Gomoti u Aôndo u Bem
Ityough 13
Gomoti u Aôndo u Bem
1. Kanyi ugomoti mbaiorov ve feityô u eren ga?
Ú VANDE nengen er ugomoti mba uumace ne, sha ikyev i mbara mba mbaawashima vev ve lu mba doon je kpaa, ve feityô u ivin asaren a ior ga nahan kpa? Môm tsô fatyô u been a mbamzeiyol mba iferev man ihyom i sha mlu u kwavyolough shi ve fatyô u nan ior kwaghyan tsembelee shin ajiir a tsan sha ci u ior kpaa ga. Mba á fatyô u been ior vev angev vindi vindi ga. Shi ma gomoti môm ngu a fatyô u karen a iyolbeen man ku kera ga shin u nderen mbakpenev kpaa ga. Mô tsô kpa ngu a va ior nav a bem man mkpeiyol ga. Ugomoti mbaiorov vea fatyô u been mbamzeiyol mba vesen mba ior ve lu a mi la ga.
2. Loho u Bibilo jim kanyi?
2 Orgbanakaa u a gbe se la fa dedoo e̱r kwagh á gbe se á gomoti u perapera u una na ior cii iember i vesen man uma u sar sar yô. Ka nahan man Bibilo i er kwagh u gomoti u sha ikyev i Aôndo ye. Jim je yô, ka gomoti u sha ikyev i Aôndo u i tendezwa shami ne je á lu tinekwagh i vesen i loho u Bibilo ye.
3. Yesaia 9:6, 7 kaa er nyi sha kwagh u gomoti u Aôndo?
3 Kpa alaghga ú pine wer: ‘Bibilo i ôr kwagh u gomoti u Aôndo hana?’ I ôr, u tesen ikyav yô, ken Yesaia 9:6, 7. Kwaghôron u sha ikyev i King James Version la, avur ne kaa er: “Gadia i mar se wan, i na se wan u nomso: gomoti ngu sha vandegh nagh: a yilan iti na er U Kpilighyol, Orwasenmhen, Aôndo u ageegh, Ter u tsôron, Wantor u Bem. Mseer u gomoti na kua bem vea lu a ikighir ga.”
4. Wan u á hingir tor ken gomoti u Aôndo la ka ana?
4 Bibilo ngi ôron kwagh u mmar u wannomso heen, ka wantor je la. Ken hemen yô gba u ‘wan u tor’ ne una va hingir tor u vesen, ka “Wantor u Bem” je la. Una er tom u gomoti u kpilighyol. Gomoti ne una va a bem sha won cii, shi á lu bem u tsôron kpaa. Wannomso, u i tsengeôron mmar na ken Yesaia 9:6, 7 la, lu Yesu. Shighe u orityom Gaberiel lu yôôn mar u Yesu la, a kaa a iniunkwase Maria er: “Una lu tor . . . tartor Na kpaa ua bee mayange ga.”—Luka 1:30-33.
U PASEN MDOOM MA TARTOR LA
5. (a) I tese mdoom ma Tartor ken Bibilo nena? (b) Kanyi i lu tartor u Aôndo, shi kanyi ua va eree?
5 Shighe u ve lu shin tar ne her la, tom u vesen u Yesu Kristu man mbadondon un ve lu eren yô lu u pasen kwagh u mve u tartor u Aôndo. (Luka 4:43; 8:1) Ve ôr kwagh u tartor la kuma acin 140 nahan ken Bibilo. Shi yange Yesu tese mbadondon un u sônon Aôndo er: “Tartor Wou u̱ va, i er ishima You shin tar kpaa vough er i eren i Sha nahan.” (Mateu 6:10) Tartor shon u Mbakristu cii ve lu sônon la ka gomoti jim kpa? Alaghga ú vande henen wer ka u jim ga, kpa ka u. Yesu Kristu, Wan u Aôndo la, ka un á lu Tor u Tartor la ye. Tar cii ua lu akighir á na á nengen shami. Á lu kwagh u doon kpishi sha ci u hen shighe la ior vea kera pav avegher kpishi sha u shi zeren van a ahendanakaa ga, kpa uumace cii vea lu ken bem kangenaan sha ikyev i gomoti u Tartor u Aôndo!
6. Shighe u Yesu lu shin tar la, hii nan i kaa er yange Tartor la “mgbôghom” shi ngu “hen atô wen” e?
6 Yohane U Eren Batisema yange hii u pasen kwagh u gomoti ne, lu pasen ior er: “Gema nen asema, gadia tartor u Sha mgbôghom ve.” (Mateu 3:1, 2) Ka sha ci u nyi man Yohane lu kaa nahana? Ka sha ci u Yesu, Un u una va lu tor u gomoti u Aôndo shaala la, shighe kuma u una er batisema shi á haa un mkulem sha icighan jijingi u Aôndo kpaa. Nahan ú fatyô u kaven er i hii ve yange Yesu kaa a Mbafarishi nahan ye wen-er: “Nenge! tartor u Aôndo ngu hen atô wen je.” (Luka 17:21, NW ) Lu sha ci u un Yesu, u Aôndo vande tseghan un tor la, lu a ve. Ken anyom atar man tiôn a yange lu pasen shi lu tesen la, sha jighjigh u á tile shami hen Aôndo zan zan ar ken ku la, Yesu yange tese mkom na u lun tor la.
7. Kanyi i tese er Tartor la yange u lu kwagh u vesen shighe u Yesu lu shin tar laa?
7 U tesen er tartor u Aôndo lu kwagh u vesen shighe u Kristu lu eren tom la yô, se hen nen sha kwagh u yange er cii man iyange i ku na la. Bibilo i kaa a vese er yange ior lu wan Yesu kwagh iyol, kaan er: “Or ne yô, se kohol Un tsughun nongo wase, yangen er i de te Shisar kpandegh ga, kaan er, Wen iyol Na Un ngu Kristu tor je.” Ongu akaa ne cii yô, gomna u Mbaromanu Pontiu Pilatu pine Yesu er: “We, U ngu tor u Mbayuda?”—Luka 23:1-3.
8. (a) Shighe u yange i pine Yesu er shin una lu tor la yange na ikyar er nena? (b) Yange Yesu ver ishima er nena shighe u yange kaa er tartor na “ka u shin tar ne ga” la?
8 Yesu kera na Pilatu ikyar sha mpin la jighilii ga, kpa gema kaa a na er: “Tartor Wam ka u shin tar ne ga. Tartor Wam ua lu u shin tar ne yô, mbayev Av ma ve nenge ityav sha u i de nem sha ikev i Mbayuda ga yô; kpa hegen yô, tartor Wam ka u heen ga.” Yesu yange na ikyar nahan sha ci u yange tartor na lu u shin tar ne ga. Gba u hemen na ua lu senen shaala, ua lu inja er or tema sha ikyônough ki torough hen tar ne ga. Er ityôikyaa yange lu u á fa shin yange Yesu una lu aa tahav mbu lun tor shin una lu a mi ga yô, Pilatu shi pine Yesu er: “Nahan U ngu tor zee?”
9. (a) Ka mimi u kpilighyol u nyi yange Yesu va pase ioro? (b) Mbampin mba vesen nyian kanyi?
9 Wanger, yange i kar Yesu sha ci u lu pasen man tesen kwagh u gomoti u he yum. Nahan Yesu na Pilatu ikyar kaa er: “U kaa sha mi, M ngu tor. Ka sha ci u nahan i marem, shi ka sha ci u nahan kpaa M ve shin tar ne, sha er Me pase mimi ye.” (Yohane 18:36, 37) Een, yange Yesu tsa hen tar ne lu ôron ior kwagh u kpilighyol u mimi u gomoti u Tartor u Aôndo. Lu loho na jim jim je la. Nyian kpaa Tartor la hemba kan kwagh u vesen. Nahan cii kpaa, mbampin mban mba heregh: Ka hanma gomoti jim á hembe lun á inja ken uma u oro? Ka gomoti u sha ikyev i ior, shin ka tartor u Aôndo u Kristu una lu tor laa?
U WANYOL SHA CI U GOMOTI U HE U TAR
10. (a) Ka hanma shighe yange Aôndo nenge doo u van a gomoti u he? (b) Ken Bibilo, ka han i hii ôron kwagh sha kwagh u gomoti? (c) Ka an jim iyô la i til sha ityough ki nanaa?
10 Ka shighe u yange Satan mee Adam vea Ifa ve kohol un ken ihyembeto na la yange Yehova nenge doo u van or-umace a gomoti u he ye. Tsô hen shighe la je Aôndo ôr kwagh u awashima na u veren gomoti la. A ôr kwagh u gomoti ne zum u lu wan iyô la ifan, kpa jim je yô lu kaan a Diabolo Satan er: “Me ver ihom hen atô wou vea kwase, man hen atô u vor wou a vor na kpaa, u ua cagh u ityough, we di kpaa ú cagh u ikishinguhar.”—Genese 3:14, 15.
11. Yange gba u ihyom ia lu hen atô u an vea ana?
11 Kpa alaghga u pine wer: ‘I ôr kwagh u gomoti heen hana?’ Se nenge sha kwaghôron ne vie vie tsô se nenge. Ruamabera kaa er iyongo, shin ihyom ia lu, hen atô u Satan kua “kwase” la. U seer shami yô, shi ihyom ia lu hen atô u “vor” u Satan, shin ônov, man “vor” u kwase, shin ônov nav. Hiihii yô, gba u se time se fa “kwase” la.
12. I ôr kwagh u “kwase” u ken Mpase ityough 12 la er nyi?
12 Kwase la ka u hen tar ne ga. Ihyom ngi Satan a ma kwase hen tar ne nahan ga. Kpa, kwase ne ka ika̱v di tsô. Inja na yô, ngu tesen kwagh u genegh kposo. Bibilo i tese kwagh ne ken takerada u maseityô la, ka Mpase je la, i hemba nan kwaghôron sha kwagh na. Keregh la i na mpase sha “kwase” la er á “cir iyange iyol, uwer lu shin angahar a na, lu a tsar u sha asan pue kar ahar sha ityough nagh.” U wasen se sha er se kav kwagh u “kwase” la a til shami yô, ver ase ikyav sha kwagh u Mpase a kaa sha kwagh u wan na la: “Nahan kwase la mar wan u nomso, u una tema tor sha akuraior sha tôgh ku iyôôgh, i tsuwe wan la kera i yem a na sha Aôndo man sha ikyônough nagh ki torough.”—Mpase 12:1-5, The Jerusalem Bible.
13. Ka ana shin kanyi “wan u nomso” kua “kwase” la ve til sha ityough veghe?
13 Se faan kwagh u “wan u nomso” la a til shami yô shi á wase se u fan kwagh u “kwase” la kpaa á til sha ityough nagh yô. Wan la ka or-umace jim ga, di er kwase la kpaa á lu or-umace ga nahan. Ruamabera tese er “wan u nomso” la gba u una “tema tor sha akuraior” cii. Er i lu nahan yô “wan” la tile sha ityough ki gomoti u Aôndo man Yesu Kristu una lu Tor u u. “Kwase” la tile sha ityough ki nongoior u Aôndo u jighjigh u sha la. Nahan er i lu “kwase” á mar “wan u nomso” la yô, kape Yesu Kristu, u á lu Tor la kpaa, á dugh ken nongoior u shaala, ken iyol i mba ken jijingi mba ve lu eren tom imôngo sha u kulen awashima u Aôndo la. Mbagalatia 4:26 yila nongoior ne er “Yerusalem u Sha.” Sha ci u nahan yô, yange Adam vea Ifa mba hembe mtemtor u Aôndo la ato yô, Yehova maa hii u wan ago iyol sha kwagh u gomoti u Tartor ú ua yar tom ú nan mba ve soo perapera mbara ishimaverenkeghen yô.
YEHOVA UMBUR ITYENDEZWA NA
14. (a) Yange Yehova tese er un umbur ityendezwa na sha kwagh u “vor” u ua cagh Satan ityough la nena? (b) Ka an nan lu “vor” u yange i tôndozwa shami laa?
14 Yange Yehova hungur ityendezwa na i tindin a “vor” ú ua lu tor ken gomoti u Aôndo la ga. Tor ne una hembe Satan ityough una tim un kera. (Mbaromanu 16:20; Mbaheberu 2:14) Shighe karen yô, Yehova kaa er vor u sha ityendezwa la ua va ken tsombor u Aberaham or u jighjigh. Yehova kaa a Aberaham er: “Nahan akuraior a sha won cii aa zua a iveren ken tsombor wou.” (Genese 22:18) Ka hanma “vor” yange i tôndozwa er ua va ken tsombor u Aberaham a? Bibilo i na ikyar i kaa er: “Ka Aberaham man i tende zwa a na ye kua vor na. I kaa er ‘vor imôngo’ ga, inja na yô, ka kpishi ga, kpa ngu môm tseegh er, ‘man shi vor wou’, inja na yô, ka Kristu je la.” (Mbagalatia 3:16) Shi Yehova kaa a Isaka wan u Aberaham kua wan u wan na Yakob er “vor” u “kwase” u Aôndo la ua va ken tsombor ve.—Genese 26:1-5; 28:10-14.
15, 16. Kanyi i tese er “vor” la ua va lu tor u hemene?
15 Utan iwanger waeng er “vor” ne ua va lu tor jim yô, Yakob ôr kwagh sha iyol i wan na Yuda er: “Tôgh [shin, tahav mbu tor] kua kar hen Yuda kera ga, gbough ku ortaregh kpaa kua kar hen atô u angahar a na kera ga, zan zan Shilo una va; ka un akuraior aa ungwan imo na ye.” (Genese 49:10, NW ) Yesu Kristu yange va ken kwe u Yuda. A kuma u lun “Shilo” u “akuraior aa ungwan imo na ye.”—Mbaheberu 7:14.
16 Er i ôr kwagh ne sha iyol i Yuda anyom kar nga zulum ikyua a 700 nahan yô, Yehova ôr kwagh sha iyol i Davidi u ken kwe u Yuda la er: “M zua a wanakiriki Wam, Davidi . . . Me er tsombor na ua lu gbem, ikônough nagh ki torough kpaa, kia lu er ayange a Sha yô.” (Upasalmi 89:20, 29) Zum u Aôndo kaa er “vor” u Davidi “ua lu gbem” man shi “ikônough nagh ki torough” kpaa kia “lu er ayange a Sha” nahan la, inja na er nyi? Kwaghôron u Yehova Aôndo ngu tesen er gomoti u Tartor u sha ikyev i un u á vande tseghan un tor la, ka Yesu Kristu je la, ua lu gbem sha won. Se fa sha nyi?
17. Se fa ser tor u yange i tôndozwa sha a na la ka Yesu Kristu sha nyi?
17 Ka shami, yô umbur kwagh u orityom u Yehova Gaberiel yange ôr á Maria sha kwagh u wan u una mar la. A kaa a na er: “Ú ii Un iti wer Yesu.” Kpa yange gba u Yesu una saa lun wanye ga, shin or shin tar ne ga. Gaberiel za hemen u kaan er: “Un, Una lu Zegeor, á yilan Un er Wan u Uhembansha; Ter Aôndo kpaa Una na Un ikônough ki torough ki Ter Na Davidi, Una lu tor ken ya u Yakob gbem sha won; tartor Na kpaa ua bee mayange ga.” (Luka 1:31-33) Er Yehova á we ago a van a gomoti u perapera sha u van a mdoom ma been mayange ga sha ci u mba un doo ve shi ve suur ken a na la nahan ka kwagh u kpilighyol gaa?
18. (a) Bibilo i pase mtim u ugomoti mbatarev nena? (b) Kanyi gomoti u Aôndo una er sha ci u ioro?
18 Hegen shighe mgbôghom u gomoti u Tartor u Aôndo ua hii tom sha u timin ugomoti mba tarev mban cica cii yô. Zum la Yesu Kristu una er tom u tesen mhembe u tahav nav mbu lun Tor. Bibilo i pase kwagh u ityav mbin i kaa er: “Man sha ayange a utor mbara, Aôndo u Sha Una ver tartor ugen u ua gba mayange ga yô, . . . kpa ua hembe ityartor igen ne cii avur avur, ua tim i, kpa u yô, ua lu gbem sha won.” (Daniel 2:44; Mpase 19:11-16) A karen a ugomoti mbagenev mban cii kera yô, gomoti u Aôndo una mase van a ugbaiyol mba hanmaor á kuma nan yô. Tor, Yesu Kristu, una nenge er ior nav mba jighjigh cii kwagh a kera nyoon ve ga, shin iyolbeen shin vea kera kpe kpaa ga. Ifer, uivôngon mbayaav, ijen kua mbamzeiyol mbagenev kpaa cii a kar a ve kera. Bem u mimi man mkpeiyol vea lu tar sha won cii. (2 Peteru 3:13; Mpase 21:3-5) Nahan cii kpaa, doo u shi se seer u henen sha kwagh u mba vea va lu utor ken gomoti u Tartor u Aôndo la.
[Mbampin Mba Ngeren u Henen]
[Foto u sha peeji 112, 113 la]
Yange Yesu tindi mbadondon un er ve̱ za er tom u vesen u pasen kwagh u tartor u Aôndo
[Foto u sha peeji 114 la]
Yange Yesu lu pasen kwagh u tartor u Aôndo heregh, shin er yange tile sha ishigh ki kwavjir nahan kpaa
[Foto u sha peeji 119 la]
U nenge Yesu nena—e̱r ka tor u hemban ityav shin e̱r ka wanikyundana?
