U Civir Imôngo hen Shighe Wase Ne—Ikyav Na Ér Nyi?
Ityough I Môm
U Civir Imôngo hen Shighe Wase Ne—Ikyav Na Ér Nyi?
1, 2. (a) Ka akaa a sagher iyol a nyi a eren sha ayange ase nee? (b) Kanyi akaa mbaasemaamimi ve veren ishima ve keghene?
IOR mba kohol sha tar cii ér vea lu ken mciviraôndo u a lu ken mzough la. Mzough shon ngu kohol ior umiliôn imôngo ken akuraior cii man hanma nongoior man hanma zwa kpaa. Mba kohol ior seer a seer hanma inyom cii. I pase kwagh u ior mban ken Bibilo ér ka “mbashiada” mba Yehova, shi i yila ve ér “zegeikpelaior” kpaa. Mba eren Aôndo “tom . . . tugh man tetan kpaa.” (Yesaia 43:10-12; Mpase 7:9-15) Hii nan ve eren kwagh nee? Ka sha ci u ve va fa e̱r Yehova a lu Aôndo u mimi tswen yô. Kwagh ne mgbegha ve vé nyôôso uuma vev sha u dondon igbenda na i perapera la. Shi ve fa e̱r se lu ken “ayange a masejime” a tar u ifer ne, shi er i lu u ica a gba ga tsô Aôndo una tim ú kera, shi i lu u una gema tar u he u paradiso la una ver sha ityough ki ú kpaa yô.—2 Timoteu 3:1-5, 13; 2 Peteru 3:10-13.
2 Mkaanem ma Aôndo er ityendezwa ér: “Shi côhin tsô iferor á kera lu ga . . . Kpa mbaasemaleghlegh yô, vea ya dyako u tar, á saan ve iyol sha mngee u bem.” (Pasalmi 37:10, 11) “Mbaperapera vea ya dyako u tar, vea lu ken u gbem.” (Pasalmi 37:29) “[Aôndo] Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:4.
3. Mbá civir ken mzough sha mimi nena?
3 Ior mba ve kohol imôngo ken mcivir u mimi hegen ne ka ve vea hii teman twev ken tar u he la ye. Ve hen ve fa kwagh u a lu ishima i Aôndo yô, shi mba eren i sha afatyô ve cii kpaa. Er Yesu lu tesen mluainja u kwagh ne yô, a kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu” je la. (Yohane 17:3) Apostoli Yohane nger wener: “Tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.”—1 Yohane 2:17.
Ikyav i Kwagh Ne A Lu Tesen Jim Yô
4. (a) Ikyav i mkombo u kumban ior kpishi imôngo ken mciviraôndo hen shighe wase ne yô ka nyi? (b) Bibilo pase mkohol imôngo ne nena?
4 Ikyav i kohol ior kpishi imôngo ken mciviraôndo hen shighe wase ne yô, kanyi jimi? Ka ikyav i tesen wang je ér se mba ikyua a mkur u tar u ifer ne, man tar u he u Aôndo ua kar a tema sha ityough ki ú je a ngôôr ga. Se nenge m-iv u akaaôron a profeti a Bibilo a yange tsengaôron mkohol u kohol ior imôngo ne sha ashe ase. Imba kwaghôron u profeti shon ugen kaa ér: “Sha ayange a masetyô la [ayange a masejime ne], á ver uwo u ya u TER [mcivir na u mimi u a lu sha tseng la] sha ityough ki iwoov [ua kar hanma ityô mcivir cii], . . . akuraior aa ur yemen her; akuraior kpishi aa za aa kaa er: Va nen, sé za nen sha uwo u TER, hen ya u Aôndo u Yakob, sha u Una tese se igbenda Na man sha u sea zenden sha igbenda Na kpaa.”—Mika 4:1, 2; Pasalmi 37:34.
5, 6. (a) Akuraior nga geman hen Yehova sha mimi nena? (b) Ka mbampin mba nyi se pine ayol a asa?
5 Shin er akuraior jimin cii a ne ayol a ve ken iyou i Yehova i ken jijingi i civir un la ga nahan kpaa, ior umiliôn imôngo ken akuraior mbá eren nahan. Ka vea henen vea faan awashima u sha dooshima man inja i dedoo i Yehova Aôndo la yô, asema ve a mgbegha ve tsung je. Ve hide a ayol a ve ijime ve gba keren u fan kwagh u Aôndo a soo ér ve̱ er la. Msen ve ngu inja er u orpasalmi ngise er wener: “Tesem, m̱ er ishima You, gadia We U ngu Aôndo wam” la, nahan.—Pasalmi 143:10.
6 Ú nenge a iyol you ken zegeikpelaior i Yehova a kohol i hegen ken mcivir u ken mzough imôngo ne kpa? Mwongor u ú wongor atindi a ú zough a mi ken Mkaanem ma Yehova la tese ér ú lumun wer ka un a lu Imbor i ma kpa? Ú ‘zende sha igbenda Na’ ú kighir nena?
Er I Ker Cio u Civir ken Mzough Imôngo La
7. (a) Ken masejime yô, a va fatyô u lun ken mcivir u civir ken mzough la a za kighir nena? (b) Hii nan ve i lu u or a hingir or u civir Yehova fefaa, man se wase mbagenev kpa u eren kwagh ne nena?
7 Awashima u Yehova yô, ka u akaa a uma a i gbe á a gba, á lu a mkav tsung la cii a̱ zua imôngo ken mcivir u mimi. Iyange i sev a av ve hanma or u nan lu uma cii nana lu civir Aôndo u mimi tswen la i sar se je zua ga! (Pasalmi 103:19-22) Kpa cii man kwagh a̱ lu nahan yô, saa Yehova una vande timin hanma or u nan vende u eren ishima na i perapera la kera cii ve. Kpa ngu a vande tan icin i kwagh u a soo u eren la sha mhôôn sha er ior vea lu han han kpa ve̱ zua a ian i geman anza ve yô. (Yesaia 55:6, 7) Sha nahan yô, sha ayange ase ne, zamber u a hingir torough torough ne ngu nyôron “hen hanma ikurior man hanma nongo man hanma zwa man hanma nongoior” kpaa ér: “Cia nen Aôndo, na nen Un icivir gadia shighe Na u ôron ijir kuma ve, civir nen Un u A er Sha man tar man zegemnger man amboramnger kpaa la.” (Mpase 14:6, 7) Ú vengese mlehe u i lôhô ú ne vee? Aluer ka nahan yô, we kpa ú ngu a ian i civirigh i shi geman lôhôn mbagenev kpaa sha u ve̱ va fa Aôndo u mimi la shi ve̱ civir un yô.
8. Zum u se hen atesen a hiihii a ken Bibilo la kera yô, ka a inja u se nôngo tsung se za hemen sha nyi gbenda?
8 Ior mba ve kaan ér ve na Yehova jighjigh kpa ve ze hemen u zendan asaren a ve ijime la ka awashima na u ve̱ civir un ga. Aôndo soo ér ior ve̱ zua a “mfe u fan ishima Na sha kwaghfan cii” la shi ve̱ tese ikyav i kwagh ne ken uuma vev kpaa. (Mbakolose 1:9, 10) Sha nahan yô, ior mba lun a iwuese mba ve hen atesen a Bibilo la yô mbá soon u zan hemen za aren sha mlu u vian u Mbakristu la. Isharen ve yô, ka u seer fan Yehova tsung, shi seer igbanger man mze u ve kav Mkaanem nam la, shi seer eren sha ma ken uuma vev kpaa. Ka ve ker gbenda u kaven anza a Ter wase u sha la shi nengen akaa er un kpa a nengen á nahan. Kwagh ne mgbeghan ve u keren igbenda i wan uwegh ken tom u waren uuma, ú á we ior ve eren sha tar sha ayange ase ne ne. We kpa ka isharen you laa?—Marku 13:10; Mbaheberu 5:12–6:3.
9. Ka sha nyi igbenda i fetyô u lun ken mzough imôngo u mimi la hegene?
9 Bibilo tese ér gba u ior mba civir Yehova vea lu ken mzough môm kpee. (Mbaefese 4:1-3) Ka u mzough la una lu hegen, shin er se lu ken tar u ú pav ker wue wue shi se nôngon a myen wase her nahan ne kpaa. Yesu yange er msen a ishima i môm wener mbahenen nav cii ve̱ lu gungur môm, ve̱ ember mzough imôngo u mimi la. Lu u kwagh ne una lu nena? Hiihii yô, lu u vea ya ikyar i dedoo a Yehova man Wan na. U sha uhar yô, lu u vea lu ken mzough ayol a ve. (Yohane 17:20, 21) Sha nahan yô, ka tiônnongo u Kristu a lu nongo u Yehova a tesen ior nav sha ikyev i ú ye.
Ka Nyi Akaa i Ve a Mzougho?
10. (a) Ka sea yaren tom a Bibilo ayol a ase u henen u keren mbamlumun sha mbampin mba ve bende a vese nahan, kanyi ka se seer zuan a mini? (b) Time sha akaa a a ve a mzough u Mbakristu la sha u nan mbamlumun sha mbampin mba i pin sha ikyumhiange ingin ne.
10 Ka akaa a van a mzough a ataankarahar je a dondo shiin ne. Ú nguren nan mbamlumun sha mbampin mba ve lu ne kaveraa yô, hen er hanma ishemberkwagh i bende a ikyaryan you a Yehova man a mba ve lu Mbakristu a we imôngo mbara yô. U̱ henen sha avur a Ruamabera a i ter a ter á kpa i nger a cii ga la una seer mfe wou u fan Aôndo la kua kwaghfan wou man mkav wou kpaa—ka anza a kwagh a gbe se cii sha mi je la. (Anzaakaa 5:1, 2; Mbafilipi 1:9-11) Time sha atôakyaa ne môm môm.
(1) Se lumun ser Yehova ngu a ian i veren tindi u a tese ér kwagh ka u bo shin ka u dedoo la. “Suur sha TER a ishima you cii, de yier sha mkav wou ga. Umbur Un sha ijende you cii, Un kpaa Una kôôm igbenda you.”—Anzaakaa 3:5, 6.
Hii nan ve i gbe u se ker kwaghwan u Yehova man gbendatesen na zum u se tsough kwagh u se soo u eren laa? (Pasalmi 146:3-5; Yesaia 48:17)
(2) Se mba a Mkaanem ma Aôndo ma tesen se gbenda. “Zum u ne ngohol kwaghôron u Aôndo u ne ungwa hen vese la yô, ne rumun un er ka kwaghôron u ior ga, kpa er ka kwaghôron u Aôndo man kape i lu kpaa je la, u a eren tom ken a ven, ne mba ne ne jighjigh la.”—1 Mbatesalonika 2:13.
Ka kwaghbo u nyi a lu ken m-er u gban eren kwagh u se “nenge” ser ka u shami tsô laa? (Anzaakaa 14:12; Yeremia 10:23, 24; 17:9)
Aluer se fa kwaghwan u Bibilo i we sha ma kwagh ga yô, kanyi se ere? (Anzaakaa 2:3-5; 2 Timoteu 3:16, 17)
(3) Se cii se mba zough a mtsera ken aaven a kwaghyan u ken jijingi inja i môm. “Ônov ou ci ca kpaa vea lu mba TER A tese ve yô.” (Yesaia 54:13) “Sé wa nen ayol a ase iko, sé taver nen ayol a ase asema u lun a dooshima man aeren a dedoo. Se̱ de bundu nen mbamkohol asev mba aduaav er mbagenev ve eren nahan la ga, kpa sé taver nen asema ayol a ase, i seer eren nahan er ne nenge iyange [i mtim] la i lu mgbôghom yô.”—Mbaheberu 10:24, 25.
Ior mba ve ngohol mserakaa u Yehova a ver sha u nan kwaghyan u ken jijingi la yô, ka mbamtsera mba nyi ve zough a mini? (Yesaia 65:13, 14)
(4) Ka Yesu Kristu a lu Orhemen wase ye, ka ma orumace ga. “I de yer ne er, rabi, ga, gadia Ortesen wen ngu môm tsô, man ne cii ne mba anmgbianev. Man shi de yer nen ma or shin tar ne ner ter wen ga, gadia Ter wen ngu môm tsô, ka u A lu Sha la. Man i de yer ne er, mbahemenev, kpaa ga, gadia Orhemen wen ngu môm tsô, ka Kristu.”—Mateu 23:8-10.
Ka u mô wase môm nana hen ér se hemba mbagenevee? (Mbaromanu 3:23, 24; 12:3)
(5) Se ver ashe a gomoti u Tartor u Aôndo la ser ka un tseegh a lu ishimaverenkeghen i orumace ye. “Yô, eren nen msen nahan, ner: Ter wase u Sha, i tsegha iti You, tartor Wou u̱ va, i er ishima You shin tar kpaa vough er i eren i Sha nahan. Kpa vande keren nen tartor Na man perapera Na, man akaa ne cii á seer ne a ye.”—Mateu 6:9, 10, 33.
U̱ ‘vanden keren tartor’ la kuran mzough imôngo wase nena? (Mika 4:3; 1 Yohane 3:10-12)
(6) Icighan Jijingi ne mbacivir Yehova anza a a lu hange hange sha u van a mzough imôngo u Mbakristu yô. “Ityamegh ki Jijingi yô, ka dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha.”—Mbagalatia 5:22, 23.
Kanyi i gbe u se er ve jijingi u Aôndo una ume ityamegh nagh ken avese? (Aerenakaa 5:32)
U lun a jijingi u Aôndo la benden a mlu wase vea mba ve lu Mbakristu a vese imôngo la nena? (Yohane 13:35; 1 Yohane 4:8, 20, 21)
(7) Mba ve civir Aôndo sha mimi cii mba pasen loho u dedoo u Tartor na la. “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—Mateu 24:14.
Kanyi ia mgbegha se ve se soo u lun a ci u vesen ken tom u kwaghpasen nee? (Mateu 22:37-39; Mbaromanu 10:10)
11. Zum u ka sea dondo mimi u Bibilo la ken uuma asev yô, kanyi ka i due kere?
11 U civir Yehova ken mzough la ne se mba hembe kporom ikyua a na shi ne se u ember mtemimôngo vea mba se civir a ve imôngo la. Pasalmi 133:1 kaa ér: “Nenge, aluer anmgbianev vea tema imôngo, ishima ve ia lu i môm yô, á doo yum á hôm kpaa.” U duen undun tar ne a msoo u ú hembe soon iyol i ú la man idya i ú man tswam u ú, geman kohol imôngo a mba Yehova a doo ve ishima sha mimi shi ve kor atindi na la ka kwagh u yôhôr iyol ishima i môm!
Palegh Akaa A Nan Mpav La
12. Hii nan ve i gbe u se palegh inja i or lun sha tseeneke u nan laa?
12 Aluer ka u se vihi mzough wase u a lu tar sha won cii shi a gbe se kwagh yum ne ga yô, gba u se palegh akaa a nan mpav la. Môm ken akaa ne yô, ka inja i or tilen sha tseeneke u nan undun Aôndo man atindi na la. Yehova wase se u palegh imba inja la sha u ponon or u yange hii inja shon la, ka Satan Diabolo je la. (2 Mbakorinte 4:4; Mpase 12:9) Ka Satan yange tuur Adam man Ifa ér ve̱ hule kwagh u Aôndo ôr ve la kera ve̱ gema ve̱ er kwagh u a lu sha ishima i Aôndo ga la ye. Kwagh u lu due ker yô, lu ikyaa i yange i tser ve, se kpa í kou se sha mi la. (Genese 3:1-6, 17-19) Tar ne iv a ieren i ior lun sha tseeneke ve, kera lun sha ikyev i Aôndo man atindi na ga la. Nahan gba u se yange imba inja ingira ken avese.
13. Kanyi ia tese shin mimi je sea lu wan ago a va lun uma ken tar u perapera u Aôndo la shin sea lu wan á ga yôô?
13 U tesen ikyav yô, time ase sha ityendezwa i sagher iyol i Yehova a tende wener una va kar a tar u ifer u ainge ne kera una gema a ver usha u he man tar u he u “perapera una tema ker” sha ityough ki ú la. (2 Peteru 3:13) Kwagh la una kera mgbegha se hegen je sha u se̱ hii u wan iyol i va lun hen shighe u perapera una hemba la gaa? Ikyav i kwagh ne yô, ka u ungwan kwaghwan u Bibilo i we wang nahan la, ér: “Tar u̱ de kera doon ne ishima ga shin akaa a [a] lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga.” (1 Yohane 2:15) Nahan, se venda anza a tar ne kera—ka u or lun sha tseeneke u nan man u or wan iyol i nan ikyo za karen ikyaa inya man idya man tswam u eren je la. Se na i hingir ikye yase u keghen ato a Yehova shi ungwan imo na a ishima yase i môm, shin er ishima yase i i yen ne ia soo kwagh ugen kposo nahan je kpaa. Mlu u uma wase jimin cii tese ikyav ér mhen wase man hangeshima wase har sha u eren ishima i Aôndo.—Pasalmi 40:8.
14. (a) Hii nan ve i doo u se de ser ian i i lu hegen i henen igbenda i Yehova shi dondon i ken uuma asev ne i kar se ga? (b) Avur a Ruamabera a i ter ken ikyumhiange ne nga a inja hen avese kpôô kpôô nena?
14 Shighe u Yehova a ver u timin tar u ifer ne kera kua mba igbenda i ú i hembe doon ve la una kuman yô, una kera timbir a timbir je ga. Ngu va bunden shighe na u a ver la ga, shin una va gema kwagh u un soo la kposo wener ior mba ve nôngon u varen ken tar her kpa shi ve henen ishima i Aôndo shi ve eren i wer wer la i lu ve guda kpaa ga. Hegen ka shighe u a gba teman a tema ga je ne! (Luka 13:23, 24; 17:32; 21:34-36) Sha nahan yô, er zegeikpelaior i lu den ér ian i dedoo ne i kar ve ga, ve sasen a sase keren kwaghwan u Yehova a we ken Mkaanem nam man nongo na shi ve lu zenden ken mzough imôngo, ve yemen sha gbenda u zan ken tar u he la nahan, ka kwagh u saan shin ishima kpishi je! Shi ka sea nguren henen kwagh u Yehova seer yô, a hemban doon se ishima seer a seer shi se hemban soon u eren un tom kpaa.
Kwaghôron u Hiden Kimbir Kwagh
• Awashima u Yehova sha gbaa u mcivir yô ngu nena?
• Zum u se hen atesen a hiihii a Bibilo la se bee yô, ka sha gbenda ugenegh u nyi nahan i doo u shi se nôngo se za hemene?
• Kanyi kwagh se er asange asange sha u se lu ken mzough a mbagenev mba civir Yehova imôngô?
[Mbampin Mba Ngeren u Henen]
[Foto u sha peeji 4 la]
‘Mbaasemaleghlegh vea ya dyako u tar shi a saan ve iyol sha mngee u bem kpaa’
