KPA, ahii! Ka inja er Daniel ngu ken mzeiyol u vesen nahan. Kpa ubegha mban mba eren un kwagh ga! Ú fa ityôkyaa kpa? Ka an nan gbihi Daniel shin ihungwa ne a ubegha mban nahana? De se hen se fa.

Tor u Babilon u hegen ka or u i yer iti na er Dariu la. A soo kwagh u Daniel kpishi je sha ci u Daniel ngu a mhôônom ma zungwen kpishi shi ngu a mfe kpaa. Dariu tsua Daniel er a̱ lu orhemen u vesen ken tartor na. Kwagh ne na ior mbagenev ken tartor la ve kôr Daniel ihom, nahan ka kwagh u ve e̱r je ne.

Ve za hen Dariu ve za kaa a na er: ‘Se vande lumun ser, we Tor, u wa tindi a icin tan taveraa wer ken ayange 30 or môm nana de eren msen hen ma aôndo ugen ga saa hen awe tseegh, we tor. Aluer anti-or nana er nahan ga yô, i̱ gbihi nan shin ihungwa i ubegha.’ Dariu fa ityôkyaa i í ne ve ior mban ve soo er i̱ wa imba tindi ne ga. Kpa a hen er ka mhen u injaa, nahan a nger tindi la. Hegen ne á kera fatyô u geman tindi la ga.

Shighe u Daniel ongo kwagh u tindi la yô, a yem ken ya na a za er msen, di vough er vanden eren keke nahan. Aferaior la fa dedoo je er Daniel una de u eren msen hen Yehova ga. Saan ve iyol, sha ci u ka inja er mhen ve u karen a Daniel sha la ngu zan vough nahan.

Shighe u Dariu va kav ityôkyaa i yange i na ve ior mban ve soo u wan tindi ne yô, a zungwe kpishi. Kpa una kera fatyô u geman tindi la ga, nahan a na zwa er i̱ gbihi Daniel shin ihungwa i ubegha. Kpa tor kaa a Daniel er: ‘M ngu a ishimaveren mer Aôndo wou, u ú civir un la, una yima u.’

Ishima za Dariu iyol je a fatyô u yaven tugh ga. Sev mbu aven pepe nahan á yevese á za hen ihungwa i ubegha la. Ú fatyô u nengen a na hen ijiir la. A yila sha imo i mlia er: ‘Daniel, wanakiriki u Aôndo u uma! Aôndo wou u ú civir un gbem la a fatyô u yiman we sha ikev i ubegha kpa?’

‘Aôndo tindi ortyom na,’ Daniel na mlumun nahan, ‘a va cir ubegha ijô nahan ve erem kwagh u vihin ga.’

Nahan tor ember tsung. A na zwa er i̱ dugh Daniel shin ihungwa la kera. Tsô a kaa er i̱ gbihi ior mbaaferev mba ve sende Daniel mbara shin ihungwa i ubegha la. E̱r ve lu a̱ mande shin mkur u ihungwa la ga je tsô, ubegha kôr ve hembe akuhe a ve avur avur cii.

Tsô Tor Dariu nger hen ior mba ken tartor na cii er: ‘M ngu wan tindi mer hanmaor nana civir Aôndo u Daniel. Ngu a er uivande mba kpilighyol. A yima Daniel sha ikev i ubegha sha er ve̱ de ye un ga yô.’