ÚFA kwagh u wanyekwase u kiriki ne á lu ôron kpa? Ngu ôron kwase la kwagh u profeti u Yehova Elisha, man akaa a kpilighyol a Yehova ka a wase un u eren yô. Kwase la fa kwagh u Yehova ga sha ci u lu kwase u ken Iserael ga. De se nenge ase, er i hii ve wanyekwase ne á lu ken ya u kwase ne yô.

Kwase ne ka u ken Shiria. Nom na ka Naaman, kurutya u kweutya u Shiria. Mbashiria yange ve kôr wanyekwase u kiriki u ken Iserael ne kpan, nahan i va a na hen kwase u Naaman sha u a̱ va lu kpan na yô.

Naaman lu a bouange u i yer er imande la. Angev mbun ka mbu na kwavyolough u or u hua kera sha iyol i nan je kpaa. Nahan ka kwagh u wanyekwase ne á lu ôron kwase u Naaman je ne: ‘M tôm mer orvesen wam ma a ze hen profeti u Yehova ken Iserael. Ma a bee un imande na ne.’ Ken hemen yô i ôr nom u kwase ne kwagh ne.

Naaman lu a isharen kpishi je u ma i sôr un yô; nahan a wa ken ishima na er una za ken Iserael. Za nyer keregh yô, á za hen ya u Elisha. Elisha tindi wanye na er a̱ due a̱ za kaa a Naaman yô a̱ yem shin Ifi u Yordan a za ôô iyol kwa taankaruhar. Kwagh ne na Naaman ishima vihin kpishi je, nahan a kaa er: ‘Uifi mba ken tar wam ve hemba doon a hanma ifi u ken Iserael cii!’ Ôron kwagh ne been kera yô, Naaman maa mough sha u yemen.

Kpa môm ken mbatomov nav kaa a na er: ‘Orvesen, aluer Elisha una kaa a we er u̱ er kwagh u taver je kpaa, ma u er. Hegen yô er nan u gbe za ôôn iyol tsô, er a kaa nahan ga?’ Naaman ungwa kwaghôron u ortom na nahan a za ôô iyol shin Ifi u Yordan kwa taankaruhar. Eren nahan yô, kwavyolough na hingir gbang gbang man tsembelee kpaa!

Saan Naaman iyol kpishi. A hide a za kaa a Elisha er: ‘Hegen m fa dedoo mer Aôndo u Iserael ka un tswen á lu Aôndo u mimi sha tar cii ye. Nahan, wea lumun yô, ngohol iwua ne sha ikev yam.’ Kpa Elisha kaa er: ‘Ei, me ngohol i̱ ga.’ Elisha fa dedoo er a lu shami ga aluer un ngohol iwua la yô, sha ci u yange lu Yehova bee Naaman angev ye. Kpa wanye u Elisha Gehashi soo sha u ma un zough a iwua la sha a ci na iyol na.

Nahan ka kwagh u Gehashi e̱r ne. Naaman yemen kera yô, Gehashi yevese za kohol un sha gbenda. ‘Elisha tindim er m̱ va kaau yô una soo uiwua mbagenev mbara sha ci u ahuraior a na agen a a ve un inya hegen yô,’ kape Gehashi kaa la. Ngun ne, sha jighilii yô, lu aie. Kpa Naaman fa er ka aie ga; nahan a na Gehashi akaa la a genegh.

Gehashi hidi ken ya yô, Elisha fa kwagh u a er yô. Yehova vande ôron un. Nahan a kaa er: ‘Sha ci u ú er kwagh bo ne yô, imande i Naaman la ia va sha awe.’ Man shi lu nahan, fese je!

Ka nyi se fatyô u henen sha kwagh nee? Hiihii yô, se lu er wanyekwase la nahan man se ôron kwagh u Yehova. Kwagh la una fatyô u van a akaa a dedoo kpishi. Sha uhar yô, doo u se wa imanger er Naaman lu manger sha hiihii la nahan ga, kpa se ungwa mbatomov mba Aôndo. Man u sha utar yô, se eren aie er Gehashi yange er nahan ga. Se fatyô u henen akaa kpishi ken Bibilo i̱ ôron gaa?