Ityough Pue Kar Utar

Zegeikpelaior Tile sha Ishigh ki Ikyônough Ki Torough Ki Yehova

1. (a) Cii man ior mba ngise ve civir Aôndo shighe u Kristu lu a va ga la ve̱ ngohol iyua ve, shin mba 144,000 mbara kpa ve̱ ngohol i ve̱ yô, saa nyi ia er ve? (b) Kanyi “zegeikpelaior” i i lu uma sha shighe ungun ne ia zua a mini?

HII sha ayange a Abel la je zan zan ar sha shighe u Yohane u Eren Batisema la, mbacivir Aôndo sha jighjigh mbara ver m-er u eren ishima i Aôndo la hiihii ken uuma vev. Kpa, ve cii ve kpe, mba keghen mnder u a va nder ve shin ku vea hide a lu uma ken tar u Aôndo u he la. Iorov 144,000 mba i lu u vea hemen vea Kristu imôngo ken Tartor u Aôndo u sha la kpaa gba u vea kpe keng cii ve vea mase ngohol iyua ve la ye. Nahan kpa, Mpase 7:9 tese ér ken ayange a masejime ne, “zegeikpelaior” ia due ken hanma ikyurior, man ia kpe ga kpa ia lu a ishimaverenkeghen i lun uma gbem sha won shin tar. Ú ngu môm ken a ve kpa?

U Fan Zegeikpelaior Shon

2. Yange i hii nan ve i va zua a mkav wang sha kwagh u ian i zegeikpelaior i ken Mpase 7:9 laa?

² Ken inyom i 1923 la, mbacivir Yehova kav ér “iyôngo” i í er kwagh u í ken injakwagh i Yesu i ken Mateu 25:31-46 la man “iyôngo igen” i í er kwagh í ter í ken Yohane 10:16 la ka ior mba vea lu a ian i lun uma gbem sha won shin tar yô. Ken inyom i 1931 la, shi i kav mba i pase kwagh ve ken Esekiel 9:1-11 ér i ver ve ikyav sha  atsul la ér ka ior mba ve lu a ishimaveren i lun shin tar yô. Nahan mba ker ken inyom i 1935 la yô, i kav er zegeikpelaior la i lu kpen u nongo u iyôngo igen i Yesu a er kwagh u í la yô. Nyian zegeikpelaior ne i ngee je nyôr umiliôn imôngo.

3. Er nan ve kwagh u i ôr ér “tile sha ishigh ki ikônough ki torough” la í lu u kaan ér nongo la ngu yemen sha ga?

³ Ken Mpase 7:9 la, i nenge zegeikpelaior la inja er ka sha i lu nahan ga. Mtil u i “tile sha ishigh ki ikônough ki torough” ki Aôndo la tese ikyav ér ngi sha keng ga. Ngi di sha ishigh ki Aôndo tsô. (Pasalmi 11:4) A fatyô u nengen er zegeikpelaior i “ma or fatyô u ôron i iyenge ga” la i lu nongo u yemen sha ga nahan aluer í tôô ve mba i er iyenge ve ga la í kar sha kwagh u i nger ken Mpase 7:4-8 man Mpase 14:1-4 la yô. I pase iyenge i ior mba i tee ve shin tar i yem a ve sha la ér mba iorov 144,000.

4. (a) “Zegecan” i zegeikpelaior la i war la kanyi? (b) Er i nger ken Mpase 7:11, 12 la nahan, ka unô ve til ve lu kenger zegeikpelaior la shi ve kohol ve ken mciviri?

⁴ Mpase 7:14 ôr kwagh u zegeikpelaior la ér: “Mban ka mba ve dugh ken zegecan la yô.” Ve war mzeyol u hemban sha won cii u i gbe je a lu a̱ vande tseren uumace ga yô. (Mateu 24:21) Vea nguren wuese Aôndo man Kristu sha myom ve la yô, akaauma a a lu sha la cii aa gba zwa môm a ve, aa kaa ér: “Amen, iwuese man iengem man kwaghfan man ishughun man icivir man agee man mtaver cii, ve̱ lu mba Aôndo wase gbem sha won. Amen.”—Mpase 7:11, 12.

U Tesen Ér Ve Kuma u Waren

5. Se er nan ve se fa kwagh u i gbe u or a er ve nana lu ken zegeikpelaior laa?

⁵ Mkor u i kura zegeikpelaior la i dugh a i ken zegecan  kera la zua sha atindi a Yehova a perapera la. I pase aeren a tesen ikyav i mba a va war ve la wang ken Bibilo. Nahan, ior mba kwagh u perapera a doo ve ishima yô, hegen je vea fatyô u eren kwagh sha u tesen ér ve kuma u a va war ve yô. Kanyi i gbe u vea er keng ne?

6. Er nan ve aluer i tôô zegeikpelaior la i kar sha iyôngo kpa a lu sha inja?

⁶ Iyôngo ngi kera ke kera ga, shi ngi taver ityough kpaa ga. Nahan kwagh u Yesu yange kaa wener un ngu a iyôngo igen i í lu ken nongo u yemen sha la ga la, yange lu ôron lu kwagh u ior mba ve soo u lun uma shin tar tseegh ga kpa shi vea dondo ityesen na yô. A kaa wener: “Iyôngo Yam ngi ongo imo Yam, Mo kpaa M fa i, ngi dondon sha a Mo kpaa.” (Yohane 10:16, 27) Ior mban ka mba ve ongo Yesu shi ve eren kwagh sha imo na, ve hingir mbahenen nav yô.

7. Ka aeren a nyi i gbe u mbadondon Yesu vea lu a mini?

⁷ Ka aeren agen a nyi i gbe u hanmaor ken mbadondon Yesu cii nana lu a mini? Mkaanem ma Aôndo na mlumun ér: “Er nen tseor la kera u a lu sha inja i zende u tsuaa la, . . . haa nen orhe iyol u i gbe un sha inja i Aôndo ken perapera u mimi man mtsegh u mimi” la. (Mbaefese 4:22-24) Ka ve lu a aeren a a nyôôso mzough u ior mbacivir Aôndo yô—inja er “dooshima man msaanyol man bem man ishima i wan man sar sar man mlu u dedoo man jighjigh man ishima i legh legh man u kôron iyol tsaha” nahan.—Mbagalatia 5:22, 23.

8. Er zegeikpelaior i lu suen asande a a shi her ne nahan, kanyi ia tagher a mini?

⁸ Zegeikpelaior ne i suen mba ve lu a ishimaveren i yemen sha mba ve lu kpuaa, ve lu hemen tom u pasen kwagh la. (Mateu 24:14; 25:40) Iyôngo igen ne ngi  suen ve, shin er í fe dedoo ér a hendan a ve gadia Kristu Yesu aa mbatyomov nav gbihi Satan man azôv na shin tar ken mhii u ayange a masejime ne nahan kpaa. Inja na yô ‘kwagh tser tar gadia diabolo sen shin u, ishima vihi un tsung gadia a fa er shighe na a kera vese ga yô.’ (Mpase 12:7-12) Nahan, er mkur u tar ne a lu mgbôghom yô, Satan ngu hemban hendan a ior mbacivir Aôndo cii.

9. Mbacivir Aôndo za ikyura ken tom u pasen loho u dedoo ne nena, man er nan ve ve ze ikyura yumu?

⁹ Shin er i lu tôvon ve a ican tsusee nahan kpa, tom u  pasen kwagh yô ngu yemen hemen hemen her. Ken mbee u Ityav mbi Tar cii Mbi sha I la, mba pasen kwagh u Tartor lu udubu kpuaa tseegh, kpa hegen mba umiliôn imôngo, gadia Yehova er ityendezwa wener: “Hanma ityumugh ki i var sha ci u vihin [ne] iyol, ikôl ia lagh ki ga.” (Yesaia 54:17) Ken atejir u tamen u Mbayuda je kpa orgen yange kav er a fatyô u bunden tom u Aôndo ga yô. A ôr kwagh a Mbafarishi mba sha derianyom u hiihii la sha kwagh u mbahenen a kaa wener: “De nen ior mban kera tsô; gadia aluer mhen ne shin tom ne ua lu u ior yô, ua bunde; kpa a lu u Aôndo yô, né fatyô u bunden u ga, alaghga á va hingir er ne mba nôngon num kuan Aôndo je kpaa.”—Aerenakaa 5:38, 39.

10. (a) Inja i ‘ikyav’ i í ver zegeikpelaior la yô, ér nyi? (b) Mbacivir Aôndo dondo ‘imo i í due Sha’ la nena?

¹⁰ Kwagh u i nger la tese ér i ver zegeikpelaior la ikyav sha u ve̱ war. (Esekiel 9:4-6) ‘Ikyav’ la tese ér i tsegha ve hen Yehova shi i er ve batisema, ve hingir mbahenen mba Yesu shi ve hii u maan aeren a Kristu la. Ve dondo ‘imo i í due Sha’ i ôr sha kwagh u tartor u Satan ú kwaghaôndo u aiegh u a samber a tser tar cii la, imo shon kaa ér: “Nongoior Wam, due nen ken a na kera sha er né nyôr nongo sha asorabo a na ga, shi né ngohol atsan a tseren un la kpaa ga yô.”—Mpase 18:1-5.

11. Ka sha gbenda u vesen ú nyi zegeikpelaior la i tesen ér ngi civir Yehova?

¹¹ Yesu shi kaa a mbadondon un wener: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:35) Kpa ior mba ken ukwaghaôndo mba tar ne yô, mba gem mba woo a wua mba nongo ve ken uitya, man ashighe kpishi ka i lu sha ci u ityar i mbara ngi kposo di tseegh tsô! Mkaanem  ma Aôndo kaa ér: “Ka sha kwagh ne man i pase ônov mba Aôndo a ônov mba diabolo ye; hanma or u nan eren perapera ga yô, nan due hen Aôndo ga, man shi u anmgbian u nan a doo nan ishima ga la kpaa. . . . Ka u ma se doo ayol a ase, i de luun er Kain u a due ken Orbo man a wua anngô na la nahan ga.”—1 Yohane 3:10-12.

12. Yehova una er a ‘ikyon’ í ukwaghaôndo i í um atam a injaa ga la sha shighe u zegecan la nena?

¹² Yesu kaa wener: “Kape hanma kon u injaa u um atam a injaa je ra; kpa kon u bo yô, ngu um di atam a bo je. Kon u injaa ngu fetyô u umen atam a bo ga; kon u bo di kpaa ngu fetyô u umen atam a injaa ga. Hanma kon u u um atam a injaa ga yô, ka i gber kera, i gbihi ken usu. Nahan yô, ka sha atam a ve man né fa ve ye.” (Mateu 7:17-20) Atam a ukwaghaôndo mba tar ne ve um la tese ikyav ér mba ‘ikyon’ i bo, man ica a gba ga tsô Yehova una tim í ken zegecan la.—Mpase 17:16.

13. Zegeikpelaior la i tese ér i kuma u waren zegecan la nena?

¹³ Mpase 7:9-15 tese akaa a á ne ve i kor zegeikpelaior la yô. I nenge ve kohol cii “ve tile sha ishigh ki ikônough ki torough” ki Yehova, mba suen hementor na u sha won cii la. Ve “ôô uriga vev ken awambe a Waniyôngo, ve kungu ve,” kwagh ne tese ér ve lumun a naagh ku Yesu ku wamen isholibo la. (Yohane 1:29) Ve tsegha ayol a ve hen Aôndo shi ve tese ikyav i mtsegh ne sha u mirin ayol a ve shin mnger. Nahan ve tile mba wang sha ishigh ki Aôndo, er akondo a ve a pupuu la a tese ikyav nahan, shi mba eren un “tom . . . tugh man tetan kpaa.” Igbenda ngi i ú fatyô u seer sôron uma wou sha er una hemba zuan sha kwagh u i pase heen ne vough yôô?

 Mbamtsera Mba Ve Lu Hegen La

14. Hegen je kpa mbacivir Yehova mba zuan a mbamtsera mba vesen nena?

¹⁴ A̱ shi nan kpa ú nenge a mbamtsera mba hegen je ior mba ve civir Yehova ve lu zuan a mi yô. U tesen ikyav yô, yange ú va fe mbaawashima mba Yehova mba perapera yô, ú kav er ishimaverenkeghen i lu ér mlu u ken hemen una doo yô. Nahan hegen uma wou ngu a awashima—ka u eren Aôndo u mimi tom a ishimaveren i iember i va lun uma gbem sha won ken paradiso shin tar. Een, Tor Yesu Kristu “Una za a [zegeikpelaior la] hen ambor a mngerem ma umam.”—Mpase 7:17.

15. Mbashiada mba Yehova mba zuan a mtsera sha u kuran akaawan a ken Bibilo a i we sha kwagh u patii man aeren la nena?

¹⁵ Mtsera u kpilighyol u zegeikpelaior la i lu zuan a mi yô ka dooshima man mzough man ijoughave i mbacivir Yehova tar sha won cii ve lu a mi la. Er i lu kwaghyan u ken jijingi môm se cii se ye yô, atindi man akaawan a ken Mkaanem ma Aôndo á se dondon la kpa nga môm tsô. Ka nahan ve akaa a patii shin kwaghfan u ior a paven se ga ye. Heela tseegh ga, se mba kor atindi a tseng a mlu u wang u Aôndo a soo ér ior nav ve̱ kuran la. (1 Mbakorinte 6:9-11) Sha nahan yô ior mba Yehova mba nenge num ga, shin mba a mbampav ken a ve shin mba eren idya i i zende tembe ken tar la nahan kpaa ga, kpa mba gem mba ember kwagh u a fatyô u yilan ér paradiso u ken jijingi yô. Nenge ase er i pase kwagh ne ken Yesaia 65:13, 14 yô.

16. Shin er uma a mgbough a mbamzeyol yum nahan kpa, ka ishimaverenkeghen i nyi zegeikpelaior la i lu a mini?

¹⁶ Uumace mba ve civir Yehova mban mba a myen shio ga. Shi ve kpa mbamzeyol mba tar ne mba ze ve iyol, amba er ibanave shin ican i ityav mbi akuraior ka mbi va ve a mi  iyol ishô la nahan. Shi ve kpa mba gbe angev shi mba ye ican shi mba kpen kpaa. Kpa ve na jighjigh ér ken tar u he la yô, Aôndo “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:4.

17. Aluer nyityô kwagh je ia er se hegen kpa, ka mlu u ken hemen u kpilighyol u nyi a lu keghen ior mba ve civir Aôndo u mimi laa?

¹⁷ Aluer uma wou una saa ken ku hegen sha ci u iyolbeen shin angev shin aikyôr shin tôvacan je kpa, Yehova una nder ú shin ku ú hide ú lu uma ken Paradiso. (Aerenakaa 24:15) Nahan ú za hemen u ember iniongo i ken jijingi sha shighe u Hemen ú Kristu ú Anyom Dubu la. Aôndo una seer doon we ishima er ú nenge mbaawashima nav vea lu kuren sha iengem yô. Shi averen a Yehova una va a mi kpôô kpôô sha shighe shon la aa na una hemba doon we ishima cii. (Yesaia 25:6-9) Nenge imba mlu u ken hemen u kpilighyol u a lu keghen ior mba Aôndo la sha wono!

Kwaghôron u Hiden Kimbir Kwagh

• Ka nyi kwagh i kpilighyol Bibilo i er sha kwagh u zegeikpelaior laa?

• Aluer mimi je se soo ser i wa se ken zegeikpelaior i í lumun a i la yô, hegen je kanyi se hii u erene?

• Averen a zegeikpelaior la i lu zuan a mi hegen shi ia va zua a mi ken tar u he ú Aôndo la nga ú a inja nan je?

[Mbampin Mba Ngeren u Henen]

[Foto u sha peeji 123 la]

Zegeikpelaior umiliôn imôngo kohol mba civir Aôndo u a lu u mimi la ken mzough môm