Shi Kpeghee Awashima u Aôndo Una Iv
Vegher U Sha 7
Shi Kpeghee Awashima u Aôndo Una Iv
1, 2. Ka sha ci u nyi se fa ser Aôndo una er kwagh sha u been a aferakaa man atsan a yana?
1 Shin er sha mnenge u uumace yô er Aôndo á ne mlu u vough ga ne kua atsan ian shighe gôgônan nahan kpaa, mayange una de er mbamlu mbabov ve̱ za hemen gbem sha won ga. Bibilo i̱ ôr se er Aôndo ngu a shighe u una de akaa ne yô.
2 “Hanma kwagh ngu a ayange na.” (Orpasenkwagh 3:1) Zum u shighe u Aôndo á ne aferakaa kua atsan la una been yô, ka hen zum la una wa uwegh sha aerenakaa a uumace ye. Una bee a aferakaa man atsan shi una iv awashima na u hiihii la sha u nengen er tar iv a tsombor u uumace mba lun vough, saan saan shi ember bem u mimi man mkpeyol u akaa ken mbamlu mba ken Paradiso mbara cii.
Ajiraôron a Aôndo
3, 4. Takerada u Anzaakaa pase kwagh u una due sha uwegh ku wan ku Aôndo nena?
3 Ver ase ikyav sha akaaôron a profeti ken a genegh kpishi a Bibilo i pase sha kwagh u Aôndo una wa uwegh la, inja na yô, ka akaa a a due sha kwagh u ajiraôron a na la, er a lu hen tsombor u uumace yô:
4 “Mbaperapera vea tema sha tar, man mbajighjigh kpaa vea tema sha u gbem. Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera.”—Anzaakaa 2:21, 22.
5, 6. Upasalmi 37 tese kwagh u una er shighe u Aôndo una wa uwegh la nena?
5 “Á va tim aferaior kera; kpa mba ve veren ashe hen TER yô, ka ve vea ya dyako u tar ye. Gadia shi côhin tsô iferor á kera lu ga . . . Kpa mbaasemaleghlegh yô, vea ya dyako u tar, á saan ve iyol sha mngee u bem.”—Upasalmi 37:9-11.
6 “Ver ashe hen TER, wa iko sha gbenda Na, tsô Una kende u sha, ú ya dyako u tar, ú nenge mtim u á tim mbaaferev kera yô. Ver ishima sha or u vough, shi nenge sha or u mimi kpaa, gadia injar ngi sha ci u or u bem; kpa mbaasorabo yô, á tim ve imôngo icin i môm.”—Upasalmi 37:34, 37, 38.
7. Ka kwaghwan u injaa u nyi Mkaanem ma Aôndo ma ne se?
7 Sha kwagh ne yô, er mdoom ma ken hemen mara ma lu van sha ci u mba ve fe ér Orgbanakaa uhembanagee la kuma u teman tor sha a ve yô, i wa se kwagh er: “Ishima you i̱ waan atindi am iko, gadia vea seer we ayange á ngee, man anyom a uma kua bem kpaa.” Sha mimi yô, ka mba ve tsough u eren ishima i Aôndo la á na ve uma u tsôron ye! Sha nahan yô, Mkaanem ma Aôndo wa se kwagh er: “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.”—Anzaaka 3:1, 2, 5, 6.
Hemen u Aôndo ú Sha
8, 9. Aôndo una ese tar ne sha nyi?
8 Aôndo una kile tar ne sha ikyev i gomoti u hembandoon u uumace vea zua a mi yô. Ka gomoti u una er kwagh sha ibeen i kwaghfan u a lu sha yô sha ci u hemen ne ua due sha sha mtese u Aôndo. Shi Tartor u sha la ua kar a hanma inja i mhemen u uumace cii hen tar ne kera. Uumace vea kera lu a ian i keren u hemen sha tseeneke ve a Aôndo shio ga.
9 Sha kwagh ne yô kwaghôron u profeti u Daniel 2:44 la kaa er: “Sha ayange a utor mbara [ugomoti mba ve lu hegen mban], Aôndo u Sha Una ver tartor ugen [sha] u ua gba mayange ga yô, man shi tahav mbu u kpaa mbua hingir sha ikev i ma ikur igen ga [a kera na uumace ian er ve̱ hemen sha tseeneke ve a Aôndo shio ga], kpa ua hembe ityartor igen ne cii [i i lu hegen ne] avur avur, ua tim i, kpa u yô, ua lu gbem sha won.”—Shi nenge ken Mpase 19:11-21; 20:4-6.
10. Ka sha ci u nyi se lu a vangertior ser Tartor u Aôndo u sha la kwagh u vihin mtemtor u ú una lu ga?
10 Aluun nahan yô, uumace vea kera lu a ma hemen u pien ga, sha ci u Aôndo una karen a tar u hegen ne kera yô, hemen u uumace u sha tseeneke ve la ua kera shi mape sha won ga. Man er Tartor ne ua lu sha yô makwagh u vihin ú una lu ga, sha ci u ka Aôndo a lu Orhiin man Orkuran ú kpaa ye. Kpa kwagh u una lu yô, ua er tom sha gbenda u hembandoon cii sha ci u uumace. Á hingir u eren ishima i Aôndo tar sha won cii er i eren sha nahan. Ka ityôkyaa ne yange Yesu tese mbahenen nav u sônon Aôndo ye, er: “Tartor Wou u̱ va, i̱ er ishima You shin tar kpaa vough er i eren i Sha nahan.”—Mateu 6:10.
Se Mgbôghom Nena?
11. Ka han ken Bibilo se zua a akaaôron a profeti a a wase se u fan er sé mgbôghom ken mkur u tar nee?
11 Se mgbôghom a mkur u tar ne man ken mhii u tar u he u Aôndo la nena? Kwaghôron u profeti u Bibilo na se ikyar gbaagbaa. Ikyav i tesen, Yesu iyolna tsengaôron akaa a se va nenge a mi yô sha er se fa mtile wase sha kwagh u ‘mkurtar’ yô, er Bibilo i kaa nahan. I nger kwagh ne ken Mateu ityouv 24 man 25, Marku 13, kua Luka 21. Man er i nger ken 2 Timoteu ityough 3 nahan, apostoli Paulu tsengaôron er se va nyôr ken shighe u a yila er “ayange a masejime” yô, shighe u akaa aa lu eren atô kposo kposo sha u pasen inja i shighe u se lu keregh ne yô.
12, 13. Kanyi Yesu man Paulu yange ve ôr sha kwagh u shighe u mkuru?
12 Yesu yange kaa er shighe ne una hii u tesen ikyav sha akaa ne: “Ikurior igen ia mough ityav a ikurior igen; tartor ugen kpaa ua mough ityav a tartor ugen; ijen ia gba man ityartenger ia lu sha ajiir kposo kposo.” (Mateu 24:7) Luka 21:11 la tese er ‘ubombauangev kpaa vea lu sha ajiir kposo kposo.’ Shi yange ta se icin sha kwagh u ‘mseer u mvende u vendan atindi’ la kpaa.—Mateu 24:12.
13 Yange apostoli Paulu tsengaôron er: “Fa kwagh ne. Ken ayange a masejime yô, ashighe a ican aa va. Gadia ior vea hingir mbawan ayol a ve iko tseegh man mba inyaregh ki doo ve ishima man mbahagher sha akaa man mbagengese iyol man mbaôron kwagh dang dang, man mbahemban mbamaren ve ato man mbalun a ishughun ga man mbalun wang ga, man mbalun a dooshima ga man mba ve soo u himen iyongo kpaa ga man mbaerenangereke man mbakôron ayol a ve tsaha ga man anomaior a bo man mba kwagh u dedoo a doo ve ga man mbapasen ior aker man mbawan uma ve iko ga man mbamoron ayol a ve man mba iember i iyolough i hembe doon ve a Aôndo la. Sha ashe yô mba a mlu u civir Aôndo la kpa mba geman mba nyiman agee la. . . . Udangmbaiorov man mbatsughunior vea yem hemen hemen vea hemba vihin a vihi kwagh. Mba tsughun ior man ve di kpaa mba gem mba tsughun ve.”—2 Timoteu 3:1-5, 13.
14, 15. Akaa a a lu eren ken derianyom u sha 20 ne tese er se mba ken ayange a masetyô nena?
14 Akaa a yange Yesu man Paulu ve tsengaôron la nga eren hen shighe wase ne kpa? Een, nga eren. Ityav mbi Tar Cii Mbi sha I la yange mbi lu mbi hembanvihin hen shighe la kua ken jime cii. Yange mbi lu ityav mbi tar cii mbi hiihii man mbi na mgem u akaa hen tar u ainge ne. Akaa a yange due sha ityav mbila yô lu ijen, ubombauangev mbatsaren, man akaabo a genegh. Sha kwaghôron u Yesu yô, akaa a yange hii u eren ken inyom i 1914 la cii lu “mhii u ican tsô.” (Mateu 24:8) Akaa la yange lu mhii u shighe u yange i tsengaôron u i yer er “ayange a masejime” la, lu mhii u kov u masetyô u Aôndo una na aferakaa man atsan ian yô.
15 Alaghga ú ngu mlan sha akaa a a lu eren ken derianyom u sha 20 ne ga. U fa anzughulakaa a a lu eren yô. I wua ior ken uitya kuma er umiliôn 100 nahan. Mba kpen ijen man angev kuma iyenge umiliôn uderi imôngo. Ityartenger tim uuma mbaiorov gandeôron. Ikyo i wan ga sha kwagh u uma man ikyáv ngi seer a seer. Mcia u ifer hingir kwagh u ayange ayange. Ior ta aeren a dedoo kera. Mzeiyol u mngee u ior la ka môm ken akaa a i lu a fatyô u sôron ga yô. Mvihi u ahumbe la gema ngu vihin mlu u uma shi ngu van a kwaghbo kpaa. Mimi je se nyôr ken ayange a masetyô hii ken inyom i 1914 la shi se mba mgbôghom a mkuusu u akaaôron a Bibilo a profeti sha kwagh u shighe wase ne.
16. Ayange a masetyô ne nga lihen kuman shighe nena?
16 Ayange a masetyô ne a lihe a kuma nena? Sha kwagh u kov u ua hii u nengen a “mhii u ican” hii ken inyom i 1914 yem ken hemen la yô, yange Yesu kaa er: “Kov ne ua lu a kar kera ga saa akaa ne cii aa er ve.” (Mateu 24:8, 34-36) Er i lu nahan yô, akaa a tesen ayange a masejime la cii aa er keng ken atô u kov môm, ka kov u yange u hii ken inyom i 1914 je la. Inja na yô ior mbagenev mba yange ve lu uma ken inyom i 1914 la vea lu uma heregh zan zan mkur u tar ne. Ior mba ken kov shon la ve kar anyom ngee hegen, sha u tesen er shighe kera shi vese ga tsô Aôndo una tim tar u hegen ne kera.
17, 18. Ka kwaghôron u profeti u nyi a tese er se mgbôghom a mkur u tar nee?
17 Kwaghôron u profeti u genegh u yange tese er mkur u tar ne mgbôghom yô lu sha zwa u apostoli Paulu, yange tsengaôron er: “Iyange i Ter ngi van er ormbaiv ka nan va tugh nahan. Zum u vea kaan er: Bem, man mkpeyol yô, ka zum la je mtim una ande sha a ve ibuv . . . , mayange vea kera war ga.”—1 Mbatesalonika 5:2, 3; shi nenge ken Luka 21:34, 35.
18 Nyian Ityav mbi ken Myer mbila bee, shi mciem ma ityav mbi akurakur mbila kpaa mbi pande iwondo. Nahan alaghga akuraior aa lu henen er ve mba zan sha gbenda u van a tar u he. Kpa zum u vea hen er uiniôngon vev mbara mba zan doon yum yô, á gema á lu kposo á kwagh u ve hen la, sha ci u á lu ikyav i masetyô i tesen er mtim u Aôndo á lu van á mi hen tar ne la á nangem. Umbur wer, mbamsôr mba mbapativ kua uijoughzwa vev mbara cii mba geman mbamlu mbaiorov ga. Mba wasen ior u tesen dooshima hen mbagenev ga. Shi mbahemenev mbatarev kpaa mba kanen shio u been a ifer, shi mba been a angev man ku kpaa ga. Sha nahan yô de suur sha ma mzehemen u uumace sha u van a bem man mkpeyol shi henen wer tar ne ngu zan u sôron mbamzeiyol mba ú ga. (Upasalmi 146:3) Ikyenge ve i ngoron la a lu ikyav i tesen er shighe nangem u tar ne ua kar kera yô.
U Pasen Loho u Dedoo
19, 20. Ka kwaghôron u tsengankaan u nyi a bende sha kwagh u kwaghaôndo u pasen u ken ayange a masetyô ne se nenge a lu ivinii?
19 Kwaghôron u profeti u genegh u á tese er se mba ken ayange a masejime hii ken inyom i 1914 yô ka u Yesu yange na la er: “Á vande ôron akuraior cii Loho u Dedoo ne keng.” (Marku 13:10) Shi er Mateu 24:14 a nger nahan: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”
20 Sha kwagh u mtim u tar ne kua mve u tar u he u Paradiso sha ikyev i Tartor u Aôndo yô, i pase loho u dedoo hen ayange ne i tser tar cii. Sha ikyev i unô? Sha ikyev i Mbashiada mba Yehova umiliôn kpishi. Mba pasen u sha hanma tar.
21, 22. U̱ hemban je yô kanyi kwagh i tese er Mbashiada mba Yehova ka Mbakristu mba mimi?
21 U seer sha u pasen kwagh u Tartor u Aôndo yô ieren i Mbashiada mba Yehova i tese ken igbar er ka mbadondon Kristu mba mimi, sha ci u yange kaa er: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” Er i lu nahan yô, Mbashiada mba Yehova ve zua ken mzough u anmgbianev tar sha won cii sha mkange u dooshima u a saghen mayange ga la.—Yohane 13:35; shi nenge ken Yesaia 2:2-4; Mbakolose 3:14; Yohane 15:12-14; 1 Yohane 3:10-12; 4:20, 21; Mpase 7:9, 10.
22 Mbashiada mba Yehova na jighjigh sha kwagh u Bibilo i kaa la er: “Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan.” (Aerenakaa 10:34, 35) Ve nenge mbagenev mba ve kpa ve lu Mbashiada ityar sha won cii er ka anmgbianev mba nomso man mba kasev mba ken jijingi, vea lu ken nongoior u genegh shin vea lu kwavyolough kposo a ve kpaa. (Mateu 23:8) Man er mzough u anmgbianev sha won cii ne a lu nyian je ka ikyav i seer tesen er shi kpeghee awashima u Aôndo una due ken igbar.
[Mbampin Mba Ngeren u Henen]
[Foto u sha peeji 26 la]
Ka Tartor u Aôndo u sha u vough la tseegh ua tema tor sha uumace ken tar u he la ye
