Armagedon una Karen yô, a lu Tar u Paradiso
Ityough 19
Armagedon una Karen yô, a lu Tar u Paradiso
1. (a) I fa kwagh u Armagedon nena? (b) Bibilo i na kwaghôron shami er nyi?
“ARMAGEDON” ka iti i cieryol hen ior kpishi. Mbahemenev mba tarev mba yer i mba veren ishima sha mpev u Ityav mbi Tar Cii Mbi sha III. Nahan cii kpaa, Bibilo i ôr kwagh u Armagedon er ka ijiir i nôngon ityav mbi perapera mbi Aôndo. (Mpase 16:14, 16) Ityav mbi Aôndo mbin mbia sôr gbenda sha ci u tar u he u perapera la.
2. (a) Ka unô a tim kera ken ityav mbi Armagedon mbilaa? (b) Nahan ka aeren a nyi se de u erene?
2 Er ityav mbi iorov ka mbi wuan mbaiboov kua mbaishôôv nahan, Armagedon yô, una tim mbaaferev tseegh. (Upasalmi 92:7) Ka Yehova Aôndo una lu Orjir ye, nahan una kar a hanmaor kera u nan vende sha apera u kuran atindi a na a perapera la. Nyian ior kpishi ve nenge a kwaghbo ken ambaakaa er ijimba i eren, msôrom ma hunden, aie u eren shin anyighe nahan kpaa ga. Kpa, hen Aôndo yô, akaa ne ka a shami ga. Nahan sha iyange i Armagedon la una yima mba ve ze hemen u eren a ga la ga. (1 Mbakorinte 6:9, 10; Mpase 21:8) Ú faan atindi a Aôndo sha akaa ne yô, ka a inja u mba ve eren akaabo la ve gema mbamlu vev.
3. (a) Yange Yesu kar mkur u tar u hegen ne sha nyi? (b) Kanyi ia va er Satan kua azôvô? (c) Sha mpase u ruamabera er i tese ken upeeji mba ken hemen mban nahan, kanyi akaa á va ember ken tar u paradiso laa?
3 Armagedon a karen yô tar u ifer ne ua kera shi vegher mape tsô kpaa ga. Ka mba ve civir Aôndo mbara tseegh vea tsôr sha won ye. (1 Yohane 2:17) Yange Yesu Kristu kar shighe ne sha ayange a Noa la. (Mateu 24:37-39; 2 Peteru 3:5-7, 13; 2:5) Armagedon a karen yô, ka tartor u Aôndo tseegh ua mase shin a tahav mbu gomoti sha tar cii ye. Satan kua azôv a na cii vea kera lu ga. (Mpase 20:1-3) Shi nenge vie vie, sha upeeji mba ken hemen mbara, sha averen a genegh a Bibilo i tese er mbaperapera vea va ember la.
UUMACE CII KEN BEM
“Gadia i mar se Wan, i na se Wan u nomso; tarkuran ngu sha vandegh Nagh; mba yer iti Na er: . . . Wantor u Bem. Mseer u tarkuran kua bem vea lu a ikighir je ga.”—Yesaia 9:6, 7.
“Sha ayange na yô, i kpe orperapera iyol, man bem a̱ ngee zan zan uwer ua kera lu ga. A̱ tema tor, hii hen zegemnger zan zan za ar hen zegemnger, man shi hii hen Ifi zan zan ar sha akighir a tar.”—Upasalmi 72:7, 8.
ITYAV KERA MBI GA
“Va, va nenge nen ityom i TER, A er akaacieryol shin tar, A er ityav mbi bee zan zan ar hen ikighir i tar je.”—Upasalmi 46:8, 9.
UYA MBA DEDOO MAN TOM U DEDOO SHA CI U HANMAOR
“Vea maa uya man vea tema keregh . . . Mayange vea maa ya, orgen á kar á tema ker ga, vea lôô man orgen á kar á ya, ga; . . . uicuwan Av kpaa vea ya tom u ave ve zan zan je. Vea kera er tom gbilin ga, vea kera mar ônov sha ci u ve̱ tim kera kpaa ga; gadia ve ka vor u mba TER A ver ve doo doo la, kua tsombor ve a ve imôngo kpaa.”—Yesaia 65:21-23.
IFER, IPILA MAN AFERAKAA CII NGA GA
“Gadia á va tim aferaior kera; . . . Gadia shi côhin tsô iferor á kera lu ga; mimi je, ú nenge sha ijiir i nan, nan nan kpaa, kpa nana lu ga.”—Upasalmi 37:9, 10.
“Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera.”—Anzaakaa 2:22.
TAR CII HINGIR PARADISO
Yesu yange kaa er: “Ú lu a Mo imôngo ken Paradiso.”—Luka 23:43, NW.
“Mbaperapera vea ya dyako u tar, vea lu ken u gbem.”—Upasalmi 37:29.
AKAAYAN KPISHI SHA CI U IOR CII
“Sha uwo ne TER u akum a Sha Una yôr akuraior cii . . . sha akaa a ahômough a a mgbough a mshiam, sha wain u tse u i kase un dedoo yô.”—Yesaia 25:6.
“Iyiav mbi ngee shin tar sha ityouv mbi iwoov je kpaa, asagher a mbi a̱ hingir war war.” “Inya mende iyiav dedoo; Aôndo, Aôndo wase, Una ver se doo doo.”—Upasalmi 72:16; 67:6.
4, 5. (a) Ka akaa a nyi aa kera lu ken tar u paradiso la ga? (b) Kanyi akaa ior vea va eren, a ken ajiir kpishi, ior ve feityô u eren nyian ga?
4 Ka keng sar ú u lun uma ken tar u paradiso ú ú lu er sule u or u hiihii Adam yange lu a mi shighe u i gba un la. (Genese 2:8; Luka 23:43) Hen ase shami yôô—ityav mbia kera lu ga, ifer shin ipila kpaa ga. U fatyô u zenden yemen hanma ijiir ken hanma shighe cii a lu atetan shin tugh je kpaa a mciem ma kwaghbo shio. Iferor nana kera lu ga.—Upasalmi 37:35-38.
5 Inja na yô mbapati mbaaiev shin mbakpengav mbahuav mba nzughul a ior kpaa vea kera lu ga. Shi ior vea kera tôô ikyav mbi tan kpandegh sha ishe i taver sha ci u ikyav mbi uityaav kpaa ga. Or môm nana kera vaa ican i kwaghyan shin sha ci u nan kôrcio u zuan a ya u injaa ga yum kpaa ga. Myina u ityom, mseer u inyar kua akaa a taver ishe cii aa kera lu ga. Mbamzeiyol mba ve ne atsan ken icombor nyian mbara cii vea kera lu ga. Ior cii vea zua a tom u doon u eren, shi vea fatyô u nengen shi ember ityom i ave ve zan zan je.
6. (a) Kanyi tom mba warén Armagedon mbara vea eree? (b) Aôndo una na iveren sha tom u eren nena?
6 Hiihii yô, mba vea war ityav mbi Armagedon mbara vea lu a tom u sôron tar shi esen ihyôghonov mbi tar u tse ne kera. Shi sha ityesen i Tartor la, vea zua a ian i sôron tar sha er ua hingir ijiir i doon u lun shin u yô. Tom u eren ua saan iyol tsô! Hanmakwagh u i er cii Aôndo una ver un doo doo. Shi una na sev mbu injaav mbu doon iyiav kua zendeinya, shi una nenge er ve cii mba ken mkpeiyol a kwaghbo u eren ve shin angev kpaa ga.
7. (a) Ka hanma ityendezwa i Aôndo ia iv hen shighe laa? (b) Kanyi Mbakristu ve keghen sha ityendezwa i Aôndo?
7 Ityendezwa i Orgbanakaa u dooshima, er Bibilo i nger sha zwa u orpasalmi ne, ia kule shami vough: “U bugh uwegh Ough, U ne hanma kwagh u uma sha isharen na, ka kom un.” (Upasalmi 145:16) Een, asarenakaa a vough a mbacian-Aôndo mbara cii a na ve a. Se fatyô u gbilen kwar sha u fan e̱r uma u kpilighyol una va lu ken tar u paradiso la ga. Er lu ôron kwagh u Aôndo pasen awashima na u va nan ior nav iveren la yô, apostoli Peteru yange nger er: “Kpa se mba keghen Usha mba hev je man tar u he u perapera una tema ker yô, sha ityendezwa [i Aôndo] la.”—2 Peteru 3:13; Yesaia 65:17; 66:22.
8. (a) Kwagh gba se a kwavaôndo u he ga sha ci u nyi? (b) “Usha mba hev” mbara kanyi?
8 Ka “Usha mba hev” mba nyi? Ka usha mba hev mba nengen a mi bouung ga. Aôndo yange gba usha mba se nengen a mi mban dedoo, shi mba wuese un kpaa. (Upasalmi 8:3; 19:1, 2) “Usha mba hev” mbara ka mtemtor u he u sha tar je la. Nahan “usha” mba ve lu hegen mban mba sha tahav mbu gomoti u sha ikyev-i-or. Mba va karen a u kera sha iyange i Armagedon la. (2 Peteru 3:7) Kpa “Usha mba hev” mba vea va tema sha ityough vev la ka gomoti u sha ikyev i Aôndo je la. Tor u ú á lu Yesu Kristu. Kpa mbadondon un mba jighjigh mba ve lu ken ikyum i “Usha mba hev” mba 144,000 mbara vea tema tor a na imôngo.—Mpase 5:9, 10; 14:1, 3.
9. (a) Kanyi i lu “tar u he”? (b) Tar u á va tim kera la kanyi?
9 Nahan, “tar u he” la di kanyi? Ka u shi gban tar u he ga. Aôndo yange gba Tar ne sha inja vough sha er uumace ve̱ lu sha u yô, man awashima na ka u̱ u lu gbem sha won. (Upasalmi 104:5) “Tar u he” la ka kweior u he shin nongoior u he. Ashighe kpishi Bibilo ka i ôr kwagh i yila “tar” sha injagbenda la. Ikyav i tesen, i kaa er: “Tar cii [inja na yô, ior] lu zwa môm, iliam kpaa môm.” (Genese 11:1) Nahan “tar” u i lu va timin u kera la ka ior mba ve zough ken tar u aferakaa ne la. (2 Peteru 3:7) Nahan “tar u he” u ua tema sha ityough ki u la ka mba civir Aôndo sha mimi mba ve til paleghaa a tar u aferaior ne yô.—Yohane 17:14; 1 Yohane 2:17.
10. (a) Ka unô i lu kohol hegene, man ka ken nyi? (b) Sha kwaghôron u avur a ruamabera a ken upeeji mba ken hemen mban, kanyi á va er ken tar u paradiso i ugomoti mbatarev ve feityô u eren ga?
10 Hegen je ior mba ken ikweior man akuraior a sha won cii mba vea va lu ken “tar u he” la mba kohol ve ken tiônnongo u Kristu. Mzough man bem mba ve lu hen atô ve la ka ikyav i tesen mlu u una va lu ken tar u paradiso zum u Armagedon una kar kera la. Mimi je, tartor u Aôndo ua va kar a mbamzeiyol mba gomoti u sha ikyev i ma or una fatyô u karen a mi kera ga yô. Yô nenge sha atôakaa la kpeghee sha upeeji mba ken hemen mban.
11. Kanyi ka i vihi paradiso u ior ka ve er la ashighe ageneghe?
11 Paradiso u sha ikyev i tartor u Aôndo la una va a akaa a doon kpishi je a hemba nyityôkwagh i tar u tse ne ma u ve a mi yô! Ka mimi, ior mbagenev sôr ajiir á ve lu her la hingir er paradiso nahan. Kpa mba ve lu ken ajiir ne ka i lu ior mba wan bo shin soon ayol a
UUMACE CII VEA DOO AYOLAVE
“Aôndo ka u sangen a sange ior ga, kpa ken hanma ikurior yô, or u nan cie Un, nan eren perapera kpaa yô, Una rumun nan.”—Aerenakaa 10:34, 35.
“Nenge, zegeikpelaior lu, ma or fatyô u ôron i iyenge ga, ve due ken hanma ikurior man hanma nongo man hanma nongoior man hanma zwa kpaa. . . . Ijen ia kera kôr ve mayange ga, imura kpaa ga.”—Mpase 7:9, 16.
BEM HEN ATÔ U IOR MAN ISHÔSO
“Zum la gbaseela una teman vea waniyôngo imôngo, anyam kpaa una yaven a wanivo imôngo, gumbua man gumbegha kua icighanile vea teman imôngo, wanye u kpeghee una hemen ve.”—Yesaia 11:6; 65:25.
ANGEV MBUA KERA LU GA, IYOLBEEN SHIN KU KPAA GA
“Tsô á bugh mbaapirashe ashe, man á bugh mbakondonato ato. Tsô orkeer nana gba tsuwen er ashim nahan, man nombor u orkondoniker kpaa ua wa icam.”—Yesaia 35:5, 6.
“Aôndo iyol Na Una lu a ve. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.
SHI Á NDER MBAKPENEV
“Shighe ngu van u mba ve lu shin iwar cii vea ungwa imo Na, vea due kpaa.”—Yohane 5:28, 29.
“Zegemnger na mbakpenev mba ve lu shin a na la. Ku man Hade kpaa na mbakpenev mba ve lu shin ve la.”—Mpase 20:13.
ve tseegh, shi ka i lu ior mba kôron mbagenev ihyom. Shi, shighe a karen kpeghee yô, ve gba angev, ve bee iyol, shi ve kpe kera. Nahan cii kpaa, Armagedon una karen kera yô paradiso u shin tar ne la una kera har sha akaa er uya mbadoon shin ishule tseegh tsô ga.
12, 13. (a) Er Armagedon a kar kera la kanyi bem una luu? (b) Kanyi i lu i eren sha u van a mbamlu mbanaa?
12 Hen shami. Ikweior man akuraior a sha won cii vea hen u lun ijiir i môm er anmgbianev mba nomso man mbakasev ken tsombor môm nahan. Vea lu a dooshima u mimi hen ayol a ve. Mô ve môm nana kera vihi tu shin nana wa iyol i nan ikyo tseegh ga. Orgenegh nana kera kôr u genegh ihyom sha ci u kweior u nan lu la, shin kwaviyolough, shin ape nan dugh la kpaa ga. Ihyom i kôron ia bee vindi vindi. Hanmaor u sha tar cii nana hingir huror u mimi kua orwanndor a orgenegh kpaa. Mimi je, ua lu paradiso ken mlu u jijingi. A sar ú pe va lun ken paradiso u sha ikev i “Usha mba hev” la kpa?
13 Nyian ior mba er kwagh u lun ken bem, shi ve ver “Mzough u Akuraior Cii” sha kwagh ne. Nahan kpa ior kua akuraior mba paven seer a seer. Kanyi i lu i erene? Gba u geman asema a ior. Kpa ka kwagh u taver u á fatyô ga yô u ugomoti mba tar ne ve̱ er injakwagh i kpilighyol ne. Kpa loho u Bibilo u sha kwagh u dooshima u Aôndo yô ngu eren kwagh ne.
14. Kanyi i lu eren hegen i tesen er mbamlu mba ken paradiso mbara á va lu mimini?
14 Zum u ior ka vea hen kwagh u msertar u he la yô, mbagenev kpishi ka ve gema asema hen Aôndo. Shi ve gba eren akaa a doon a mbagenev, er Aôndo kpaa a eren nahan. (1 Yohane 4:9-11, 20) Kwagh ne tese mgem u vesen ken uuma vev. Mba ngise ve wa bo shi ve lu ihyom a mbagenev, ve lu er ka inyam i tswam kpaa la, ve hingir mbaasemaleghlegh man mba lun a bem. Ve cii i kohol ve ken ityôr i Mbakristu vough er iyôngo i ungwan imo i orkuran u í nahan.
15. (a) Ka ikwe ihiar i nyi Mbakristu ve lu? (b) Ka unô vea lu mbahiihii mba lun ken “tar u he”?
15 I hii u kohol “anikumuile u kpeghee” u Mbakristu mba ve lu iorov 144,000 mba vea za tema tor a Kristu la anyom kar hegen hemba 1,900. Ken a ve yô ka iorov kpeghee tseegh ve shi uma shin tar ye; mbakpishiv mba hemen a Kristu imôngo sha. (Luka 12:32; Mpase 20:6) Kpa Yesu ôr kwagh u Mbakristu mbagenev, er: “M ngu a iyôngo igen i i lu hen ityôr ne ga yô [i “anikumuile u kpeghee” la], i kpaa Me va a i keng, ia ungwa imo Yam; ia hingir ikum i môm man orkuran môm kpaa.” (Yohane 10:16) Mba kohol “zegeikpelaior” i “iyôngo igen” la hegen. Ka ve vea lu imaagh ki mba vea va lu “tar u he” la jim kpaa ye. Yehova una kura ve ken “zegecan” i i lu van ken mkur u aferakaa ne u za lun uma ken tar u paradiso.—Mpase 7:9, 10, 13-15.
16. Kanyi ivande ia na u lun a ishôso imôngo la á lu kwagh u saanyolo?
16 Armagedon una karen yô kwagh u genegh u kpilighyol una seer sha mdoom ma mlu u ken paradiso la. Inyamikyume anza er ubegha, mbaanyam, ugbaseela kua dwem, mba ve vihi tu hegen ne cii, vea va lu bem bem. A lu kwagh u doon kpishi u man ahumbe za asegh sha begha shin dwem nahan ken ikyô! Or a kera lu a mciem sha makwagh u genegh u uma ga.
17, 18. (a) Kanyi kwagh i nan ijungwen ia kera lu ken tar u paradiso la ga? (b) Ka sha nyi se fa ser ior cii vea va zua a mkpeyol u mimi?
17 Aluer se mba a uya mbadoon kua ishule, erdoo una lu kua dooshima hen atô u ior, shin mzough una lu hen atô u uzendeinya nan nan kpaa, aluer se mba ken uange, shin se bee iyol shi sé kpe yô ijungwen ia lu. Kpa ka an nana fatyô u nan ior cii mkpeiyol u mimi laa? Ugomoti mba uumace fatyô u been angev mbu menden a mende la ga, shin angev mbu shimav kua mbamnyoon mbagenev kpaa ga. Shi luun er mba a tahav mbu eren nahan je kpaa, mbatwerev kaa er ma i feityô u karen a iyolbeen kera ga. Ma se lu been iyol heregh. Shighe a karen yô ashe ase ma á kera nenge dedoo ga, iyol yase ma i hii u zulugh, kwaviyolough wase kpaa ma u hii u vôron shi igbilayolough yase kpaa ma i hingir livaa. Tsô ku ma u nyer je. Vihi tsô!
18 Armagedon una karen, á nyôron ken tar u paradiso yô, zegekwagh u kpilighyol u Aôndo una gema hanmakwagh cii, sha ci u Bibilo i kaa er: “Ma or u nan tem ker kpaa nana kera kaa er: Kwagh nyoon mo, ga.” (Yesaia 33:24) Shighe u Yesu Kristu yange lu shin tar la a tese er un ngu a tahav u been hanma inja i mkpeiyolga cii, mbu se ngohol sha ci u isholibo i se zough a mi ken Adam la. (Marku 2:1-12; Matteu 15:30, 31) Iyolbeen kpa ia bee sha ikyev i gomoti u Tartor la. Mba ve vande been ayol kpaa vea hingir ikyaior. Een, ‘inyam i or ia hingir hegh er i wanye nahan.’ (Yobu 33:25) A lu kwagh u saan iyol kpishi sha ci u hanma sev yô mkpeiyol wou una seer a seer doon!
19. Orihyom u maseityô u a tim un la kanyi, shi á tim un nena?
19 Wanyekwaor môm u nan lu uma, ken mkpeiyol ken tar u paradiso la nana kera soo u kpen mayange ga. Shi or a kera kpe ga! Mbamtsera mba vea ngohol mba naagh ku ipaa i Aôndo la yô a lu u ember iyua i vesen i “uma u tsôron ken Kristu Yesu Ter wase.” (Mbaromanu 6:23) Er Bibilo i kaa nahan, Kristu “Una ya tor keng, zan zan [Aôndo, NW] Una gema mbaihomov Nav cii, vea lu shin angahar a Na. Orihom u masetyô u á tim un kera yô, ka ku.”—1 Mbakorinte 15:25, 26; Yesaia 25:8.
20. Dugh mba ve lu uma hegen kera yô, ka unô shi vea va ember ken tar u paradiso, man á lu nahan nena?
20 Ior mba ve kpe hegen mban je kpaa vea va ember tar u paradiso la. Vea hingir mbaumav! Nahan, hen shighe la, sha u yôôn ikyu i ior la yô, a lu yôôn kwagh u mnder u ior shin ku. Ka kwagh u kpilighyol kpishi u shi nengen a uter mba ve vande kpen mbara, kua ungô, mbayev kua mbadoonshima mbagenev cii! Ikyu i yaren ia bee, ajiir a iin ior aa kera lu ga shin ubarmbaiwarev kpaa vea kera lu sha u vihin mdoom ma tar u paradiso kpaa ga.
21. (a) Ka unô vea va wase u nengen er atindi kua akaawan a “Usha mba hev” la i yar tom sha mini? (b) Ka sha nyi se tese ser mimi je se soo “Usha mba hev” kua “tar u he” laa?
21 Ka unô vea lu hemen shi tesen ior ityom i eren ken tar u paradiso shono? Atindi kua akaawan cica cii a lu senen sha ikyev i “Usha mba hev” shaala. Kpa shin tar ne yô a tsua mbajighjigh a ver ve sha u nengen er atindi kua akaawan la cii ior mba yaren tom shami. Sha er ior mban ve til sha ityough ki tartor u sha la sha gbenda u tseer tseer yô, Bibilo i yila ve er “atiator.” (Yesaia 32:1, 2; Upasalmi 45:16) Nyian kpaa icighan jijingi u Aôndo ver ior ken tiônnongo u Kristu sha u kuran man u nengen sha ityom kpaa. (Aerenakaa 20:28) Armagedon una karen kera yô se na jighjigh ser Kristu una nenge er i ver ior mba ve kom vough sha u tilen sha ityough ki gomoti u Tartor la, u ve eren nahan la á lu un iyol na una lu hemen ken akaa cii hen tar ne ye. Ka sha nyi u tese wer u ngu keghen “Usha mba hev” man “tar u he” mba Aôndo laa? Ka sha u nôngon sha afatyô wou cii u kuman sha akaa a kwagh a gbe shami la sha er ú vá lu uma ken msertar u he u perapera la yô.—2 Peteru 3:14.
[Mbampin Mba Ngeren u Henen]
