Nongoior u Aôndo Shin Tar Ne
Ityough 23
Nongoior u Aôndo Shin Tar Ne
1. Sha kwagh u nongoior u Aôndo u ken jijingi la Bibilo i kaa er nyi?
KA SHA NYI se kaa ser Aôndo ngu a nongoior shin tara? Ityôkwagh i genegh yô ngu a nongoior u i nengen a mi ga yô. Yange Yehova gba ucerubi, userafim kua mbatyomov mbagenev kpishi sha u ve̱ eren ishima na shaala yô. (Genese 3:24; Yesaia 6:2, 3; Upasalmi 103:20) Yesu Kristu gema ngu ortyom u Tamen man shi u nengen sha mbagenev mban cii. (1 Mbatesalonika 4:16; Yuda 9; Mpase 12:7) Bibilo i pase mlu u mbatyomov er i ver ve sha akum a ve “shin a lu mkônom ma torom, shin a lu tor u yan shin a lu mbatarev, shin a lu tahav” kpaa. (Mbakolose 1:16; Mbaefese 1:21) Ve cii mba shir Yehova tom sha iniezwa na, shi mba eren tom u á soo er ve̱ er la.—Daniel 7:9, 10; Yobu 1:6; 2:1.
2. Gbenda u yange Aôndo gba sha man tar la tese er a fa mdoom ma veren kwagh sha inja nena?
2 Shi se mba a mkav sha mdoom ma Aôndo a tese sha mver u akaa aluer se nenge sha akaa a á gbe la dedoo yô. Ikyav i tesen, asan nga sha kwavaôndo ubiliôn udubu kpishi sha akum a ve mba yer ve er akaa a nan iwanger. Akaa a nan iwanger ne nga zenden ken iamegh sha gbenda ve, kape asan kpaa a zenden asange asange je la kua akum a genegh kpaa ken atô u akaa a nan iwanger ne. U tesen ikyav yô, Tar wase ne hanma inyom ka u ningir iyange i i lu ishan i hemban lun ikyua a vese ne, ken ayange 365, ahwa 5, miniti 48 man usekônd 45.51. Een, i ver tar sha inja tsembelee je!
3. Kanyi mver u sha inja u Aôndo a ver akaa a i nengen a mi ga kua tar cii la á tese se?
3 Ken akum a cieryol a Aôndo a ver á i nengen a mi ga kua á i nengen a mi ne cii a tese se kwagh je kpa? Een, a tese se er Yehova ka Aôndo u eren kwagh sha inja. Er i lu nahan yô, inja Aôndo la ia gba undun uumace mba a doo ve ishima shin tar aa hemen man nongoior shio ga.
NONGOIOR U AÔNDO SHIN TAR NE—MBANGISE MAN MBA HEGEN
4, 5. Se fa ser yange Aôndo hemen ior nav sha inja sha ayange aa Aberaham kua ikyuior i Iserael nena?
4 Bibilo i tese er kera je Yehova vanden hemen mbacivir un sôron ve veren sha gbenda u vough. Ikyav i tesen, mba nan jighjigh anza er Aberaham nahan yange ve hemen icombôr ve kua mbashiren ve ken u civir Yehova. Nahan Yehova pase awashima na sha iyol i Aberaham sha u lamen vea na. (Genese 12:1) Tsô Aôndo wa un kwagh er á pase mbagenev kpaa nahan, a kaa er: “Gadia M tsuwa un [Aberaham] sha er a̱ kaa ônov nav man mba ken ya na ken ijime, ve̱ waan gbenda u TER iko.” (Genese 18:19) Yange i lu mser u kohol ior veren sha nongo vough sha er á civir Yehova tsembelee yô.
5 Mbaiserael mba ngeen, mba kom umiliôn kpishi yô, Yehova kera de er hanmô ve nana̱ civir un sha gbenda u nan nenge la, paleghaa a u lun sha nongo shio ga. Ei, yange Mbaiserael ve kohol ve lu ikyurior i môm ken mcivir ve la. Yange i yilan ikyurior i Iserael la er “mkohol u TER.” (Numeri 20:4; 1 Kroniku 28:8) Luun er yange wea lu or u civir Yehova sha mimi sha ayange la yô, yange ma u lu môm ken mkohol u mbacivir mbara, yange ma u lu paleghaa ga.—Upasalmi 147:19, 20.
6. (a) Yange Aôndo tese mlumun na sha mbadondon mba Kristu nena? (b) Kanyi ikyav i lu i tesen er ngise Mbakristu ve kohol sha u civiri?
6 Yange kwagh lu nena ken derianyom u sha hiihii laa? Bibilo i tese er mlumun u Yehova yange lu sha mbadondon mba Wan na Yesu Kristu. Yange Yehova haa icighan jijingi na sha a ve. Sha u tesen er un ngu yaren tom a nongo u Kristu hegen kera ka ikyurior i Iserael la ga yô, yange na Mbakristu mba tsuaa mbara tahav mbu been ior angev, shi mbu nderen mbakpenev kua akaa a genegh a kpilighyol. U fatyô u ôron Ruamabera u Mbakristu u ken Zwa Grika a u lun sar sar shio ga sha ci u yange Mbakristu lu nongo môm ken mcivir ve la. Shi yange i wa ve tindi er, ve̱ kohol ijiir i môm sha ci u kwagh ne. (Mbaheberu 10:24, 25) Nahan luun er yange wea lu or u civir Yehova sha mimi ken derianyom u hiihii la yô, yange ma u lu ilyeghegh ki nongoior u Kristu.
7. Se fa ser ma shighe môm Yehova vande yaren tom a nongoior hemban môm tseegh ga nena?
7 Ken ashighe ne cii yange Yehova yar tom a nongoior môm tseegh ga kpa? Ken ayange a Noa la kpaa lu Noa man mba yange ve lu a na ken tso mbara tseegh yange Aôndo kura ve ve war nôôwura la ye. (1 Peteru 3:20) Ken derianyom u hiihii la kpaa, yange iniongo i Kristu lu ihiar shin hemba nahan ga. Aôndo yange yar tom a u môm tseegh. Yange lu di “Ter môm, jighjigh u nan kpa môm, batisema kpaa môm” la. (Mbaefese 4:5, NW ) Yange Yesu Kristu tsengaôron er hen shighe wase ne kpaa ka ijiir i môm tseegh ior mba Aôndo vea zuan a kwaghwan u ken jijingi ye.
8. Yange Yesu tese er nongoior u Aôndo ua va lu môm tseegh shin tar hen ayange ase nena?
8 Er lu ôron kwagh u mtemtor na ken tahav mbu Tartor yô, Yesu kaa er: “Yô, ka an nan lu wanakiriki u jighjigh man u fan kwagh u ter u nan una wa nan ya sha ikev sha u nana naan ve kwaghyan sha ashighe ashighe? Wanakiriki u ter u nan una hide, una va kohol nan eren nahan la yô, á saan nan iyol. Mimi je M ngu kaan ne, una wa akaa a na cii sha ikev na.” (Mateu 24:45-47) Sha mhidi na ken tahav mbu Tartor ken inyom i 1914 la, Kristu yange zua a “wanakiriki u jighjigh man u fan kwagh” lu nan “kwaghyan” u ken jijingi, shin kwaghwan kpa? Een, yange zua a inja “wanakiriki” la ken ikyum i mba 144,000 i “anmgbianev” mba ve shi asande shin tar la. (Mpase 12:10; 14:1, 3) Man hii ken inyom 1914 la je ior umiliôn imôngo mba zuan a “kwaghyan” u ve ne la, shi ve hii u eren kwaghaôndo u mimi a ve kpaa. Nongoior u mbacivir Aôndo ne mba yer u er Mbashiada mba Yehova.
9. (a) Ka sha ciu nyi mbacivir Aôndo ve tee iti i Mbashiada mba Yehova? (b) Hii nan ve yer ajiir ve a civir her la er Ayou a Tartoro?
9 Mbashiada mba Yehova mba nengen hen Aôndo kua shi Mkaanem nam sha u ngohol ityesen ken hanma kwagh ve u eren cii. Iti ve i Mbashiada mba Yehova la je kpaa tese er tom ve jim ka u eren shiada sha kwagh u iti man tartor u Yehova Aôndo, er Kristu kpa yange eren nahan. (Yohane 17:6; Mpase 1:5) Shi ijiir i ve kohol u civir la kpaa mba yer i er Iyou i Tartor sha ci u tartor u Aôndo u sha ikyev i Mesiya, shin Kristu la, ka u u lu itinekwagh ken Bibilo cii ye. Er yange Aôndo lumun a Nongo u Kristu u sha derianyom u hiihii la yô, wanger sha ci u ka sha m-ertom ve la Mbashiada mba Yehova ve eren tom ve kpaa ye. Se time nen sha mlu u nongoior u Kristu u tsuaa la sha u fan aerenakaa a ve a a lu kwagh môm a nongoior u Aôndo shin tar ne nyian la.
IKYAV I MBA SHA DERIANYOM-U-HIIHII LA
10. Mbamlu mbagenev mba nongoior u Kristu sha derianyom u hiihii la kanyi?
10 Hanma ijiir ape Mbakristu mba sha derianyom u hiihii la vea lu cii, yange ve kohol sha ajiir ajiir sha u civir. Yange ve kohol ken iniongo ne hanma shighe sha u henen kwagh shi taver ayol a ve kpaa. (Mbaheberu 10:24, 25) Tom ve u vesen yange lu u pasen man u tesen ior kwagh u tartor u Aôndo, er Kristu kpaa yange eren nahan. (Mateu 4:17; 28:19, 20) Aluer or u ken tiônnongo ve yange nana dondo gbenda u uma u bo yô, yange ve dugh nan ken tiônnongo ve kera.—1 Mbakorinte 5:9-13; 2 Yohane 10, 11.
11, 12. (a) Kanyi akaa i tese er atôônanongo a tsuaa la yange i ngohol hemen ma ityesen hen mbaapostoli man “mbatamen” mba ken Yerusalem a̱? (b) U kaan er sha “ityesen i Aôndo” la inja na nena? (c) Er atôônanongo la yange aa ngohol ityesen la yô kanyi kwagh yange i due shami?
11 Iniongo i Kristu i sha derianyom u hiihii la yange hanmaor eren kwagh sha tseeneke u nan, hanmaor nan eren akaa sha ishima i nan shinii? Ei, Bibilo i tese er yange ve zua ken jighjigh u nan môm u Mbakristu. Iniongo i Kristu cii yange i ngohol kwaghwan man ityesen ijiir i môm. Ka nahan yange anyiman nga gbe sha kwagh u icôngo yô, iniongo la, shin hanma or ve gba eren kwagh u ve soo la tsô ga. Ei, kpa kwagh u yange lu yô, yange i tindi apostoli Paulu, kua Barnaba man mbagenev ken a ve, sha u “ve̱ za a anzughul ne hen mbaapostoli man mbatamen ken Yerusalem yô.” Shighe u mbakavenkwagh mban, sha iwasen i Mkaanem ma Aôndo man “icighan jijingi” na yô, ve mase nan imo sha kwagh u a lu u eren la, tsô ve tindi mba nanjighjigh sha er ve̱ za a loho la ken iniongo i Kristu yô.—Aerenakaa 15:2, 27-29.
12 Er yange atôônanongo ne ngohol kwaghôron u Aôndo ne, shin mkaanem ma sha ityesen na la nahan, yange ve er nena? Bibilo i kaa er: “Mba [apostoli Paulu man mbanongo na] ngur yemen karen sha agar agar yô, ve lu nan atindi a mbaapostoli man mbatamen mba ken Yerusalem ve wa a sha u i eren sha mi la. Nahan iniongo i Kristu taver ken jighjigh u nan, man iyenge ve lu seer a seer ayange ayange.” (Aerenakaa 16:4, 5) Een, atôônanongo la cii lu ken mzough môm sha kwagh u mkohol u mbatamen mba ken Yerusalem yange ve na tindi shami la, shi ve lu vesen ken jighjigh u nan taveraa kpaa.
ITYESEN I AÔNDO SHA AYANGE A NYIAN
13. (a) Ka hanma ijiir shin tar man ka sha ikyev i unô nongoior u Aôndo u lu ngohol ityesen nyiana? (b) Mlu u mbatamen mba shin tine man u “wanakirki u jighjigh man u fan kwagh” la ngu nena?
13 Nongoior u Aôndo shin tar ne nyian kpaa ngu ngohol mkôôm man ityesen i Aôndo. Ken ijiir i tamen i Mbashiada mba Yehova i ken Brooklyn, New York la, mbatamen mba shin tine mba ve lu nomso mbaiorov yô ve due sha avegher a tar cii sha u nengen sha ityom i ior i Aôndo ken tar sha won cii. Mbatamen mba shin tine mban ve due ken tihi u “wanakiriki u jighjigh man u fan kwagh” la. Ka ve kpaa ve lu mba ôron kwagh sha ityough ki “wanakiriki” u jighjigh la ye.
14. Ka sha nyi mbatamen mba shin tine mba ior i Aôndo ve haren sha u kulen akaaeren a ve?
14 Mba ve lu ken ikyum i mbatamen mba shin tine mbara ve er tom u Aôndo anyom ngee, vough er mbaapostoli man mbatamen mba ken Yerusalem mbara nahan. Kpa mba haren sha kwaghfan u or ken mshirtom ve ga. Ei, er mshirtom ve la a lu sha ityesen i Aôndo jim jim yô, ve dondo sha ikyav i mbatamen mba ken Yerusalem mba tsuaa mbara, mba uiniezwa vev cii yange ve har sha Mkaanem ma Aôndo shi lu sha iniezwa i icighan jijingi kpaa la.—Aerenakaa 15:13-17, 28, 29.
U KÔÔM NONGOIOR U AÔNDO TAR SHA WON CII
15. Ka sha nyi kwaghôron u Yesu ken Mateu 24:14 a tese er Aôndo una lu a zegenongo shin tar ken shighe u mkuru?
15 Yange Yesu Kristu tese ikyav sha iindí i nongoior u Aôndo hen tar ne ken shighe u mkur ne zum u yange kaa er: “Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii, ka zum la man mkur una kuma ye.” (Mateu 24:14) Hen a se sha zege tom u a lu u eren sha u ôron ior mba ve lu umiliôn udubu kpishi shin tar mbara kwagh u mtemtor u tartor u Aôndo. Nongo u Kristu u sha ayange ne, u u veren ashe hen mbatamen mba shin tine sha hemen ve shi ve tesen ve kpaa la, mba a agoiyol u eren zege tom ne kpa?
16. (a) Ka sha ciu nyi Mbashiada mba Yehova ve lu a ajiir aa gberen akaa a vesen kpishi nahana? (b) Kanyi akaa i eren ken ajiir nee?
16 Hegen Mbashiada mba Yehova mba pasen loho u Tartor ne ken ityar man acilemnger je hemba er 230 nahan tar sha won cii. Sha u wasen mbapasen kwagh u Tartor la sha u eren tom ne tsembelee yô, mba ve hemba iorov 4,700,000 (ken inyom i 1993 la) sha u a er tom ne dedoo yô, i ver afo a gberen ityakerada sha ityar kpishi. Ka keregh kpaa i gberen Ubibilo kua ityakerada i henen Bibilo kpishi kpaa ye. Hanma iyange i yaren tom cii, a kar iyenge i hanma mgber vough yô, ka i gber Watchtower man Awake! ve hemba miliôn uhar ken afo shon ne i samber a min.
17. (a) Hii nan i gberen ityakerada i henen Bibilo nee? (b) I lôhôu er u̱ za er nyi?
17 Ityakerada i henen Bibilo a mi ne cii i sôr i sha u wasen ior sha u ve̱ vese ken kwaghfan u Yehova kua mbaawashima nav mba vesen mbara. Kape i lu je la, mkaanem ma i nger er “U Yôôn Tartor u Yehova” la, ma hingir iti môm a ruamabera u i yer er The Watchtower la. Mba lôhôn we sha u wasen u samber a ityakerada i henen Bibilo ne shi u pasen mbagenev kpaa akaa a mimi a a lu ken Bibilo la. Ikyav i tesen yô, u ngu a ma or u ú fatyô u nan nan mkaanem ma injaam ma u hen ken takerada u i yer er, Ú Fatyô u Lun Uma Gbem sha won ken Paradiso Shin Tar ne kpa?
18. (a) Ka nongoior u nyi u lu nongoior u Aôndo shin tar nyiana? (b) Ka sha ciu nyi i doo u taver ior i Aôndo ishima kpishi yumu?
18 Er yange i lu sha derianyom u hiihii la nahan, nongoior u Aôndo u shin tar nyian ne kpaa ka nongoior u mba ve tsegh ayolave shi ve er batisema sha u lun mbapasen kwah u Tartor la yô. Shi i ver u sha u wasen alegh a u la sha u eren tom u pasen kwagh. Ka u taver ior mban ishima kpishi je kua ken jijingi kpaa, sha ci u Satan kua mba ve gbe ken imeen na la ve hendan a loho u Tartor la yô. Ka anzaaior la yange wua Yesu sha ci u tom u pasen kwagh la ye, shi Bibilo i vande kaan er mbadondon un cii a tôv ve a ican.—Yohane 15:19, 20; 2 Timoteu 3:12.
19. (a) Ka unô i ne sha u wasen shi nyôôsu ior i Aôndo hegene? (b) Mba kuran tiônonnongo sha akaabo a vihin un nena?
19 Er yange i lu sha derianyom u hiihii la nahan nyian kpaa ka i ver “mbatamen,” shin mbakuran, sha u ve̱ wasen shi ve̱ taver hanma tiônnongo ishima yô. Vea fatyô u wasen we sha akaawan a ken Bibilo sha u sôron mbamzeiyol kposo kposo. Shi mbatamen mban mba kor “ikumuile i Aôndo” kpaa. Nahan zum u ma ilyeghegh ki tsum ki dondo uma u bo shi ki vende u geman ishima yô, “mbatamen” mbara ka ve dugh imbaor la kera, shin ve tôndo nan iti kera ken tiônnongo. Sha u eren nahan la yô, ka u nan sha er tiônnongo a lu waeng ken jijingi yô.—Titu 1:5; 1 Peteru 5:1-3; Yesaia 32:1, 2; 1 Mbakorinte 5:13.
20. (a) Ken derianyom u hiihii la ka unô yange mbatamen mba shin tine mba ken Yerusalem tindi ve, man lu sha nyi ityôkwagha? (b) Ka unô mbatamen mba shin tine ve tindin ve nyiana?
20 Vough er ngise mzough u mbatamen mba shin tine ken Yerusalem yange ve tindin mba sôron, anzaaior er Paulu man Sila, sha u ningir samber aa atindi shi taver ior i Aôndo ishima nahan, kape nyian kpaa mbatamen mba shin tine mbara ve lu eren ken shighe u mkur ne vough je la. (Aerenakaa 15:24-27, 30-32) Ka i kuma er kwa har nahan ken inyom i môm ortom u kaven kwagh, u i yer un er ornengen sha ningir la, i vande wan un kwagh er hanma tiônnongo u hen ningir na la a luun a u lahadi môm.
21. Ornengen sha ningir la wasen atôônanongo a ior mba Aôndo nena?
21 Tar sha won cii atôônanongo a Mbashiada mba Yehova ngee hemba 73,000, shi i pav i ken uningir man hanmô yô ngu a atôônanongo kuma er 20 nahan. Ka una zaan sha u za sôron atôônanongo a hen ningir na la yô, ornengen sha ningir la ngu á maan mba eren shiada u Tartor la sha u lun a ve imôngo ken tom u pasenkwagh shi tesen ne. Dugh gbenda u maan ve ne kera yô, ngu á ná ve mbamhen mba injaav sha u wasen ve u zan hemen ken tom ve la.—Aerenakaa 20:20, 21.
22. (a) Shi ka sha nyi i taver ior i Aôndo ishima kwa har ken inyom i mômô? (b) Kanyi i lehe we?
22 Igbinda i genegh i taver man shi nyôôso asema yô, kwa har ken inyom, atôônanongo a ken hanma ningir, ka a kumba ken mkohol u iyange i môm shin ahar, er i vande sôron veren la. Ken aaven ne cii ior ka ve kuma er deri uhar shin utar za ar 2,000 shin hemba nahan. Mba lôhôn we u zan mkohol u á gbé ikyua hen ningir wou la. Se fa dedoo ser u zua a kwagh u injaa man myôhôriyol u ken jijingi aluer u za mkohol la yô.
23. (a) Ka mbamkombu mba nyi i kombo kwa môm ken inyomoo? (b) Môm ken mbamkombu mban yange kehe nena?
23 Shi ka i zua mkombu u kehen hemban nahan u i yer er Mkohol u Tamen u ka i tsa i hemba ayange ahar la, kwa môm ken inyom. Hii nan u sér ian tsembelee sha er u za u za nenge kwagh u doon man u maan we ken jijingi la sha ashe a ou er mkohol u tamen la ka a lu la ga? Ken anyom a genegh yô, ka i lu mbamkohol mba tamen mbara tsô ga, kpa i lu mkohol u kehen hemban mbara shin i lu mkohol u akurakur. U hemban kehen sha won cii la ka u yange i zua ken New York City ken Agirigi u Anumbe u ior i Yankee kua ken Mbaakpur mba Polo la i tsa kuma ayange anigheni nahan ken inyom i 1958 la. Ior mba yange ve lu hen kwaghôron u ken igbar la cii, ve kuma 253,922 sha itinekwagh i “Tartor u Aôndo Tema Tor—Mkurtar Zulumu?” la. Hii hen shighe la je mba a kera zua a ijiir i kehen kuman sha imba zegeikpelaior la ga, kpa i gema i sôr ajiir ken ugar mba vesen sha ci u zuan mbamkohol mba tamen mban.
MBAMKOMBU KEN ATÔÔNANONGO
24. Ka mbamkombu utaan mba nyi atôônanongo a ior mba Aôndo ve lun a mi ken lahadi mômô?
24 Mbatamen mba shin tine mba Mbashiada mba Yehova ka ve sôr aaven aa ngohol kwaghwan u ken Bibilo u i kombu sha u ngohol un ken atôônanongo a ior i Yehova yô. Hanma tiônnongo ngu a mbamkombu mban utaan ken lahadi môm. Mbamkombu mban yô ka Makeranta u Henen Kwagh u Tom u Aôndo, Mkombu u Henen u Civir, Mkombu u ken Igbar, Watchtower u henen kua takerada u tiônnongo i tsough sha u henen la. Er i lu a vande lian we iyol a mbamkombu mban ga yô, se pase u kwagh ve asav asav.
25, 26. Awashima u Makeranta u Henen Kwagh u Tom u Aôndo man Mkombu u Henen u Civir la kanyi?
25 I ver Makeranta u Henen Kwagh u Tom u Aôndo la sha u wasen mbahenen sha u fan er vea lamen a ior leghlegh sha kwagh u tartor u Aôndo yô. Mba ve nyer makeranta shon ne mba a ian i ôron atôônakaa sha atôakaa a ken Bibilo sha ishigh ki mba ve kohol la cii, sha ashighe ashighe. A̱ been yô ortamen u kaven kwagh nan kar nan na mbamhen sha ajiir a or la nan yen shami la sha er shi nana seer wan iyol shighe u genegh yô.
26 Hen aikighe shon la je shi ka i nyôr Mkombu u Henen u Civir la. Aaven a ken mkombu ne ka i gber a ken ruamabera u i yer er Our Kingdom Ministry, u mbatamen mba shin tine ka ve vande sôron un tsembelee alun upeeji uhar shin hemban nahan u i gberen sha hanma uwer la. Ken mkombu ne ka i na mbamhen shi i tese akav a ôron kwagh a ior sha kwagh u loho u Tartor la man igbinda kposo kposo i lamen a ior. Kape Kristu kpaa yange taver mbadondon un asema shi waan ve akaa sha er vea yar tom ve tsema tsema je la.—Yohane 21:15-17; Mateu 10:5-14.
27, 28. Mkombu u ken Igbar, Watchtower u henen man takerada u tiônnongo i tsough sha u henen la cii ka mbamkombu mba nyi?
27 Mkombu u ken Igbar kua Watchtower u henen cii ka sha Lahadi. Ka i lôhô mbahev mba ve lu a isharen mbara sha u van Mkombu u ken Igbar, u ortom u nan fe kwaghôron tsema tsema ka nan na kwaghôron sha tinekwagh i ken Bibilo yô. Kpa Watchtower u henen yô ka sha mbampin mba pinen shi nan ikyar man timen sha atôakaa sha tinekwagh i ken Bibilo i i sember henen ken Watchtower u a kar la yô.
28 Er tiônnongo cii una fatyô u kohol ijiir i môm ken Iyou i Tartor la sha ci u mbamkombu mba i tese ve heen nahan kpaa yô, shi ka i kohol sha ajiir cuku cuku ken uya mbaiorov hanma lahadi sha u timen ken takerada u tiônnongo i tsough sha u henen la. Takerada u wasen u timen ken Bibilo, inja i u lu ôron heen ne nahan, a fatyô u yaren tom a mi sha u timen ken Bibilo vihin shighe kuman er ihwa i môm nahan.
29. (a) Ka u umbur ku u ana Mbakristu mba mimi ve umbur hanma inyomoo? (b) Ka unô ka ve ya bredi shi ve ma wain laa?
29 Dugh mbamkombu mban kera yô, shi Mbashiada mba Yehova mba aa icighan iyange i kohol sha hanma inyom sha u umbur ku u Yesu. Sha hiihii u yange Yesu lu sôron ian i umbur ku na la, yange kaa er: “Eren nen kwagh ne sha u umbur Mo.” (Luka 22:19, 20) Shighe u Yesu lu eren ino̱ngo̱ ne yô a ver wain man bredi u i we kwa shami ga yô sha u ve̱ lu ikyav i uma na u una va na naagh a mi sha ci u uumace la. Nahan ken inio̱ngo̱ i Umbur hanma inyom ne mbadondon mba Kristu mba i tsegh ve mba 144,000 mba ve shi asande her mbara ka ve tese ishimaverenkeghen ve i yemen sha la sha u yan bredi shi man wain la.
30. (a) Shi ka unô ka ve tema sha u Umbur ku shono, man ishimaveren ve ngi nena? (b) Yesu pase kwagh u anzaaior la nena?
30 Ior mbagenev umiliôn mba ka ve lu hen iniongo i Umbur ken Iyou i Tartor la tar sha won cii yô ka i saan ve iyol u nengen a nenge. Ve yô kwagh ne ka u umbur ve kwagh u Yehova Aôndo man Yesu Kristu yange ve er sha u yiman ve ken ikyangenev mbi isholibo man ku yô. Kpa u veren ashe keghen u za lun uma sha la yô, mba aa iember a ishimaveren i va lun uma gbem sha won ken paradiso shin tar. Ve mba er Yohane U Eren Batisema, u yange ôr kwagh sha iyolna er un ngu “ikar u orkwasehe” la kpa un ngu môm ken ikyum i kwasehe u Kristu u a lu alegh 144,000 la ga la nahan. (Yohane 3:29) Ior mba ve lu umiliôn mban mba ken “iyôngo igen” i yange Yesu ôr kwagh u i la. Ve mba alegh aa “ikumuile u kpeghee” la ga. Nahan, kpa er yange Yesu vande kaan nahan, mba ken mcivir môm a mba ve lu ken “ikumuile u kpeghee” la, nahan ve cii ve “hingir ikum i môm.”—Yohane 10:16; Luka 12:32.
U CIVIR AÔNDO A NONGOIOR NA
31. Kanyi ikav i lu i tesen er mba ve tem ken kwaghaôndo u aiegh kpa shi ve kaan er ve mba ken nongoior u Aôndo la a lumun a ve ga?
31 Wanger waeng sha u fan ér, di vough er sha ashighe a tsuaa la kpa i lu nahan, nyian kpa Yehova Aôndo ngu a nongoior shin tar ne! Ngu eren tom a u hegen sha u tesen ior mba vea va lu uma ken msertar u he u perapera la. Nahan cii kpaa, se fatyô u lun ken nongoior u Aôndo, shi lun ken kwaghaôndo u aiegh, shighe môm ga. Mkaanem ma Aôndo kaa er: “i de zough ne ken mzough u kpeegh sha igbur i môm a or u nan ne jighjigh ga, imôngo ga. Gadia perapera zua vea ifer sha nyi? Shin ka nyi mzough i lu hen iwanger a ime? . . . Shin ka sha nyi man kwagh u or u nan ne jighjigh a zua a u nan ne jighjigh ga laa?” Nahan Aôndo na tindi er: “Nahan yô, due nen ken atô ve kera, lu nen kposo.”—2 Mbakorinte 6:14-17.
32. (a) Aluer gba u se ‘due ken atô ve kera’ yô, kanyi se er keng-e? (b) Aluer se lumun u civir Aôndo a nongoior na u shin tar ne nahan kanyi iveren se va zua a mini?
32 U kaan er “due nen ken atô ve kera” la inja na nena? Inja na yô, se fatyô u kaan ser se mba wan tindi la ikyo ga aluer se mba môm ker, shin se mba nan iwasen hen nongoior u kwaghaôndo u genegh, kera ka u Yehova Aôndo a lu yaren tom a u la ga yô. Nahan aluer mô wase nan ngu ken imba nongoior u kwaghaôndo la heregh yô, ka u se nger ve kwagh ser se soo u duen ken a ve kera. Aluer se due kera ken mba ve eren kwaghaôndo u aiegh mbara shi se tôô ieren i civir Aôndo a nongoior na u shin tar ne yô, se va lu ken mba Aôndo a er kwagh ve la er: “Me tema hen ve shi Me zenden hen atô ve kpaa, Me lu Aôndo ve, ve kpaa vea lu nongoior Wam.”—2 Mbakorinte 6:16.
[Mbampin Mba Ngeren u Henen]
[Foto u sha peeji 192 la]
Ken shighe u Mngerem ma Deemee la, yange Aôndo lu aa nongoior hemba mômôô?
[Ufoto mba sha peeji 196 la]
IJIIR I SHIN TINE I MBASHIADA MBA YEHOVA SHA TAR CII
AFISHI A VESEN
Iyagh ki Kômputa
IJIIR I GBEREN ITYAKERADA KEN BROOKLYN
Injin u Gberen Ityakerada
Ijiir i Maghen Ityakerada
Ijiir i Tindin a Mi
[Ufoto mba sha peeji 197 la]
AJIIR A GENEGH KPISHI A GBEREN ITYAKERADA A WATCH TOWER
Brazil
England
South Africa
Wallkill, New York
Canada
[Pictures on page 198]
Iorov mbagenev mba 253,922 ken mkohol u vesen u Mbashiada mba Yehova ken gar u New York
Mbaagirigi mba Polo
Ikpur i Yankee
[Foto u sha peeji 201]
Kwaghôron u Bibilo u taver ishima ken mbamkombu mba Mbashiada mba Yehova
