Uma Ngu A Awashima u Vesen
Vegher U Sha 5
Uma Ngu A Awashima u Vesen
1, 2. Se fatyô u kaan ser Aôndo we ikyo sha kwagh wase nena, man doo u se za hana sha u zuan a uikyar sha mbampin mba ve dugh sha kwagh u uma?
1 Er yange i er tar kua akaauma a a lu sha ú cii tese er Orgbanakaa u á gbe ve la ka Aôndo u dooshima u a we ikyo sha kwagh ve kpaa yô. Man shi Mkaanem nam, Bibilo, kpaa ma tese er we ikyo a vese; má na se uikyar mba hemban cii sha mbampin mban: Hii nan se lu shin tar heene? man, Se mba yemen hana?
2 Doo u se time ken Bibilo sha u zuan a uikyar mbara. Mkaanem ma Aôndo kaa er: “Aluer né ker Un yô, né zua a Na je; kpa aluer né undu Un yô, Un kpaa Una undu ne.” (2 Kroniku 15:2) Sha nahan yô, kanyi mtime u ken Mkaanem ma Aondo la á pase sha kwagh u awashima na sha ci wase?
Ityôkyaa i Yange Aôndo Gba Uumace La
3. Ka sha ci u nyi yange Aôndo gba tara?
3 Bibilo i tese er yange Aôndo sôr tar jim jim a uumace ken ishima. Yesaia 45:18 kaa sha kwagh u tar er Aôndo yange “gba u er u̱ lu gbilin dang ga, [kpa] A maa u sha er ior ve̱ tema sha u.” Man yange na tar hanma kwagh u ior vea soo yô, ka u gban lun tsô ga, kpa ka u ember uma gbem zan zan.—Genese, ityouv 1 man 2.
4. Ka sha ci u nyi yange Aôndo gba uumace mbahiihii mbaraa?
4 Ken Mkaanem nam la, Aôndo ôr kwagh u gban uumace mba hiihii mbara, ka Adam vea Ifa je la, shi a pase kwagh u yange wa ken ishima sha ci u tsombor u uumace yô. Yange kaa er: “Sé er or sha inja i mlu Wase, sha ibeen Yase; ishu i shin zegemnger man inyon i sha man uzendenya man tar cii kua hanma kwagh u kpelan inya, u a kper a kpela sha tar kpaa, ve̱ lu sha ikev ve.” (Genese 1:26) Yange gba u uumace vea nengen sha “tar cii” kua ishôso kpaa.
5. Ka han yange i ver uumace mbahiihii mbaraa?
5 Aôndo yange er zege sule ikyon hen ijiir i yange i yilan er Eden la, vegher u hen Atô u Imbusutariyan la. Tsô a “tôô or la ver un ken sule u Eden, sha u a̱ sôron u man a̱ kuran u kpaa.” Yange ijiir la lu paradiso u yange mgbough a hanma kwagh u mba hiihii mban vea yaan yô. Yange i wa “hanma kon u doon u nengen man shi u doon u yan,” kua imendenev mbigenev kpaa man uzendenya mba doonnengen.—Genese 2:7-9, 15.
6. Ka mbamlu mba ken mhen man mba ken iyol mba nyi yange i gba uumace a mini?
6 Yange i gba ayol a mba hiihii mbara lu vough, sha er vea gba angev ga, vea beeiyol ga, shin vea kpe kpaa ga yô. Shi yange i na ve mbamlu mbagenev kpaa, inja er ian i tsuwan u eren kwagh u ve soo la nahan. Sha er yange i gba ve la i pase ken Genese 1:27 er: “Aôndo gba or sha inja i mlu Na, lu sha inja i mlu u Aôndo je A gba nan ye; lu nomsoor man kwase A gba ve ye.” Er yange i gba se sha ibeen i Aôndo yô, yange i na se mbamlu mba sha iyol man mhen tseegh ga i na se mbamlu mba sha aeren kua mba ken jijingi kpaa, man gba u mbamlu mban kpaa vea kuma se keng aluer gba u se lu ken msaanyol u mimi yô. Aôndo una va a igbinda i ivin akaa ne kua akaa a genegh kpaa inja er kwaghyan, mngerem, man ahumbe nahan. Er yange Yesu Kristu kaa nahan, “ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo yô.”—Mateu 4:4.
7. Kanyi tom yange i na mbahiihii mbaraa?
7 Heela tseegh ga, yange Aôndo na mba hiihii mbara tom u kpilighyol sha u ve̱ eren ken Eden yô: “Mar nen kpishi, seer nen ngeen, iv nen tar.” (Genese 1:28) Yange ve lu a tahav mbu maren ônov mba lun vough kpaa. Man er ior vea lu seer ngeen yô, vea lu a tom u nan msaanyol ú samber aa sule u hiihii la, ka paradiso u hen vegher u Eden je la. Ken hemen yô, tar cii ua kehe ua hingir paradiso, man mba lun vough, lun saan saan mban vea fatyô u lun uma keregh gbem sha won. Bibilo i kaa a vese er yange akaa ne cii nga hiín tom yô, “Aôndo gema nenge hanma kwagh u Un er yô, lu u doon tsung.”—Genese 1:31; shi nenge ken Upasalmi 118:17.
8. Yange gba u uumace vea nenge sha tar nena?
8 Ikyav tese er yange gba u tar ua lu sha ikyev i uumace sha u eren tom u nán mtsera. Kpa yange gba u kwagh a lu nahan sha gbenda u kwaghfan. Yange gba u uumace vea lu mbasôron tar sha inja, lu u vea vihin a vihi ú ga. Er se nenge i lu vihin tar nyian la ka sha ishima i Aôndo ga, man mba ve nyer iyol ken u vihin ú mbara cii mba zan gondo sha awashima u uma hen tar ne. Vea zua a mtsaha sha ieren la, sha ci u Bibilo i kaa er Aôndo una “tim mba ve lu vihin tar la kpaa.”—Mpase 11:18.
Ka Awashima u Aôndo Heregh
9. Ka sha ci u nyi se lu a vangertiôr ser Aôndo una iv awashima na laa?
9 Er i lu nahan yô, ken mhii la je yange i lu awashima u Aôndo u tsombor u uumace u vough la u lu shin tar gbem sha won ken paradiso. Man ka awashima na heregh! Man awashima ne una iv shami keng, a bunde ga. Bibilo i kaa er: “TER u akum a Sha bum kaa er: Mimi je, er M hen nahan, kape á er la; man er M ver ishima nahan, kape á lu la.” “M ôr kwagh, Me kure un sha mi vough kpaa; M vande veren ishima sha kwagh, shi Me er un kpaa.”—Yesaia 14:24; 46:11.
10, 11. Yange Yesu, Peteru, man orpasalmi Davidi ve ôr kwagh u Paradiso la nena?
10 Yesu Kristu yange ôr kwagh u awashima u Aôndo u hiden a paradiso u shin tar la zum u lu ôron kwagh a or u yange soo u lun a ishimaverenkeghen ken hemen la er: “Ú lu a Mo imôngo ken Paradiso.” (Luka 23:43) Apostoli Peteru kpaa yange ôr kwagh u mve u tar u he la zum u a tsengaôron er: “Se mba keghen Usha mba hev je [gomoti u he u una lu hemen sha yô] man tar u he [sosaiti u he u shin tar] u perapera una tema ker yô, sha ityendezwa [i Aôndo] la.”—2 Peteru 3:13.
11 Orpasalmi Davidi kpaa yange nger kwagh u mve u tar u he shi pase shighe u ua tsa kpaa. A tsengaôron er: “Mbaperapera vea ya dyako u tar, vea lu ken u gbem.” (Upasalmi 37:29) Ka ityôkyaa i yange i hii man Yesu tôndozwa je la er: “Saan mba ve lu a ishima i legh legh la iyol, gadia tar ua lu dyako ve je.”—Mateu 5:5.
12, 13. Na kwaghôron u asavasav sha kwagh u awashima u vesen u Aôndo sha ci u or-umace.
12 U lun uma gbem sha won shin tar u paradiso a mbaaferev shio, ifer, angev, ijungwen, shin kwaghnyoon kpaa ga la, ka ishimaverenkeghen i vesen tsô! Ken takerada u masetyô u ken Bibilo la Mkaanem ma Aôndo ma profeti la ma sav awashima u vesen ne sha u yôôn er: “ [Aôndo] una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” Shi kwaghôron la za hemen er: “Un u A tema sha ikônough ki torough la kaa er: Nenge M ngu geman akaa cii hingir aa he. Shi A kaa er: Nger, gadia akaaôron ne ka a jighjigh man ka a mimi kpaa.”—Mpase 21:4, 5.
13 Een, Aôndo ngu a awashima u vesen ken ishima. Á lu tar u he u perapera, ka paradiso u tsôron je la, i tsengaôron sha ikyev i Un u una fatyô shi una soo u eren sha uityendezwa nav kpaa yô, ‘akaaôron a na ka a jighjigh man ka a mimi kpaa.’
[Mbampin Mba Ngeren u Henen]
[Foto u sha peeji 20, 21 la]
Aôndo yange washima er uumace ve̱ lu uma gbem sha won shin tar u paradiso. Awashima na la ngu heregh
[Foto u sha peeji 22 la]
Orya nana pine mba ve tse nan hen ya kpa ve eren a mi sha inja ga mbara kwagh
