ER DAVIDI woo Goliati kera yô, kurutya u Iserael Abiner va a na hen Saulu. Doo Saulu a Davidi je zua ga. A ver un kpaa a hingir or u nengen sha mba nôngon ityav nav shi a va a na sha u a̱ va lu hen ya u tor yô.

Ken hemen, sha shighe u mbautyaav mba ngur hiden ken ityav vev a Mbafiliti yô, kasev gba wan atsam kaan er: ‘Saulu wua ior udubu udubu, kpa Davidi yô wua udubu pue pue.’ Kwagh ne na Saulu mough a iyuhwe, sha ci u i hemba nan Davidi icivir a Saulu. Kpa wan u Saulu u nomso Yonatan yô ishima vihi un ga. Davidi doo un ishima kpishi je, man Davidi di kpaa kape Yonatan doo un ishima je la. Nahan ve uhar ve bum ayol ave er vea ya ikar ayol ave gbem sha won.

Davidi fa adiguve u kuhwan kpishi, man Saulu soo ikyenge i kwagh kuhwan na la. Kpa iyange igen yô iyuhwe i Saulu na un a̱ er kwagh u kpilighyol kpishi. Er Davidi lu kuhwan adiguve yô, Saulu tôô iwange na man ker í, kaa er: ‘Me tume Davidi je i̱ kar i̱ kôr ken kpekpe!’ Kpa Davidi palegh, nahan iwange la tume un ga. Shighe ugen yô Saulu shi ker Davidi iwange kpa shi tume ga. Nahan Davidi fa hegen je er gba u una wa iko dedoo.

Ú umbur ityendezwa i yange Saulu er la kpa? Yange kaa er una na wan na u kwase nana hingir kwase u or u nana wua Goliati la. Ken masejime yô Saulu kaa a Davidi er a̱ tôô wan na u kwase Mikal, kpa saa una vande wuan Mbafiliti mba ve lu mbaihomov mbara iyenge 100 cii ve. Hen ase sha kwagh la yôô! Saulu ngu a ishimaveren mimi je er Mbafiliti vea wua Davidi. Kpa ve wua un ga, nahan Saulu na wan na u kwase sha u a̱ hingir kwase u Davidi yô.

Iyange igen yô Saulu ôr a Yonatan kua mbatomov nav cii er un soo u wuan Davidi. Kpa Yonatan kaa a ter na er: ‘De vihin Davidi iyol ga. Mayange ngu a̱ vande eren we ma kwaghbo ga. Kpa, hanma kwagh u a er yô ka u lun a zege iwasen hen awe. Yange tee uma na shighe u a wua Goliati la, man er yange ú nenge yô, saan we iyol.’

Saulu ungwa imo i wan na, man a tôndozwa er una vihi Davidi iyol ga. I hide a Davidi, nahan a er tom hen ya u Saulu di vough er yange vanden eren nahan. Nahan cii kpaa, iyange igen yô, er Davidi lu kuhwan ityogholough nav yô, Saulu shi ker Davidi iwange. Davidi palegh, man iwange la kar tume ken kpekpe. Ka kwa u sha utar je ne! Davidi fa je er hegen yô gba u una yevese!

Hen tugh mbula Davidi yem ken ya na. Kpa Saulu tindi ior mbagenev er ve̱ za wua un. Mikal fa kwagh u ter na á we ishima u eren yô. Nahan a ôr nom na er: ‘Aluer u yevese tugh mbu nyian ne ga yô, kper u kpe keng je.’ Hen tugh mbula Mikal wase Davidi due sha ihula. Anyom nga karen ataankarahar yô hingir u Davidi una yer hen ijiir ingin ga yô i ngira keng sha er Saulu una zua a na ga yô.