Ityough 2

Orihyom u Uma u Tsôron

1. Er msaanyol man bem ve fe lun ga yô, ka mbampin mba nyi ve dughu?

MSAANYOL shin tar—shi cuku hanmaor yô ma nan soo. Kpa hii nan ior kpishi ve lu saan saan ga? Kanyi i nzughulu? Er ior kpishi ve soo bem yô, hii nan akuraior a nenge ityav shi hii nan ior ve ker ihyom ayol a ve? Ma tahav mbu mgbeghan ve u eren ubombaakaav mban shinii? A fatyô u kaan er ma tahav mbu i nengen a mi ga mbu kôôm akuraoir shinii?

2. Ka aferakaa aa nyi ior kpishi ve kpilighiyol, er shin ma tahav mbu i nengen a mi ga mbu kôôm uumacee?

² Kwagh ne kpiligh ior iyol kpishi zum u ka vea hen sha anzaabo a cieriyol a or-umace yô—ahumbe a bo a cieriyol a i nenge ityav a mi sha u nanden ior la, kua ubom mbaiusuv kua ubom mbavihin ahumbe. Shi nenge a se, akaa a hemben yeghen usu, a i keren ken atô u afo a mbakwarev, kua atsanaior umiliôn kpishi mba i woo ve la, ken ajiir er ijiir i ngise lu Cambodia la nahan ken anyom a karen la. U hen wer aferakaa ne cii nga gbe eren abu tsôô? Kera kpa or iyol i nan nan ngu a tahav u eren akaacieriyol, zum u ka wea time sha ubombaakaav mba nan yô, kau er ma tahav mbu iferev mbu̱ i nengen a mi ga, mbu mgbegh nan ga he?

3. Bibilo i kaa er nyi sha kwagh u mtemtor u tar nee?

³ Ka a inja u keren ahaba sha kwagh ne ga. Bibilo i tese er orfankwagh u i nengen a na ga yô ngu eren tahav sha ior kua akuraior kpaa. Ken Bibilo yô, Yesu Kristu yila orutaha ne er “tor u tar ne.” (Yohane 12:31; 14:30; 16:11) Ka ana?

4. Yange Diabolo tese Yesu nyi, shi yange na un nyi akaa?

⁴ Sha u wasen se u fan or shon yô, hen sha kwagh u yange er shighe u Yesu hii tom hen tar ne la. Bibilo i kaa a vese er mba eren Yesu batisema mba been kera yô á yem ken taaikyôngo ken ape Diabolo Satan mee un la. Vegher u imeen la i pase er: “Shi  diabolo yem a Na sha gôgôwo u taven tsung, tese Un ityartor i sha won cii kua icivir i i, tsô a kaa a na er: Akaa ne cii me na U, aluer Wea gure inya, Wea civir mo yô.—Mateu 4:8, 9.

5. (a) Kanyi i tese er alaghga ugomoti mba tarev cii ka kwagh u Diabolo? (b) Er Bibilo i kaa yô, ka an nan lu “aôndo u tar u ainge ne”?

⁵ Hen a se sha akaa a yange Diabolo na Yesu Kristu la. Yange na un “ityartor i sha won cii.” Yange ugomoti mba tar ne cii lu mba Diabolo jim kpa? Een, gayô á hii nan una na Yesu ve? Yange Yesu venda er ka mba Satan ga yum ga, yange ma venda luun er ka mba Satan ga yô. Nahan Satan ka tor u akuraior a tar ne cii u̱ i nengen a na gayô! Bibilo i pase waeng er: “Tar cii ngu sha ikev i Orbo.” (1 Yohane 5:19) Mkaanem ma Aôndo yila Satan er “aôndo u tar u ainge ne.”—2 Mbakorinte 4:4.

6. (a) Mkaanem ma sha kwagh u mtemtor u Satan ne wase se u kaven nyi kwagha? (b) Kanyi Satan á soo u eren á vese, nahan kanyi se eree?

 ⁶ Kwagh ne wase se u kaven ityôikyaa i yange Yesu kaa wen-er: “Tartor Wam ka u shin tar ne ga” la. (Yohane 18:36) Shi kwagh ne wase u kaven er i hii man akuraior a lu a ihyom hen atô u a shi a nenge u timin ayol a ve kpa i gem i lu isharen i hanmaor u nan lu sha mar u nan u lun ken bem la. Een, “Satan . . . u a lu tsughun tar cii la.” (Mpase 12:9) Se kpaa a soo u tsughun se. A soo er se̱ ngohol iyua i Aôndo i uma u tsôron la ga. Nahan ka u se nôngo sha er a de meen se se̱ eren kwaghbo ga yô. (Mbaefese 6:12) Doo u fan Satan jim kua m-ertom na sha er se hendan a na yô.

OR U DIABOLO A LU YÔ

7. Er nan se fatyô u nengen a Diabolo ga?

⁷ Diabolo Satan ngu jim. Ka ifer i ken orumace, er mbagenev ve ne jighjigh nahan la ga. Kpa, uumace vea fatyô u nengen a Diabolo ga, vough di er vea fatyô u nengen a Aôndo ga nahan. Aôndo kua Diabolo cii ka ujijingi, mlu ve se fatyô u nengen a mi sha ashe ase angan ga.—Yohane 4:24.

8. Ka sha ci u nyi ior kpishi ve ne jighjigh er Aôndo yange gba Diabolo?

⁸ ‘Kpa aluer Aôndo ka dooshima yô,’ orgenegh nana pine nahan er, ‘hii nan yange gba Diabolo?’ (1 Yohane 4:8) Kwagh ngu, Aôndo yange gba Diabolo ga. Kpa orgenegh nana kaa er, ‘Aluer ka Aôndo á gbe hanmaor yô, Diabolo kpa ka un a gbe ye. Ga yô ka ana? Diabolo va hana?’

9. (a) Mbaityomov ka unô ioro? (b) Inja i “diabolo” man “satan” er nyi?

⁹ Bibilo i pase er Aôndo yange gba ujijingi kpishi, kpishi je mba lun er un nahan. Ken Bibilo yô, i yila ujijingi mban er mbatyomov. Shi ka i yila ve er “ônov mba Aôndo.” (Yobu 38:7; Upasalmi 104:4; Mbaheberu 1:7, 13, 14) Yange Aôndo gba ve vough. Mô ve môm tsô nan lu diabolo, shin satan ga. Ishemberti i “diabolo” ne inja na er or-msende shi “satan” inja na er orhendankwagh.

10. (a) Ka an nan gbe Satan u a lu Diabolo laa? (b) Or u dedoo nana hingir iferor nena?

¹⁰ Kpa shighe ze yô, môm ken ônov mba Aôndo mba ken jijingi mban hingir Diabolo iyolna, inja na yô, ka oraie u ôron ubombaakaav sha iyol i orgenegh. Shi á hingir Satan iyolna, ka orhendan kwagh a Aôndo je la. Yange i gba un la lu nahan ga, kpa ken hemen yô hingir injaor la. Ikyav i tesen: Mba maren a mar ormbaiv ga. Alaghga nan due ken tsombor u dedoo, mbamaren mba nan kua anmgbianev mba nan mbanomso man mbakasev cii mba ior mbamimi shi mba we tindi ikyo kpaa. Kpa ka isharen i zuan a inyaregh ki yamen kwagh a mi la i ne un á hingir ormbaiv ye. Sha kwagh ne yô, môm ken ônov mba Aôndo mba ken jijingi yange hingir Diabolo shin Satan iyolna nena?

11. (a) Ka awashima u Aôndo u nyi yange orityom u hembanato la vande fana? (b) Orityom ne yange vande lun a isharen i nyi, nahan i na un er nena?

¹¹ Orityom u yange hingir Diabolo la yange lu shighe u Aôndo gba tar shi va gba mbahiihii kpaa la, ka Adam vea Ifa je la. (Yobu 38:4, 7) Yange ungwa e̱r Aôndo yange kaa a ve er ve̱ maren ônov yô. (Genese 1:27, 28) Yange fa er shighe kpeghee yô tar cii ua iv a mbaperapera mba civir Aôndo. Lu awashima u Aôndo je la. Nahan cii kpaa, orityom ne hen sha zegemdooashe na u tsuung kua kwaghfan na la nahan hemba soon u ngohol icivir i Aôndo la hingir i na. (Esekiel 28:13-15; Mateu 4:10) Sha u yange ma dugh isharen i bo ne kera ken a na yô, zer henen shami gbem. Kwagh  ne na un hingir u keren gbenda u zuan a icivir sha isharen na la. Yange er nena?—Yakobu 1:14, 15.

12. (a) Yange orityom ne lam a Ifa sha nyi gbenda, shi yange kaa a na er nyi? (b) Yange orityom ne hingir Satan Diabolo nena? (c) Mluashe u shami ga sha kwagh u Diabolo kanyi?

¹² Tsô orityom u hembanato ne nyôr ken iyô i lam a kwase u hiihii, ka Ifa je la. Yange er kwagh ne vough er or u fankwagh kpaa nana highir imo ia due er ka ma zendeinya shin atoki nga lamen nahan. Kpa lu orityom u hembanato ne lu lamen ye, u̱ i yer iti na ken Bibilo er “tseyô” la, yange lu lamen a Ifa ye. (Mpase 12:9) Yange kaa a na er Aôndo yange ôr un kwagh u mimi ga, shi lu nyumen un kwaghfan u ma na un la. (Genese 3:1-5) Kpa kwagh ne cii lu aie ka nahan á hingir diabolo iyolna ye. Shi á hingir orhendan a Aôndo, shin Satan. Er u nenge heen nahan, u henen er Diabolo ka inyamakor i lun a ityumugh ki horon u á nengen sha ijiir i yan ican shin tareghnyaagh la ka shami ga. Kpa un ka orityom u á lu a tahav kpishi, kpa á gem a we ifer yô.

MHII U MBAMZEIYOL MBA TAREGH

13. (a) Yange Ifa na ikyar sha aie u Diabolo la nena? (b) Kanyi akaa a sha aie yange Diabolo ôrôô?

¹³ Aie u yange Diabolo ôr a Ifa la za kule sha awashima na vough. Yange na un jighjigh gema hemba Aôndo ato. Shi a na nom na kpa hingir u peren tindi u Aôndo. (Genese 3:6) Diabolo yange kaa er aa Aôndo shio kpaa uumace vea fatyô u kulen ugbayol vev. Shi a kaa er ior vea fatyô u hemen ayolave tsembelee, a iwasen i Aôndo shio kpaa. Shi Diabolo kaa er tsombor u Adam vea Ifa cii una fatyô u geman ve kera hen Aôndo.

14. Ka sha ciu nyi yange Aôndo tim Satan her je ga?

¹⁴ Mimi je, Aôndo yange ma tim Satan her je. Kpa yange iwanger ma i va sha mbampin mba Satan yange pine la ga, lu mbampin mba lun ken asema a mbatyomov mba ve lu nengen mbara. Nahan Aôndo na ian er Satan á nôngo á yar tom sha mkaanem nam mela. Nahan za nena?

15, 16. (a) Ken shighe u á kar ne tese nyi sha akaaôron a Diabolo laa? (b) Kanyi kwagh i mgbôghom u erene?

¹⁵ Shighe u a kar ne tese er uumace vea fatyô u hemen ayolave  tsembelee a iwasen i Aôndo shio ga. Uiniôngon vev mbara cii gba shami ga. Ior ya atsan a cieriyol sha ikyev i ugomoti mbaiorov, sha ityesen i Diabolo, vough er Icighanruamabera a tese nahan. Shighe u Aôndo a ne la tese waeng er Satan kera fatyô u yangen ior u civir Aôndo ga. Sha hanma ian cii ior ka ve lu mba tilen sha jighjigh ken hemen u Aôndo. U tesen ikyav yô, ú fatyô u ôron ken Bibilo ape i kaa er, yange Satan nôngo kpogholoo je, sha u una yange Yobu á de civir Aôndo ga yô, kpa fatyô ga.—Yobu 1:6-12.

¹⁶ Nahan mkaanem ma Diabolo cii due ken aie. Hegen a kuma ku er i lu un yange hii ifer sha u hemban Aôndo ato yô. Saaniyol, gadia se nyôr ken shighe u Aôndo una va a mkur sha mtemtor u Satan yô. Mpase u hiihii u sha kwagh ne yô, Bibilo i pase ityav mbi hange hange mbi mbi gba sha la, mbi ior mba shin tar ne yange ve fatyô u nengen shin u ungwan ayôôsu a mbi ga la. Yô ôr ase avura Bibilo ne:

17. (a) Bibilo i na mpase sha kwagh u ityav mbi shaav mbila nena? (b) Kanyi yange i er mba shaav mbaraa, man mba shin tar di ye?

¹⁷ “Tsô ityav gba Sha, Mikael [Yesu Kristu u i nder un shin ku la] kua mbatyomov nav lu nôngon a darakon. Darakon a mbatyomov nav kpaa lu nôngon, kpa a hemba ga, ian kera lu sha ci ve Sha kpaa ga. I gbihi zegedarakon la shin inya, ka tseyô je la, u i yer un er Diabolo man shi Satan la, u a lu tsughun tar cii la, i gbihi un shin tar shi  i gbihi mbatyomov nav a na imôngo kpaa. Nahan yô, ember nen ne Usha, man shi ne mba ne tem ker kpaa. Kpa kwagh á gema á tser tar man zegemnger gadia diabolo sen shin ven, ishima vihi un tsung gadia a fa er shighe na a kera vese ga yô.—Mpase 12:7-9, 12.

18. (a) Ityav mbi shaav mbila nôngo hanma shigee? (b) Er yange i “gbihi” Satan shin tar je kanyi i lu zan hemene?

¹⁸ Ka hanma shighe ityav mbin yange mbi pev sha? Ikyav tese er ka shighe u Ityav mbi Tar cii Mbi sha I mbi yange mbi hii ken 1914 la. Vough er Mpase a kaa nahan, ka hen shighe la yange i zenda Satan shaala ye, inja na yô se mba ken ayange a “shighe na a kera vese ga” la. Ka u kaan er angan ka “ayange a masejime” a tar u Satan je ne. Mseer u mbavendanatindi, mciem, ityav, myina u kwaghyan, iangev kua mbamlu mba nyianshima mba ve kohol se mban cii tese nahan.—Mateu 24:3-12; Luka 21:26; 2 Timoteu 3:1-5.

19. (a) Satan ngu nôngon taveraa hegen u eren nyi? (b) Nahan doo u se er nyi?

¹⁹ Er Satan á fe er “shighe na [u] a kera vese ga” ne ngu nôngon u been yô, ngu nôngon tsuung je sha u yangen ior sha er ve̱ de civir Aôndo ga yô. A soo u yemen a ior kpishi er una fatyô la cii sha u za timin a ve imôngo. Sha ityôikyaa ne yô Bibilo kaa er ngu zenden er begha u tan kume nahan keren or u una ya yô. (1 Peteru 5:8, 9) Aluer se soo ser á imbishi se ga yô, gba u se hen sha u fan igbinda na i hônon kua i a tsughun ior a mi la kpaa.—2 Mbakorinte 2:11.

ER SATAN A TSUGHUN IOR LA

20. (a) Ityav mbi Satan mbi zan nena? (b) Ka sha ciu nyi se penda ishima ser ashighe kpishi mbamhen nav vea doo u nengen, shin u lun a iwasen je kpaa?

²⁰ De henen wer atseregh a Satan a tsughun ior a mi la nga lun ken igbar u̱ nengen a mi hanma shighe ga. Hoor un iyol u tsughun ior. Igbindatom na i ken anyom udubu kpishi la na yô, ngu felefele je yô ior mbagenev na jighjigh er ngu ga. Hen a ve yô iferkwagh cii ka kwagh u i gbe u lun a mi hanma shighe yô. Myartom u Satan ngu vough er mbahemenev mbaiferev mba hen ayange-ne, mba ka ve lu a icivir ken woniyolough, kpa ken iuv yô, ve eren aferakaa la nahan. Bibilo pase er: “Satan je kpaa ka a gema iyol na er ka ortyom u iwanger nahan.” (2 Mbakorinte 11:14) Nahan  gba u se fa ser ayom a na a tsughun ior la aa luun waeng sha ashe, shi a luun a iwasen kpaa.

21. Ka hanma gbenda môm Satan á lu yaren tom a mi?

²¹ Umbur yange Satan za hen Ifa er ka huror na nahan. Tsô a bume un un kpaa er kwagh u yange hen er una lu un a iwasen la. (Genese 3:4-6) Nyian kpa ka nahan. Ikyav i tesen, Satan ngu a mgbegha ior sha atseregh sha ikyev i mbatomov nav mbara nahan isharen ve cii i har sha u civir ugomoti mbaiorov i hemba Aôndo. Ka nahan jijingi u ka tar wase je ne la kpaa a lu shi i nenge ityav mbi cieriyol kpaa ye. Ken ashighe a a kar la Satan na ior mhen sha u ve̱ ker igbinda i van a bem man mkpeiyol yô. Môm ken igbinda ne yô ka Mzough u Akuraior Cii la. Kpa á va tar á bem kpa? Ga cii! Kpa gema ka kwagh u tôôn ior asema kera sha ago a Aôndo a lu wan sha u van or-umace a bem, sha mve u tartor na la sha ikyev i Yesu Kristu, “Wantor u Bem.”—Yesaia 9:6; Mateu 6:9, 10.

22. Kanyi mfe Satan a soo er se de luun ami ga?

²² Aluer gba u se zua a uma u tsôron la yô, saa se zua a mfe u mimi u Aôndo, shi Wan-Tor na kua tartor na. (Yohane 17:3) Fa dedoo wer Diabolo shin Satan soo er we u de zough a kwaghfan ne ga, nahan una er tom sha tahav nav cii sha u yangen we u zuan a mi. Una er nena? Gbenda u genegh yô ka u van we a tôvaican, alaghga á lu sha tarnahan u ior. Bibilo i kaa a vese er: “Man mba i sar ve pe zenden sha mciviraôndo ken Kristu Yesu cii, á tôv ve a ican.”—2 Timoteu 3:12.

23. (a) Satan una mgbegha ahuraior shin anmgbianev er ve̱ tule se nena? (b) Ka sha ciu nyi i doo u yinan ishima sha mbaahendanev ga?

²³ Man alaghga a lu uijende ough mbara shin mba ve we ndor a we je vea kaa a we er ve ve lumun a mtime wou u timen ken Icighanruamabera la ga ye. Yesu Kristu iyolna kpa vande ôron er: “Man mba ken ya u or vea gema vea lu mbaihomov mba nan je. Or u ter u nan shin ngô u nan a hembe doon nan ishima a Mo yô, nan kuma ga; man shi or u wan u nan u nomso shin u kwase a hembe doon nan ishima a Mo yô, nan kumam ga.” (Mateu 10:36, 37) Mba ve we ndor a we vea ker gbenda u̱ kpen we iyol, vea er nahan sha ishima i môm je sha ci u ve kera fa akaa a mimi a a lu ken Bibilo la ga. Kpa aluer u de u timen ken Mkaanem ma  Aôndo sha ci u mbaahendanev ough mbara yô, Aôndo una nenge sha kwagh wou nena? Shi aluer u gba uwer yô, á wase ahuraior kua mbadoon we ishima mbara sha er vea kav mfe u mimi u Bibilo u a lu kwagh u injaa u uma-man-ku la nena? U kôron akaa a u hen kwagh sha a ken Mkaanem ma Aôndo la á va lu iwasen sha u ulugh ve sha er ve kpaa vea va hen mimi yô.

24. (a) Ka igbinda i genegh i nyi Diabolo á meen ior sha u ve̱ gbihi mfe u zuan a uma la kera? (b) U hen wer ka a inja u henen Mkaanem ma Aôndo sha nyi?

²⁴ Sha vegher u genegh yô, Satan shi una lu meen we sha u eren udaengmbaakaav, mba Aôndo a soo ga la. (1 Mbakorinte 6:9-11) Shin una nau sha u henen wer ian yinau i timen ken Bibilo. Kpa aluer u hen ken ishima tsembelee yô, makwagh u injaa u hemban u zuan a injakwaghfan ne ngu je kpa? De naan ian wer makwagh a yangeu u zuan a kwaghfan u una hemen we u va ngohol uma u tsôron ken paradiso shin tar ga!

25. Aluer se mba hendan a Diabolo nahan, kanyi una kanshio u eren se?

²⁵ Bibilo i wa kwagh er: “Hendan nen a diabolo.” Aluer ne er nahan yô, “una yevese ne.” (Yakobu 4:7) Ka u kaan er aluer u hendan a Satan yô una kera vau a zaiyol ga shinii? Ei, una za hemen u karen we sha ashighe ashighe sha er una ulugh we sha er u̱ er ishima na yô. Kpa aluer u ngu hendan a na heregh yô, una fatyô u meen we sha u zan sha gbenda u hendan a Aôndo ga. Nahan yô, lu tsevaa sha u zuan a kwaghfan-u-hemban u ken Bibilo shi zenden sha aeren a u hen kwagh sha a la. Ka a inja nahan sha u yangen icugh i genegh i Satan a tsum a ior shami la, ka kwaghaôndo u aiegh je la.

[Mbampin Mba Ngeren u Henen]

[Foto u sha peeji 16, 17 la]

Yange Satan ma fatyô u nan Kristu ityartor ne cii aluer ka i na ga kpa?

[Foto u sha peeji 19 la]

Ormbaiv ne yange i mar un lu ormbaiv ga, vough er Diabolo kpaa yange i gba un lu “diabolo” ga nahan

[Foto u sha peeji 20, 21 la]

Ityav mbi shaav mbila bee sha mgbihi u i gbihi Satan kua azôv shin tar la. We kpaa ka zan we iyol hegen

[Foto u sha peeji 24 la]

Alaghga ahendan aa lu sha mzehemen wou u henen Bibilo la