Kwagh u Ú Er Keng ve Ú Lu Uma Gbem Sha Won Yô
Ityough 30
Kwagh u Ú Er Keng ve Ú Lu Uma Gbem Sha Won Yô
1. (a) Ka igbinda ihiar i nyi i lu ivegher sha ci wouwe? (b) U tsuwa gbenda u dedoo nena?
YEHOVA AÔNDO nau kwagh u kpilighyol—ka uma u tsôron ken msertar na u he u perapera je la. (2 Peteru 3:13) Kpa u va lun uma gbem sha won keregh la har sha u we eren ishima i Aôndo hegen je. Tar u ifer u hegen ne, kua mba ve lu ken u cii, shighe mgbôghom u vea kar kera yô, “kpa u nan eren ishima i Aôndo yô, nan ngu lun gbem sha won.” (1 Yohane 2:17) Nahan saa u tsuwa gbenda môm ken igbinda ihiar. Gbenda môm ka u zan ken ku kpa u genegh la ka u zan ken uma u tsôron. (Duteronomi 30:19, 20) Ka hanma gbenda we u dondo?
2. (a) Aluer u ngu a jighjigh u nan u mimi yô, kanyi u kera ta akperan shimi ga? (b) U suur hen Aôndo er wanye ngu a suur hen ter u doonshima la á waseu u civir un nena?
2 We u tese wer u ngu tsuwan uma nena? Hiihii yô, saa u na Yehova jighjigh kua uityendezwa nav kpaa. U fa dedoo wer Aôndo ngu “man shi Un ne mba ve lu keren Un la injar” kpa? (Mbaheberu 11:6) Gba u ú suur hen Aôndo vough er wannomso shin u kwase ka nan suur hen ter u doon ishima man u zungwen mhôônom nahan. (Upasalmi 103:13, 14; Anzaakaa 3:11, 12) U lun a imba jighjigh u nan nahan la, u kera ta akperan sha mdoom ma kwaghwan na shin sha igbinda na i vough la kpaa ga, shin ashighe a genegh wea kera lu a mkav sha akaa kpishi ga je kpaa.
3. (a) U seer sha jighjigh u nan yô, shi kanyi i lu i erene? (b) Ka ityom i nyi i lu hange hange i eren sha u tesen er u tsuwa u lun uma?
3 Nahan cii kpaa, shi kwagh seer sha jighjigh u nan la. Saa ityom i eren ia lu sha u pasen m-iv u ishima you la sha kwagh u Yehova. (Yakobu 2:20, 26) U vande eren akaa a tesen wer u va̱a̱ afanyô sha aferakaa a ou a tse la kpa? Ishima vande mgbeghan we u eren kwagh u dedoo shin u geman aeren a uma wou la sha u eren ishima i Yehova kpa? U gema, inja na yô, u gbihi gbenda u bo u yange u vande dondon la, shi u hii u eren akaa a Aôndo a soo la kpa? (Aerenakaa 3:19; 17:30) Aeren a tom la aa tese er ú ngu dondon gbenda u uma.
IYOLTSEGHAN MAN U EREN BATISEMA
4. (a) Kanyi ia ulugh we u eren ishima i Aôndo? (b) Aluer u tsuwa wer u civir Aôndo yô, kanyi i doo u erene?
4 Kanyi ia mgbeghau u tsuwan uma sha u eren ishima i Aôndo? Ka mkav. Hen ase: Yehova vande sôron mmem sha ci wou sha hanma angev, ican i yan, man ku je kpaa! Sha iyua i injaa i Wan na la a bugh u gbenda u zan ken uma u tsôron ken tar u paradiso. (1 Mbakorinte 6:19, 20; 7:23; Yohane 3:16) Zum u dooshima u Yehova a mgbegh ú u̱ soon un yô, kanyi u eree? (1 Yohane 4:9, 10; 5:2, 3) Gba u u kporom hen Aôndo ken iti i Yesu shi ú pase un wer u soo u civir un, u soo u lun u na. Sha gbenda ne yô u tese wer u tsegha iyolyou sha ci u Aôndo. Kwagh ne ka kwagh wou tswen, ken myer. Orgenegh u eren kwagh ne sha ci wou nan ngu ga.
5. (a) Er u tsegh iyolyou sha ci u Aôndo kera yô, kanyi á ver ishima er we u̱ erene? (b) Kanyi iwasen i lu sha ci wou aluer u ngu eren sha iceghzwa you la yôô?
5 Ú tseghan iyolyou sha ci u Aôndo kera yô, una soo er we u er e̱r ú kaa nahan. Nahan tese wer ú ngu or u eren sha ikyaan you la sha u tilen sha kwaghôron wou, shin sha iyoltseghan you la, ken ayange a uma wou cii. (Upasalmi 50:14) Aluer ú ngu ikyua a nongoior u Aôndo shin tar ne yô, ú zua a iwasen hen anmgbianev mba ve lu Mbakristu mba a saan ve iyol u taver we ishima sha dooshima shi wan we inyatine kpaa yô.—1 Mbatesalonika 5:11.
6. (a) Zum u u tsegh uma wou sha ci u Aôndo la, ka iaven i nyi i lu hange hange u tôônô? (b) Inja i batisema er nyi?
6 Nahan cii kpaa, u we pasen Yehova ken myer wer ú soo u lun sha ci na la shi kwagh u genegh kpa ngu. Gba u ú tese sha ishigh ki mbagenev wer ú tsegha iyolyou sha u civir Aôndo. Ú er nena? Á er u batisema shin mnger. Batisema u shin mnger la ngu tesen ken igbar er or la nan tsegha uma u nan sha ci u Yehova shi nan ngu nan iyol i nan sha u eren ishima Na.
7. (a) Kanyi ikav yange Yesu ver Mbakristu? (b) Ka sha nyi batisema u yange Yesu wa tindi shami la a lu sha ci u anikyundanev ga?
7 Er batisema u shin mnger la á lu kwagh u hange hange u eren kpee yô i tese sha ikyav i Yesu Kristu la. Yange Yesu gba kaan sha zwa tseegh a Ter na er un va sha u va eren ishima Na ga. (Mbaheberu 10:7) Yange ka kom u una hii tom u pasen kwagh u tartor u Aôndo yô, Yesu za na iyolna hen Yehova maa i er un batisema shin mnger. (Mateu 3:13-17) Er yange Yesu ver ikyav yô, nyian kpaa mba ve tsegh ayolave sha ci u Yehova sha u eren ishima na cii saa a er ve batisema. (1 Peteru 2:21; 3:21) Kape i lu je la, yange Yesu wa mbadondon un tom er ve̱ gema ior ken akuraior a sha won cii a hingir mbahenen shi i er mbahenen mbahev mbara batisema. Batisema u eren ne ngu sha ci u anikyundanev ga. Ka batisema u eren sha ci u mba ve hingir mba nan jighjigh, mba ve gem asema sha u civir Yehova yô.—Mateu 28:19; Aerenakaa 8:12.
8. Aluer u soo wer i er u batisema yô, ka an u kaa nan ken tiônnongo, man ka sha ci u nyi?
8 Aluer u gema ishima sha u civir Yehova shi u soo u eren batisema yô, u er nena? Gba u ú pase ortamen u a nengen sha tiônnongo u Mbashiada mba Yehova hen ape we kpaa u kohol la e̱r i sar u nahan. Un, kua mbatamen mbagenev mba hen tiônnongo la, á saan ve iyol kpishi je u henen imôngo a we sha akaa a i gbe u ú fa sha er ú civir Aôndo sha gbenda u vough yô. Nahan á mase sôron ian i eren we batisema.
ISHIMA I AÔNDO SHA CI WOU NYIAN
9. Cii man mngerem ma deemee va la, kanyi yange Noa er man i lu awashima u Aôndo u we kpaa ú er hegene?
9 Cii man mbgerem ma deemee va la, yange Yehova ôron kwagh a Noa, u lu “yôôn kwagh u perapera la,” lu pasen ior kwagh u mtim shi lu tesen ve ijiir i môm tseegh i vea za war her yô, lu ken tso je la. (Mateu 24:37-39; 2 Peteru 2:5; Mbaheberu 11:7) Ishima i Aôndo yô we kpa gba u ú er tom u pasenkwagh la. Sha kwagh u shighe wase ne Yesu tsengaôron er: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.” (Mateu 24:14) Ka keng saa mbagenev kpaa vea fa akaa a u hen sha kwagh u mbaawashima mba Aôndo la aluer gba u vea war mkur u tar ne vea za lu uma gbem sha won yô. (Yohane 17:3) Ishima you i mgbegha u u wan uwegh sha u nan mbagenev kpaa kwaghfan u uma ne kpa?
10. (a) Kanyi ikyav yange Yesu ver i u lun a dooshima hen ior la una mbgbegha se u dondono? (b) Mba hemban eren tom u pasenkwagh ne nena?
10 Dondo ikyav i Kristu la. Yange kegh er saa ior ve̱ vaan hen a na ga, kpa yange á zenden á keren mbara mba vea ver ato u ungwan loho u Tartor la yô. Shi yange wa mbadondon un kwagh—ve cica cii—er ve kpa ve̱ er nahan. (Mateu 28:19; Aerenakaa 4:13; Mbaromanu 10:10-15) U dondon sha kwaghwan man ikyav i Kristu la yô, yange Mbakristu mba tsuaa mbara ve zaan ken uya mbaiorov. Yange “ve̱ za hen hanma gar man hanma idiôya” a loho u Tartor la. (Luka 10:1-6; Aerenakaa 20:20) Nyian kpaa ka gbenda u vesen u Mbakristu mba mimi ve lu eren tom ve je la.
11. (a) Hii nan i lu sha ishima i taver man á pase kwagh u tartor u Aôndo, kpa ka sha ci u nyi i gbe u se cia ga? (b) Yehova nengen tom u se eren ne nena?
11 Ka sha ishima i taver man á er tom ne ye. Satan kua tar na ne vea nôngo sha u yangen we, er mbadondon Kristu mba tsuaa mbara kpaa yange nôngo u yangen ve kwaghpasen nahan. (Aerenakaa 4:17-21; 5:27-29, 40-42) Kpa gba u ú cia ga. Er yange Yehova lu a Mbakristu mba tsuaa mbara shi lu taver ve asema nahan, kape we kpaa una er a we nyian vough je la. (2 Timoteu 4:17) Nahan taver ishima! Tese wer Yehova doou ishima kua mbagenev kpaa sha u lun hoghomoon sha u pasen loho u yiman-uma shi u tesen ior kpaa. (1 Mbakorinte 9:16; 1 Timoteu 4:16) Yehova una hungur a tom wou ga, una na u injar kpee je.—Mbaheberu 6:10-12; Titu 1:2.
12. Kanyi ityesen se zough a mi sha kwagh u kwase u Loti laa?
12 Tar u tse ne ngu a kwagh u injaa môm u nan se ga, nahan de henen wer aluer u gema jime ken u yô kwagh saau je ve ga. “Umbur . . . kwase u Loti,” kape Yesu yange kaa la. (Luka 17:32) Yange un man tsombor na mba dugh kera ken Sodom yô, á gema ashe ken jime sha isharen i akaa a yange ve undu ken gar la. Nahan Aôndo yange nenge ape ishima na i lu yô, nahan a hingir icebar. (Genese 19:26) De luun er kwase u Loti nahan ga! Kenger sha kwagh u á lu u ken hemen la, sha “uma jim” ken msertar u perapera u he u Aôndo la.—1 Timoteu 6:19.
TSUA UMA U TSÔRON KEN PARADISO SHIN TAR
13. Yange Yesu tese kwagh u se cii se tsuwa la nena?
13 Jim je yô, akaa nga ahar tsô. Kristu yange kar kwagh shon sha môm ken atô u igbinda ihiar. Gbenda u môm la, akaa er, u “gbangese, ngu bele bele kpaa.” Sha gbenda shon la mbakaren sha u mbara i na ve ian i eren ishima ve. Kpa, gbenda u genegh la yô, u “imbishi.” Een, mba ve ze sha u ngun yô i soo er ve̱ wa ikyo sha akaawan man atindi a Aôndo. Yange Yesu kaa er ikpelaior ngi zan sha gbenda u u lu bele bele la, ka ior kpeghee ve lu zan sha gbenda u hogholoo la ye. Ka hanma gbenda we u tsuaa? Gbenda u u soo u tsuan cii, lu a kwagh ne ken ishima: Gbenda u gbangese la ua gba za been tsô—ka ken mtim je la! Vegher u genegh yô, gbenda u hogholoo la ua za nyôr a we ken msertar u he u Aôndo. Ka keregh kpaa u za yar tom u geman tar ne hingir paradiso u̱ engem, ken ape ú fatyô u lun uma gbem sha won ken msaanyol ye.—Mateu 7:13, 14.
14. Ka ken vegher u nyi ú lu̱ keng sha u va waren nyôron ken msertar u he u Aôndo laa?
14 De kera henen wer igbinda ngi kposo kposo, shin ajiir a karen, a ú fatyô u dondon za zuan a uma ken msertar u he u Aôndo la ga. Ngu môm tseegh. Ka ken tso môm tseegh yange i war ker sha ayange a Mngerem ma Deemee la ye, yange utso lu kpishi ga. Shi á lu nongoior môm tseegh—nongoior u Aôndo u shin tar ne—ka u ua war “zegecan” i i mgbôghom la ye. U kaan er ukwaghaôndo cii mba zan ijiir i môm la ka aie. (Mateu 7:21-23; 24:21) Saa ú lu ken nongoior u Yehova keng, u eren ishima i Aôndo, sha u va ngohol iveren i uma u tsôron la yô.—Upasalmi 133:1-3.
15. (a) Kanyi i lu i se eren ayange ayange? (b) Ka ishimaverenkeghen i nyi i hembe mnyamcieme?
15 Nahan lu a foto u ityendezwa i sha kwagh u msertar u he u Aôndo la waeng je ken mhen wou man ishima you kpaa. Hanma sev yô hen sha zege iyua i Yehova Aôndo a ver sha ci wou la—ka u va lun uma gbem sha won ken Paradiso shin tar. Kwagh ne ka mnyamciem ga. Kape á lu̱ je la! Sha ci u gba u ityendezwa i Bibilo la ia kule shami keng je er: “Mbaperapera vea ya dyako u tar, vea lu ken u gbem. . . . U nenge mtim u a tim mbaaferev kera yô.”—Upasalmi 37:29, 34.
[Mbampin Mba Ngeren u Henen]
[Foto u sha peeji 251 la]
Tsegha iyolyou sha ci u Yehova . . . man er batisema
[Foto u sha peeji 253 la]
‘Umbur kwase u Loti’
[Ufoto mba sha peeji 254 la]
Lu a msertar u he u Aôndo la ken mhen man ken ishima you waeng je
