Tartor “U Ua Gba Mayange Ga Yô”
Ityough pue
Tartor “U Ua Gba Mayange Ga Yô”
1. Hii sha igbetar je kanyi kwagh i dugh ken igbar ken akaa a á lu zan hemen sha tar laa?
AKAA a á ze hemen sha tar hanma sev la tese ér sha mimi yô uumace zua a msaanyol sha u vendan hementor ú Yehova la geman hemen ayolave ga. Ma gomoti u uumace môm tsô kpa ngu a̱ va orumace a mbamtsera mba mimi ga. Er ior ve zough a mzehemen sha gbaa u kwaghfan u sangen yeke je i gande ôron nahan kpa, mba a̱ fatyô u hemban angev agee shin been aa ku sha ityough ki or môm tsô kpaa ga. Hemen u orumace bee aa ityav mbi nôngon ga, shin ipila shin ifer shin anyighe shin ibanave kpaa ga. Ugomoti mba kighir ior mbá hemen her ken ajiir wue wue sha tar. (Orpasenkwagh 8:9) Mfe u iwavaren man hua man lanegh, akaa ne kohol cii nga vihin inya man mngerem man ahumbe kpaa. Mvihi u mbahemen ve vihin inyaregh sha igbenda i ikyoogh ga la na yô, ior kpishi ka i taver ve u zuan a akaa a kuren ugbayol vev. Hemen u orumace nan hemen iyol i nan anyom udubu imôngo ne tese ken igbar ér kwagh u í ôr heen ne ngu mimi je ka u henen a hen ga. I kaa ér: “Gbenda u or ngu sha ikev i nan ga; or u zenden la, mvershigh u iaven i angahar a nan ngu sha ikev i nan ga.”—Yeremia 10:23.
2. Kanyi kwagh í lu i tseegh ia fatyô u been a mbamzeyol mba orumacee?
2 Á bee a kwagh ne nena? Á lu sha ikyev i Tartor u Aôndo, ú Yesu yange tese mbadondon un ér ve̱ sôn la, ér: “Tartor Wou u̱ va, i er ishima You shin tar kpaa vough er i eren i Sha nahan.” (Mateu 6:9, 10) I yila Tartor u Aôndo ú sha la ken 2 Peteru 3:13 ér “Usha mba hev,” mba vea hemen “tar u he” la, inja na yô ka mtemimôngo u orumace u perapera je la. Tartor u Aôndo ú sha la yange ú lu Yesu kwagh u vesen je yô, lu ú je har kwaghpasen na cii sha mi ye. (Mateu 4:17) Yange tese e̱r i gbe u ua gba kwagh ken uma wase kpen kpen yô, á kaa ér: “Vande keren nen tartor Na man perapera Na, man akaa ne cii á seer ne a ye.”—Mateu 6:33.
3. Er nan ve i hembe lun torough torough u henen fan kwagh u Tartor u Aôndo hegene?
3 Hemba kan torough torough u henen fan kwagh u Tartor la hegen cii, gadia kera shi ica ga tsô Tartor la ua gema hementor u shin tar ne gbem sha won. I tsengaôron ken Daniel 2:44 ér: “Sha ayange a utor mbara [ugomoti mba ve hemen hegen ne], Aôndo u Sha Una ver tartor ugen [sha] u ua gba mayange ga yô, man shi tahav mbu u kpaa mbua hingir sha ikev i ma ikur igen ga [mayange uumace vea kera hemen tar ne sha won ga], kpa ua hembe ityartor igen [í í lu hemen hegen] ne cii avur avur, ua tim i, kpa u yô, ua lu gbem sha won.” Nahan Tartor la ua va a mkur u ayange a masejime ne sha u timin botar ne jimin cii. Hen shighe la, ma or nana kera kperan hemen u tar ne a Tartor u sha la ga. Doo u se wuese kwagh ne kpishi, gadia mpeveryol u kwagh ne una va a mi la ngu ikyua ikyua hegen!
4. Kanyi yange i za hemen sha kwagh u Tartor la ken inyom i 1914 laa, man er nan ve kwagh ne á lu se kwagh u vesene?
4 Ken inyom i 1914 la, i ver Kristu Yesu Tor, i na un ian ér a̱ “tema tor hen atô u mbaihomov [nav].” (Pasalmi 110:1, 2) Shi lu ken inyom shon la kpaa “ayange a masejime” a botar ne hii ye. (2 Timoteu 3:1-5, 13) Shi hen shighe shon môm môm la, akaa a Daniel lu nenge a mi ken mpase u sha mnenge la e̱r kpôô kpôô nahan sha. Yehova Aôndo, u á lu “or u tsan sha won” la gema na Yesu Kristu u a lu Wan u or la “tor sha won cii man icivir man tartor, sha u ior man akuraior man ijô cii ve̱ er Un tom” yô. Daniel ngur ôron kwagh u mpase u sha mnenge shon yô, á nger wener: “Mtemtor Na ka mtemtor u tsôron, u una kar kera mayange ga, man tartor Na kpaa ka u timin kera mayange ga.” (Daniel 7:13, 14) Ka sha ikyev i Tartor u sha ú sha ikyev i Kristu Yesu ne Aôndo una na mbara mba perapera á doo ve ishima la vea ember akaa a doon kpishi á yange wa ishima zum u a ver mbamaren asev mba hiihii ken Paradiso la ye.
5. Ka akaa a ver ver a Tartor la a nyi nahan kwagh a gbe se sha mi tsung nu, man ityôkyaa yô kanyi?
5 Sar ú u suen Tartor ne gban uwer ga kpa? Aluer ka isharen you la yô, a doo ú tsung u fan mserakaa u tartor ú sha ne man iertom i ú kpaa. Ú soo u fan kwagh u ú lu eren hegen la, man kwagh u ua va er ken hemen la, kua kwagh u ú soo hen a we la kpaa. Ú nguren timen sha kwagh u Tartor ne vighe vighe yô, iwuese i ú lu a mi sha ú la ia seer kpee. Aluer ú dondo hemen u Tartor ne yô, ú hemba wan ago iyol tsema tsema sha u ôron mbagenev kpa akaakpilighyol a Tartor u Aôndo ua er sha ci u orumace u ungwan tindi la.—Pasalmi 48:12, 13.
Mbahemen mba Tartor u Aôndo
6. (a) Ruamabera tese un shon u Tartor u Mesiya ú lu tesen hementor u nan la nena? (b) Gba u kwagh u se hen sha kwagh u Tartor shon la una bende a vese nena?
6 Kwagh u hiihii u ú ngure timen sha kwagh la ve ú hii zuan a mi yô, ú kav wer Tartor u Mesiya ne ka kwagh u tesen hementor u Yehova iyol na. Ka Yehova yange na Wan na “tor sha won cii man icivir man tartor” ye. Yange mba ne Wan u Aôndo tahav ér a̱ tema Tor a̱ hii u hemen yô, akenge maa due sha gba yôôn kaan sha inja vough nahan ér: “Tartor u shin tar hingir u Ter wase [Yehova Aôndo] man u Kristu Na ve, [Yehova] Una tema tor gbem sha won.” (Mpase 11:15) Nahan hanma kwagh u se nenge a mi sha kwagh u Tartor ne man kwagh u ú lu eren cii una fatyô u kporom a vese ikyua hen Yehova iyol na. Doo u kwagh u se hen la una mgbegha se, una na a sar se u wan ayol a ase sha ikyev i hementor na gbem sha won.
7. Er nan Yesu Kristu a lu Orhemen u Dondon ken Yehova ve kwagh a gbe se sha mi yumu?
7 Shi gbidye kwar nenge kpaa e̱r Yehova a ver Yesu Kristu sha ikyônough ki torough, á lu Orhemen u Dondon ken Yehova yô. Er Yesu á lu Or u Fan Tom, u̱ Aôndo yange yar tom a na sha u gban tar man uumace cii kpaa yô, a fa ugbayol asev je hemba hanma wase cii. Heela tseegh ga, hii sha igbetar je, a tese ér ‘doo un a ônov mba iorov tsung.’ (Anzaakaa 8:30, 31; Mbakolose 1:15-17) Uumace doo un ishima je yô, yange mough iyol na va shin tar ne va na uma na hingir ipaan sha ci wase. (Yohane 3:16) Nahan a bugh ian i paan se sha ikyev i isholibo man ku, shi a na se ian i zuan a uma u tsôron kpaa.—Mateu 20:28.
8. (a) Er nan ve gomoti u Aôndo una lu er hemen u orumace ga, un de a tsa gbeme? (b) “Wanakiriki u jighjigh man u fan kwagh” la zua vea gomoti u sha la nena?
8 Tartor u Aôndo ka ú geman ga, shi ka u tsan gbem kpaa. Se fa ser ua tsa gbem, sha ci u Yehova iyol na kpa kpen na sha won mayange ga. (Pasalmi 146:3-5, 10) Yesu Kristu ti u Aôndo a ver un tor ne yô, ngu er ator a uumace nahan ga, gadia un una kpe sha won ga. (Mbaromanu 6:9; 1 Timoteu 6:15, 16) Mba vea tema sha mkônom ma torom ma shaav a Kristu imôngo yô ka mba 144,000 mba ve civir Aôndo a ishima i môm, ve dugh ken “hanma nongo man hanma zwa man hanma nongoior man hanma ikurior” la. Mban kpa i na ve uma u kera kpen mayange ga la. (Mpase 5:9, 10; 14:1-4; 1 Mbakorinte 15:42-44, 53) Ve kpishi ve yem za mbá sha kera kpaa, kpa asande a ve a á shi shin tar her la ka á je a lu “wanakiriki u jighjigh man u fan kwagh,” u a lu zan hemen u eren akaa a Tartor ne yughur yughur la ye.—Mateu 24:45-47.
9, 10. (a) Ka nyi akaa a van a mbampav man hôngor Tartor la ua kar a mi kera? (b) Aluer se soo ser se lu mbaihyomov mba Tartor u Aôndo ga yô, ka akaa a kangen or kpene kpene a nyi nahan i doo u se palegha?
9 Kera shi ica ga tsô, shighe u Yehova a ver la una kuman yô, una tindi akumautya na a van a mtim la aa gba mi sôron tar. Akumautya la aa tim uumace mba ve tsough a ishima ve ér vea lumun a hementor na ga, shi ve hur mbamne mba a ne sha dooshima sha ikyev i Yesu Kristu mbara kpa kera la cii gbem sha won. (2 Mbatesalonika 1:6-9) A lu iyange i Yehova je la, iyange i paan iyol, tesen ér un ngu Tor u Hemban Cii, iyange shon i í zer veren ashe gbenda a i ica i gbe la je la. “Nenge, iyange i TER ngi van, ngi a mhôônom ma zungwen ga, ngi a ishimavihin kua iyugh tsung, . . . u timin mbaasorabo mba ve lu ken u kera.” (Yesaia 13:9) “Iyange la ka iyange i iyughugh, ka iyange i ican man i [ishima nyian], ka iyange i mvihi man i myôhôr, ka iyange i ime i wan mgbigh mgbigh, ka iyange i abeen man i angôghime.”—Sefania 1:15.
10 A tim hanma kwaghaôndo u aiegh cii, kua ugomoti mba orumace man akumautya ve a i lu orifer u hemen tar ne u í nengen a na ga á lu ve ken ijime la kpaa cii gbem sha won. Mba ve te ikyaa a tar ungun sha u keren ugbayol vev tseegh shin ve eren mimi ga, shin ve eren uma u ijimbagh cii, a kar a ve kera ken ku. A kar a Satan man azôv a na sha tar kera, vea kera lu hen atô u ior ga, kpa a wuhe ve gban gban zan zan saa anyom dubu aa kar ve. Hen zum la Tartor u Aôndo ua kar a lu ityough sha hanma kwagh cii sha tar. A pever mba perapera a doo ve ishima la cii iyol kpen kpen hen shighe la!—Mpase 18:21, 24; 19:11-16, 19-21; 20:1, 2.
Er A Kure Awashima u Tartor Shon Yô
11. (a) Tartor u Mesiya la ua kure awashima u Yehova a we sha ci u tar la nena? (b) Hemen ú Tartor la ua er nyi sha ci u ior mba vea lu uma shin tar sha shighe shon laa?
11 Tartor u Mesiya la ua kure awashima u hiihii u Aôndo yange wa ishima sha ci u tar la vindi vindi. (Genese 1:28; 2:8, 9, 15) Orumace sue awashima la ga zan zan ar nyian. Nahan cii kpa á gema “tar u u lu van” la a wa sha ikyev i Yesu Kristu, u a lu Wan u or la. Mba vea war ijirôron i mtim í Yehova una ôr tar u tse ne cii, vea er tom ken ijoughave sha ikyev i Tor Kristu, a saan ve iyol u eren nyityôkwagh i a kaa ér ve̱ er cii, sha er tar cica cii ua hingir paradiso yô. (Mbaheberu 2:5-9) Uumace cii vea ember tom u ave ve ken ikpelakaa i tar ua va a mi la.—Pasalmi 72:1, 7, 8, 16-19; Yesaia 65:21, 22.
12. A na mba vea lu sha ikyev i Tartor la mlu u vough u ken mhen man u sha iyol nena?
12 Shighe u i gba Adam man Ifa la, ve lu vough, shi lu awashima u Aôndo ér tar u̱ iv a ônov vev, ve cica cii ve̱ lu ken mlu u vough u ken mhen man u sha iyol la. Awashima la una iv kpôô kpôô sha gbenda u kpilighyol sha ikyev i hemen u Tartor la. U̱ kwagh a̱ lu nahan yô, a kar a akaa a isholibo i ve a mi la cica cii kera, man sha gbaa ne yô, Kristu ngu Tor tseegh ga, kpa shi ngu Pristi u Tamen kpaa. Tegh tegh tsô una wase mba ungwan tindi mba vea lu sha ikyev na la u zuan a mtsera ken injar i naagh ku himen isholibo ku yange na sha uma na u sha inja i or la.
13. Ka mbamtsera mba nyi a zua a mi sha ikyev i hemen u Tartor laa?
13 Sha ikyev i hemen u Tartor la yô, mba vea lu sha tar la vea zua a mbamtsera kpishi je. “Tsô á bugh mbaapirashe ashe, man á bugh mbakondonato ato. Tsô orkeer nana gba tsuwen er ashim nahan, man nombor u orkondoniker kpaa ua wa icam.” (Yesaia 35:5, 6) Or u iyolbeen shin angev mbu nzughul a kwavyolough u nan ú zulugh ú hingir adivir adivir kpa ua hide a hingir hegh á hemba ú wanye, shi mbamkpeyolga vea kar kera cii, a mase shin iyol i gbon gbon tseegh. “Zum la inyam i nan [kwavyolough u nan ua] ia hingir hegh á hemba i wanye kpaa; nana hide nana hingir er sha ayange a nan lu iyev la yô.” (Yobu 33:25) Yange sev a av iyange igen yô, ma or môm kpaa nana kera lu a ityôkyaa i kaan ér, “kwagh nyoon mo, ga.” Sha ci u nyi? Sha ci u á shir uumace mba ve cie Aôndo la ikyav mbi isholibo i tee ve la, kua ubombaakaav mba ikyav mbi shon mbi ve a mi la kpaa cii. (Yesaia 33:24; Luka 13:11-13) Een, Aôndo “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:4.
14. U orumace aren sha mlu u vough la wa nyi man nyi kere?
14 Kpa u aren sha mlu u vough la hemba di u lun gbon gbon sha iyol kua ken mhen di tsô la. Wa u dondon aeren a Yehova a sha inja la kpa ker, gadia yange i e̱r se ‘sha inja i mlu u Aôndo, sha ibeen na.’ (Genese 1:26) U̱ kwagh a̱ lu nahan yô, a gba u a tese ior kwagh tsusee. Ken tar u he la yô, “perapera una tema ker.” Di vough er Yesaia yange tsengaôron nahan, “mba ve tem shin tar la mba henen perapera.” (2 Peteru 3:13; Yesaia 26:9) Perapera ne gem ve a bem—bem hen atô u akuraior cii man hen atô u anterev man hen tsombor u or, man hemban cii je yô, bem a Aôndo iyol na kpaa. (Pasalmi 85:10-13; Yesaia 32:17) Tegh tegh tsô, á tese mba ve hen perapera mbara vea fa kwagh u Aôndo a we ishima sha ci ve yô. Mdoo u Yehova a doo ve ishima la una nguren wan amise ken asema a ve yô, vea gba dondon igbenda na ken hanma vegher u uma ve cii. Ve kpa vea fatyô u ôron ier i Yesu nahan, ér “M eren akaa a doon Un gbem.” (Yohane 8:29) Kwagh ne una va hingir mimi hen uumace cica cii nahan, uma una lu kwagh u ember kpen kpen!
Mbamzehemen Mba Hegen Je Kpa Ve Lu Yô
15. Tôô mbampin mba i pin ken ikyumihiange ingin ne yar tom a mi sha u tesen akaa a Tartor la ú lu eren la, man kwagh u i gbe u se lu eren hegen yô.
15 Akaa a injaa a Tartor u Aôndo man mba vea lu ken ú mbara vea er la, hegen je kpa nga duen tseer tseer. Mbampin man avur a ruamabera a i nger a dondo heen ne aa umbur we mbamzehemen mban, shi aa umbur we akaa a i gbe u mba vea lu sha ikyev i Tartor la cica cii vea lu eren hegen yô.
Ka an yange Tartor la hii tan num sha nanaa, man lu nyi i va kere? (Mpase 12:7-10, 12)
Hii shighe u yange i ver Kristu tor la je, ka mkohol u asande a nongo ú nyi a lu zan hemene? (Mpase 14:1-3)
Er i nger ken Mateu 25:31-33 nahan, kanyi tom Yesu yange tsengakaan ér una er zum u zegecan la una hii kera cii yôô?
Kanyi tom í hila lu eren nyiana? Ka unô ior ve lu eren tom shono? (Pasalmi 110:3; Mateu 24:14; Mpase 14:6, 7)
Er nan ve mbapativ man mbakwaghaôndo mbaahendanev ve kan shio u yangen tom u pasen kwaghaôndo nee? (Sekaria 4:6; Aerenakaa 5:38, 39)
Ka mbamgem mba nyi ve ve ken uuma mba ior mba ve we ayol a ve sha ikyev i hemen u Tartor laa? (Yesaia 2:4; 1 Mbakorinte 6:9-11)
Tartor ú Anyom Dubu La
16. (a) Hemen u Kristu la ua tsa a kuma er shighe nena nahana? (b) Ka akaa a kpilighyol a nyi á er sha shighe la kua zum u hemen na ua bee la je kpaa?
16 A wuhen Satan man azôv a na shin ihungwa i í ze kweng la yô, Yesu Kristu man mbayandyako a na imôngo mba 144,000 mbara maa vea tema tor shi vea lu upristi kpaa zan zan anyom dubu. (Mpase 20:6) Sha iaven shon la, a sôr orumace nana hingir vough, á kar a isholibo man ku u Adam yange va a mi la kera gbem sha won. Hemen u Anyom Dubu la ua been yô, hen zum la Yesu una er tom na u Tor Mesiya man Pristi kpaa la una kure, nahan una “gema tartor Una na” Ter na, “sha er Aôndo Una hoghom cii ken hanma or cii yô.” (1 Mbakorinte 15:24-28) Hen shighe la a sagh Satan anshighe kpuaa sha u a̱ kar uumace mba i yem ve la, sha u vea lu suen hementor u sha won cii u Yehova la shin vea lu suen ú ga kpa a fa yô. Ikyaren i masejime la ia been yô, Yehova maa una tim Satan man mbahembanato mba ve te ikyaa ken a na la cii. (Mpase 20:7-10) Mba ve dondo hementor u Yehova her gban yô—ka ian i a lu a mi u hemen la je la—hen shighe ne nahan vea vande tesen ér mtil sha mimi ve la ka u tenger ga. A nyôr a ve sha ian i lun vea Yehova kangenaa la, una ngohol ve ér mba ônov nav, Aôndo una lumun ve, vea zua a uma u tsôron.—Mbaromanu 8:21.
17. (a) Anyom dubu la aa been yô, a gema Tartor la a er nyi a mini? (b) Ka sha nyi gbenda a fatyô u kaan ér mimi je Tartor la “ua gba mayange ga”?
17 Nahan tom u Yesu man ú mba 144,000 mbara ve lu eren sha ci u tar la, ua gema. Tsô kanyi tom vea lu masen erene? Heela Bibilo kera ôr ga. Kpa aluer se sue hementor u Yehova la her dông yô, se lu uma zan zan a ar sha mkur u Hemen u Anyom Dubu la, nahan se fa kwagh u Yehova a lu a mi ken ishima sha ci ve kua gburumaa u sha won u a te hindi iyol yum ne kpaa. Nahan cii kpa, hemen u anyom dubu u Kristu la ua lu “mtemtor u tsôron,” shi Tartor na kpaa “ka u timin kera mayange ga.” (Daniel 7:14) Inja nena? Hiihii yô, tahav mbu hemen la mbua kar a lu sha ikyev i mbagenev mba ve lu a awashima ve kposo ga, gadia ka Yehova una lu Orhemen ye. Heela tseegh ga, Tartor la “ua gba mayange ga” sha ci u akaa a ua er la aa lu gbem sha won. (Daniel 2:44) Shi Tor Mesiya u a lu Pristi la, kua mba ve lu ator man upristi a na imôngo la cii a na ve icivir gbem sha won sha ci u tom u ve shire Yehova sha jighjigh u nan la.
Kwaghôron u Hiden Kimbir Kwagh
• Er nan ve i lu Tartor u Aôndo tseegh ú lu mkur u mbamzeyol mba orumacee? Ka hanma shighe yange Tor u Tartor u Aôndo la hii u hemene?
• Kanyi i hembe doon we sha kwagh u Tartor u Aôndo man akaa a ua er la ciilii?
• Ka nyi akaa Tartor la ú er u̱ hegen je kpa se fatyô u nengen a mini, man ci wase ken akaa ne yô kanyi?
[Mbampin Mba Ngeren u Henen]
[Foto u sha peeji 92, 93 la]
Ior cii vea hen perapera sha ikyev i Tartor u Aôndo
