Vegher U Sha 6

Hii Nan Atsan Man M-ban u Mimi Ve Ngee Yumu?

1, 2. Sha kwagh u akaa a á vande eren uumace kera la yô, ka mbampin mba nyi i gbe u a pinee?

¹ Nahan cii kpaa, aluer Or Uhembansha la yange washima er ior mba vough ve lu uma shin tar gbem sha won a mbamlu mba ken paradiso shi aluer ka awashima na heregh yô, hii nan paradiso la a lu hegen ga? Hii nan or-umace nan gem nan zough a ican man m-ban u mimi kpaa ken uderimbaanyomov mba ve kar laa?

² Kwaghpinen a pine ngu ga, sha ci u mlu u uumace mgbough a akaavihin a ityav mbi ve a mi yô, kua tsoko u eren tahav sha ityar i genegh, u meen ngohol mbagenev akaa, m-ban u mimi, ibanave, kwaghtseren, angev, man ku.  Hii nan ubombaakaav ve eren mbaishôôv kpishi yum nahana? Aluer Aôndo ka u hembanagee yô, hii nan á ne atsan a vesen ne ian anyom udubu kpishi nahana? Er yange Aôndo ndera shi ver tar cii sha inja nahan, hii nan a ne injughulkwagh man mtim ian shin tara?

Ikyav i Tesen

3-5. (a) Ka injakwagh i nyi ia wase se u kaven er i hii man Aôndo u á eren kwagh sha inja ne una na ian er kwaghnzughul á lu shin tar nee? (b) Ka ityôkyaa i môm i nyi ken atôakaa kpishi ne í kom sha kwagh u tar nee?

³ De se tese ikyav sha injakwagh sha u fan er i hii man Aôndo u eren kwagh sha tindi a ne injughulkwagh ian shin tar yô. Tôô ken ishima you wer u ngu zenden ken ikyô maa u za nenge a iyou. U kengér iyou ne u been kera yô, u nenge ngi sha inja ga. Uwindor cii hembe, haav vihi caver caver, varenda hingir agbéé agbéé, hunda tôndo shi kokombo môm, ugôngor mbamngerev kpa de van a mngerem.

⁴ Er akaa ne cii a lu nahan yô, ú kule wer kera ka or u lun a mfe u nderan kwagh yange nan ndera iyou la ga zee? Er i̱ hingir nzughul nzughul yô ú kaa wer yange i̱ gba duen aburabur tsôô? Shin wea kaa wer ka or yange nan ndera nan maa i je kpaa, u kaa ken ishima wer yange or ne lu orfan tom ga shi yange lu orhenenkwagh ga yum shinii?

⁵ Aluer u kenger mlu u iyou la dedoo yô, yange i maa i̱ sha uee man tese ikyav i orhenenkwagh sha inja. Kpa hegen yô i̱ yôhôr ngi yemen u masen saanishe. Nahan mbamshi kua mbamzeiyol mban vea lu tesen er nyi? Vea lu tesen er (1) orya la kpe; (2) ka or u fan tom u kwaghmaan kpa kera ngu a isharen sha iyou la ga; ga yô (3) a hila gema iyou na ne a wa sha ikyev i mbanyôron ya mba eren a kwagh sha inja ga. Ka ityôkyaa i masejime ne i lu kwagh môm a mlu u tar ne ye.

Kwagh u yange Zaiyol La

6, 7. Kanyi yange i er Adam vea Ifa shighe u yange ve per tindi u Aôndo laa?

⁶ Sha kwagh u Bibilo i vandeôron yô awashima u Aôndo sha ci u ior lu sha u ve̱ ya ican shi ve kpe ga. Mbamaren asev mbahiihii mbara, Adam vea Ifa, yange ve kpe sha ci u ve hemba Aôndo ato. (Genese, ityouv 2 man 3) Zum u ve hemba ato yô, ve kera lu eren ishima i Aôndo ga. Ve nyula ve due sha ikyev i Aôndo kera. Sha jighilii yô, yange ve tôndo mlu ve a Aôndo, un u a lu “imbor i uma” la.—Upasalmi 36:9.

⁷ Er mashin ka a hii u ndôhôr ihyulan shi a mase tilen shighe u ka a wuhe un la nahan, yange ayolave kua mbamhen vev cii hii u vôngon. Shighe karen yô, Adam vea Ifa ve hingir zumbee, ve bee iyol, man ve mase kpen. Kanyi yange i eree? Ve yem ape yange i va a ve la: “Gadia ú ngu vuulevu, nahan ú shi ú hide ú hingir vuulevu.” Yange Aôndo ta ve icin er injar i ihyembeato ve yô ia lu ku: “Ú kpe je.”—Genese 2:17; 3:19.

8. Isholibo i mbamaren asev mbahiihii mbara yange i bende sha tsombor u uumace nena?

⁸ Ka mbamaren asev mbahiihii mbara tseegh yange ve kpe ga kpa kua ônov vev kpaa, tsombor u uumace cii, ve hingir mba zuan aa ku. Sha ci u nyi? Sha ci u sha atindi a tesen marami la yô, mbayev ka ve bee mbamaren vev. Nahan mbayev mba yange mbamaren asev mbahiihii mbara mar la cii yange i mar ve a mlu u waeng ga la kua ku shami. Mbaromanu 5:12 pase se er: “Nahan yô er isholibo nyôr shin tar sha or môm [Adam, ter u uumace], man ku gema va sha ci u isholibo yô, nahan ku va sha ior cii sha ci u ve cii ve er isholibo yô [sha ci u ve ngohol mlu u waeng ga la, inja na yô, ka asaren a isholibo je la].” Man er isholibo, man mlu u waeng ga la, man ku ve lu akaa a ior ve fe yô, mbagenev hen er akaa la ka gbaaôndo shi á fatyô u palegh a ga. Nahan cii kpaa, uumace mba hiihii mbara yange i gba ve a tahav man isharen i lun uma gbem sha won. Ka ityôkyaa i i lu ve ior kpishi ve lu a ishimanyian la gadia ve fa er yange ku ua er tavayia una gba sha uma ve keng.

Hii nan Ica i gbe Nahana?

9. Ka sha ci u nyi Aôndo á ne atsan a yan ian gôgô shighe yum nahana?

⁹ Hii nan Aôndo á ne uumace ian gôgônan er ve̱ sôr mbamlu vev ayolave? Hii nan á ne atsan a yan ian á lu heregh i kom uderimbanyomov kpishi nahana? Kwagh u a lu yô yange i va a ityôkyaa i vesen: Ka an nan lu a ian i hemene? Ka Aôndo a kom u lun Tor u uumace yee, shin vea kôrcio u hemen ayolave tsembelee a na shio?

10. Ka tahav mbu nyi yange i na uumace, man lu sha u eren nyi tomo?

 ¹⁰ Yange i gba uumace aa ian i eren kwagh u ve soo yô, inja na yô, i gba ve a tahav mbu tsuwan kwagh. Yange i er ve e̱r ior mba i var sha myô shin er ishôso, i i henen kwagh man i eren ga la ze. Nahan uumace vea fatyô u tsuwan or u ve soo u civir nan yô. (Duteronomi 30:19; 2 Mbakorinte 3:17) Er i lu nahan yô, Mkaanem ma Aôndo wa kwagh er: “Lu nen er mba ve lu ken uikangen ga nahan, kpa mlu wen u ken uikangen ga la a̱ de gem a̱ hingir ne kwagh u yisan ifer a mi ga; lu nen ikpan i Aôndo.” (1 Peteru 2:16) Nahan cii kpaa, er uumace ve lu a iyua i kpilighyol i eren kwagh u ve soo kua kwagh u ve tsough nahan cii kpaa, vea ngohol injar sha aeren a ve la.

11. Ka gbenda môm tseegh u nyi ú lu u fan er kwagh á fatyô u zan tsembelee ga aluer or tile sha tseeneke a Aôndo shio yô?

¹¹ Mbamaren asev mbahiihii mbara yange ve tsuwa kwagh u shami ga. Yange ve tsuwa u tilen sha tseeneke a Aôndo shio la. Mimi je, Aôndo yange ma fatyô u wuan mbahembanato mbara er yange ve yar tom a ian ve i eren kwagh u ve soo la sha kwaghfan ga yô. Kpa yange u wuan ve la ma fatyô u been a akperan sha kwagh u mkom u Aôndo u hemen uumace la ga. Er mbahiihii mban yange ve soo u lun sha tseeneke ve a Aôndo shio yô, saa á na ikyar sha mpin ne keng: Gbenda u yange ve tile sha ú la yange ma ve zua a msaanyol man mlu u tsembelee kpa? Gbenda u fan mlu u kwagh ne yô lu u den mbamaren mbahiihii mbara kua ônov vev cii sha u ve̱ er ishima ve, sha ci u ka kwagh u yange ve tsuwa u eren je la. Shighe una pase kwagh ne ken igbar aluer yange i gba uumace sha u ve̱ er kwagh tsembelee sha u hemen ayolave sha tseeneke ve a Orgbanakaa u a gbe ve la shio kpaa.

12. Yange Yeremia kaa imo sha kwagh u hemen u uumace nena, man ka nahan sha ci u nyi?

¹² Orngeren Bibilo Yeremia yange fa kwagh u una due sha kwagh ne yô. Sha mne u icighan jijingi i Aôndo i utaha, shin tahav mbu agegh nagh yô, yange nger sha mimi nahan er: “TERE, m fa, gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga. TERE, tsaham.” (Yeremia 10:23, 24) Yange fa er saa uumace vea ngohol ityesen i Aôndo man kwaghfan na u a dugh sha la. Sha ci u nyi? Ka sha ci u yange  Aôndo gba uumace er ve̱ er kwagh tsembelee aa hemen na shio ga.

13. Kanyi hemen u uumace u ken udubu mbaanyomov mba ve kar ne u tese a akperan shio?

¹³ Akaa a a dugh sha hemen u uumace ken anyom udubu kpishi ne tese a akperan shio er uumace mba a kwaghfan u hemen ayolave a Orgbanakaa u a gbe ve la shio ga. Er ve kar ve nenge yô, vea na ayolave ibo sha mbamtim mba cieryol mba ve dugh shami mbara. Bibilo i ôr kwagh waeng er: “Ka Vande [ka Aôndo je la], tom Na ngu vough; gadia igbinda Na cii, ngi jighilii. Ka Aôndo u jighjigh, ngu a ifer ga, Un ka u perapera man u mimi. Ve er a Na dang, ve kera mba ônov Nav ga, mba a acôghol iyol; ka kov u bo u lun kpe.”—Duteronomi 32:4, 5.

Shi Kpeghee Aôndo una wa Uwegh

14. Ka sha ci u nyi Aôndo una kera timbir u wan uwegh sha akaa a uumace ga?

¹⁴ Er shighe u á ne uumace gôgônan kpa ve tese igbekera sha hemen ve ken uderimbaanyomov mba ve kar mban yô, hegen kuma u Aôndo una wa uwegh sha aerenakaa a uumace sha u been a atsan, ijungwen, angev, kua ku kpaa. Er á né uumace ian ve nyer sha iaven i hemban i kwaghfan ve u sangen yeke, iwavaren, icimbiv mbi eren twer, kua agbaatom a genegh yô, kera ka a inja u shi Aôndo nan ve uderimbaanyomov sha er uumace shi ve̱ er kwagh sha tseeneke ve a Orgbanakaa u a gbe ve la sha u tesen aluer vea kôrcio u van a bem, man tar u paradiso ga. Ve vande kanen shio shi vea kanshio kpaa. Mtile u sha tseeneke a Aôndo shio la va a tar u vihin, ú ihyomkôron, man ú nan ku kpaa.

15. Ka kwaghwan u Bibilo u nyi a doo u se yar tom shamini?

¹⁵ Shin er utor mbatarev mbagenev ve lu a isharen i mimi u wasen or-umace nahan kpaa, ve kanshio. Hanmajiir nyian cii ikyav ngi i tesen er mtemtor u uumace saa ishe. Ka nahan ve Bibilo i we kwagh ye er: “De suur nen sha mbatarev, sha wan u or u iwasen i lu her a na ga la ze.”—Upasalmi 146:3.

[Mbampin Mba Ngeren u Henen]

[Foto u sha peeji 24, 25 la]

Utor mbatarev mba ve lu a awashima u mimi je kpaa ve kanshio u van a bem, man tar u paradiso