Ityough 16

Gomoti u Aôndo Hii Tom

1. (a) Kanyi mba nan jighjigh ve lu̱ vanden keghene? (b) Hii nan i yer tartor u Aôndo er “gar” a?

KEN ANYOM UDUBU a á kar la mba nan gomoti u Aôndo jighjigh lu vanden nengen ken hemen keghen shighe u ua hii tom la. Ikyav i tesen, Bibilo i kaa er orjighjigh Aberaham “lu keghen gar u a lu a imagh, u Aôndo A lu Orkaren man Ormaan un la.” (Mbaheberu 11:10) Man “gar” la ka tartor u Aôndo je la. Kpa hii nan i yer heen er ka “gar” a? Ka sha ci u sha ayange a tsuaa la lu kwagh u lanen ga u̱ tor nengen sha gar. Nahan hen ior yô yange ve henen er gar ka tartor jim.

2. (a) Kanyi i tese er yange Tartor la lu kwagh jim hen mbahenen mba Kristu mba tsuaa mbaraa? (b) Kanyi yange ve soo u fan sha kwagh u u yumu?

² Hen mbadondon Kristu mba tsuaa mbara yô tartor u Aôndo lu  ve kwagh u jim jim. Kwagh ne tese ikyav sha ishimaveren i ve lu a mi sha kwagh u mtemtor u u la. (Mateu 20:20-23) Mpin u yange luun ken asema ve yô lu un je ne: Kristu man mbahenen nav vea hii u hemen hanma shighe jimi? Shighe u Yesu yange nder shin ku va ande hen mbahenen nav la, ve pine un er: “Tere, ka hen shighe ne man Ú hide Mbaiserael a tahav mbu veren tor ve ayol a ve yee?” (Aerenakaa 1:6) Nahan we kpaa torough we iyol u fan shighe u Kristu una hii tom u Tor u gomoti u Aôndo, vough er mbahenen mba Kristu mbara nahan kpa?

GOMOTI U MBAKRISTU VE SÉN LA

3, 4. (a) Kanyi i tese er Aôndo vande teman Tor kera je? (b) Ka sha ciu nyi yange Kristu tese mbadondon un er ve̱ sôn tartor u Aôndo u̱ va?

³ Yange Kristu tese mbadondon un u sônon Aôndo er: “Tartor Wou u̱ va, i er ishima You shin tar kpaa vough er i eren i Sha nahan.” (Mateu 6:9, 10) Kpa orgenegh nana pine er: ‘Yehova Aôndo vande ngun tor u hemen kera gaa? Man aluer una vande lun tor kera yô, hii nan shi i gbe u sônon er tartor na u̱ va?’

⁴ Ka mimi, Bibilo i yila Yehova er “Tor u tsôron.” (1 Timoteu 1:17) Shi i kaa er: “TER ver ikônough Nagh ki torough dong sha Usha, tartor Na kpaa ngu sha won cii.” (Upasalmi 103:19) Nahan yô Yehova vande ngun Tor Uhembansha sha akaa aa a gbe a cii. (Yeremia 10:10) Nahan cii kpaa, sha ci u ihyembeto i ken sule u Eden sha kwagh u mtemtor na la yô, Aôndo vande wan ago iyol sha kwagh u gomoti. Ka gomoti u ngise Yesu Kristu kaa a mbadondon un er ve̱ sônon je la. Awashima u ú yô ka u va been a mbamzeiyol mba Diabolo Satan kua mbagenev ve ve a mi sha u tôôn ior asema kera sha kwagh u mtemtor u Aôndo la.

5. Aluer ka tartor u Aôndo yô, ka sha ciu nyi shi i yer er tartor u Kristu man tartor u mba 144,000?

⁵ Gomoti u he u Tartor ne ngohol tahav man agee a hemen hen Tor Uhemban, Yehova Aôndo. Ka tartor na. Acin imôngo je, Bibilo i yila er “tartor u Aôndo.” (Luka 9:2, 11, 60, 62; 1 Mbakorinte 6:9, 10; 15:50) Nahan cii kpaa, er Yehova á vande tseghan Wan na er á lu Tor u Tamen ken u yô, shi mba yer u er tartor u Kristu kpaa. (2 Peteru 1:11) Er se vande henen nahan, iorov 144,000 ken uumace vea hemen a Kristu ken tartor ne. (Mpase 14:1-4; 20:6)  Ka nahan Bibilo shi i yer u er “tartor ve” kpaa ye.—Daniel 7:27.

6. Sha mhen u mbagenev yô, tartor u Aôndo hii u hemen hanma shighe?

⁶ Mbagenev kaa er Tartor la hii tom u u ken inyom i Yesu yange kôndo yem sha la. Shi ve kaa er Kristu hii u hemen shighe u yange icighan jijingi haa sha mbadondon un sha iyange i Pentikôsti i Mbayuda ken inyom i 33 C.E. la. (Aerenakaa 2:1-4) Kpa gomoti u Tartor u Yehova a ser sha u va been a mbamzeiyol mba Satan yange va a mi sha ihyembeto na la u hii tom hen shighe la ga. Kwagh ngu u tesen er ‘wan u nomso,’ u a lu gomoti u Aôndo sha ikev i hemen u Kristu la, yange i mar un shi hii u hemen hen shighe la ga. (Mpase 12:1-10) Sha mimi yô, ma gbenda ngu u yange tartor u Yesu hii tom ken inyom i 33 C.E. la yôô?

7. Hii ken inyom i 33 C.E. la je Kristu tema tor sha unô?

⁷ Een, yange Yesu hii u hemen tiônnongo u mbadondon un mba ken hemen yô, vea za kohol un shaala yô. Er ve lu shin tar la je, Bibilo i ôr kwagh ve er i nyôr a ve “ken tartor u Wan u [Aôndo] u doon ishima” la. (Mbakolose 1:13) Kpa mhemen, shin “tartor,” u Mbakristu ve lu a ishimaveren u za lun uma sha la ka gomoti u Tartor ú yange Yesu tese mbadondon un er ve̱ sônon la ga. Ka tartor u mba 144,000 mba vea za tema tor vea na shaala la tseegh. Ken uderimbanyomov mba karen mbara cii ka ve tseegh ve lu ior i u ye. Mhemen ne, shin ‘tartor u Wan u Aôndo u doon ishima’ ne, ua va bee zum u or u masejime ken mba ve lu aa ishimaverenkeghen u yemen sha la nana kpe nana zá kohol Kristu shaala yô. Hen shighe la vea kera lu sha ikyev i Kristu ga, kpa vea lu utor vea na imôngo ken gomoti u Tartor u Aôndo ú i tendezwa shami la.

MHII U TEMAN TOR HEN ATÔ U MBAIHYOMOV

8. (a) Kanyi i tese er shighe u Kristu nder shin ku la gba u una kegh cii man una hii u hemene? (b) Kanyi yange Aôndo ôr a Kristu zum u shighe kuma u una tema tor laa?

⁸ Shighe u Kristu nder kôndo yem sha la, maa hii u hemen sha inja i Tor u gomoti u Aôndo la ga. Kpa shighe lu u keghen, er apostoli Paulu a pase nahan: “Kpa Un yô [Yesu Kristu], A va na nagh môm tseegh sha ci u asorabo, maa A za tema sha uwegh ku yanegh ku Aôndo gbem. Ngu masen keghen zan zan á va gema mbaihomov Nav vea hingir Un kwagh u pendan angahar a Na sha mi.” (Mbaheberu 10:12, 13) Yange shighe va kom u Kristu una hii  tom yô, Yehova kaa a na er: “Tema tor [shin, hemba] hen atô u mbaihomov Ou!”—Upasalmi 110:1, 2, 5, 6.

9. (a) Hii nan i lu hanmaor nan soo tartor u Aôndo ga? (b) Shighe u tartor u Aôndo hii u hemen la, akuraior er nena?

⁹ Ka kwagh u cieryol u ungwan er ma or nana lu orihyom u gomoti u Aôndo yôô? Kpa ka hanmaor nana soo u lun sha ikyev i tahav mbu mbu soo er ior mba ve lu mbu sha ikyev ve̱ eren akaa a doon ga. Er Bibilo i pase er Yehova man Wan na vea ngohol tahav mbu teman tor sha tar ne kera yô, shi i kaa er, “akuraior yuwe.” (Mpase 11:15, 17, 18) Akuraior lumun a tartor u Aôndo ga sha ci u Satan tsugh ve sha er ve̱ hendan a u yô.

10, 11. (a) Shighe u tartor u Aôndo hii u hemen la, kanyi yange i er sha? (b) Kanyi i er shin tara? (c) Nahan kanyi kwagh i vesen i doo u se umburuu?

¹⁰ Zum u gomoti u Aôndo hii u hemen la yô, Satan kua mbatyomov nav ve lu sha heregh. Er ve hendan a mtemtor u Tartor la yô, ityav maa pev je. Ken masejime yô, i zenda Satan kua mbatyomov nav shaala kera. Tsô imo i taver due sha kaa er: “Hegen yô, myom man agee man tartor u Aôndo wase man shi tahav mbu Kristu Na kpaa va ve.” Een, mhemen u gomoti u Aôndo hii kera kpaa! Man zum u i zenda Satan kua mbatyomov nav shaala kera yô, iember lu sha heregh. “Nahan yô, ember nen ne Usha, man shi ne mba ne tem ker kpaa,” ka pe Bibilo i kaa la.—Mpase 12:7-12.

¹¹ Tar kpaa ua ember hen shighe nee? Ei! Ka shighe u zegeican una er inja i tar u lu a vande nengen a mi mayange ga yô. Bibilo i kaa a vese er: “Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô.” (Mpase 12:12) Ityôkwagh ne ka i umbur heregh: Mhii u mtemtor u tartor u Aôndo tese er bem man mkpeiyol vea lu sha tar hen shighe la je ga. Bem u mimi una va ken hemen shighe u tartor u Aôndo ua ngohol tahav sha won cii la. Kwagh ne una er ken mkur u “shighe na a kera vese ga” ne, zum u Satan kua mbatyomov nav cii vea kera lu ga sha er or môm nana kera zua a kwagh u zan nan iyol ga yô.

12. Ka sha ciu nyi se kaa ser Bibilo ia pase se shighe u tartor u Aôndo ua hii u hemene?

¹² Kpa ka hanma shighe i zende Satan kera sha, á sen u va nan anzughul zum u “shighe na a kera vese ga” nee? Gomoti u Aôndo hii tom hanma shighee? Bibilo i na ikyar je kpa? Se ver ishima ser  ia na. Sha ciu nyi? Sha ciu tsuaa je tsô Bibilo i tsengayôôn mve u Wan u Aôndo una va shin tar ne ken iyol i or shi una hingir Mesiya kpaa yô. Shi i tese inyom i una va hingir Mesiya la kpaa. Nahan sha kwagh u mve u vesen u Mesiya, shin Kristu, va hiin tom u Tartor na la ye? Se mba a ishimaveren ser Bibilo ia kaa se shighe u kwagh ne una er yô!

13. Bibilo i tsengayôôn inyom i Mesiya una due shin tar nena?

¹³ Kpa orgenegh nana pine er: ‘Ka han Bibilo i tsengeyôôn inyom i mve u Mesiya shin tara?’ Takerada u Daniel kaa er: “Nahan yô, fa man kav kpaa, hii sha mdugh u tindi sha u sôron man u maan Yerusalem zan zan ar hen u i shigh Un mkurem, ka Tor je la, á lu ulahadi utaankaruhar; man ulahadi akunduatar kar uhar,” kohol cii ka ulahadi 69. (Daniel 9:25) Nahan cii kpaa, ka ulahadi 69 jim jim, mba ve lu ayange 483 tseegh ne ga, shin i lu inyom i môm man kwaghkaren tseegh ne kpaa ga. Ka ulahadi 69 mba anyomov, shin anyom 483. (Ôr Numeri 14:34.) I na tindi u sôron man u maan ukpekpe mba Yerusalem ken inyom i 455 B.C.E. * (Nehemia 2:1-8) Nahan ulahadi mba 69 mba anyomov mban ve bee ken anyom 483 ken hemen, ka ken inyom i 29 C.E. je la. Shi ka ken inyom shon i Yesu za hen Yohane sha u i er un batisema je la! Ka hen shighe la kpaa yange i tsegha un sha icighan jijingi shi hingir Mesiya, shin Kristu kpaa ye.—Luka 3:1, 2, 21-23.

SHIGHE U GOMOTI U AÔNDO UNA HII TOM YÔ

14. “Kon” u ken Daniel ityough inyiin la tile sha nyi?

¹⁴ Nahan, ka hanma ijiir, Bibilo i tsengeyôôn inyom i Kristu una hii tom u tor u gomoti u Aôndo? Ka ken Bibilo shon ne ken takerada u Daniel. (Daniel 4:10-37) Keregh la i ôr kwagh u zegekon u taven sha hweeng u̱ á til sha ityough ki Tor Nebukadinesar u Babilon la. Yange lu tor u hemban cii hen shighe la. Nahan kpaa, yange i kighir Tor Nebukadinesar sha u á fa e̱r orgenegh u hemban un nan lu tor yô. Or shon la ka “Uhembansha,” shin “Tor u Sha,” Yehova Aôndo. (Daniel 4:34,37) Sha gbenda u hemban lun a inja yô, kon u taven sha tsung ne u tese ikyav sha mtemtor u Aôndo u hemban sha, aluer i kar mlu u ú a tar wase ne yô. I vande tesen mlu u mtemtor u  Yehova la ken tartor u yange ver u sha u nengen sha ikyurior i Iserael la. Nahan utor mba ken kwe u Yuda mba ngise ve nengen sha Mbaiserael la yange ve “teman sha ikyônough ki torough ki TER.”—1 Kroniku 29:23.

15. Shighe u i gber “kon” shon la, ka sha ciu nyi yange i kange ikpughur naa?

¹⁵ Sha kwaghôron u Bibilo i er ken Daniel ityough inyiin la yô, yange i gber zegekon la i gbihi inya. Kpa ikpughur na yô i de un lu heregh, i kange un sha iyôugh ki iligh man togula. Lu sha u ikpughur na la á de kera vesen ga zan zan saa shighe u Aôndo a ver u saghen ikyangenev mbila una kar kuman shi ka hen shighe la una sagh mbi ye. Kpa yange i gber mtemtor u Aôndo la nena man lu hanma shighe?

16. (a) Yange i gber mtemtor u Aôndo nena man lu hanma shighee? (b) Tor u maseityô u Yuda u yange tema sha ‘ikyônough ki torough ki Yehova’ la yange i kaa a na er nena?

¹⁶ Shighe karen yô, tartor u Yuda ú Yehova ver la u kera lu zan sha gbenda u mimi ga nahan á ná vé sha ikyev i Tor Nebukadinesar sha e̱r a̱ tim u, a̱ gber u kera yô. Kwagh ne yange er ken inyom i 607 B.C.E. Hen shighe la i kaa a Sedekia, tor u maseityô u Yuda u yange tema sha ikônough ki torough ki Yehova la, er: “Bugh idyer i tor kpaa; . . . zan zan un u i lu kwagh na jim, una kar van, u Me na un yô.”—Esekiel 21:25-27.

17. Ka shighe u nyi yange hii ken inyom i 607 B.C.E. laa?

¹⁷ Nahan mtemtor u Aôndo, er i tese  ikyav sha “kon” la nahan, yange i gber un ken inyom i 607 B.C.E. Hii shighe la je ma gomoti môm kera tile sha ityough ki mtemtor u Aôndo hen tar ne ga. Nahan yô, ken inyom i 607 B.C.E. la je, iaven i genegh hii i yange Yesu Kristu yila i er “ashighe a akuraior” (NW ) shin, “shighe u atôatyev,” la hii je. (Luka 21:24) Ken “ashighe” ne cii Aôndo yange lu a ma gomoti môm u lun sha ityough ki mtemtor na hen tar ne ga.

18. Kanyi yange gba u ia er ken mkur u “ashighe a akuraior” laa?

¹⁸ Kpa kanyi yange i ver ishima er ia va er ken mkur u “ashighe a akuraior” nee? Yange gba u Yehova una gema tahav mbu hemen una na Un “u i lu kwagh na jim” la. Ka Yesu Kristu je la. Nahan aluer se fatyô se fa shighe u “ashighe a akuraior” la a bee yô, shi se fa shighe u Kristu hii tom na u tor la kpaa.

19. Ka “ashighe” a me lu u a bunde mtemtor u Aôndo shin tar nee?

¹⁹ Sha kwaghôron u ken Daniel ityough ki sha unyiin la yô, “ashighe” ne a kar acin “ataankarahar.” Daniel tese er ‘ashighe ataankarahar’ aa kar a mtemtor u Aôndo, er i tese ikyav sha “kon” la nahan, una kera lu a tahav mbu hemen sha tar ne ga. (Daniel 4:16, 23) Nahan ‘ashighe a ataankarahar’ ne aa lihe nena?

20. (a) “Shighe” môm lihe kuma nena? (b) ”Ashighe ataankarahar” la lihe kuma nena? (c) Hii nan ka se ôr iyange sha ityough ki inyomo?

²⁰ Ken Mpase ityough 12, avur 6 man 14 la, se fa ayange 1,260 la  ka “shighe [inja na yô, shighe 1] man ashighe [inja na yô, ashighe 2] man veghershighe.” Kohol cii ka ashighe 3¹/2 je la. Nahan “shighe” môm a lu ayange 360. Ka lun nahan yô, ‘ashighe ataankarahar’ la a lu 7 kwa 360, shin ayange 2,520. Aluer se kaa ser iyange i môm ka inyom, sha kwaghôron u Bibilo yô, ‘ashighe ataankarahar’ la ka anyom 2,520 je la.—Numeri 14:34; Esekiel 4:6.

21. (a) “Ashighe a akuraior” hii shi bee hanma iana? (b) Gomoti u Aôndo hii u hemen hanma shighee? (c) Hii nan i lu vough heregh u sônon tartor u Aôndo er u̱ va?

²¹ Kwagh u se vandefan yô “ashighe a akuraior” la hii ken inyom i 607 B.C.E. la. Nahan se hiin u ôron anyom a 2,520 la ken inyom la yô, se va nyôr ken inyom i 1914 C.E. Ka ken inyom i “ashighe” yange bee je la. Ior umiliôn mba ve lú uma hegen mban mba umbur akaa a yange er ken inyom i 1914 la. Ken inyom shon la, yange Ityav mbi Tar Cii Mbi sha I la mbi pev a mbamzeiyol mba cieryol mba ve lu zan zan nyian ne. Inja na yô Yesu Kristu yange hii tahav mbu torough mbu tor u gomoti u Aôndo shaala ken inyom i 1914 la. Sha er Tartor la u hii tom u u yô, ka shighe u shi se seer sônon ser u̱ “va” u̱ va ese aferakaa a tar u Satan ne shin tar kera je ne!—Mateu 6:10; Daniel 2:44.

22. Ka mpin u nyi alaghga mbagenev vea pinee?

²² Kpa orgenegh nana pine er: ‘Aluer Kristu hide kera sha u teman tor ken tartor u Ter na yô, hii nan se nengen a na ga?’

[Footnotes]

[Mbampin Mba Ngeren u Henen]

[Chart on page 140, 141]

Ken inyom i 607 B.C.E. la tartor u Aôndo u ken Yuda la gba. Ken inyom i 1914 C.E. la Yesu Kristu hii hemen na u tor u gomoti u Aôndo shaala

1914 C.E.—1914 C.E.

October, 607 B.C.E.—October, 1 B.C.E. = KA ANYOM 606

October, 1 B.C.E.—October,   1914 C.E. = KA ANYOM 1,914

ASHIGHE ATAANKARAHAR AA AKURAIOR = KA ANYOM 2,520

[Foto u sha peeji 134 la]

“Ka hen shighe ne man u hide Mbaiserael a tahav mbu veren tor ve ayol a ve yee?”

[Foto u sha peeji 139 la]

Gôgô kon u ken Daniel ityough 4 la tile sha ityough ki mtemtor u Aôndo. Yange i pase kwagh ne ken tartor u Yuda la sha anshighe kpeghee

[Foto u sha peeji 140, 141 la]

Yange i gber kon la kera zum u yange i tim tartor u Yuda la