Mhidi u Kristu – A Nenge a Na Nena?
Ityough 17
Mhidi u Kristu – A Nenge a Na Nena?
1. (a) Yange Kristu er ityendezwa sha nyi? (b) Shi ka a inja u Kristu hiden sha nyi?
“ME SHI ME HIDE.” (Yohane 14:3) Yange Yesu Kristu tôndozwa aa mbaapostoli nav hen tugh mbu lu a ve cii man ku na la. We iyolyou kpaa ú lumun wer kwagh vande gban sha kwagh u bem, mkpeiyol man uma u mhidi u Kristu ken tahav mbu Tartor una va uumace a mi la er kwagh a gbe shami hegen ne ga. Kpa Kristu una hide nena? Ka unô vea nenge a naa, man á lu sha nyi gbenda?
2. (a) Zum u una hide la, Kristu una za a mbadondon un, kua mbaapostoli mbara kpaa, sha u za lun hana? (b) Ka ayol a nyi vea lu ami shaalaa?
2 Ken mhidi na la, Kristu una kera va lu shin tar ne ga. Nahan cii kpaa, mba vea za tema tor sha u hemen vea na la yô á yem á ve sha. Yesu yange kaa a mbaapostoli nav er: ”Me va kua a ven sha er né kpaa ne lu hen ape M lu yô.” (Yohane 14:3) Nahan shighe u Kristu una hide la yô, mba á yem á ve sha la vea hingir mba ken jijingi, nahan vea nenge a Kristu ken iyol na i civirigh i ken jijingi la. (1 Mbakorinte 15:44) Kpa uumace mbagenev, mba ve lu yemen sha ga mbara, vea nenge a Kristu zum u una hide la kpa?
ITYÔIKYAA I MHIDI NA Á LU KEN IYOL I OR GA YÔ
3. Kanyi ikyav Bibilo i tese er uumace vea kera nenge a Kristu ga?
3 Hen tugh mbula je Yesu ôr kwagh a mbaapostoli nav kaa er: “Mase shin ciôn man tar ua kera nenge a Mo ga.” (Yohane 14:19) “Tar” la ka uumace je la. Nahan Yesu pase waeng er ior mba shin tar ne vea kera nenge a na zum u una kôndo a yem sha la ga. Apostoli Paulu yange nger er: “Aluer se vande fan Kristu sha inja i iyolough kpaa, hegen yô, se kera fa Un nahan ga.”—2 Mbakorinte 5:16.
4. Kanyi i tese er Kristu una hide sha inja i or u ken jijingi u taver iyolo?
4 Kpa ior kpishi na jighjigh er Kristu una hide a iyol i yange i wua un a mi la, shi ve hen er mba ve lu uma shin tar cii vea nenge a na. Bibilo i kaa er, Kristu una hide ken iengem a mbatyomov nav cii, shi “Una tema sha ikônough Nagh ki torough ki engem la.” (Mateu 25:31) Aluer gba u Yesu una va tema sha ikyônough ki torough er ka or u shin tar ne nahan yô, una hemba gban ijime a mbatyomov cii. Kpa una va ken tahav mbu hemban kua iengem a ônov mba Aôndo mba ken jijingi mban cii shi á fatyô u nengen a na ga, vough er mbatyomov ve lu nahan.—Mbafilipi 2:8-11.
5. Ka sha ciu nyi i gbe u Kristu una kera hide ken iyol i or ga?
5 Sha vegher u genegh yô, anyom kar hegen je hemba 1,900 zum u gba keng u Yesu una hide a iyol na ijime una va hingir or la. Yange gba u una na uma na u waeng la á hingir ipaa sha ci wase. Yesu iyolna vande pasen er: “Man kwaghyan u Me na yô, ka iyol Yam je, sha ci u uma u tar.” (Yohane 6:51) Nahan Yesu yange na iyolna sha u nan naagh sha ci u uumace. Gba u naagh kula kua tsa shighe nena? Apostoli Paulu na ikyar shami er: “Ka sha awashima ne man i tsegh se kwa môm bee, sha nagh ku i ne sha iyol i Yesu la ye.” (Mbaheberu 10:10) Ne iyol na sha ci u uma u tar ne kera yô, gba u shi Kristu una tôô iyol la i môm sha u shi lun or heregh ga. Sha ityôikyaa i vesen ne yô mhidi na la á kera lu ken iyol i or i á vande nan naagh shami la ga.
A NYÔR A IYOL I INYAM LA SHA GA
6. Ka sha ciu nyi ior kpishi ve ne jighjigh er yange Kristu kôndo yem a iyol i inyam sha?
6 Nahan cii kpaa, ior kpishi na jighjigh er yange Kristu yem sha ken iyol na i inyam la. Ityôikyaa yô ka ve kaa er zum u Kristu nder shin ku la, i kera nenge a iyol na la shin uwar ga. (Marku 16:5-7) Shi ka i kaa er, yange Yesu nderen shin ku yô a za ande hen mbahenen nav ken iyol sha u pasen ve e̱r un lu uma heregh yô. Shi A kaa a apostoli Toma er a̱ za uwegh a̱ pev ahula a ukusa ken ihyan Na sha er Toma una na jighjigh e̱r Un nder shin ku yô. (Yohane 20:24-27) Kwagh ne kera tese er Kristu yange nder ken iyol shon i môm i yange i wua un la ga zee?
7. Kanyi i tese er yange Kristu yem sha ken iyol i jijingi?
7 Ei, tese nahan ga. Bibilo i pase waeng zum u i kaa er: “Gadia Kristu kpaa kpe sha ci u asorabo kwa môm . . . Iyol Na yô, i wua i kpa i shi i na Un uma sha Jijingi.” (1 Peteru 3:18) Uumace mba ve lu a iyol i inyam-man-awambe vea fatyô u lun sha ga. Sha kwagh u mnder u shin ku za lun uma sha la yô, Bibilo i kaa er: “Mba lee iyol i sha marami, mba gem mba nderen iyol i sha inja i jijingi. . . . inyam man awambe fatyô u yan dyako u tartor u Aôndo ga.” (1 Mbakorinte 15:44-50) Ka mba ve lu a ayol a jijingi la tseegh vea fatyô u lun sha ye.
8. Yange i er a iyol i Kristu la nena?
8 Tsô, aluer ka nahan yô, kanyi yange i er a iyol i Yesu laa? Yange mbahenen ve ker i shio shin uwar gaa? Yange ve ker í shio sha ci u Aôndo yange kar a iyol i Yesu la kera. Yange Aôndo er nahan sha ci u nyi? Yange kwagh ne kule sha kwagh u Bibilo i tsengangeren la vough. (Upasalmi 16:10; Aerenakaa 2:31) Yange Yehova nenge lu a inja u karen a iyol i Yesu kera, e̱r yange vande eren a iyol i Mose nahan. (Duteronomi 34:5, 6) Shi, aluun er yange i undu iyol la shin uwar yô, yange mbahenen mba Yesu ma ve fa mnder na shin ku ga, sha ci u ve lu a kav akaa a ken jijingi tsembelee ga.
9. Shighe u Yesu nder shin ku la yange Toma fatyô u zan un uwegh sha ajiir aa ukusa nena?
9 Kpa er yange apostoli Toma bende ave sha ajiir a ukusa a yange i mande Yesu shami la nahan, kera tese er yange Yesu nder shin ku ken iyol i môm i yange i mande un a mi sha kon la ga zee? Ei, yange Yesu gema mluiyol shin haa iyol i inyam, vough er ngise mbatyomov ve eren ken ashighe a tsuaa la nahan. Sha u una na Toma a fa Or u un lu yô, Á haa iyol i lun a ajiir a ukusa. Tsô a va ande, mlu na lu er u or nahan, sha u fanityô u yan, shin u man kwagh, vough er mbatyomov mba ngise Aberaham yôr ve iwer mbara nahan.—Genese 18:8; Mbaheberu 13:2.
10. Kanyi i tese er yange Yesu ande ken mbamluiyol kposo kposoo?
10 Shin er yange Yesu ande hen Toma man iyol Na la lu kwagh môm a iyol i yange i mande Un a mi la nahan kpaa, shi lu anden hen mbadondon Un ken mbamluiyol kposo kposo. Hiihii la yange Maria Magedalena hen er Yesu ka ma orsule. Ken ashighe a genegh yô mbahenen nav yange ve kav injaor i á lu tsô kpaa ga. Ken aaven ne cii yange i faan un sha mluiyol na ga, kpa yange i lu sha kwaghôron shin sha ierenkwagh na ve faan un ye.—Yohane 20:14-16; 21:6, 7; Luka 24:30, 31.
11, 12. (a) Ka sha nyi gbenda yange Kristu undu tar nee? (b) Shi se ver ashe sha mhidi na sha nyi gbenda?
11 Er Yesu nder shin ku la, lu anden hen mbahenen nav ken iyol i inyam zan zan kuma ayange 40 je. (Aerenakaa 1:3) Tsô a kôndo a yem sha. Kpa mbagenev vea pine er: ‘Kpa mbatyomov mba uhar mbara yange ve kaa a mbaapostoli mbara er Kristu u i tee un her a ven la “er ne nenge Un A kende A yemen Sha nahan, kape mhir kpaa Una hire vough je la” gaa?’ (Aerenakaa 1:11) Een, kape yange ve kaa je la. Kpa umbur wer yange ve kaa er “kape mhir kpaa Una hire vough je la,” kpa ka ken iyol la i môm ga. Nahan mkôndo u Yesu yange lu inja nena? Yange kôndo viing, a mfe u ikpelaior shio. Ka mbaapostoli nav tseegh yange ve fa ye. Yange tar fa ga.
12 Ôr ase er Bibilo i ne mpase sha inja gbenda i yange Yesu undu mbaapostoli nav kôndo yem sha la: “Tsô er A ôr akaa ne kera yô, i tôô Un i yem a Na Sha; ve lu nengen je, ibeenegh maa ngohol Un sha ashe ve.” (Aerenakaa 1:9) Nahan er Yesu lu kôndon yemen sha la, ibeenegh kase un nahan mbaapostoli nav kera fatyô u nengen a na ga. Nahan ve kera nenge a myem u Yesu la bouung ga. Yange ve fatyô u nengen a na sha ashe ga. Tsô a kôndo a yem sha ken iyol i jijingi. (1 Peteru 3:18) Ka pe mhidi na kpaa á lu ken iyol i jijingi, á nenge á na sha ashe ga je la.
ER HANMA ASHE AA NENGE A NA LA
13. Se kav kwaghôron u i kaa er “hanma ashe aa nenge” a Kristu sha mhidi na sha abeen la nena?
13 Nahan, ka sha nyi, se kav mkaanem ma ken Mpase 1:7 laa? Apostoli Yohane nger er: “Nenge, ngu van sha abeen man hanma ashe aa nenge a Na, kua ve mba ve kuma Un la kpaa. Akuraior a sha won cii aa vaa sha ci Na.” Bibilo i ôr kwagh u nengen, kpa ka sha ashe a iyolough ga, ka u kaven shin u fan. Zum u or ka nana kav shin nana fa kwagh u kwagh a gbe shami la yô, ka nan kaa er, ‘M nenge a mi.’ Bibilo i ôr kwagh sha kwagh u “ashe a asema a en sha u né fa” yô. (Mbaefese 1:18) Nahan kwaghôron u i kaa er “hanma ashe aa nenge a Na” la inja na er hanmaor nana fa shin nana kav e̱r Kristu á hidi yô.
14. (a) “Mba ve kuma Un la” inja na nena? (b) Ijungwen ia lu zum u hanmaor nana va kav mhidi u Kristu la nena?
14 Mba yange ve “kuma” Yesu mbara kera mba uma sha tar ga. Kpa ve gema ve tile, sha ityough ki mba ve ker mbadondon Kristu ihyom nyian, mba ieren ve i lu kwagh môm a ior mba sha derianyom u hiihii mbara. (Mateu 25:40, 45) Shighe mgbôghom u Kristu una tim aferaior la kera yô. I vande pasen ve nahan tsuaa je. Zum u mtim ve la una hii yô, vea “nenge” shin vea kav kwagh u a lu zan hemen hen shighe la yô. Mliam vem maa kehe tsô!
SHI KRISTU HIDE SHIN TARA?
15. Ashighe agen ishemberti i u “hiden” la ka i tese nyi ikyava?
15 U hiden la tese er saa or la nana za hen ijiir la kpôô kpôô kpee ga. Ka nahan ka i ôr kwagh u oruange er ‘via hide sha iyolna’ kpaa ye. Shi ka i kaa kpaa er or u yange vande teman tor la shi ‘hide ken utaha’ kpaa. Sha gbenda ne môm, yange Aôndo kaa a Aberaham er: “Me hide hen a we sha shighe u i ver la, hen shighe ne nahan, Sara una lu a wan ave.” (Genese 18:14; 21:1) Mhidi u Yehova la, lu u hiden sha inja i iyolough ga, kpa lu u veren ishima sha u eren kwagh u yange tôndozwa u eren sha ci u Sara la.
16. (a) Kristu hide shin tar sha nyi gbenda? (b) Ka hanma shighe Kristu hide, man kanyi kwagh i e̱re̱?
16 Kwagh ne ka kwagh môm, mhidi u Kristu ka u kaan er una hide a va shin tar ken iyol ga. Kpa inja na er, a ngohol tahav mbu Tartor hen tar ne shi a ver ishima shin u kpaa. Ka u saa una mough shaala una undu ikyônough nagh ki torough una sen shin tar sha u va eren tom ga. Er se vande nengen ken ityough ki ki kar kila nahan, akav a Bibilo tese er ken inyom i 1914 C.E. la shighe u Aôndo yange ver la kuma u Kristu una hide una hii tom yô. Ka hen shighe la kpaa i ungwa zegeimo due sha lu kaan er: “Hegen yô, myom man agee man tartor u Aôndo wase man shi tahav mbu Kristu Na kpaa va ve.”—Mpase 12:10.
17. Er mhidi u Kristu i lu ken jijingi yô, kanyi ikyav yange tese sha er sé fa mhidi naa?
17 Er mhidi u Kristu i lu u̱ a nenge á na ga yô, ma gbenda ngu ú fan er kwagh ngu nahan jim kpa? Een, gbenda ngu. Kristu iyolna vande tesen “ikav” sha er se fa mhidi na kua mgbôghom u mkurtar yô. Se time sha “ikav” la.
[Mbampin Mba Ngeren u Henen]
[Foto u sha peeji 142 la]
Yange Kristu na naagh sha iyol na. Una kera ngohol í sha u hingir or heregh ga
[Ufoto mba sha peeji 144, 145 la]
Ka sha ci u nyi yange Maria Magedalena hen er Yesu ka orsule shighe u yange nder shin ku laa?
Ka iyol i nyi yange Yesu kaa a Toma er a za hôwe naa?
[Foto u sha peeji 147 la]
Yange gba u Kristu una hide sha inja i yange yem la vough. Yange yem nena?
