Er nan Aôndo A ne Aferakaa Iana?
Ityough 11
Er nan Aôndo A ne Aferakaa Iana?
1. (a) Mlu u tar ngu nena nyiana? (b) Ka ahun a nyi ior ve lu a mini?
HANMAJIIR i ú gem ashe shin tar cii, ifer ngi, kua ihyom man mzeiyol. Ashighe kpishi ka mbaishôôv mbara ka ve ya ican ye. Mbagenev ka ve war a Aôndo. Ka ve kaa er: ‘Aluer Aôndo ngu yô, hii nan a de aferakaa a cieryol ne a lu erene?’
2. (a) Ka unô ve eren aferakaa? (b) Ma i yange atsan kpshi shin tar nena?
2 Kpa ka unô ve lu eren akaa a ifer shon ne á mbageneve? Ka ior, ka Aôndo ga. Aôndo venda aferakaa a eren. Mimi je, atsan kpishi ma a feityô u lun ga luun er ior wa atindi a Aôndo ikyo yô. Á na se tindi er se lu a dooshima. A venda iwoo-or, iv, ijimba, hua, ihundugh ki msôrough man aeren a genegh á á lu shami ga shi á né mbagenev ve yé atsan la. (Mbaromanu 13:9; Mbaefese 5:3, 18) Yange Aôndo gba Adam vea Ifa la na ve kwaghfan u kpilighyol kua iyol man tahav mbu ember uma zan zan. Yange soo er ve shin ônov vev kpaa ve̱ ya ican shin ve̱ lu ken mzeiyol ga.
3. (a) Ka unô jim ve lu mbaafereve? (b) Kanyi i tese er Adam vea Ifa yange ma ve fatyô u hendan aa ameen aa Satan laa?
3 Ka Diabolo Satan yange hii tom u ifer shin tar ye. Kpa Adam vea Ifa kpaa mba a ibo. Yange ve yina je u hemban ve u hendan a Diabolo shighe u yange va u meen ve la ga. Yange ma ve fatyô u kaan a Satan er “yem kera,” di er yange or u vough Yesu va er a na nahan. (Mateu 4:10) Kpa ve er nahan ga. Nahan, ve kera lu waeng ga. Ônov vev cii, kua se kpaa, se ngohol myina la, á angev shami, kua ijungwen man ku. (Mbaromanu 5:12) Kpa hii nan Aôndo á ne ian atsan alu eren ior hereghe?
4. Kanyi i wase se u kaven er Aôndo u dooshima una hila na aferakaa iana?
4 Alaghga hiihii yô or á hen er ityôikyaa i i lu ve Aôndo á de ior ve ye atsan anyom a kar uderi kpishi la ia lu i kehen yum ga. Kpa doo u henen kwagh nahanaa? Mbamaren mba ve soo mbayev vev mba á na ian er i sôr ve twer u paven ú nyoon sha u been a mzeiyol u ken iyol gaa? Een, ashighe kpishi ican i yan anshighe kpeghee la ka i va mbayev mbara a iember i mkpeiyol ken hemen. Kanyi kwaghdoon i ve ken shighe u Aôndo á ne aferakaa ian nee?
ITYÔKWAGH I HANGE HANGE I I GBE U SÔRON LA
5. (a) Yange Satan ôr kwagh kposo a Aôndo nena? (b) Yange Satan tôndozwa a Ifa er nena?
5 Ihyembeato i yange i hemba Aôndo ato ken sule u Eden la i due a ityôkwagh i hange hange shin mpin. Doo u se time sha i er se kav er i hii man Aôndo á né aferakaa ian la. Yange Yehova ta Adam cin er a̱ de ye kon u genegh ken sule la ga. Aluer Adam ya u yô, kanyi ia eree? Aôndo kaa er: “Ú kpe je.” (Genese 2:17) Nahan cii kpaa, Satan gema ôr kwagh u genegh kposo. A kaa a kwase u Adam, Ifa er, a za hemen a ya kon u i te ve cin sha mi la. “Né kpe je ga,” kape yange Satan kaa a na je la. Shi a za hemen u kaan a Ifa er: “Gadia Aôndo fa iyange i né ya a la, iyange la ashe aa bugh ne, né hingir er Aôndo nahan, ne gba fan kwagh u dedoo man kwagh u bo.”—Genese 3:1-5.
6. (a) Ifa yange hemba Aôndo ato sha ciu nyi? (b) U yan kon u yange i ta icin sha u la inja na nena?
6 Tsô Ifa hemba Aôndo ato ya kon la. Sha ciu nyi? Yange Ifa na Satan jighjigh. Yange hen er una zua a kwagh u injaa aluer un hemba Aôndo ato yô. Yange hen er un shin Adam kpaa vea kera va ôr kwagh sha ishigh ki Aôndo ga. Kwagh a kera gba u ve kuran atindi a na ga. Shi vea tsua kwagh u a “doo” shin u a lu u “bo” sha ci ve ayolave. Adam kpa dondo Ifa maa ya je. The Jerusalem Bible na kwaghpasen u seer sha kwagh u isholibo i or sha ishigh ki Aôndo er: “Ka tahav mbu tsuwan kwagh sha ci na iyol na u doon shin u bo shi eren tom shami kpaa, ka ieren i tesen mtile u sha tseeneke . . . Isholibo i hiihii la lu ityav jim mbi nôngon a mtemtor u Aôndo.” Inja na yô lu ityav mbi nôngon a tahav mbu Aôndo sha u lun tor shin tahav sha or.
7. (a) Ka ityôkwagh i nyi yange i due sha ihyembeto i oro? (b) Ka mbampin mba nyi i doo u nan ikyar shami sha ityôkwagh nee?
7 Adam vea Ifa mba ye kon u yange i ta ve cin shami la yô, ve due sha ikyev i mtemtor u Aôndo kera. Ve hingir mba lun sha tseeneke ve, shi eren kwagh u a “doo” shin u “bo” sha msoo ve. Nahan ityôkwagh i hange hange shin mpin u yange lu sha kwagh ne yô ka un ne: Aôndo ngu a tahav u lun tor u uumace? Sha gbenda u genegh yô, ka Yehova A lu a mfe u tsuwan kwagh u doon shin u bo sha ciu uumace yee? Ka Un a lu a imo i ôron kwagh u a lu ieren i dedoo man i bo yee? Shin or a fatyô u eren tom u hembandoon sha u hemen iyol i nan kpa? Ka mhemen u an á hembe lun a iwasena? Uumace vea fatyô u hemen ayolave tsembelee sha ityesen i ken myer i Satan, aa hemen u Yehova shio kpa? Shin gba u or a ker hemen u Aôndo sha u veren gomoti u perapera u una va a bem u tsôron shin tara? Mbampin mban cii ve due sha kwagh u ityav mbi nôngon a mtemtor u Aôndo, sha mkom na u lun tor sha uumace la.
8. Ka sha ciu nyi yange Yehova kera tim mbaahendanev mbara her je ga?
8 Gayô er yange ihyembeato la i due je Yehova yange ma fatyô u timin mbahembanato mba utar mbara. Yange akperan lu ga tahav nav hemba mbu Satan shin Adam vea Ifa kpaa. Kpa u timin ve la yange ma lu gbenda u hembandoon u sôron anzughulakaa la ga. Ikyav i tesen, yange ma na ikyar sha mpin u uumace vea fatyô u hemen ayolave a iwasen i Aôndo shio la ga. Ka nahan man Yehova yange de er shighe a kar sha u sôron kwagh u yange zaiyol la ye.
U SÔRON MZEIYOL LA
9, 10. Mnôngo u uumace keren u hemen ayolave aa ityesen i Aôndo shio la akaa due shami nena?
9 Er shighe a kar hegen nahan, kanyi se nenge a mi? We, u kaa wer nyi? Ken anyom a a kar 6,000 la akav tese er uumace fatyô u hemen ayolave tsembelee a mtese u Aôndo shio kpa? Uumace va a gomoti u dedoo sha u nan ior cii iveren man msaanyol kpa? Shin akav tese er kwaghôron u profeti Yeremia la ngu vough er yange kaa er: “Or u zenden la, mvershigh u iaven i angahar a nan ngu sha ikev i nan ga” la shinii?—Yeremia 10:23.
10 Ken ashighe a a kar la uumace kar hanma inja gomoti cii, kpa gbenda môm tsô kpaa u va a mkpeiyol man msaanyol hen mba vé lu tor sha a vé la ga. Mbagenev yô alaghga vea tese akav a mzehemen. Kpa or a fatyô u ôron kwagh u mzehemen u mimi zum u ubom mba vihin ahumbe ve lu sha ityough ki avaan man ada, shi zum u tar cii u lu ken zegemcie sha kwagh u ityav mbi tar cii mbigenev la kpa? Ka mzehemen u nyi aluer ior mba fanityô u za zenden sha uwer kpa kera mba fantiyô u lun ken bem shin tar ga yôô? A doo ior sha nyi aluer ve maa uya a ikyav mbi injaav keregh kpa icombor la pav sha ciu mbamzeiyolo? Ayôôso a eren sha ugodobi, ikyav mbi hemben sha ishimavihin kua ikyuior man mseer u mbavendanatindi ka akaa a tan ave vanger a mi la? Mayange ga cii! Kpa akaa ne cii nga eren sha ciu uumace mba keren gbenda u hemen ayolave a Aôndo shio yum.—Anzaakaa 19:3.
11. Sha er ikyav i tese yô, kanyi i hembe kuman uumace?
11 Hanmaor ma nan nenge a kwagh ne tsula. Iniôngon i or sha u hemen iyol i nan a Aôndo shio cii gba gbilin. Ve pev a pev shin atsan a yan. “Shighe u or ka nana lu a tahav sha orgen yô, nan eren nan ican,” kape Bibilo i pase la. (Orpasenkwagh 8:9) Ime kera ngi ga, uumace ma ve ngohol ityesen i Aôndo sha u kôôm mbamlu vev. Vough er Aôndo yange gba or a isharen i yan kwagh shi man mngerem nahan, i gba or sha u nana lu a ikyo i wan sha atindi a Aôndo. Aluer or venda atindi a Aôndo yô, uma una taver nan, vough er aluer nan venda u nan iyol i nan kwaghyan man mngerem ve náná ya ican nahan.—Anzaakaa 3:5, 6.
ER NAN ICA I GBE YUMU?
12. Hii nan Aôndo a tee shighe gôgônan u sôron kwagh shono?
12 Kpa, alaghga orgenegh nana pine er, ‘Hii nan Aôndo a ne shighe gôgônan je, i kom er anyom 6,000 hegen, sha u sôron mzeiyol nee? Yange ma fatyô u sôron kwagh ne tsembelee ngise je gaa?’ Ka nahan ga. Aluer Aôndo yange sôr kwagh ne fese ngise yô, ma i lu kaan er yange i na uumace shighe kuma ga. Kpa er i lu nahan yô, uumace zua a shighe kpishi u van a gomoti u nan ior vev mbamgbaiyol vev, shi van ve a kwaghfan u tôvon sha akaa a van a mzehemen sha igbindaakaa kposo kposo. Ken uderimbaanyomov mba ve kar mbara uumace kar gomoti atô kposo kposo. Sha mzehemen ve sha gbaa u tôvon sha akaa la kpaa vihi u nengen ga. Ve fatyô u kusun tahav mbu ahumbev shi zenden yemen sha uwer kpaa. Kpa kanyi i dugh sha kwagh nee? Kwagh ne va a tar u he u vesen sha u nan uumace iveren kpa?
13. (a) Ken mzehemen u or sha kwaghfan u tôvon nán kpaa, ka nena nyiana? (b) Kwagh ne tese wanger wanger er nyi?
13 Va ikyua ga cii! Kpa ishimavihin kua atsan nga seer sha tar hemban ayange a tse. Anzaakaa er ifer, ahumbe a vihin, ityav, mvihi u tsombor kua mbamzeiyol mbagenev kpaa ngee je mbafankwagh na jighjigh er mtem u or kera ngu biishii ga. Een, er or nan hemen iyol i nan i kom er anyom 6,000, shi nan tev sha kwaghfan nan “ze hemen” kpishi yum yô, uumace mba ikyua u timin ayolave hegen! Wanger kpishi je er uumace ve feityô u hemen ayolave tsembelee a Aôndo shio ga nahan! Ma or ngu u nana kaa er Aôndo yange na shighe lihe kuma u sôron kwagh ne ga yum ga.
14. Hii nan i gbe u se time sha ityôkwagh i genegh i hange hange i Satan a dugh amini?
14 Sha mimi yô Aôndo ngu a ityôikyaa i dedoo i nan sha er á de mtemtor u uumace sha ikyev i Satan la á ve a aferakaa zan zan hegen yô. Sha ihyembeato na la Satan shi va a ityôkwagh i genegh i a tôô shighe u sôron yô. U timen sha kwagh shon la shi á waseu u seer kaven ityôikyaa i i hii man Aôndo á ne aferakaa ian zan zan nyian la. Ma u lu a isharen sha kwagh ne sha ciu we iyolyou u ngu keregh.
[Mbampin Mba Ngeren u Henen]
[Foto u sha peeji 100 la]
Sha ityôikyaa i doon yô, ormaren nana na ian er i sôr wan u nan u doonshima la twer u paven u nyoon. Aôndo kpaa ngu aa atôakaa a doon sha u nan ian er uumace ve ya ican anshighe kpeghee
[Foto u sha peeji 101 la]
Sha mye u yan kon u yange i ta icin sha u la yô, yange Adam vea Ifa ve ta mtemtor u Aôndo kera. Tsô ve hii u eren akaa sha asema a ve sha kwagh u doon shin u bo
[Foto u sha peeji 103 la]
Vough er yange i gba or a isharen i yan kwagh shi man mngerem nahan, kape shi yange i gba nan a isharen i haren sha ityesen i Aôndo je la
