Lu Uma Gbem sha Won Shin Tar u Paradiso
Vegher U Sha 8
Lu Uma Gbem sha Won Shin Tar u Paradiso
1, 2. Ken hemen u Tartor u Aôndo la uma una lu nena?
1 Zum u Aôndo una bee a aferakaa kua atsan cii shin tar una nyôr á tar na u he ken hemen u sha dooshima sha ikyev i Tartor na la yô, uma una lu nena? Aôndo tôndozwa er ‘una bugh uwegh nagh una na hanma kwagh u uma sha isharen na.’—Upasalmi 145:16.
2 Ka akaa a hange hange a nyi á sarugh yumu? Ka akaa er uma u saan saan, tom u doon u eren, akaa a kuman, mluashe u dedoo, bem hen atô u ior cii, man u duen ken ikyangenev mbi m-ban u mimi, angev, ican i yan, man ku ga zee? Man iember i ken jijingi ye? Shi kpeghee akaa la cii aa due ken igbar sha ikyev i mtemtor u Tartor u Aôndo. Yô ver ase ikyav sha akaaôron a profeti a Bibilo sha kwagh u averen a kpilighyol a a lu van ken tar u he la.
Uumace vea lu ken Bem u Mimi
3-6. Ka kwaghôron u mimi u nyi se lu a mi u tesen er uumace vea va lu ken bem ken tar u he laa?
3 “ [Aôndo] er ityav mbi bee zan zan ar hen ikighir i tar je, A sombo ada, A kever iwange, A nande akekeautya sha usu.”—Upasalmi 46:9.
4 “Vea gema usanker vev, vea var indyuhar a mi, awange a ve kpaa aa hingir ahô a sôron ikon a mi; ikurior igen ia kera tsuwa sanker a ikurior igen ga, vea kera hen ityav mbi nôngon kpaa ga.”—Yesaia 2:4.
5 “Mbaasemaleghlegh yô, vea ya dyako u tar, á saan ve iyol sha mngee u bem.”—Upasalmi 37:11.
6 “Tar cii hingir bem bem, u mem; i gba wan atsam ember.”—Yesaia 14:7.
Or man Ishôso vea lu ken Bem
7, 8. Kanyi bem una lu hen atô u ior man ishôso?
7 “Gbaseela una teman vea waniyôngo imôngo, anyam kpaa una yaven a wanivo imôngo; gumbua man gumbegha kua icighanile vea teman imôngo, wanye u kpeghee una hemen ve. Ngôbua vea ngôdwem vea yan kwagh, ônov vev vea yaven ijiir i môm; begha je kpaa una ya toho er bua nahan. Wanikundan u man atumba una numbe hen zwa u tayar, wan u den atumba una za uwegh ken zwa u igbinde. Vea vihi kwagh ga, vea tim kwagh . . . kpaa ga.”—Yesaia 11:6-9.
8 “Me ya ikur sha ci ve a inyamtoho man inyon i sha man akaa a kpelan iyav inya; . . . Me na vea tema bem bem.”—Hosea 2:18.
Mkpeyol u Mimi, Uma u Tsôron
9-14. Na mpase sha mbamlu mba van a mkpeyol mba vea lu ken tar u he la.
9 “Tsô á bugh mbaapirashe ashe, man á bugh mbakondonato ato. Tsô orkeer nana gba tsuwen er ashim nahan, man nombor u orkondoniker kpaa ua wa icam.”—Yesaia 35:5, 6.
10 “ [Aôndo] una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:4.
11 “Ma or u nan tem ker kpaa nana kera kaa er: Kwagh nyoon mo, ga.”—Yesaia 33:24.
12 “Zum la inyam i nan ia hingir hegh á hemba i wanye kpaa; nana hide nana hingir er sha ayange a nan lu iyev la yô.”—Yobu 33:25.
13 “Iwua i sha mrumun u sha mhôôn u Aôndo yô, ka uma u tsôron ken Kristu Yesu Ter wase.”—Mbaromanu 6:23.
14 “Anti or u nan ne Un jighjigh yô, [nana̱] . . . zua a uma u tsôron.”—Yohane 3:16.
Á Nder Mbakpenev
15-17. Mba ve vande kpen mbara ishimaverenkeghen ve kanyi?
15 “Ka mnder u mbaperapera kua mba ve lu perapera ga vea nder shin ku la.”—Aerenakaa 24:15.
16 “Shighe ngu van u mba ve lu shin iwar cii [mba Aôndo a umbur ve la] vea ungwa imo Na, vea due kpaa.”—Yohane 5:28, 29.
17 “Zegemnger na mbakpenev mba ve lu shin a na la. Ku man Hade kpaa [uwar] na mbakpenev mba ve lu shin ve la.”—Mpase 20:13.
Tar, ka Paradiso u Ngeen a Akaa
18-22. A va gema tar cii ua hingir nena?
18 “Á lu ikumenura u haan iveren. Ikon i ken ikyôngo ia ume atam, man tar kpaa ua doo iyiagh, vea tema bem bem ken tar ve.”—Esekiel 34:26, 27.
19 “Inya mende iyiav dedoo; Aôndo, Aôndo wase, Una ver se doo doo.”—Upasalmi 67:6.
20 “Taaikôngo man ikpoghonya vea lu sar sar, deserti una ember, una mondo er ishohough nahan.”—Yesaia 35:1.
21 “Iwo kua agungu vea ger icam i wan sha ishigh yenegh, ikon i ken toho cii kpaa ia kure ave. Kon u fer ua mende sha ityough ki saa, kon u mertel ua mende di sha ityough ki sagher.”—Yesaia 55:12, 13.
22 “Ú lu a Mo imôngo ken Paradiso.”—Luka 23:43.
Uya mba Dedoo sha ci u Hanmaor
23, 24. Ka kwaghôron u mimi u nyi se lu a mi u tesen er uya mba dedoo vea lu sha ci u hanmaoro?
23 “Vea maa uya man vea tema keregh . . . Mayange vea maa ya, orgen á kar á tema ker ga, vea lôô, man orgen á kar á ya, ga; . . . uicuwan Av kpaa vea ya tom u ave ve zan zan je. Vea kera er tom gbilin ga, vea kera mar ônov sha ci u ve̱ tim kera kpaa ga.”—Yesaia 65:21-23.
24 “Hanmô ve nana tema shin itine i kon u wain u nan, man shin itine i kon u tur u nan, ma or nana kera ta ve mciem iyol ga.”—Mika 4:4.
Ú Fatyô u Lun Uma Gbem sha won ken Paradiso
25. Ka mlu u kpilighyol u nyi se nenge a mi ken hemene?
25 Mlu u ken hemen la kpilighyol tsô! Uuma mba hegen mban mba a awashima u á lu á ishimaverenkeghen i tilen er ka imandetso i taver yô sha er ken tar u he u Aôndo la yô mbamzeiyol mba ve lu nyian mban cii vea hingir akaa a tse gbem sha won! “Á kera umbur akaa a tsuaa la ga, man shi aa kera va or ken ishima kpaa ga.” (Yesaia 65:17) Shi ka kwagh u nan msurshima kpishi sha u fan er uma u hen shighe la una lu u tsôron yô: “ [Aôndo] una tim ku sha won kera.”—Yesaia 25:8.
26. Kanyi i lu i ú er man ú lu uma gbem sha won ken tar u he u Aôndo laa?
26 U soo u va lun gbem sha won ken tar u he u Paradiso u u ngbôghom nee? Alaghga u pine wer, ‘Kanyi i lu i me er sha er Aôndo una lumun a mo una kuram ken mkur u tar ne sha er mé lu uma ken tar na u he laa? ’ Gba u ú er kwagh u yange Yesu tese ken msen na hen Aôndo er i̱ eren la: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”—Yohane 17:3.
27. Kanyi i lu i u er keng sha er u va lu ken awashima u Aôndo yôô?
27 Sha nahan yô, zua a Bibilo, ôr shi kar sha akaa a ú vande ôron ken antakerada ne la. Ker mba ve henen shi ve tesen akaa a mimi aa Bibilo ne. Osough due kera ken ukwaghaôndo mba imangerev mba ve tesen shi ve eren akaa a a lu kposo a Bibilo la. Hen sha er we, kua ior umiliôn mba ve lu vanden eren ishima i Aôndo la, ú fatyô u lun a kwar ken awashima u Aôndo sha er uumace vea lu uma gbem sha won shin tar u paradiso yô. Lu a kwagh u Mkaanem ma Aôndo ma kaa ne ken ishima sha kwagh u á lu ken hemen ne: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”—1 Yohane 2:17.
[Mbampin Mba Ngeren u Henen]
[Foto u sha peeji 31 la]
Shi kpeghee awashima u Aôndo u hiden a tar u paradiso la una iv
