U Lun Uma Gbem sha Won la ka Mnyamciem Ga
Ityough 1
U Lun Uma Gbem sha Won la ka Mnyamciem Ga
1, 2. Hii nan i lu kwagh u taver u nan jighjigh er ior vea fatyô u lun uma gbem sha won ken massniyol shin tara?
MSAANYOL shin tar—taver kpishi u ember un shin a lu sha anshighe kpeghee kpaa. Mnyoon, iyolbeen, ijen, ifer—se hila ter mbamzeiyol kpeghee tseegh—mba ve ne uma a saaniyol ga la. Nahan kpaa, alaghga u kaa wer, u ôron kwagh u lun uma gbem sha won ken paradiso shin tar la ka u vendan u nengen a mimi. Alaghga shi u lu henen wer u teren kwagh shami kpaa ka shighe u vihin, u lun uma gbem sha won la ka mnyamciem tsô.
2 Akperan nga ga ior kpishi vea lumun a we. Nahan kpaa, á hii nan se fa ser, ú fatyô u lun uma gbem sha won ken paradiso shin tara? Ka sha nyi se na jighjigh ser uma u tsôron la ka mnyamciem ga?
ITYÔIKYAA I SE FATYÔ U NAN JIGHJIGH YÔ
3. Kanyi kwagh i tese er Aôndo soo er uumace ve̱ lu ken msaanyol shin tara?
3 Se fatyô u nan jighjigh sha ci u Tahav Mbuvesen, Aôndo Uhembanagee la, lu sôr hanmakwagh u kuman se sha gbaiyol wase. Á er tar vough sha ci wase! Shi á gba or vea kwase sha gbenda u hembandoon cii sha er ve̱ ember uma gbem sha won shin tar ne—zan zan yô.—Upasalmi 115:16.
4. Kanyi mbafankwagh ve hen sha kwah u iyol i orumace u á tese er yange i maa i sha er i lu gbem sha wono?
4 Mbatôvonkwaghfan vandefan tsuaa je e̱r iyol i or i lu a tahav u sôron iyol i i yô. Mshiam ma umav ka ma veren iyol i ma shin ma hingir hegh sha gbenda u cieryol, er i doo la. Man gbenda u sôron iyol i ma ne ma u ze hemen gbem sha won. Kpa ka nahan ga, shi ka kwagh u mbatôvonkwaghfan vea fatyô u pasen un ga yô. Ve fa er i hii man ior ve been iyol kpaa ga. Ka ve kaa er, aluer akaa za vough yô, uumace ma ve tsa gbem sha won.—Upasalmi 139:14.
5. Bibilo i kaa er nyi sha kwagh u awashima u Aôndo sha kwagh u tar ne?
5 Kpa, kera je Aôndo wa ishima er ior ma ve tse gbem sha won ken msaanyol shin tar ne? Aluer ka nahan yô, uma u tsôron ka kwagh u tômon a tôm tsô ga shi ka mnyamciem ga—una va kpee je! Bibilo, takerada u u pase se mbaawashima mba Aôndo la, kaa er nyi sha kwagh nee? i yila Aôndo er “u A maa tar man A er u kpaa la,” shi i kaa er: “Ka Un A ver u ye; A gba u̱ er u lu gbilin dang ga, A maa u sha er ior ve̱ tema sha u.”—Yesaia 45:18.
6. (a) Mbamlu mba tar mba nena nyiana? (b) Kape Aôndo a soo er i lu ne?
6 Nahan wa been we er ior mba shin tar ne hegen sha er Aôndo vande wan ishima nahan la shinii? Ka mimi, ior yô mba sha azongoataregh ne cii. Kpa mba ken msaanyol imôngo ken tsombor môm, sha gbenda u doon er Orgbanakaa u a gbe ve vande wan ishima la kpa? Tar pav keregh nyian avegher kpishi. Ihyom i kôron ngi. Ifer kpa ngi. Ityav kpa mbi. Ior umiliôn kpishi mba ijen shi mba uange kpaa. Za mbagenev iyol sha m-ban u ijiir i tsan, tom man ugbaiyol. Man môm ken akaa ne cii va Aôndo a icivir ga. Ikyav tese, er, tar ne ngu a ior kpa mba sha gbenda u Aôndo Uhembanagee vande wan ishima sha hiihii la ga.
7. Yange Aôndo wa ishima a tar ne nena shighe u yange gba mbahiihii mbaraa?
7 Yange gbe mbahiihii mbara kera yô, Aôndo ver ve ken tar u paradiso. Yange soo er ve̱ ember uma shin tar gbem sha won. Awashima na hen ve yô lu u̱ ve̱ samber a paradiso ve la á tser tar cii. I tese nahan sha akaawan a na hen a ve: “Mar nen kpishi, seer nen ngeen, iv nen tar, gema nen u, u̱ lu sha ikev yen.” (Genese 1:28) Een, awashima u Aôndo yô, lu sha er, ken hemen yô tar cii ma u lu sha ikyev i tsombor u uumace mba perapera mba lun imôngo ken bem man msaanyol.
8. Shin er mbahiihii mbara yange ve hemba Aôndo ato nahan kpaa, ka sha nyi se fa ser awashima u Aôndo a tar yange gema kposo ga?
8 Shin er ior mbahiihii mbara yange ve hemba Aôndo ato, ve kera kuma mba lun uma gbem sha won ga nahan kpaa, awashima u Aôndo sha hiihii la gema ga. Una iv shami keng! (Yesaia 55:11) Bibilo i tôndozwa er: “Mbaperapera vea ya dyako u tar, vea lu ken u gbem.” (Upasalmi 37:29) Hanma shighe Bibilo ngi pasen awashima u Aôndo u nan uumace mba ve civir un yô uma u tsôron.—Yohane 3:14-16, 36; Yesaia 25:8; Mpase 21:3, 4.
ISHAREN I LUN UMA—HANA?
9. (a) Kanyi isharen ior ve lun a mi? (b) Bibilo i ver ishigh er nyi zum u i kaa er ‘Aôndo ver mtsôr ken asema a ve’ la?
9 Se fatyô u lun saan saan er i lu awashima u Aôndo u se lu uma gbem sha won yô. Hen ase: Aluer gba u u tsua yô, ka hanma iyange u tsua u kpene? U fatyô u tsuan iyange ga, shin u fatyô? U soo u kpen ga, shi kape orgenegh u nan lu sha mar u nan kpaa nan soo ga je la. Aôndo er se a isharen i lun uma, ka isharen i kpen ga. Sha gbenda u Aôndo á er uumace la yô, Bibilo i kaa er: “A shi A ver mtsôr ken asema a ve.” (Orpasenkwagh 3:11) Inja na nena? Inja na yô kera je kpaa ior soo u lun uma gbem sha won, a u kpen shio. Er isharen i lun uma gbem sha won ne i lu ken hemen yô, ior ker gbenda u lun iyevyev gbem sha won ne ica gba.
10. (a) Vande kan isharen i or u lun uma gbem sha won hana? (b) Ka sha nyi se lu a ishimaveren ser Aôndo una sôr ian sha ci wase sha er se̱ tsôr shin tara?
10 Ka han je uumace ve soo er ma ve lu gbemee? Ka hen ape ve vande lun i hoor ve iyol la, shin tar heen. I er or sha ci u tar, shi tar di kpaa sha ci u or. (Genese 2:8, 9, 15) Bibilo i kaa er: “U [Aôndo] tim tar sha amagh a u, sha er u̱ de tenger mayange ga yô.” (Upasalmi 104:5) Er yange i gba tar sha er u̱ lu gbem sha won yô, or kpaa kape ma nan lu gbem sha won je la. Mimi je Aôndo u dooshima una gba gban uumace a isharen i lun uma gbem sha won kpa kera nan sha u ve̱ iv isharen la shio ga!—1 Yohane 4:8; Upasalmi 133:3.
INJA UMA I I SAR U LA
11. Bibilo i kaa er nyi u tesen er ior vea fatyô u tsôron ken mkpeiyolo?
11 Nenge ase sha peeji u a dondo ne. Ka inja uma i nyi ior mban ve embere? U soo u lun môm ken a vee? Ga kanyi, een, kape u kaa la! Nenge a se er i kpe ve iyol shi ve lu iyevyev sha ashe yô! Aluer i kaa a we er ior mban tsa kuma anyom udubu imôngo nahan, u na jighjigh kpa? Bibilo i kaa a vese er mbabeenayol shi vea hingir ikyaior, mbauangev kpaa á bee ve mbu kua mbaawanev, mbaapirashe, mbaakondoato, man mbakondonikyer cii á bee ve angev vev. Shighe u Yesu Kristu lu shin tar ne la yange er akaakpilighiyol kpshi sha u been ior angev. Sha u eren nahan la lu tesen er, shighe u iemberegh u a mgbôghom ne yô, mba vea lu uma la cii á na ve mkpeiyol u vough la.—Yobu 33:25; Yesaia 33:24; 35:5, 6; Mateu 15:30, 31.
12. Ka mbamlu mba nyi se nenge a mi ken ufoto mbanaa?
12 Nenge a se sule u doonashe sha wono! Er Kristu vande tôndonzwa nahan, ka paradiso jim je ne, ngu vough er u̱ or u hiihii vea kwase na yange ve ta kera sha ihyembeto ve la nahan. (Luka 23:43) Shi nenge bem man mzough mba ve lu la. Akuraior a sha won cii—ioril, mbapupuu, mbanyian—ve cii mba er ka tsombor môm nahan. Uzendeinya kpaa mba ken bem. Shi nenge wanakiriki ngu numben a begha. Kpa mciem ma ga. Sha kwagh ne yô Orgbanakaa la yôô wen-er: “Zum la gbaseela una teman vea waniyôngo imôngo, gumbua man gumbegha kua icighanile vea tema imôngo, wanye u kpeghee una hemen ve . . . begha je kpaa una ya toho er bua nahan. Wanikundan u man atumba una numbe hen zwa u tayar.”—Yesaia 11:6-9.
13. Shighe u á va er tom sha mbaawashima mba Aôndo cii la kanyi ia kera lu sha tar ga?
13 Ken paradiso u Aôndo a weshima sha ci u ior la, msaanyol una ban ga. Tar ua na akaayan a dedoo kpishi. Ijen ia kera kôr or môm ga. (Upasalmi 72:16; 67:6) Ityav, ifer, ipila, shin ihyom i kôron man kangegh cii, á hingir akaa a tse. Een, aa kar kera gbem sha won! (Upasalmi 46:8, 9; 37:9-11) U na jighjigh wer akaa ne cii aa er kpa?
14. Kanyi i ne ú né jighjigh wer Aôndo una va a mkur u ican i yana?
14 Yô, shi nenge ase: Luun er wea lu a tahav nahan, ma u bee aa akaa aa nan uumace ican la kera gaa? Shi ma u ve aa mbamlu mba dedoo mba ishima i orumace i soo la gaa? Ma u er nahan. Kape Ter wase u sha u dooshima una er vough je la. Una iv mbamgbe man asaren a ase cii, gadia Upasalmi 145:16 ôr imo i Aôndo nahan er: “U bugh uwegh Ough, u ne hanma kwagh u uma sha isharen na, ka kom un.” Kpa ka hanma shighe kwagh ne una eree?
AVEREN A VESEN MGBÔGHOM
15. (a) Mkur u tar la inja na nena sha kwagh u tar ne? (b) Kanyi ia er aferaioro? (c) Kanyi ia er mba ve eren ishima i Aôndo mbaraa?
15 U van aa averen aa dedoo shin tar yô, Aôndo tôndozwa u vanden been aa aferakaa kua mba ve eren a la kpaa. Hen shighe la, una kura mba ve civir un mbara, gadia Bibilo i kaa er: “Man tar yô, ngu karen kera kua isharen i u kpaa; kpa u nan eren ishima i Aôndo yô, nan ngu lun gbem sha won.” (1 Yohane 2:17) Nenge er mgem una lu sha wono! Mkur u tar la inja na yô ka mkur u tareghnyaagh ga. Kpa, er mngerem ma deemee yange ma va sha tar ken ayange a Noa la nahan, á lu mkur u aferaior kua ieren ve la tseegh. Kpa mba ve eren ishima i Aôndo yô vea war mkur la. Tsô, shin tar u á kile u waeng la, vea ember gadia vea due kera sha ikyev i mba ve soo u vihinkwagh shi ve kighir ve kpaa la.—Mateu 24:3, 37-39; Anzaakaa 2:21, 22.
16. Ka akaa a nyi yange i tsengaôron sha kwagh u “ayange aa masejime”?
16 Kpa orgenegh nana kaa er: ‘Akaa nga hemban vihin a vihi, guda ngu lun ga. Ka sha nyi se fa ser mgem u vesen ne mgbôghomôô?’ Yesu Kristu tsengaôron akaa kpishi aa mbadondon un mba ken hemen ve̱ kuran sha er vea fa shighe u á kuma u Aôndo una va aa mkur u tar ne yô. Yesu kaa er ayange a masetyô a tar ne aa tese ikyav sha anzaakaa er ityav mbi vesen, myina u kwaghyan, ityartenger i vesen, mseer u mbavendanatindi kua mndôhôr u dooshima. (Mateu 24:3-12) Shi a kaa er “asema aa nyian akuraior a a lu sha tar á kondo a iyol.” (Luka 21:25) Shi Bibilo i za hemen er: “Ken ayange a masejime yô, ashighe a ican aa va.” (2 Timoteu 3:1-5) Akaa ne nga eren se hegen gaa?
17. Ior mbahenenkwagh mba kaan er nyi sha kwagh u mbamlu mba nyiana?
17 Ior kpishi mba ve hen sha akaa a taregh yô ve kaa er mgem ngu lun zegenan je. Ikyav i tesen yô, ornengen sha pipa i nan abaver i i yer er Herald, ken Miami, U.S.A., nger er: “Or u nan lu a an mhen kpeghee tsô kpaa nana fatyô u kaven mbamgem mba cieryol mba vesen mba ken anyom a a kar kpeghee la shi nana nenge yô tar kura inya yemen je ve. . . . Ua zer geman gbem kua mbamlu mbaiorov kpaa.” Sha kwagh shon môm, orngeren u genegh ken Amerika Lewis Mumford kaa er: “Ibughashe ngi yemen u za shoghul inya. Ka pe i lu kpaa je la. . . . Ngise la yô shighe u ibughashe ia yem a shoghul inya yô, i lu hanma jiir ga. . . . Kpa hegen, u tar u hembe lun kangenaan shi lun imôngo sha igbinda i lamen la kpaa yô, aluer ibughashe ngi yemen u za shoghul inya yô, tar cii kura yemen u za shoghul inya je ve.”
18. (a) Mbamlu mba tar tese er nyi sha mlu u ken hemene? (b) Kanyi ia va tema sha ityough ki ugomoti mba hen ayange nee?
18 Mbamlu mba taregh nyian tese er se mba ken shighe u mtim u tar u ahegen ne a mgbôghom yô. Een, hegen shi kpeghee Aôndo una ese mba ve lu vihin tar mbara sha tar kera. (Mpase 11:18) Una kar a ugomoti mba hegen mban kera sha u sôron gbenda sha er gomoti u perapera la una hemen tar cii yô. Ka gomoti u Tartor u Kristu yange tese mbadondon un u eren msen je ne.—Daniel 2:44; Mateu 6:9, 10.
19. Aluer sea soo u lun uma gbem sha won yô, kanyi i lu i se er keng-e?
19 Aluer uma una doou shi wea soo u lun uma gbem sha won shin tar sha ikyev i hemen u Aôndo la yô, saa u er fefa keng sha u zuan a kwaghfan u mimi u Aôndo, mbaawashima nav kua akaa a a soo la. Yesu Kristu sôn Aôndo ken msen er: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.” (Yohane 17:3) Ka kwagh u iemberegh kpishi u fan er se fatyô u lun uma gbem sha won—er í lu mnyamciem ga nahan! Kpa u ember iveren i dedoo ne sha ikyev i Aôndo yô hingir hange hange u se hen kwagh u orihyom u a lu nôngon u bunden se u zuan a iveren ne la.
[Mbampin Mba Ngeren u Henen]
[Foto u sha peeji 8, 9 la]
Yange Aôndo washima er tar u lu nahana?
