Ityough Puetaratar

“Doo Nen Ayol a En sha Gbashima Je”

1. Ashighe kpishi kanyi ka i̱ doo mba ve ze mbamkombo mba Mbashiada mba Yehova kwa u hiihii laa?

Ashighe kpishi kwagh u ior ka vea va mkombo u Mbashiada mba Yehova kwa u hiihii ve a doo ve yô, ka dooshima u ka ve nenge a mi hen atô u mba ve ve mkombo la. Ka ve nenge a dooshima ne sha gbenda u ka i ngohol ve la man sha gbenda u ka i lam a ve sar sar la. Mba ka vea za mbamkombo asev mbavesen la kpaa ka ve nenge a dooshima ne nahan. Ortôônabaver ugen yange nger kwagh sha kwagh u mkohol ugen wener: ‘Ma or môm ken a ve nan ngu eren dang sha ci u nan ma icimbiv mbi bov yum, shin nan ngu hunden msôrom kpaa ga. Or môm ngu ngoron shin nanden a orgen ga. Mba tuur ior kpaa ga. Mba tan sha ior ga. Ma or lam iliam i dang shin nan tuhwa orgen ga. Or môm er asenge a hôngorough shin nan lam iliam i ijimbagh ga. Ma or ngu man taav kpaa ga. Iv mbu ga. Ma or ya kwagh haa apusu côugh côugh ga. Sha kpôô yô se mba a̱ vande nengen a imba kwagh ne ga.’ Kwagh ne cii tese dooshima, imba u á “we dang ga, [a] keren kwagh na iyol na tsô” kpaa ga la.—1 Mbakorinte 13:4-8.

2. (a) Shighe a karen deghôô yô, kanyi í doo u ia kera lu ilian sha kwagh u dooshima u se lu a mi la ga? (b) Kanyi imba dooshima i gbe u se lu a mi sha u dondon ikyav i Kristu laa?

² Dooshima u anmgbianev la ka ikyav i̱ í fe Mbakristu mba mimi a mi je la. (Yohane 13:35) Ka sea nguren vesen ken jijingi seer yô, kape ka se hemban fan u lun a dooshima hen mbagenev kpaa je la. Apostoli Paulu yange er msen wener dooshima u mba ve lu Mbakristu a na imôngo la “a̱ seer  a seer ngeen.” (Mbafilipi 1:9) Apostoli Yohane tese ér gba u dooshima wase una tangen iyol ga. A nger wener: “Kwagh u se fe dooshima sha mi yô, ka un ne: [Wan u Aôndo] na uma Na sha ci wase, nahan se kpaa, ka u sé na uma wase sha ci u anmgbianev” asev. (1 Yohane 3:16; Yohane 15:12, 13) Kpa mimi je se fatyô u nan uma wase sha ci u anmgbianev asev kpa? Shin er kwagh a fe lun nahan ga nahan kpa, se mba nôngon hegen sha afatyô wase cii ser se wase ve, kua shighe u i we se i doo ga la je kpa?

3. (a) Ka sha nyi gbenda se fatyô u seer lun a dooshima? (b) Er nan ve i lu a inja u se doo ayol ase sha gbashima hegene?

³ U seer sha ityom yase i í tese ér se mba a jijingi u tangen iyol ga la yô, shi gba u anmgbianev asev vea doo se ishima sha mimi kpaa. Mkaanem ma Aôndo taver se ishima ér: “Doo nen ayol a en tsung sha dooshima.” (Mbaromanu 12:10) Se cii ka i lu se nahan a ior mbagenev. Kpa se fatyô u shi seer lun a imba mlu la a ior mbagen kpa? Er mkur u tar ungun ne a mgbôghom yô, ka a inja u se hemba kporom ikyua a mba ve lu Mbakristu a vese imôngo la cii. Bibilo kaa ér: “Mkur u akaa cii mgbôghom ve; . . . Kwagh u a hembe cii yô, doo nen ayol a en sha gbashima je gadia dooshima cirin asorabo kpishi.”—1 Peteru 4:7, 8.

Shighe u Mbamzeyol Ve Ve Yô

4. (a) Er nan ve mbamzeyol vea fatyô u van hen atô u ior mba ken tiônnongoo? (b) Er alaghga a lu ashighe cii a heghem se u dondon kwaghwan u Bibilo ga nahan kpa, aluer se dondo kwaghwan shon yô, kanyi i injaa ia va kere?

⁴ Sha mimi yô, er se lu ken myen her ne di tsô yô, ashighe agen se er akaa a a vihi mbagenev ishima yô. Shi anmgbianev asev kpa alaghga vea er se kwaghbo sha igbenda wue wue. (1 Yohane 1:8) Aluer kwagh va ngu nahan yô, ú er nena? Ruamabera tese gbenda u i gbe u se kar yô. Kpa alaghga kwagh u ruamabera á kaa ér se̱ er la una zua sha kwagh u se we ishima u eren sha mlu u i mar se ken isholibo ne  ga. (Mbaromanu 7:21-23) Nahan kpa, aluer se dondo kwaghwan u a lu ken Bibilo la sha gbashima yô, nahan se lu tesen ikyav ser mimi je se mba a gbashima u eren ishima i Yehova. Shi aluer se dondo kwaghwan u a lu ken Bibilo la yô, mdoo u mbagenev ve doo se ishima la kpa una hemba taver.

5. Aluer or hii se iyongo yô, er nan ve i doo u se or iyev ga?

⁵ Ashighe agen kwagh ka una vihi or yô, nan keren igbenda i nana or iyev yô. Kpa u eren nahan la ka a na kwagh a hemba vihin gban kera cii. Aluer gba u a or iyev keng yô, de se undu Aôndo a mi a̱ or i̱. (Anzaakaa 24:29; Mbaromanu 12:17-21) Alaghga mbagen vea ker gbenda u palegh or u nan er ve kwaghbo la. Kpa doo u se er a mba ve civir a vese imôngo la nahan ga, sha ci u aluer se mba kôron anmgbianev asev ihyom yô, mcivir wase kpa a lumun a mi ga. (1 Yohane 4:20) Nahan yô, Paulu nger wener: “Waan nen ishima a ayol a en, deen nen ayol a en kwaghbo aluer kwagh á nzughul orgen a orgen yô, er Ter A de ne akaabo nahan, ne kpaa kape eren nen la.” (Mbakolose 3:13) Ú fatyô u eren nahan kpa?

6. (a) Ka kwa me i doo u se de anmgbianev asev a kwaghbo? (b) Kanyi kwagh se kav ken a vese ve ia wase se u nengen sha kwaghbo u or er se la sha injaa?

⁶ Kpa aluer or zer eren se akaabo gbem, kpa nan gema nan er kwaghbo u a vihi i kom u a dugh nan ken tiônnongo sha ga di ye? Apostoli Peteru due a mhen wener aluer or er akaabo a kiriki angara nahan yô, i̱ de nan a mi “zan zan kwa taankaruhar” je kpaa. Kpa Yesu kaa wener: “Zan zan kwa taankaruhar tsô ga, kpa i̱ lu zan zan akunduatargber kwa taankaruhar.” A kaa wener aluer i tôô injô i uumace ve lu se a mi la i kar sha injô i se lu Aôndo a mi la yô, se hemba mban Aôndo a injô ca je gande u ôron. (Mateu 18:21-35) Hanma iyange yô, se mba eren Aôndo isholibo sha igbenda kpishi—ashighe agen yô ka i lu sha mtange u se lu tangen iyol la, shin sha iliam yase shin kwagh u se lu henen ken ishima la, shin kwagh u i hungur se u eren la—man fan tsô kpa ka  se fa ser se mba eren kwaghbo ga. (Mbaromanu 3:23) Kpa, Aôndo ngu zungwen se mhôônom her. (Pasalmi 103:10-14; 130:3, 4) Kape a soo ér se̱ eren a ayol a ase kpaa je la. (Mateu 6:14, 15; Mbaefese 4:1-3) Ka nahan ve se lu a imba dooshima u a “koson kwagh u bo ken ishima ga” la ye.—1 Mbakorinte 13:4, 5; 1 Peteru 3:8, 9.

7. Aluer anmgbian ngu a kwagh ishima a vese yô, se er nena?

⁷ Alaghga ashighe agen se kav ser, shin er se we kwagh ishima a anmgbian wase ga, shi iyongo kpa se hii nan ga nahan kpa, nan yô nan gema nan wa kwagh ishima a vese. Aluer sea soo yô se gba den nan a ieren i nan i̱ nan gbe yuwen se a ityôkyaa shio la tsô, se cir ieren i nan la sha dooshima er 1 Peteru 4:8 a tese nahan. Ga yô se ker gbenda u lamen a nan sha u nôngon himen iyongo shon.—Mateu 5:23, 24.

8. Aluer or u nan ne jighjigh a vese imôngo la nan er se kwaghbo yô, kanyi kwagh se er sha mini?

⁸ Alaghga anmgbian u nan ne jighjigh a vese imôngo la nan ngu eren kwagh u i lu se tseegh a vihi se ga, mbagen kpa a vihi ve yô. A lu a inja u wan nan kwagh gaa? Alaghga a lu vough u wan nan kwagh. Aluer we iyol you ú za pase nan ibo i nan la sha gbenda u kundu kundu yô, alaghga nana de kwagh la. Kpa vande pinen iyol you wer: ‘Sha mimi yô ngu eren kwagh u ruamabera a vende yôô? Shin kam nahan sha ci u ape mo m dugh la man ijiir i m vese la kaha kposo a i nan yumu?’ Wa ikyo sha er ú lu veren atindi a ou iyol you tsô hiden nan mba ve kan á shio la ibo ga yô. (Yakobu 4:11, 12) Yehova sangen a sange ga, ngu a ngohol nyityô or cii, shi we ishima a ve er ve lu vesen yemen hemen ken jijingi la.

9. (a) Ka unô ve nengen sha akaabo a vesen ken tiônnongo? (b) Ka hanma shighe nahan i lu tom u or u i er nan kwaghbo la u vanden keren gbenda, man gba u awashima u nan la a lu nyi?

⁹ Aluer or u ken tiônnongo nan er kwaghbo u vesen, imba er idya nahan yô, i̱ er kwagh sha mi fese je i̱ de timbir ga. Ka unô vea er kwagh sha mini? Ka mbatamen. (Yakobu 5:14, 15)  Nahan kpa, aluer or er orgen kwaghbo man alaghga ka sha kwagh u kpenga, shin nan yar tom a nombor u nan sha gbenda u ikyoo ga yô, nahan or u i er nan kwaghbo la nana̱ vande za keren bem vea or u nan hii nan la ve uhar tseegh. (Mateu 18:15) Aluer kwagh la fatyô u kuren ga yô, nana̱ dondo igbenda igen er i i tese ken Mateu 18:16, 17 la nahan. Mdoo u anmgbian wase u nan lu nôngon gbeev nan doo se ishima la, kua isharen i í sar se pe ma̱ se ‘yem’ nan la ia wase se u eren kwagh ne sha gbenda u a kôr nan ken ishima yô.—Anzaakaa 16:23.

10. Shighe u mzeyol a ve yô, kanyi ia wase se u nengen sha kwagh la sha injaa?

¹⁰ Shighe u mzeyol a ve yô, aluer ka u vesen shin ka u kiriki je kpa, a lu se a iwasen kpishi aluer se nôngo se fa mnenge u Yehova sha mi yô. A lumun a isholibo sha ma gbenda môm  tsô kpaa ga, man ior ka vea zeren eren asorabo a vesen sha apera, vea vendan u geman ishima yô, á dugh ve ken nongo na kera sha shighe u i kom un la. Nahan kpa, i̱ de hungur se er se cii se eren asorabo sha igbenda igen cuku cuku, man er kwagh a gbe se sha ishimawan na man mhôônom nam ma zungwen nahan ga. Nahan Yehova ver ikyav i̱ se dondo shighe u mbagenev ve er se isholibo yô. Shighe u se zungu or mhôônom yô, se mba dondon ikyav i dooshima na la.—Mbaefese 5:1, 2.

Ker Igbenda i ‘Bughun Ishima’

11. Er nan ve Paulu yange taver Mbakorinte ishima ér ve̱ ‘bugh ishima’?

¹¹ Paulu maa tiônnongo u ken gar u Korinte u ken tar u Grika la iwer imôngo je. A nôngo kpoghuloo sha u una wase anmgbianev mba ker mbara, shi ve doo un ishima kpaa. Kpa mbagenev ken a ve sôsom a na ga. Ve lu sendegh a na sha hanma kwagh u una er cii. Nahan a taver ve ishima ér ve̱ ‘bugh ishima’ ve sha u lun a dooshima. (2 Mbakorinte 6:11-13; 12:15) Doo u se cii se gbidye kwar se nenge er mbagenev ve doo se ishima i za kighir la, nahan se ker igbenda i se bugh ishima yô.—1 Yohane 3:14.

12. Dooshima u se lu a mi sha mba ken tiônnongo cica cii la una seer nena?

¹² Mbagen mbá ken tiônnongo mba í taver se u kporom ikyua a ve yôô? Aluer se nôngo sha afatyô wase cii se hungur a mbamzeyol mba ve lu hen atô wase—er se kpa se soo ser ma ve eren a vese nahan yô—kwagh ne una wase se se kporom ikyua a ve. Shi kwagh ve una hemba doon se aluer kwagh gba se sha aeren ve a dedoo la shi se har ishima sha á yô. Kwagh ne una na dooshima u se lu a mi sha a ve la una vese a seer.—Luka 6:32, 33, 36.

13. Se bugh ishima sha u lun a dooshima hen mba ken tiônnongo wase nena?

¹³ Ka sha hanma gbenda cii se fatyô u eren kwagh sha ci u  mbagenev ga je ka ashe tugh ga. Alaghga se fatyô u sughun hanma or hanma kwa u se ze mkombo cii ga. Shi alaghga a lu ican u lôhôn hanma or zum u se yer ahuraior kwaghyan yô. Kpa se fatyô u bughun ishima sha u keren anshighe kpuaa lamen a ma or ken tiônnongo wase sha er se fa nan se seer kpa? Se fatyô u lôhôn or u se fe nan tsembelee ga la ser nana̱ due kwaghpasen a vese shighe ugen kpa?

14. Shighe u se lu hen atô u Mbakristu mba se lu a̱ vande fan ve ga yô, se tese dooshima u se lu a mi sha mbagenev sha gbashima la nena?

¹⁴ Mbamkombo mbavesen mba Mbakristu kpa ka aan a dedoo a bughun se asema sha u lun a dooshima. Ior udubu udubu ka ve lu her. Se fatyô u zuan ashe a ve cii ga, kpa se fatyô u eren kwagh sha gbenda u ua tese ér se ver mkpeyol ve ken hemen u iyol yase yô. Zum u i dugh ahumbe yô, se fatyô u karen a ishima kporom ikyua hen mbagenev mba ve tem ikyua a vese la. Yange sev a hungwa a av yô, ior mba vea lu sha tar cii vea lu anmgbianev mbanomso man mbakasev, vea kohol a zua ken mcivir u Aôndo u mimi u a lu Ter u ior cii la. Nenge er a lu se a iember u fan ayol a ase sha wono! Dooshima u se lu a mi sha gbashima la una mgbegha se se soo u eren nahan. Er nan ú hii hegen je ga?

Kwaghôron u Hiden Kimbir Kwagh

• Zum u mbamzeyol ve ve hen atô u Mbakristu yô, doo u a kure ve nena, man ka sha ci u nyi?

• Er se lu vesen ken jijingi nahan, ka sha nyi igbenda i doo u dooshima wase di kpa una lu vesene?

• Se er nan ve or u nan lu huror wase u sôngo sôngo ga kpa nana doo se ishima tsung nu?

[Mbampin Mba Ngeren u Henen]

[Foto u sha peeji 148 la]

Mba tesen dooshima u Mbakristu la sha igbenda kpishi je, inja er ken mbamkombo mba tiônnongo nahan