Uma sha Kwaghôron u Bibilo

“Or la maa hingir or u uma.”—GENESE 2:7.

1. Kanyi i gbe u̱ se time shami sha u fan kwagh u Bibilo i tese sha kwagh u uma?

ER SE vande nengen nahan, jighjigh u i ne kwagh u uma la ngee shi ngu wue wue kpaa. Hen atô u mba ve senge ér jighjigh u nan ve har sha Bibilo je kpaa, mbamhen vev mbá kposo kposo sha kwagh u a lu uma la kua kwagh u ka a er un zum u se kpe kera yô. Kpa kanyi jim Bibilo i tese sha kwagh u uma? U kérén fan yô, gba u se time sha inja i asemberatii a ken zwa Heberu kua zwa Grika a i gem ér “uma” ken Bibilo la.

“Uma” sha Inja i Kwagh u á Lú Ityough Ndor La

2, 3. (a) Kanyi ishemberti í gem ér “uma” ken Ruamabera u ken zwa Heberu, man inja i ishemberti shon jim yô er nyi? (b) Genese 2:7 tèsè ér ishemberti i “uma” la a fatyô u lun or jim nena?

² Ishemberti i ken zwa Heberu i í gem ér “uma” la ka neʹphesh, man ngi ken Ruamabera u ken zwa Heberu (u í hembe yilan ér Ikuryan i Tse la) kwa 754. Inja i neʹphesh yô ér nyi? Sha kwaghôron u The Dictionary of Bible and Religion yô, “mbá hembe veren ishima ér ka kwaghuma la jimin cii, ka í lú or shon jim.”

³ U tesen ikyav yô, Genese 2:7 kaa ér: “TER Aôndo maa or sha vuulevu u inyaagh, fehe nan iôôn i uma ken ahenga, or la maa hingir or u uma.” Ver ikyav wer Adam vande lun a uma ga; yange hingir a hingir or u uma—di vough e̱r or u nan hingir ortwer yô nan lú ortwer nahan. Nahan yô, á fatyô u pasen ishemberti i “uma” ne ér, ka or jimin.

4, 5. (a) Ná akav a tesen ér ishemberti i “uma” la ka or jimin cii. (b) Takerada u i yer ér The Dictionary of Bible and Religion la súè mkav u uma ka or jimin la nena?

⁴ Í súè mkav ne ken Ruamabera u ken zwa Heberu cica cii, hen ape se fatyô u zuan a asember a iliam amba er “aluer hanma or nana er isholibo” (Levitiku 5:1), “hanma or u nana er ma tom” (Levitiku 23:30), “aluer á kohol or nana lu iin or” (Duteronomi 24:7), “ishima vihi un” (Mbaajiriv 16:16), “né vihim ishima nan je?” (Yobu 19:2), man “ishima yinam sha ci u zayol” nahan la.—Pasalmi 119:28.

⁵ Ma kwagh ngu ken avur ne u tesen ér uma ka mà jijingi u ka a lu her shin ku ga. The Dictionary of Bible and Religion kaa ér: “U se kaan ser ‘uma’ u or u doon se ishima hide yem hen Ter shin ôron kwagh u ‘uma u kpen ga’ la á lu kwagh u tsumen kpishi hen aeren a uter á Ikuryan i Tse.”

6, 7. Kanyi ishemberti í gem ér “uma” ken Ruamabera u Mbakristu u ken zwa Grika, man inja i ishemberti ne jim yô ér nyi?

⁶ Ishemberti i í gem ér “uma” ken Ruamabera u Mbakristu u ken zwa Grika (u í hembe yilan ér Ikuryan i He la) ka psy·kheʹ. Di vough e̱r neʹphesh nahan, ashighe kpishi ishemberti ne ka i lu ôron kwagh u or jimin cii. U tesen ikyav yô, nenge ase asember a kwaghôron ne: “Hegen ishima ngi tan Mo kwe.” (Yohane 12:27) “Mciem gba sha hanma or u uma.” (Aerenakaa 2:43) “Hanma or u uma nana̱ ungwan imo i tahav mbu nan lu mbu sha ikev la.” (Mbaromanu 13:1) “Taver nen mba ve yen ishima la asema.” (1 Mbatesalonika  5:14) “Ior kpeghee, ka uuma mba iorov anigheni tsô ve war sha mnger ye.”—1 Peteru 3:20.

⁷ Psy·kheʹ kpaa ka or jimin, di vough e̱r neʹphesh nahan. Sha kwaghôron u ortimen sha akaa Nigel Turner yô, ishemberti ne “tèsè ikyav i or u nan lú uma yô, or iyol i nan, inyam man awambe u í fehe rûaḥ [jijingi] kimi la. . . . Kwagh u í har shami jim yô ka or jimin.”

8. Ishôso kpa ka uumaà? Ta iwanger.

⁸ Ken Bibilo yô i yar tom a ishemberti i “uma” la ka sha uumace tseegh ga kpa kua sha ishôso kpaa. U tesen ikyav yô, Genese 1:20 lu̱ pasen mgbe u í gba akaauma a shin mnger la, nahan á ôr tindi u Aôndo wa la ér: “Mngerem ma̱ mgbough a akaauma a zenden shimi.” Shi sev mbu gen mbu gbanakaa mbú aven yô, Aôndo kaa er: “Tar u̱ due a akaauma sha inja i a, uzendenya man akaa a a kper a kpela inya man inyamtoho i sha tar, sha anza a ve.” (Genese 1:24; kar sha Numeri 31:28.) Sha nahan yô, “uma” a fatyô u lun nyityo kwagh u á lu a uma cii, a̱ lu̱ or uma shin ishôso kpaa.

“Uma” sha Inja i Uma u Ishôso

9. (a) Ka nyi mpase á fatyô u seer nan sha ishemberti i “uma” laa? (b) Kwagh ne kàhà a mhen u uma ka or jim laa?

⁹ Ashighe agenegh yô, ka i yar tom a ishemberti i “uma” la u ôron kwagh u inja uma i or shin zendenya á lú la. Ngun gema mpase u Bibilo i ne sha kwagh u uma ér ka or shin ishôso la ga. Ikyav i tesen yô: Ka se kaa ser or ngu uma, inja na yô nan ngu her ityough ndor. Shi se fatyô u kaan kpaa ser nan ngu a uma. Sha gbenda shon môm, or u nan lú her ityough ndor yô nan ngu uma. Nahan kpa, shighe u nan lú uma la, a fatyô u ôron kwagh u “uma” kaan ér ka kwagh u or nan lú a mi yô.

10. Na akav a tesen ér ishemberti i “uma” la a fatyô u lun uma u or shin u zendenya ka a ember la.

¹⁰ U tesen ikyav yô, Aôndo yange kaa a Mose ér: “Ior mba ve lu keren we a ku la cii, ve kpe.” (Ekesodu 4:19) Wanger, mbaihomov mba Mose yange ve lu̱ keren ér vea kar a uma na kera. Shi á fatyô u nengen e̱r i yar tom a ishemberti i “uma” ne ken akaaôron a á dondo heen ne kpaa. “Se cia ne tsung sha ci u uuma asev.” (Yosua 9:24) “Ve yevese sha u vea war uma ve.” (2 Utor 7:7) “Orperapera we uma u zendenya na iko.” (Anzaakaa 12:10) “Wan u or kpaa A ve . . . sha u . . . Una na uma Na a̱ hingir ipaan sha ci u ior kpishi yô.” (Mateu 20:28) “Shi côhin ma a kpe . . . a gbihi uma na.” (Mbafilipi 2:30) Hen ajiir ne cii, ishemberti i “uma” la inja na yô ka kwagh u á lú her “ityough ndor” yô. *

11. A fatyô u kaan ér nyi sha myar u Bibilo i yar tom a ishemberti i “uma” laa?

¹¹ Nahan ishemberti i “uma” la ken Bibilo yô i tèsè ikyav i or shin zendenya shin mlu-uma u or shin u zendenya la. Mpase u Bibilo i ne sha kwagh u uma la taver ga, a kàhà ga, shi kwaghfan u taregh man mnyamciem ma uumace kpaa cimin shami ga. Kpa kanyi ka i er uma shin kuu? U nan ikyar sha mpin ne yô, saa se vande kaven ityôkyaa i i ne ve ka se kpe la.

[Ngeren mba shin kpe]

[Mbampin Mba Ngeren u Henen]

[Ufoto mba sha peeji 20 la]

Ve cii ka uuma