Sha ci u Tar u Satan, Shin Msertar u He u Aôndo?
Ityough 25
Sha ci u Tar u Satan, Shin Msertar u He u Aôndo?
1. Kanyi jim i tese er we u ngu sha ci u msertar u he u Aôndo?
U NGU SHA ci u msertar u he u Aôndo la, shi u soo wer á vaa? U kôr Satan ihyom, shi u soo wer tar na ne u kar kera kpa? Sha mbampin mban cii alaghga u kaa wer, Een. Kpa ngura tseegh kuma kpa? Kwaghôron u genegh u mbayiase kaa er ieren i hembe kaan taver a kwaghôron. Aluer wea na jighjigh a msertar u Aôndo yô, ka sha gbenda u u eren a uma wou la ua tese mimi wou ye.—Mateu 7:21-23; 15:7, 8.
2. (a) Ka uter uhar mba nyi se fatyô u eren ve tomo? (b) Kanyi i tese or u se lu kpan u nan, shin or u se lu eren nan tomo?
2 Mimi u sha kwagh ne yô, gbenda u uma wou la ua fatyô u doon or môm tseegh ken atô u uter uhar. Aluer wea lu civir Yehova Aôndo ga yô a lu Diabolo Satan. Iôronkwagh i genegh ken Bibilo ia wase se u kaven kwagh ne. I kaa er: “Ne kera fa gaa? Aluer ne na ayol a en sha ikev i kwagh sha u lun ikpan na man shi u ungwan imo na yô, ne mba ikpan i kwagh u ne ongo imo na la.” (Mbaromanu 6:16) U ongo imo i ana? U eren ishima i ana? Wea na ikyar ia lu nena, kpa aluer u ngu dondon igbinda i ifer i taregh yô ka Aôndo u mimi Yehova u civir ga.
TAR U SATAN—KA NYI?
3. (a) Bibilo i tese er ka an nan lu tor u tar nee? (b) Yange Yesu tese mkposo u tar man mbahenen nav ken msen na nena?
3 Yange Yesu yila Satan er “tor u tar ne.” Shi apostoli Yohane kaa er “tar cii ngu sha ikev i Orbo.”(Yohane 12:31; 1 Yohane 5:19) Fa wer ken msen na hen Aôndo la Yesu yange wa mbahenen nav ken vegher u tar u Satan ga. Yange kaa er: “M ngu eren msen sha ci ve [ka mbahenen nav je la]; ka sha ci u tar M eren msen ga . . . Ve mba ior i tar ne ga, er Mo kpaa M lu or u tar ne ga nahan.” (Yohane 17:9, 16; 15:18, 19) Kwaghôron ne tese waeng nahan er Mbakristu mba mimi yô ka u vea lu paleghaa aa tar ne.
4. (a) Ken Yohane 3:16 la, kwagh u i yer er “tar” la ngu tesen sha nyi? (b) Ka “tar” u nyi i gbe u mbadondon mba Kristu vea paleghaa?
4 Kpa kanyi yange Yesu lu ôron kwagh yilan er “tar” jimi? Ken Bibilo yô kwagh u i yer er “tar” la ashighe kpishi ka i lu uumace cii. Yange Aôndo tindi Wan na va na uma na hingir ipaa sha ci u tar uu uumace cii. (Yohane 3:16) Kpa ka uumace mban je Satan a kohol ve kpishi ve hingir mbahendan a Aôndo ye. Nahan tar u Satan yô ka uumace mba a kohol ve tihi môm ve lu paleghaa shin ve lu ken nongoior u Aôndo shin tar ne ga la. Ka tar shon u Mbakristu mba mimi vea palegh je ne.—Yakobu 1:27.
5. Vegher u tar u á hembe lun u vesen la kanyi, shi kanyi i til sha ityough nagh ken Bibilo?
5 Tar u Satan—uumace mba a kohol la—ka atôôn kposo kposo a a zough ikyua ikyua ayol a ve yô. Tiôn u a lu tseer tseer keregh yô ka kwaghaôndo u aiegh. Ken Bibilo yô i tese ikyav i kwaghaôndo u aiegh sha “zegeidyakwase,” shin gbaga, aa iti i “Zegebabilon” iyol. Un ka zegegar, u i tese er ngu a “tahav sha utor mba shin tar yô.” (Mpase 17:1, 5, 18) Kpa kanyi i tese er Zegebabilon la ka zegegar u kwaghaôndo shin tara?
6, 7. (a) Kanyi i tese er Zege Babilon la ka zegegar u mba eren kwaghaôndo? (b) Mlu u kwaghaôndo u aiegh man u ugomoti mbapativ ngu nena?
6 Er i kaa er “utor mba shin tar” ve “er idya” a na yô, Zege Babilon la á fatyô u lun zegegar u mbaeren pati ga. Shi er i kaa er “mbaeren kasua” mba shin tar ve tile ca mba vaan zungwen mtim na yô, un ka zegegar u mba eren kasua ga. (Mpase 17:2; 18:15) Nahan kpaa, er a lu zegegar u mba eren kwaghaôndo yô Bibilo tese ikyav sha kwaghôron u i kaa la er “akuraior cii tsume sha ahir a ou la.”—Mpase 18:23.
7 Shi u tesen er Zege Babilon la ka zegegar u mba eren kwaghaôndo yô ka mlu na a “inyam” la. Ken Bibilo yô anza a inyam la ngá til sha ityough ki ugomoti. (Daniel 8:20, 21) I pase er Zege Babilon ne “tema sha inyam i nyian bong, . . . lu a ityouv itiankarihiar man akor pue.” Ngu vanden nôngon taveraa je sha u ulugh “inyam” la, shin gomoti u tar ne hiden a mi ken ikyum na. (Mpase 17:3) Man ka mimi ken ashighe ne cii kwaghaôndo nungwa sha pati, sha ashighe kpishi je ka a lu ôron ugomoti kwagh u ve̱ er yô. Man sha kpôô yô kwase ne ngu “a tahav sha utor mba shin tar.”—Mpase 17:18.
8. Shi vegher u vesen u tar u Satan u genegh kanyi, shi i tese ikyav sha a ve ken Bibilo nena?
8 Ugomoti mba pativ mban ka vegher u vesen u genegh u tar u Satan. Er se vande nengen nahan, ken Bibilo yô inyamikyume tile sha ityough vev. (Daniel 7:1-8, 17, 23) Shi ugomoti mba ve bee inyamikyume sha aeren a ve yum ne ve ngohol tahav vev hen Satan er mpase u apostoli Yohane nger la á tese nahan: “Tsô m nenge inyam due shin zegemnger lu a akor pue man ityouv itiankarihiar. . . . Darakon gema na i agee a na man shi ikyônough nagh ki torough man shi tahav mbu vesen kpaa.” (Mpase 13:1, 2; 12:9) U fan er ityartor ne, shin ugomoti mban, mba vegher u Satan yô ka sha er yange Satan mee Yesu sha u nan un ityartor shon ne yô. Yange Satan ma er nahan ga luun er una lu tor ve ga yô.—Mateu 4:8, 9.
9. (a) I pase vegher u genegh u tar u Satan ken Mpase 18:11 nena? (b) Kanyi ve eren shi ve kenden a mi sha, sha u tesen er Satan ngu ken jime ve?
9 Vegher u tar u Satan u genegh u̱ á lu tseer tseer yô ka mbakasua mba huav, mba i er kwagh ve ken Mpase 18:11 er “mbakasuav mba shin tar” la. Mbakasuav mban mba kenden a isharen ken ior sha u ve̱ yam ikyav vev mbila, aluer vea soo mbi ga shin a gba u ma i hembe kpen ve iyol a mbi shio kpaa. Shi mbakasuav mbahuav mban ka ve yer kwaghyan ken iuna i koson la ve na ior umiliôn kpishi ve kpe injen sha ci u ve feityô u yamen kwaghyan la ga yô. Vegher u genegh yô, mba varen ikyav mbi uityaav mbi mbia fatyô u timin tsombor u uumace cii yô shi mba teen mbi sha u zuan a mtsera kpaa. Nahan mbakasuav mba Satan, a kwaghaôndo u aiegh kpa shami kua ugomoti mbapativ cii, mba kenden aa isharen i wan orgenegh ikyo ga la, kua ifer man ityav mbi cieryol kpaa.
10, 11. (a) Ikyav i genegh i tar u Satan kanyi? (b) Ka icintan i nyi Bibilo i te sha u palegh u nyôron ken akaa shono?
10 Mzough u uumace sha ikyev i Diabolo Satan ne ka u ifer man u hôôn kpaa. Hendan a atindi a Aôndo a perapera la, man á mgbough a hanma ieren i hôngorough cii. Nahan vegher u genegh u tar u Satan yô á fatyô u kaan er ka uma u jimbagh, ka aeren aa sha gbaaôndo ga je la. Sha ityôikyaa ne yô apostoli Paulu kua Peteru kpaa yange ve wa Mbakristu kwagh er ve̱ palegh aeren a bo aa akuraior la.—Mbaefese 2:1-3; 4:17-19; 1 Peteru 4:3, 4.
11 Shi, apostoli Yohane kpaa yange na kwaghwan taveraa hen Mbakristu sha u ve̱ kura ayolave sha asaren a sha mhange u iyol kua igbinda i jimbagh i taregh. Yange nger er: “Tar u̱ de kera doon ne ishima ga shin akaa a lu shin tar tsô kpaa ga. Aluer anti or tar ua doo nan yô, dooshima u Ter ngu ken a nan ga. Gadia akaa a a lu shin tar cii, isharen i iyolough, man isharen i ashee man ihyagh i uma ne, ka a Ter ga, ka a taregh tsô.” (1 Yohane 2:15, 16) Yange orhenen Yakobu kaa er ‘aluer or soo u yan ikyar aa tar yô, nan hingir orihyom u Aôndo je ve.’—Yakobu 4:4.
U PALEGH U LUN VEGHER U TAR NE
12, 13. (a) Yange Yesu tese er Mbakristu vea lu shin tar ne keng nena? (b) Vea lu shin tar kpa vea lu mba tar ne ga nena?
12 Ken ayange a tar u Satan u lu heregh ne cii, ka keng Mbakristu vea lu shin u. Yesu yange tese nahan zum u yange lu eren msen hen Ter na la er: “M ngu eren msen Mer: Kura ve shin tar ne kera ga.” Shi Yesu za hemen u sônon sha ci u mbadondon un er: “Ve mba ior i tar ne ga.” (Yohane 17:15, 16) A hii nan vea lu shin tar u Satan ne kpa vea lu ior i u ga?
13 Ka shami, we u ngu hen atô u ior mba ve lu ken tar u hegen ne yô. Ken a ve yô ka mbaidyarev, mba eren hua man mba eren aferakaa a genegh. Alaghga u yaren tom a ve, shi u ze makeranta a ve, shi u ye kwaghyan a ve, kua ityom i genegh wue wue. (1 Mbakorinte 5:9, 10) Shi gba u vea doou ishima, er ve doo Aôndo ishima nahan. (Yohane 3:16) Kpa Orkristu u mimi yô ka u una soo aferakaa a ior ve eren la ga. Nana nengen ken aeren a ve la ga, shi nana har ishima sha akaa a uma ne er ve ga. Shi nana lu ken kwaghaôndo kua ityom ve i pati i hôôn kera la ga. Man er i gbe keng u nana lu eren tom u zuan a kwaghyan je kpaa, nan yô nana kera eren kpenga sha anyighe er ve nahan ga; shi kwagh u vesen ken uma u nan la á lu u keren uyôghyôghmbaakaav ga. Kpa er nan lu sha ci u msertar u he u Aôndo la yô, nana palegh uijende mbabov mba ve lu sha ci u tar u Satan ne. (1 Mbakorinte 15:33; Upasalmi 1:1; 26:3-6, 9, 10) Aluer kwagh ngu nahan yô, nan ngu ken tar u Satan ne kpa nan ngu or u u ga.
14. Aluer we u ngu sha ci u msertar u he u Aôndo yô, kanyi tindi u Bibilo u wa ikyo shamini?
14 We di ye? U soo u lun or u tar u Satan nee? Shin u ngu sha ci u msertar u he u Aôndo laa? Aluer wea lu sha ci u msertar u he u Aôndo yô, gba kpee u lun paleghaa aa tar, kua kwaghaôndo u aiegh kpaa. Ungwa tindi ne: “Nongoior Wam, due nen ken a na [Zege Babilon] kera. ” (Mpase 18:4) Nahan kpaa, u duen ken Zege Babilon, u a lu zegegar u kwaghaôndo u aiegh la, ka u tôndon mbamzough ough a nongoior u kwaghaôndo u aiegh la tseegh ga, kwagh hemba nahan. Inja na yô shi ka u den hanma iniongo i taregh i ukwaghaôndo ve eren la cii.—2 Mbakorinte 6:14-18.
15. (a) Sha u ma i lu mmar u Yesu la yô, kanyi i we Mbakristu tindi er ve kurana? (b) Kanyi i tese er yange i mar Yesu sha shighe u ndôhôr ga? (c) Ka sha ci u nyi yange i tsua uwer u Disemba ayange 25 ér ka iyange i umbur mar u Yesu?
15 Iniongo i kwaghaôndo i i lu tseer tseer nyian ka Kirimishi. Kpa ngeren u mbayiase tese er Mbakristu mba tsuaa mbara yange ve eren imba iniongo la ga. Yange Yesu kaa a mbadondon un er ve̱ umbur ku na, ka mmar na ga. (1 Mbakorinte 11:24-26) Shi sha mimi yô, mar u Yesu la yange lu sha uwer u Disemba ayange 25 ga. A fatyô u lun nahan ga, sha ci u Bibilo tese er shighe u i mar un la mbakuranilev ve tsaan ken toho heregh. Yange ma ve fatyô u lun ken mndôhôr, shighe u wura cam cam la ga. (Luka 2:8-12) Kpa ityôikyaa i yange i tsua uwer u Disemba ayange 25 la er ka iyange i mmar u Yesu yô ka sha ci u, er The World Book Encyclopedia a pase nahan: “Ior i Roma yange ve vanden eren Iniongo i Saturna sha i, ve umbur mmar u iyange.”
16. (a) Ka ayange a memen a genegh a nyi a hii sha ikyev i Mbakristu ga? (b) Ka atôakaa a dedoo a nyi Mbakristu mba mimi ve eren iniongo i Kirimishi kua Ista ga?
16 Ista kpa ka iniongo i genegh i tseer tseer i mba eren kwaghaôndo. Shi Icighan Lahadi er i eren ken ityar i Latin-America la kpa ka di kwagh shon la môm tsô. Kpa Mbakristu mba tsuaa mbara yange ve eren iniongo i Ista la ga. Shi, mhii u i kpaa yange lu sha ikyev i Mbakristu ga. The Encyclopœdia Britannica kaa er: “Ikyav ngi ken Ityendezwa i He i tesen m-umbur u iniongo i Ista tsô kpaa ga.” Kpa aluer iniongo i Kirimishi man Ista hii sha ikyev i Mbakristu ga kpa ve hii sha ikyev i mba civir mbaaôndo mba aiev yô kwagh zaiyol shinii? Yange apostoli Paulu ta icin sha u nungwan kwagh u mimi man u aiegh la, er “ankwa u kpeghee ka a zua sha ijenmwe cii.” (Mbagalatia 5:9) Yange kaa aa Mbakristu mbagenev mba sha ayange a tsuaa la er yange i lu shami ga u̱ ve kuran ayange a ngise i kuran ken atindi a Mose kpa Aôndo á gem á kough a kera sha ci u Mbakristu la. (Mbagalatia 4:10, 11) Hemba kan a inja kpishi je sha u Mbakristu mba mimi tilen paleghaa aa ayange aa Aôndo á ne zwa er i kura ga shi á lu sha ikyev i kwaghaôndo u aiegh la!
17. (a) Kanyi i lu shami ga ken ayange a memen a civir mbaduenati kua akuraioro? (b) Bibilo i tese gbenda u Mbakristu vea dondo nena?
17 Ayange a memen a genegh ka sha u civir ior mba duenati. Shi a genegh ka u civir shi kenden a iti i akuraior shin mbamzough mba taregh. Kpa Bibilo i ta icin sha icivir i nan uumace, shin u suur hen mbamzough mbaiorov sha u sôron mzeiyol u̱ i lu Aôndo tseegh una fatyô u sôron un la. (Aerenakaa 10:25, 26; 12:21-23; Mpase 19:10; Yeremia 17:5-7) Nahan ayange aa memen a á lu sha u kenden a or sha shin mzough u ior la cii á zua sha awashima u Aôndo ga, man Mbakristu mba mimi yô gba u vea nungwa a ve ga.—Mbaromanu 12:2.
18. (a) Ka ieev mbi nyi ior ve gbe sha u wuese shi civiri? (b) Tindi u Aôndo kaa er nyi sha kwagh u wuese shi civir eev mbu gbana?
18 Ior gba ieev kpishi mbi ve kaan a ior mbagenev er ve̱ civir shin ve̱ cia mbi yô. I er mbigenev sha myô shin sha ikyon. Mbigenev ka sha ajav sha hwe u doonnengen aa foto u been kwagh u a lu sha kwavaôndo shin u a lu shin tar yô. Tar u genegh ua fatyô u nan tindi er hanma or yô nana civir imba ue la. Kpa tindi u Aôndo kaa er mba ve civir un yô ve̱ de eren imbakwagh la ga. (Ekesodu 20:4, 5; Mateu 4:10) Ior mba Aôndo mba eren nena ken aaven laa?
19. (a) Yange tor u Babilon wa tindi er hanmaor a er nyi? (b) Ka ikyav i unô i doo u Mbakristu vea dondo shamini?
19 Sha ayange a tsuaa la Tor Nebukadinesar u Babilon maa eev mbu vesen sha zanaria shi wa tindi er hanmaor yô nana̱ gule nana̱ civir mbu. ‘Anti or u nan gur mbu inya ga yô,’ kape yange kaa la, ‘a gbihi nan ken atse.’ Bibilo i kaa er mbayevikyaior mba Heberu utar, Saderaki, Meshaki man Abedi-nego, ve venda u eren sha tindi u tor wa la. Sha ci u nyi? Sha ci u mciviraôndo nyôr shami, man mcivir ve lu sha ci u Yehova tseegh. Kwagh u yange ve er la Aôndo lumun a mi, shi a yima ve ken kwaghtseren sha ikyev i tor. Ken kwagh ne, Nebukadinesar yange va nenge yô mbatomov mba Yehova mban lu a inja i zan iyol hen Tar na ga cii, nahan a mase wan tindi u kuran ve. (Daniel 3:1-30) Doou a jighjigh u nan u mbayevikyaior mban gaa? We u tese wer mimi je u ngu sha ci u msertar u he u Aôndo la sha u wan ikyo sha atindi aa Aôndo a we la cii kpa?—Aerenakaa 5:29.
20. Ka igbinda kposo kposo i nyi Satan a eren tom a mi sha u meen ior sha u ve̱ per atindi aa Aôndo sha aeren a jimbagha?
20 Satan yô, a soo er, se̱ civir Yehova ga. A gema a soo er se̱ civir un. Nahan gem meen se sha u se̱ er ishima na, sha ci u á fa er or u se ongo nan la yô, se hingir ikpan, shin mbatomov mba nan je ve. (Mbaromanu 6:16) Satan mgbegh ior sha u ve̱ yav aa kasev, aluer vea zua ivese ga je kpaa, kua idya i eren, man igbinda i genegh atô kposo kposo, sha anzaakaa er televishen nahan kua sinima, kua anza amaregh a vinen man ityakerada i jimbagh cii. Anza aerenegh la ka i er a sha er a̱ lu kwagh u á lumun a mi, shin u a lu vough yô. Nahan cii kpaa, kwagh ne ka u hendan aa atindi aa Aôndo tsô. (Mbaheberu 13:4; Mbaefese 5:3-5) Nahan or u nan nyer iyol ken imba ieren la cii nan ngu tesen er nan ngu sha ci u tar u Satan.
21. Ka aeren a genegh a nyi, aluer or ngu eren ve, á tese er nan ngu sha ci u tar u Satan a?
21 Aeren a genegh nga a tar u Satan ne u ne á lu ken igbar kpa á gem á lu u hendan aa atindi aa Aôndo yô. U man msôrom hunden la ka môm ken akaa shon. (1 Mbakorinte 6:9, 10) Kwagh u genegh yô ka icimbiv mbi gban man tsô anza er ikya i man kua hiroin sha u nan msaanyol, kua ityu i man cii. Akaa ne cii nga vihin iyol kimi shi ka a na or nan kera lu waeng sha iyol ga. U benden a akaa ne ka u peren kwaghwan u Aôndo u a kaa er “se wanger nen ayol a ase sha hanma kwagh u hôngorough u ken iyol kua ken jijingi cii.” (2 Mbakorinte 7:1) Ityu i man kpaa ka i vihi mba ve lu ikyua mbara iyol sha mnyim ma kuran sha iôôn la, nahan or u man ityu la nan ngu peren tindi u Aôndo u a kaa er Orkristu na̱na̱ lu a dooshima hen or u wanndor a nan la.—Mateu 22:39.
22. (a) Bibilo i kaa er nyi sha kwagh u awambe? (b) U lumun awambe a tan ka kposo a u “yan” awambe ga nena? (c) Kanyi i tese er u ‘nyaghen awambe’ la inja na er ka u palegh u haan a ken iyolyou jimi?
22 Ieren i genegh i i lu ken igbar sha ajiir kposo kposo ken tar yô ka awambe a yan. Inja na yô ka u yan inyam i i senge dedoo ga yô shin u kesen awambe aa a dugh la za nungwan sha kwaghyan. Kpa Mkaanem ma Aôndo yange awambe a yan. (Genese 9:3, 4; Levitiku 17:10) Kpa, sha kwagh u awambe a tan la di ye? Alaghga mbagenev vea hen er awambe a tan la ka awambe a “yan” ga. Zum uu oruange ka nana lu a agee a yan kwagh sha zwa ga la, ortwer ka a kera kaa er i na or la kwaghyan sha gbenda shon môm u i te awambe la ga zee? Bibilo i kaa er se “nyagh . . . awambe.” (Aerenakaa 15:20, 29) Inja na nena? Aluer ortwer kaa a we er we u̱ de msôrom ma man, nahan ka u kaan er we u̱ de me sha zwa ga kpa we u̱ kuma ma sha igbila you zee? A̱ lu nahan ga cii! Yô ka pe i lu vough je la, u̱ ‘nyaghen awambe’ la inja na yô ka u a de nyôron we ken iyol ga cii.
23. (a) Kanyi kwagh i gbe u ú tsuaa? (b) Knayi ia tese kwagh u ú tsougho?
23 Gba u u tese Yehova Aôndo wer u ngu sha ci u msertar na u he la u ngu u tar ne ga. Kwagh ne ka u u tsua iyolyou. Kwagh u u tsua u eren tom shami yô ka u civir Yehova, eren ishima na. U fatyô u gban lun asema ahar, er Mbaiserael mbagenev ngise ve lu nahan la ga. (1 Utor 18:21) Shi umbur wer, aluer ka Yehova u lu civir ga yô, ka Satan u civir un ye. Shi alaghga u̱ kaa wer u ngu sha ci u msertar u he u Aôndo, kpa ieren you ngi kaan er nyi? U lun sha ci u msertar u he u Aôndo la ka u nyaghen hanma ieren i Aôndo a vende er ia va lu ken msertar na u perapera u he ga la.
[Mbampin Mba Ngeren u Henen]
[Foto u sha peeji 209 la]
Ka tar u nyi yange Yesu sôn sha ci u ú ga shi mbahenen nav kpaa ve lu ior i u ga?
[Ufoto mba sha peeji 211 la]
Ken Bibilo yô, agbagakwase u hundemsôrom la tile sha ityough ki kwaghaôndo u aiegh cii, man inyam i á hende la i tile sha ityough ki ugomoti mbatarev cii
Uma u hôngorough la ka mbamlu mba tar u Satan. Mbakpengav mba huav kpaa ka vegher u tseer tseer
[Foto u sha peeji 213 la]
Er shighe u i mar Yesu la mbakuranilev lu a ilev ken toho tugh je, tese er mmar na lu sha uwer u Disemba ayange 25 ga
[Foto u sha peeji 214 la]
Mbacivir Aôndo yange ve venda u civir eev mbu yange tor ver la. Aluer imbakwagh la i kohol we nahan u er nena?
