ANYOM kar kpishi. Ônov mba Noa hingir u lun a ônov kpishi. Man ônov vev di kpaa vese ma̱r ônov seer a seer. Shighe karen deghôô yô ior ngee kpishi shin tar.

Môm ken ior mban yô lu wan u wan-u-wan u Noa u i yilan er Nimrodi la. Un yange lu bo-or u yange eren tato wuan ishôso kua ior kpaa yô. Nimrodi shi yange ver iyolna tor sha u hemen ior mbagenev. Aôndo soo Nimrodi ga.

Ior mba sha ayange la cii ve lamen zwa môm. Nimrodi yange soo er una ver ve cii ijiir i môm sha ci u una lu tor sha a ve yô. Nahan ú fa kwagh u yange er kpa? A kaa a ior er ve̱ maa gar kua gôgôyou kimi. Nenge ve ken foto ne er ve lu gbidyen akam yô.

Yange saan Yehova Aôndo iyol sha iyou i ve lu maan ne ga. Aôndo yange soo er ior ve̱ samber ve̱ lu sha tar cii. Kpa ior mbara ve kaa er: ‘Va nen! Se maa nen gar man gôgôyou u una tav je haav nav mbua za tagher sha Aôndo yô. Tsô iti yase ia za gwa sha won!’ Ior mbara yange ve soo gwa sha ci ve, lu sha ci u Aôndo ga.

Nahan Aôndo er ior mbara de u maan gôgôyou la. Ú fa gbenda u yange er kwagh ne kpa? Fese nahan a er ve ve hingir ior mba lamen ijô kposo kposo, kera lu zwa môm tseegh ga. Mba maan mbara ve kera lu kaven kwagh u mbagenev ve lu ôron ga. Ka nahan ve i gema yilan gar ve la er Babel, shin Babilon ye, inja na yô er “Mnzughul.”

Ior man hii u undun Babel yemen kera. Kweior u yange ve lu lamen zwa môm la ve yem ve za tema ijiir i môm ken avegher a taregh a genegh.