AKAA a dedoo a se lu a mi cii a va hen Aôndo. Yange er iyange sha u i̱ na se iwanger atetan, man uwer kua asan sha er se̱ zuan a iwanger tugh yô. Man shi yange Aôndo gba tar sha ci u se̱ lu sha ú yô.

Kpa iyange, uwer, asan man tar yange ve lu akaa a hiihii a Aôndo gba ga. Ú fa kwagh u yange lu kwagh u hiihii kpa? Hiihii Aôndo gba ior mba lun er un nahan. Se fatyô u nengen a ior mban ga, di vough er se fatyô u nengen a Aôndo ga nahan. Ken Bibilo yô i yila ior mban er mbatyomov. Yange Aôndo gba mbatyomov sha u ve̱ lu vea na sha yô.

Ortyom u hiihii u Aôndo gba la lu u hemban cii. Lu Wan u Aôndo u hiihii, man a er tom vea Ter na. Yange wase Aôndo sha u gban hanma kwagh u genegh cii. A wase Aôndo u gban iyange, uwer, asan man shi tar wase ne kpaa.

Tar yange u lu nena sha shighe laa? Sha hiihii la lu u or môm nana fatyô u lun sha tar ga. Kwagh u genegh yange lu ga lu di zegeifi u mnger sha tar cii. Kpa Aôndo yange soo er ior ve̱ lu sha tar. Nahan a hii u sôron akaa veren vough sha a ci wase. Yange er nyi?

Ka shami, hiihii yô yange doo u tar ua lu aa iwanger. Nahan Aôndo er iwanger ken iyange er i̱ taan sha tar. Yange er sha er atetan kua tugh vea lu yô. Been kera yô Aôndo shi er tareghnyaagh u due sha shin zegeifi la.

Sha hiihii la kwagh môm lu sha tareghnyaagh la ga. Lu di vough er foto u ú nenge a mi heen ne nahan. Uimondon shin ikon shin ishôso kpaa lu ga. Ishu tsô kpaa lu shin zegemnger la ga. Yange tom shi her vese ú Aôndo una er sha u sôron tar sha er ua doo u ishôso man ior vea lu sha ú yô.