TOR Yerobiam kpen kera yô, hanma tor u nan hemen ikwe 10 i tartor u sha imbusutarimese i Iserael la cii nan lu u bo. Tor Ahaba lu tor u hemban vihin ken ave cii. Ú fa ityôkyaa kpa? Ityôkyaa i vesen yô lu kwase na, Yesebel Torkwase u ifer.

Yesebel lu kwase u ken Iserael ga. Un lu wan u tor u Sidon. Un civir aôndo u aiegh u i yer er Baal la, man a na Ahaba kua Mbaiserael kpishi sha u ve kpaa civir Baal. Yesebel kôr Yehova ihom man a wua uprofeti nav kpishi. Mbagenev yô gba u vea za yer ken ubar sha er una wua ve ga yô. Aluer Yesebel soo makwagh yô, una fatyô u wuan or je kpaa sha er una zua a min keng yô.

Iyange igen yô Tor Ahaba lu zunguluu kpishi. Nahan Yesebel pine un er: ‘Ka nyi i ne ve u lu zunguluu nyian yum nahana?’

‘Ka sha ci u kwagh u Naboti a ôr a mo la,’ Ahaba kaa nahan. ‘M soo mer me yam sule u ikon i wain na. Kpa a kaa a mo er una nam ga.’

Yesebel kaa er: ‘Ishima i de zeu iyol ga. Me ngohol ú me nau.’

Nahan Yesebel nger uwashika hen atiator a a̱ lu hen gar u Naboti kpaa lu la. ‘Ker nen agbilinaior a̱ wa Naboti kwagh iyol er a tuhwa Aôndo kua tor kpaa,’ a kaa ve nahan. ‘Tsô kôr nen Naboti due nen a na ken akôngo a gar nahan ta nen un awen a kpe kera.’

Fese je er Yesebel ongo er Naboti kpe yô, a kaa a Ahaba er: ‘Hegen yô mough ase za tôô sule u wain na la.’ Ú lumun wer doo u i tsaha Yesebel sha er á er zege kwaghbo ne gaa?

Nahan, shighe va kom yô, Yehova tindi or u i yilan er Yehu la sha u a̱ va tsaha un yô. Er Yesebel ungwa er Yehu ngu van yô, a shighe akaa a mondon sha ashe shi a wuha iyol sha er una dooashe yô. Kpa shighe u Yehu va man va nenge a Yesebel sha ihula yô, a yila ior mba ken ya u tor la a kaa er: ‘Daa un ta nen shin inya!’ Ior mbara ve er nahan, vough er u nenge ken foto ne nahan. Ve mgbegha un gba shin inya, man a kpe. Ngun ka mkur u Yesebel Torkwase u ifer je ne.