagh á tér tsô kpaa ga yô.” Shi ken aeren a tyôô a mbagenev yô ka i yar tom a asember a yilan kwagh amba e̱r “á kàr á yèm” kua “á sáà” nahan u ôron ku or sha u̱ i lú guda ken ato yô. Sha mimi jighilii yô mciem ma cian ku ne ka mciem ma or-fe-ga, sha ci u hen ior kpishi yô ku ka kwagh u cimin. U fan mimi sha kwagh u ka a er zum u se kpe la una kàr a mciem man kera.
5 U tesen ikyav yô, gbidye ase kwar sha e̱r ishima i Michaelyn u lu̱ anyom 15 la yange i lu̱ kimi yô. Yange lu̱ aa angev mbu ke’ ikuhe mbu i yer ér leukemia la, man yange zulum ikua ikua u kpen ku u kpilighyol. Ngô na Paula umbur, ér: “Michaelyn yange kaa ér vihi un u kpen ga sha ci u un fa ku ka di hìlà tsô. Yange se lam sha kwagh u tar u he u Aôndo kua mba a va nder ve ken ú la cii. Michaelyn yange na Yehova Aôndo jighjigh taveraa kua mnder u shin ku kpaa—lu̱ a ahon a gban cuku tsô kpaa ga.” Ishimaverenkeghen i mnder u shin ku ne yange sàgh gumkwase u tavershima ne ken icôron mcie u cian ku la kera.
6, 7. Mimi sha kwagh u uma ka a pase se sha nyi mzungu a tuhwa? Tèse ikyav.
6 Mimi yange bèndè a mbamaren mba Michaelyn nena? Ter na Jeff kaa ér: “Ku u wan wase u kiriki u kwase la yange lu̱ kwagh u hemban nyoon u yange e̱r se je la. Kpa se na jighjigh a ityendezwa i mnder u shin ku i Yehova a er la, man se mba veren ashe keghen ser iyange sev a av yô andoon wase Michaelyn shi una gba se ikyúm. Ngula á lu mzough u doon tsô!”
7 Een, u fan mimi sha kwagh u uma la ka a due a or ken feng u ke’ ishima u mzungu u ku u or u doonshima ka ú va a mi la. Ka mimi, ma kwagh môm una fatyô u karen a mnyoon man ijungwen i or ka nan zua a mi zum u or u doon nan ishima nan kpe la ga. Nahan cii kpa, ishimaverenkeghen i mnder u shin ku la, ka i pande i sùle ijungwen la shi i na mnyoon la je kpaa á lú guda.
8, 9. Mimi sha kwagh u mlu u mbakpenev ka a sagh se sha nyi mcie a tuhwa?
8 Mimi u Icighanruamabera i er sha kwagh u mlu u mbakpenev la shi ka a sagh se ken mciem ma cian ku la. Hen ior kpishi yô hii shighe u yange ve fa mimi ne je, kera mba ken uikyangen sha akombo a yángén sha ci u mbakpenev ga, shi mba kera yen ishima sha áfan a i we ve, shin u̱bí mba ve eren, shin mbá zeren ákpághér, shin sôron akombo kpaa ga, shi mba kera ne iniav mbi taver ishe sha u sùrún asema a uter vev mbayiase sha u yangen ve u hiden va zan mbaumav iyol kpaa ga. Mimi je, e̱r mbakpenev ve ‘fe ma kwagh ga’ yô, ambaakaa angara cii ka gbilin tsô.—Orpasenkwagh 9:5.
9 Mimi u i nger ken Bibilo sha kwagh u uma ne, sha kpôô yô ne myom shi a kuma u nan un jighjigh kpaa. Kpa shi nenge ase ian i vesen i Bibilo i ver sha ci wou la.
[Mbampin Mba Ngeren u Henen]
[Mkaanem ma sha peeji 29 la]
Mimi sha kwagh u uma ka a sagh ú ken mciem ma cian ku kera, man mciem ma cian mbakpenev, kua mzungu u zungwen ku u or u doon we ishima kpaa
